ئه‌ڤرۆ نيوز:
ئەندامەکێ سەرکردایەتیا پارتی دیموکراتی کوردستان/ ئیران دیار دکەت کو ئەڤە جارا ئێکێ نینە ئیران ھێرشی پارتێن رۆژھەلات دکەت و رەنگە ھێرشێن وان بەردەوام ژی بن، لێ خەباتا مە ل رۆژھەلاتێ کوردستانێ دێ پتر ژ جاران یا بەردەوام بیت و پشتی ڤێ ھێرشێ ژی پارتێن رۆژھەلات پتر نێزیکی ھەڤدو بووینە و ئەڤە ژی پێنگاڤەکا گرنگە بۆ خەباتا گەلێ مە ل رۆژھەلاتێ کوردستانێ.
دارا ناتق ئەندامێ سەرکردایەتیا پارتی دیموکراتی کوردستان/ ئیران راگەھاند کو د چھل سالێن ژیێ خوە دا کۆمارا ئیسلامی یا ئیرانێ گەلەک جاران ھێرشی پارتێن کوردی کرینە و ئەڤە جارا ئێکێ نینە، لێ ھێرشێن وان کارتێکرنێ ل خەباتا مە ناکەت و ھەتا پشتی ڤێ ھێرشێ دێ خەباتا مە ل رۆژھەلاتێ کوردستانێ پتر گەشە کەت و گۆت: (گەلێ کورد ل رۆژھەلاتێ کوردستانێ دێ خوەدان ژ لاوێن خوە دەرکەڤیت و دوھی مانگرتنەکا گشتی ل رۆژھەلاتێ کوردستانێ ھاتبوو راگەھاندن و ھەروەسا ل ئورۆپا و ئەمریکا ژی مە دەست ب چالاکیێن مەزن یێن مەدەنی ل دژی ڤێ ھێرشێ و ھەروەسا سێدارەدانا لاوێن کورد کرینە و ئەڤرۆکە پتر ژ ھەر دەمەکێ گەلێ مە بۆ شۆرەشێ ئامادەیە و ئەز ب باوەرم کو پشتی ڤێ ھێرشێ دێ د ناڤخوەیێ رۆژھەلاتی دا ژی چالاکیێن مەدەنی و مانگرتن پتر ھێنە کرن).
ناڤبری د پشکەکا دی یا ئاخڤتنا خوە دا ئەو یەک ژی دیار کر کو ئێک ژ ئاریشێن سەرەکی یێ بزاڤا کوردی ل رۆژھەلاتێ کوردستانێ ئەو بوویە کو د ناڤا خوە دا پارچە پارچە بوویە، ئەز دشێم بێژم کو پشتی ھێرشا ل کۆیە پارتێن کوردی پتر نێزیکی ھەڤدو بووینە، چونکو کوردێن رۆژھەلات پشتی ڤێ ھێرشێ جارەکا دی داخواز ژ سەرکردایەتیا پارتی دیموکراتی کوردستان- ئیران و حزبا دیموکرات یا کوردستانێ کر کو ببنە ئێک و ژ بەر ھندێ ژی ئەز ب باوەرم پشتی ڤێ ھێرشێ ھەموو پارتێن رۆژھەلات پتر نێزیکی ھەڤدو بووینە و ئەو یەک ژی بێگومان بۆ بەردەوامیا خەباتێ ل رۆژھەلاتی یا گرنگە و گۆت: (ب سالانە ئەم خەبات دکەین و شەھیدان ددەین و دێ خەباتا مە یا بەردەوام بیت، رەنگە بەرپرسێن ئیرانێ وەسا ھزر دکەن کو پشتی شەھیدبوونا ھندەک ھەڤالێن مە ل کۆیە دێ خەباتا مە ل رۆژھەلاتی ھێتە راگرتن، لێ بەرۆڤاژی ھندێ دێ خەباتا مە بەرفرەھتر لێ ھێت، رۆژانە گەنج ل ئیرانێ و رۆژھەلاتێ کوردستانێ پەیوەندیێ بە سازیێن حزبا مە دکەن و دبێژن ئەم بۆ ھەر کارەکێ بەرھەڤین و جڤاکێ مە ل رۆژھەلاتێ کوردستانێ ژی بۆ شۆرەشێ بەرھەڤە).
دارا ناتق د پشکەکا دی یا ئاخڤتنا خوە دا ئەو یەک ژی دیار کر کو ئەڤرۆکە ئیران پتر ژ ھەر دەمەکێ یا لاواز بوویی و ھێرشا کۆیە ژی ڤێ راستیێ باش نیشا ددەت، ل سووریێ و عیراقێ تووشی شکەستنێ ھاتینە، ئیسرائیلێ پتر ژ ٢٠٠ جاران ل سووریێ ھێرشی ئیرانێ کریە و ب سەدان ئەفسەر و پاسدارێن ئیرانێ ھاتینە کوشتن، لێ دیارە ئیرانێ ئەو شیان نینن کو بەرسڤا وان بدەت، ڤێجا ھێرشی پارتیا مە کر دا ڤان شکەستنێن خوە پەردەپوش بکەت و گۆت: (لێ بارێ ئابووری یێ ئیرانێ رۆژ ب رۆژی خرابتر لێ دھێت و ئەز ب باوەرم دێ رۆژ ب رۆژێ ئیران یا لاواز بیت و نھا د ئاستێ نێڤدەولەتی دا کارەکێ باش ل دژی ئیرانێ دھێتە کرن).
د دووماھیا ئاخڤتنا خوە دا ئەندامێ سەرکردایەتیا پارتی دیموکراتی کوردستان/ ئیران راگەھاند کو ھەلویستێ سەرۆک بارزانی و ھەموو پارت و ئالیێن سیاسی یێن کوردستانێ پشتی ھێرشا کۆیە گرنگ بوو، ھەلویستێ پارتێن کوردستانی ئەو یەک سەلماند کو کورد دێ خوەدان ژ برایێن خوە دەرکەڤن و ب وان ب تنێ ناھێلن و پەیامەکا ئاشکرا دانە ئیرانێ و ھەموو دوژمنێن کوردستانێ کو کورد ھەنە و خوەدان ئیرادە نە و گۆت: (بێگومان وەکو من گۆتی پشتی ڤێ ھێرشی پارتێن رۆژھەلات پتر نێزیکی ھەڤدو بووینە و ل گۆر دیتنا من باشترین بەرسڤ بۆ کۆمارا ئیسلامی یا ئیرانێ ژی ئەڤە کو ئەم خەباتا خوە بەردەوام بکەین و ھەتا گەلێ مە ل رۆژھەلاتێ کوردستانێ بگەھیتە مافێن خوە یێن نەتەوی دێ خەباتێ کەین و ب ھێرشێن وەسا ژی ئەم دەستان ژ خەباتا خوە بەرنادەین).
نيشاندان