ئه‌ڤرۆنيوز:

شيره‌تكارێ جڤاتا ئاسايشا هه‌رێما كوردستانێ، مه‌سرور بارزانى، ئه‌ڤرۆ شه‌مبيێ 22/9/2018 پێشوازى ل محه‌مه‌د ئه‌لحه‌لبوسى سه‌رۆكێ په‌رله‌مانێ عيراقێ كر.

دديداره‌كێ دا زێده‌بارى دانوستاندنێ ل دۆر پێشهات وگوهۆرينێن عيراقێ، رۆناهى هاته‌ خستن ل سه‌ر پێدڤيا پشكداريا كارا يا هه‌موو لايه‌ن وپێكهاتێن عيراقێ ل دروستكرنا برياران ودووپاتى ل پره‌نسيبێ هه‌ڤپشكيێ وهه‌ڤسه‌نگيێ وته‌وافوقێ ل رێڤه‌برنا هه‌موو ده‌زگايێن وه‌لاتى هاته‌ كرن.

مه‌سرور بارزانى پيرۆزباهيا خوه‌ ب حه‌لبوسى راگه‌هاند ب هه‌لكه‌فتا ده‌ستنيشانكرنا وى بۆ سه‌رۆكاتيا په‌رله‌مانێ عيراقێ وهيڤيا سه‌ركه‌فتنێ دوى ئه‌ركێ نوو دا بۆ خواست وپشته‌ڤانى وهاريكاريا تمام يا خوه‌ژى بۆ ده‌ربرى.

سه‌رۆكێ په‌رله‌مانێ عيراقێ، دياركر كو ژ نێزيك دێ ل گه‌ل هه‌موو فراكسيۆنێن په‌رله‌مانى كارێ هه‌ڤپشك كه‌ن ل ده‌ركرنا قانوونان ب ئارمانجا ڤه‌گه‌راندنا باوه‌ريێ دناڤبه‌را پێكهاتان وباشتر خزمه‌تكرنا وه‌لاتيان بێ جوداهى.

ئه‌ڤرۆنيوز:

پارتى ديموكراتى كوردستان دێ ئاهه‌نگه‌كا مه‌زن ل سلێمانيێ گێريت بۆ ناساندنا هه‌موو به‌ربژارێن ليستا 183.

ئاهه‌نگ دێ ل ده‌مژمێر 2 پشتى نيڤرۆيا سوباهى ئێكشه‌مبى 23/9/2018 ب به‌رهه‌ڤبوونا شانده‌كێ بلند يێ مه‌كته‌با سياسى وهه‌موو ئه‌ندام و هه‌ڤال ولايه‌نگرێن پارتى ل سنورێ لقێن 4 و11و12و21 ل گۆره‌پانا جڤاتا سه‌ركردايه‌تيا پارتى ل پارێزگه‌هێن سلێمانيێ وهه‌له‌بجه‌ هێته‌ گێران.

ئه‌ڤرۆنيوز:

سكرتێرێ مه‌كته‌با سياسى يا پارتى ديموكراتى كوردستان، فازل ميرانى، ئه‌ڤرۆ شه‌مبيێ 22/9/2018 راگه‌هاند، به‌ربژارێ پارتى بۆ پۆستێ سه‌رۆك كۆمارى ژلايێ سه‌رۆك بارزانى ڤه‌ دێ هێته‌ ده‌ستنيشانكرن.

فازل ميرانى، سكرتێرێ مه‌كته‌با سياسى يا پارتى دكۆنگره‌كێ رۆژنامه‌ڤانى دا ل پيرمام گۆت” ده‌مێ مه‌ به‌ربژارێ خوه‌ هه‌بيت بۆ پۆستێ سه‌رۆك كۆمارى، ئانكو دێ هه‌ڤركێ به‌رهه‌م سالحى بيت، هه‌كه‌ مه‌ كاك به‌رهه‌م په‌سه‌ند كربا بۆ وى پۆستى، مه‌ به‌ربژار نه‌دبوو”.

فازل ميرانى ئاماژه‌ دا كو گه‌له‌ك كه‌س يێن هه‌ين كو دانوستاندن ل دۆر دهێته‌ كرن بۆ وێ چه‌ندێ ببنه‌ به‌ربژارێن پارتى بۆ وه‌رگرتنا پۆستێ سه‌رۆك كۆمارى، به‌لێ كه‌نگى ئه‌و بابه‌ته‌ ئێكلا ببيت، دێ ب فه‌رمى راگه‌هينين.

سه‌باره‌ت وێ چه‌ندێ كو پشكه‌ك ژ شيعان وسونه‌يان دهه‌ڤرانه‌ ل سه‌ر به‌ربژاركرنا به‌رهه‌م سالح، فازل ميرانى گۆت”په‌رله‌مانه‌ وهه‌لبژارتنه‌، مرۆڤ يێ ئازاده‌ ده‌نگ ب كێ بده‌ت”.

ئه‌ڤرۆ نیۆز،عه‌زیز هه‌ورامی

هژماره‌كا مه‌زن يا لاوێن سه‌ر ب حزبان ڤه‌ ل هه‌له‌بجه‌ چوونه‌ باره‌گايێ لقێ 12 يێ پارتى ول گه‌ل به‌رپرسێ لقێ كۆمبوون وسۆز دان كاربكه‌ن بۆ سه‌ركه‌فتنا ليستا 183 يا پارتى ديموكراتى كوردستان ل 30 ئه‌يلوولێ.

به‌سام عه‌لی، به‌رپرسێ لقێ 12 بۆ ئه‌ڤرۆنيوز گۆت” به‌رى چه‌ند رۆژان ل باره‌گايێ لقێ مه‌ پێشوازى ل هژماره‌كا مه‌زن يا لاوێن ب سه‌ر حزبێن دى ل ڤى سنورى كر كو په‌يوه‌ندى ب رێزێن پارتى كر وسۆز دان درێژيێ ب خه‌باتا خوه‌ دناڤ رێزێن پارتى بده‌ن، مه‌ ژى سۆز دا وان ئه‌وا دشيانێن مه‌ دا بيت بۆ خزمه‌تكرنا لاوێن سنورى، خه‌مساريێ نه‌كه‌ين”.

به‌سام عه‌لی گۆت ژى” شه‌ڤ و رۆژ دێ كاركه‌ين بۆ شكاندنا وێ تيرۆرا هزرى ئه‌وا ل دژى پارتى دهێته‌ كرن ژلايێ حزبان ڤه‌ ل ڤى سنورى ونوكه‌ ژى دبينين خه‌لك ب كۆم ل ڤان ده‌ڤه‌ران دهێنه‌ دناڤ رێزێن پارتى دا ولاوێن ڤى سنورى يێن گه‌هشتينه‌ وێ باوه‌ريێ كو په‌ياما راسته‌قينه‌ يا كوردان يا ل ده‌ف پارتى وپارتى خودان سۆزا خوه‌يه‌.

ب ديتنا وى به‌رپرسێ پارتى ده‌نگێن پارتى دێ زێده‌بوونه‌كا به‌رچاڤ ل ڤێ ده‌ڤه‌رێ ب خوه‌ڤه‌ بينيت هه‌بمه‌ركرن ل گه‌ل ده‌نگێن هه‌لبژارتنێن 12/5/2018.

ئه‌ڤرۆنيوز:

سه‌رۆك مه‌سعود بارزانى ئه‌ڤرۆ شه‌مبيێ 22/9/2018 ل گه‌ل ئه‌ندامێن فراكسيۆنا پارتى ديموكراتى كوردستان ل په‌رله‌مانێ عيراقێ كۆمبوو.

دوێ كۆمبوونێ دا به‌شير حه‌يدا جێگرێ سه‌رۆكێ په‌رله‌مانێ عيراقێ كۆرتيه‌ك ل دۆر ره‌وشا سياسى يا عيراقێ وهه‌ڤكێشێن دناڤ په‌رله‌مانێ عيراقێ دا وكار وچالاكيێن فراكسيۆنا پارتى بۆ سه‌رۆك بارزانى به‌رچاڤكر.

سه‌رۆك بارزانى دپه‌يڤه‌كێ دا ده‌ستخوه‌شى وپيرۆزبايى ل ئه‌ندامێن فراكسيۆنا پارتى كر ورۆناهى خسته‌ سه‌ر گرنگيا هه‌لبژارتنێن عيراقێ وسه‌ركه‌فتنا ليستا پارتى دوان هه‌لبژارتنان دا ودياركر كو پێدڤيه‌ فراكسيۆنا پارتى يا پێگير بيت ب ئارمانجێن ستراتيژى يێن گه‌لێ كوردستانێ كو ئارماجێن ستراتيژى يێن پارتى ديموكراتى كوردستانه‌ ژى.

دپشكه‌كا دى يا كۆمبوونێ دا، سه‌رۆك بارزانى ب تێر وته‌سه‌لى ئه‌و به‌حسێ وان هۆكاران كر كو ل قۆناغێن بۆرى بووينه‌ ئه‌گه‌رێ پێشێلكرنا دستوورى ورێككه‌فتنان ونه‌مانا هه‌ڤپشكيێ وسه‌رهلدانا كێشان،

سه‌رۆك بارزانى زێده‌بارى ئاماژه‌ دان ب ريفراندۆمێ وروودانێن پشتى ريفراندۆمێ، دياركر كو وه‌لاتيێن عيراقێ دوان هه‌لبژارتنان دا ئه‌و سه‌روچاڤ سزادان يێن ب شێوه‌كێ شوفينيانه‌ سه‌حدكره‌ گه‌لێ كوردستانێ ودژايه‌تيا مافێن خه‌لكێ كوردستانێ دكر.

سه‌باره‌ت پرۆسا سياسى ل عيراقێ، سه‌رۆك بارزانى دياركر كو پێگيرى ب هه‌رسێ پره‌نسيبێن هه‌ڤپشكيێ وته‌وافوقێ وهه‌ڤسه‌نگيێ دناڤبه‌را پێكهاتان د حوكمرانيێ دا، دێ گه‌له‌ك‌ ژ كێشان چاره‌سه‌ركه‌ت.

ئه‌ڤرۆنيوز:

سه‌رۆكێ ليستا 183 يا پارتى ديموكراتى كوردستان بۆ هه‌لبژارتنێن په‌رله‌مانێ كوردستانێ راگه‌هاند، هستريا زۆنا تيرۆرا هزرى گه‌هشتيه‌ ئاسته‌كى كو وێنێن به‌ربژارين پارتى ب درينن.

دچارچۆڤێ په‌يڤه‌كێ دا ل رێ وره‌سمێن بانگه‌شا هه‌لبژارتنان ل پيرمام، هێمن هه ورامى سه‌رۆكێ ليستا 183 يا پارتى داخواز ژ ده‌نگده‌ران ولايه‌نگرێن پارتى كر ده‌نگ ب ليستا 183 يا پارتى بده‌ن تاكو ئه‌و په‌يامه‌ بگه‌هيته‌ يا ونه‌يارێن پارتى وسه‌رۆك بارزانى كو پارتى پشتى پيلانێن وان نه‌كو هه‌ر يا ماى، به‌لكو گه‌له‌ك ب هێز دێ به‌رده‌وام بيت”.

هێمن هه‌ورامى به‌حسێ وان پێشێلكاريێن ل به‌رامبه‌ر به‌ربژارين پارتى ل سلێمانيێ دهێته‌ كرن كر وگۆت”چه‌ند رۆژه‌كه‌ هستيريا تيرۆرا هزرى گه‌هشتيه‌ ئاسته‌كى كو چو ل به‌رامبه‌ر 100 به‌ربژارين پارتى پێ ناهێته‌ كرن، مژوولى دراندنا وێنێن مه‌نه‌”.

گۆت ژى” هه‌كه‌ ب وێ دراندنێ ده‌رفه‌تا كارى بۆ چه‌ند گه‌نجان دروست ببيت وهنده‌كا پاره‌ى پێ بده‌ن ل به‌رامبه‌ر وێ دراندنێ، بلا وێنێن مه‌ يێن دى ژى ب درينن”.

ئه‌ڤرۆنيوز:

جێگرێ سەرۆكێ پەرلەمانێ عيراقێ راگه‌هاند، سەره‌دانا سەرۆكێ پەرلەمانێ عيراقێ محه‌مه‌د حه‌لبوسى بۆ ھەرێما كوردستانێ، بۆ دو مەبەستانه‌، ئێك ژوان ئەوە كو كورد ل ژڤانى دياركرى يێ خوه‌دا به‌ربژاره‌كى بۆ پۆستێ سه‌رۆك كۆمارا عيراقێ ده‌ست نيشان بكه‌ت.

به‌شير حه‌داد، جێگرێ سەرۆكێ پەرلەمانێ عيراقێ بۆ مالپه‌رێ فه‌رميێ پارتى گۆت” سه‌ره‌دانا سه‌رۆكێ په‌رله‌مانێ عيراقێ بۆ دو مه‌به‌ستايه‌ ئه‌وژى په‌يوه‌نديێ ل گه‌ل هه‌رێما كوردستانێ ب هێزتر بكه‌ت ويا دى ژلا ل گه‌ل لايه‌نێن هه‌رێما كوردستانێ دانوستاندنان بكه‌ت بۆ وێ چه‌ندێ هه‌ماهه‌نگى هه‌بيت ل دياركرنا به‌ربژارێ پۆستێ سه‌رۆكێ كۆمارێ وپارێزگارى ل ژڤانێ دياركرى بۆ ده‌ستنيشانكرنا به‌ربژارى بۆ وى پۆستى”.