ئەڤرۆ نیوز ، زنار تۆڤی:

جێگرێ پارێزگارێ دهۆكێ راگه‌هاند کو حوكمه‌تا هه‌رێما کوردستانێ حه‌فتێ میگاواتێن دی یێن كاره‌بێ بۆ دهۆكێ زێده‌كرن و ل هەیڤا هه‌شت دێ دەمژمێرێن كاره‌با گشتی بۆ وەلاتیان زێده‌بن.

به‌هزاد عه‌لی ئاده‌م جێگرێ پارێزگارێ دهۆكێ گوت ژی: وه‌زاره‌تا كاره‌بێ یا حوکمه‌تا هه‌رێما کوردستانی بریارا زێده‌كرنا حه‌فتێ مێگاواتێن دی یێن كاره‌با گشتی بۆ دهۆكێ دا و ب ڤێ چەندێ ژی، دێ دەمژمێرێن دانا كاره‌با گشتی د هەیڤا بهێت دا زێده‌بن و دێ بنه‌ 13 دەمژمێر، د ده‌مه‌كی دا کو بەری نوکە 11 دەمژمێر بوون.

هەروەسا دیارکر ژی: فشاره‌كا مه‌زن ل سه‌ر پشكا كاره‌با دهۆكێ هه‌یه‌، ژبه‌ركو پتری 40 مێگاواتێن كاره‌بێ بۆ سه‌نگه‌رێن پیشمه‌رگه‌ی دچن و 53 مێگاوات ژی بۆ ئاواره‌یان، لێ ئه‌ڤ بریاره‌ دێ بارگرانیا خه‌لكی سڤكتر لێ كه‌ت.

ئه‌ڤرۆ نیوز ، زنار تۆڤى:

پشتى ئاگره‌كێ مه‌زن به‌ربوویه‌ چه‌ندین گوندێن ناحیا باتیفا، وى ئاگرى زیانێن مه‌زن گه‌هاندیه‌ خه‌لكێ وان گوندان و پرانیا ئه‌ردێ دارستانێ و پیش و په‌له‌خێ وان گوندان هاتیه‌ سوتن.

مێهڤان ئێكه‌ ژ خۆجهێن گوندێ رێوانێ یێ سه‌ر ب ناحیا باتیفا ڤه‌ بۆ ئه‌ڤرۆ نیوز دیاركر: ژ ئه‌گه‌ره‌كێ نه‌ دیار ئاگر به‌ربوویه‌ ره‌ز و دارستانا گوندێ رێوانێ و هنده‌ك گوندێن ده‌وروبه‌ر و د ئه‌نجامدا ره‌زێن گوندێ وان و هه‌موو دارستانا گوندى ب داروبار و پیش و په‌له‌خ ڤه‌ هاتیه‌ سوتن و نوكه‌ ژ دوورڤه‌ ره‌نگێ گوندێ وان ب ره‌شى دیار دبیت.

ناڤهاتى گوت ژى: وى ئاگرى هه‌موو دار و گیا یێ سوتى و نوكه‌ ژیارا ته‌رشوكه‌والێ مه‌ ل گوندێ رێوانێ نه‌مایه‌، چونكى چو گیا نه‌مایه‌ كو په‌زێ وان بخوت،هه‌روه‌سا نوكه‌ خه‌لكێ گوندێ پتر 1400 سه‌رێن ته‌رشوكه‌والى هه‌نه‌ و هه‌موو یێ مایه‌ بێ گیا و ئالف، دیسا وى ئاگرى زیانێن مه‌زن یێن درارایى گه‌هاندینه‌ خه‌لكێ وى گوندى، كو دگه‌هنه‌ ب سه‌دان ملیۆنان، چونكى ئاگرى هه‌موو مه‌حوایێ گوندى سوتیه‌ و نوكه‌ ئه‌و ماینه‌ حه‌یرى و ئێدى ئه‌و نه‌شێن په‌زێ خوه‌ خودان بكه‌ن، چونكى گیا و چلى ل گوندێ وان نه‌مایه‌ هه‌موو هاتیه‌ سوتن و دیسا د وێ روودانێ دا پترى 1500 دۆنه‌مێن ئه‌ردێ وان هاتینه‌ سوتن، له‌وما ژبه‌ر نه‌بوونا گیاى و ئالفى خه‌لكێ گوندى دێ نه‌چار بن په‌زێ خوه‌ بفروشن و هه‌روه‌سا ئه‌و ژ جهێن شوله‌ژێ دخوازن كو هاریكاریا وان بكه‌ن و ئالفى بۆ ته‌رشوكه‌والێ وان په‌یدا بكه‌ن.