ئه‌ڤرۆنيوز:

په‌رله‌مانتاره‌كێ به‌رێ يێ بزاڤا گۆران داخواز ژ وه‌لاتيێن هه‌رێما كوردستانێ دكه‌ت، ده‌نگێ خوه‌ بده‌نه‌ حزبا ئاڤه‌دانكرنێ.

مه‌سعود حه‌يده‌ر، ئه‌ندامێ خۆلا بۆرى يا په‌رله‌مانێ عيراقێ ژ فراكسيۆنا گۆران، ل به‌رپه‌رێ خوه‌ ل سه‌ر تۆرا جڤاكى يا فه‌يسبووكى به‌لاڤكر” سه‌ركه‌فتنا هه‌لبژارتنێن په‌رله‌مانێ كوردستانێ ده‌ستكه‌فته‌ بۆ گه‌لێ كورد وبۆ بنه‌مايێن ديموكراسيێ وسه‌ركه‌فتنا وێ حزبا كيانێ فيدرالى يا هه‌رێمێ پاراستى، زامنكرنا سه‌قامگيريێ وئاڤه‌دانيێ ويه‌ و پتر ب هێزبوونا هه‌رێما كوردستانێ يه‌”.

وى په‌رله‌مانتارێ به‌رێ يێ بزاڤا گۆران داخواز ژ وه‌لاتيێن هه‌رێما كوردستانێ كر ده‌نگێ خوه‌ بده‌نه‌ حزبا ئاڤه‌دانكرنێ.

ئه‌ڤرۆنيوز:

وه‌زاره‌تا پێشمه‌رگه‌ بزاڤا ئينانا ته‌رمێن وان هه‌رسێ پێشمه‌رگان دكه‌ت كو ل قه‌زا حه‌ويجه‌ ل پارێزگه‌ها كه‌ركووكێ هاتينه‌ ديتن، جێگرێ سوپاسالارێ وه‌زاره‌تا پێشمه‌رگه‌ ژى دبێژيت رێ وره‌سمه‌كێ شايسته‌ بۆ ئينانا ته‌رمێن وان هه‌رسێ پێشمه‌رگان دێ هێنه‌ ئه‌نجامدان.

ل ده‌مێ شه‌رێ دژى تيرۆرستێن داعشێ هژماره‌كا پێشمه‌رگان ب ديلى وته‌رمێن هنده‌كان ژى كه‌فتنه‌ ده‌ستێ تيرۆرستێن داعشێ ودوهى چارشه‌مبى 12/9/2018 ته‌رمێن سێ ژوان پێشمه‌رگان ل تاخه‌كێ باژێرێ حه‌ويجه‌ يێ سه‌ر ب پارێزگه‌ها كه‌ركووكێ ڤه‌ هاتن ديتن.

ليوا قاره‌مان شێخ كه‌مال، جێگرێ سوپاسالارێ پێشمه‌رگه‌ى بۆ مالپه‌رێ فه‌رميێ پارتى ديموكراتى كوردستان پشتراستكر كو ته‌رمێ هه‌رسێ  پێشمه‌رگان ل تاخێ پيشه‌سازى ل قه‌زا حه‌ويجه‌ هاتينه‌ ديتن كو ل ده‌مێ هێرشه‌كا تيرۆرستێن داعشێ بۆ سه‌ر ميحوه‌رێ رۆژئاڤايێ كه‌ركووكێ، دو ژ وان هه‌رسێ پێشمه‌رگان شه‌هيد ببوون پێشمه‌رگه وته‌رمێن وان كه‌فتبوونه‌ ده‌ستێ تيرۆرستێن داعشێ ‌ ويێ سيێ ب بريندارى كه‌فتبوو ده‌ستێ داعشێ وپاشى ئه‌وژى شه‌هيدكربوو”.

گۆت ژى” پشتى ئاشكرابوونا جهێ ته‌رمێن وان، مه‌ ل وه‌زاره‌تا پێشمه‌رگه‌ دووڤچوون كر  ودياربوو ئێك ژوان ب پلا مولازم يه‌ ويێ دى پلا وى نه‌قيبه‌ ول گه‌ل پێشمه‌رگه‌كى كو پێشتر ل ده‌ف مه‌ ب شه‌هيد هاتبوونه‌ هژمارتن”.

دياركر” ژبه‌ركو هيزا پێشمه‌رگه‌ى ل سنورێ كه‌ركووكێ نينه‌، وه‌زاره‌تا پێشمه‌رگه‌ دبزاڤێ دايه‌ ل گه‌ل حوكمه‌تا هه‌رێما كوردستانێ هه‌ماهه‌نگيێ ل گه‌ل حوكمه‌تا عيراقێ بكه‌ت بۆ ئينانا ته‌رمێن وان سێ شه‌هيدێن قه‌هره‌مان بۆ ئاخا پيرۆزا كوردستانێ ودێ رێ وره‌سمه‌كێ شايسته‌ بۆ هێته‌ ئه‌نجامدان.

خوياكر” به‌لێ هێشتا ده‌مێ ئينانا وان يێ ديار نينه‌”.

ئه‌ڤرۆنيوز:

رێڤه‌به‌ريا گشتى يا كه‌شناسيێ وبيڤه‌له‌رزان ل هه‌رێما كوردستانێ دياركر كو پلێن گه‌رمێ ل هه‌رێما كوردستانێ سوباهى ئه‌ينيێ 14/9/2018 دێ دجودابن  چه‌ند رۆژێن بۆرى ودێ چه‌ند پله‌يه‌كان بلندتر بن.

رێڤه‌به‌ريا ناڤبرى ئاماژه‌ دا كو پلا گه‌رمێ سوباهى ل پارێزگه‌ها دهۆكێ دێ 38 بيت.

دهێته‌ زانين ل چه‌ند رۆژێن بۆرى پلا گه‌رمێ ل پارێزگه‌ها دهۆكێ دناڤبه‌را 34 هه‌تا 36 دابوو.

ئه‌ڤرۆنيوز:

به‌رپرسه‌كێ بزاڤا گۆران راگه‌هاند، كه‌سێ ئێكێ يێ نه‌وه‌ى نوێ ب گۆژمێ 50 مليۆن دۆلاران قه‌ردارێ حوكمه‌تا هه‌رێما كوردستانێ يه‌.

كاروان هاشم، ئه‌ندامێ جڤاتا نيشتمانى يا بزاڤا گۆران دديداره‌كا ته‌له‌ڤزيۆنى دا گۆت” به‌لگه‌ وديكيومێنت يێ ل ده‌ف مه‌ هه‌ين كو كه‌سێ ئێكێ يێ نه‌وه‌ى نوێ ب گۆژمێ 50 مليۆن دۆلاران قه‌ردارێ حوكمه‌تا هه‌رێمێ يه‌”.

ئه‌ڤرۆنيوز:

ئێكه‌تى نيشتمانى كوردستان راگه‌هاند، هه‌ڤپه‌يمانى بۆ ديموكراسێ وداپه‌روه‌ريا ب سه‌رۆكاتيا به‌رهه‌م سالح داخواز ئێگرتنێ ل گه‌ل ئێكه‌تيێ كريه‌.

جڤاتا سه‌ركردايه‌تيا ئێكه‌تى نيشتمانى كوردستان دراگه‌هاندنه‌كێ دا به‌لاڤكر”ئه‌ڤرۆ پێنجشه‌مبى 13/9/2018 جڤاتا سه‌ركردايه‌تيێ كۆمبوو ل دۆر چار ته‌وه‌ران كو ئێك ژوان بريارا هه‌ڤپه‌يمانيێ بۆ ده‌ست ب دانوستاندنێ  بۆ ئێكگرتنێ ل گه‌ل ئێكه‌تيێ بوو”.

دياركر ژى” سه‌ركردايه‌تيا ئێكه‌تيێ پێشوازى ل ڤێ ده‌ستپێشخه‌ريێ كر وشانده‌كێ بلند بۆ لێكتێگه‌هشتنێ وئێكگرتنێ پێكئينا”.

دهێته‌ زانين پێشتر هه‌ڤپه‌يمانيێ بريار دابوو پِشكداريێ دهه‌لبژارتنێن په‌رله‌مانێ كوردستانێ دا نه‌كه‌ت.

ئه‌ڤرۆنيوز:

سه‌رۆك مه‌سعود بارزانى ئه‌ڤرۆ پێنجشه‌مبى 13/9/2018 پێشوازى ل برێت ماكگۆرك هنارتيێ تايبه‌تێ سه‌رۆكێ ئه‌مريكى بۆ هه‌ڤپه‌يمانيا شه‌رێ دژى داعشێ كر.

دديداره‌كێ دا كو دۆگلاس سيليمان باليۆزێ ئه‌مريكا ل عيراقێ به‌رهه‌ڤ بووى، هه‌ردو لا بۆچوونێن خوه‌ ل دۆر دووماهى بزاڤێن دهێنه‌ ئه‌نجامدان بۆ پێكئينانا حوكمه‌تا عيراقى يا نوو وروونشتنا 15ڤێ هه‌يڤێ يا په‌رله‌مانێ عيراقێ ئالوگۆركر.

هه‌روه‌سا رۆناهى هاته‌ خستن ل سه‌ر پرۆسا هه‌لبژارتنێن په‌رله‌مانێ كوردستانێ ودووپاتى ل سه‌ر هه‌ماهه‌نگيێ دناڤبه‌را ئه‌مريكا وهه‌رێما كوردستانێ ل به‌رده‌وامبوونا شه‌رێ دژى داعشێ هاته‌ كرن .