ئه‌ڤرۆنيوز:

وه‌زاره‌تا خواندنا بلند وڤه‌كۆلينێن زانستى راگه‌هاند، ده‌مێ پێشكێشكرنا فۆرمان ب سيسته‌مێن وه‌رگرتنێ بۆ ده‌مێ پێنج رۆژان هاتيه‌ درێژكرن.

وه‌زاره‌تا خواندنا بلند درۆهنكرنه‌كێ دا دياركر” ژبۆ ره‌خساندنا ده‌ليڤا زێده‌تر بۆ ده‌رچوويێن پۆلا 12 ئاماده‌يى وب تايبه‌ت ده‌رچوويێن خۆلا دويێ، بريار هاته‌دان ب درێژكرنا ده‌مێ پێشكێشكرنا فۆرمێن وه‌رگرتنێ ب سيسته‌مێن وه‌رگرتنێ (زانكۆلاين، راسته‌وخوه‌ ب كريديت، پارالێل وئێڤاران) بۆ ده‌مێ پێنج رۆژێن دى”.

هه‌روه‌سا دياركر” ده‌رچوويێن پۆلا 12 ئاماده‌يى تا ده‌مژمێر 12 نيڤرۆيا رۆژا چارشه‌مبيا داهاتى 19/9/2018 دشێن فۆرمێن وه‌گرتنێ ب سيسته‌مێن جودا داگرن وپێشكێش بكه‌ن.

ئه‌ڤرۆ نیوز، نه‌وزاد هلۆرى:

ئه‌ڤرۆ وه‌زیرێ پلاندانانێ یا حوكمه‌تا هه‌رێما كوردستانێ دیاركر كو هژمارا رونشڤانێن هه‌رێما كوردستانێ نێزیكێ شه‌ش ملیون كه‌سایه‌.

عه‌لى سندى وه‌زیرێ پلاندانانێ یا حوكمه‌تا هه‌رێما كوردستانێ د كونفرانسه‌كێ رۆژنامه‌ڤانى دا ئه‌ڤرۆ رۆژا پێنجشه‌مبى دیاركر كو هژمارا گشتى یا رونشتڤانێن هه‌رێما كوردستانێ نێزیكێ شه‌ش ملیون كه‌سایه‌ و گۆتك (ده‌سته‌یا ئامارێ یا هه‌رێما كوردستانێ ب هه‌ڤكارى ل گه‌ل سندوقا نه‌ته‌وه‌یێن ئێكگرتى بو كاروبارێن رونشتڤانان و رێكخراوا كوچبه‌رێن نیڤده‌وله‌تى رابوینه‌ ب دیاركرنا هژمارا رونشتڤانێن هه‌رێما كوردستانێ كو د ماوه‌یێ 30 سالێن بورى دا چوو ئامار نه‌هاتینه‌كرن ، و دیاربوو هژمارا رونشتڤانێن هه‌رێما كوردستانێ دگه‌هیته‌ پێنج ملیون و 755 هزار و 43 كه‌سایه‌ ، كو ئه‌و ژى پێكدهێت ژ 12 هزار و 700 خێزانان ، ئه‌ڤه‌ زێده‌بارى 400 خێزانێن ئاواره‌)

زێده‌تر گۆت: (87% ژ خه‌لكێ هه‌رێما كوردستانێ داهاتیێ وان كێمتره‌ ژ ملیون دیناران بو هه‌ر هه‌یڤه‌كێ، و 23% خه‌لكێ هه‌رێمێ ژى داهاتیێ وان ب رێیا چاندنێ یه‌، و رێژا به‌تالیێ ژى ل سالا 2015 دبویه‌ 13% و نها بو 10،2% هاتیه‌ خوار)

ئەڤرۆ نيوز:‏‎

ئەندامەکێ پەرلەمانێ کوردستانێ ئاشکرا کر کو پرۆژە قانوونەک بۆ رێکخستنا ‏خانەنشینکرنا ھێزێن ئاسایش و ناڤخۆ ب دووماھی ھاتیە و خولا داھاتی دێ ھێتە ‏پەسەندکرن کو گرێدایە ب بلندکرنا مووچێ وان ڤە.‏‎ ‎

محەمەد سەعدەدین ئەندامێ لژنا ناڤخۆ و ئاسایشێ ل پەرلەمانێ کوردستانێ بۆ رۆژناما ‏ئەڤرۆ دیار کر کو بۆ رێکخستنا خانەنشینێن ھێزێن ناڤخۆ و ئاسایشێ وان پرۆژە قانوونەک ‏بەرھەڤ کریە و تەمام بوویە و خولا داھاتی یا پەرلەمانێ کوردستانێ دێ وێ پرۆژە ‏قانوونێ پەسەند کەت.‏‎ ‎

ناڤھاتی ئاماژە دا وێ چەندێ کو ئەڤ پرۆژە قانوونە بۆ رێکخستنا خانەنیشنکرنا ھێزێن ‏ئێمناھیێ یە و ب بەرھەڤبوونا نوونەرێن ھەموو ھێزان ھاتیە دروستکرن و ئەڤ پرۆژە ‏قانوونە دێ مووچێ خانەنشینکرنێ یێ ھێزێن ناڤخۆ ژی بلند کەت و خواندنا ئێکێ بۆ ڤی ‏پرۆژە قانوونێ ھاتیەکرن.‏

ل دووماھیێ محەمەد سەعدەدین خویا کر کو پرۆژە قانوون تەمام بوویە و بتنێ مایە خولا ‏داھاتی پەسەند بکەت و گۆت: “وەک عیراقێ نابیت و بتنێ یا مە دێ بشێوەکی بیت خزمەتا ‏خەلکێ کوردستانێ بکەت، چونکی کوردستان شانازیێ ب ئێمناھیا خوە دبەت و ئەڤە پێدڤی ‏ب رێکخستنەکێ نە و کاروبارێن حوکمەتێ ژی دێ ھێنە رێکخستن”.‏

ئەڤرۆ نیۆز، قائید میرۆ:

رێکخراوێن جڤاکێ سڤیل داخوازێ ل ھەموو لایەنەکێ پشکدار د ھەلبژارتنان دکەن بانگەشەیەکا ھێمن رێڤەببەن و دیارکر، پێدڤیە بانگەشە نەبیتە ئەگەرێ بێزاربوونا وەلاتیان.

دکتۆر عەدنان ئەنوەر بەگ، سەرۆکێ جڤاتا بلندا رێکخراوێن جڤاکێ مەدەنی بۆ ئەڤرۆ نیۆز دیارکر” داخوازێ ل ھەموو لیست و قەوارەیان پشکداری ھەلبژاتنان دکەن بشێوەیەکێ ھێمن و سەردەمیانە بانگەشەیێ بۆ لیست و بەربژێرێن خوە بکەن و نەبنە ئەگەرێ تێکدانا رەوشا ئاراما ھەرێما کوردستانێ و بێزارکرنا وەلاتیان.

سەرۆکێ جڤاتا بلندا رێکخراوێن جڤاکا سڤیل ئەویەکژی خویاکر” ئەم ب گرنگی ڤە بەرێ خوە ددەین پڕۆسا ھەلبژارتنێن 30ی ئیلوونێ و بدیتنامن ھەلبژارتنا ڤێجارێ دێ کاریگەریێن خوە یێن ئەرێنی ھەبن لسەر رەوشا ھەرێما کوردستانێ و بەرەف باشترکرنا ژیانا وەلاتیان.

دکتۆر عەدنان ئەنوەر بەگ گۆتژی” ھەرچەندە ھەڵبژارتن ددەمێ خوەدا نەھاتنە ئەنجامدان، بەلێ بھەر شێوەیەکێ ھەبیت نوکەژی ئەم رێڤەبرنا ھەلبژارتنان ب پڕۆسەیەکا گرنگ و چارەنڤیس وەسف دکەین، ژبەرکو پێنگاڤەکا دیە بۆ ژیانا دیموکراسی و ڤەگەڕیان بۆ وەرگرتنا بۆچوونا مللەتی.