ئەڤرۆ نیوز:
مێرکاتوو یا ئنگلیزی یا ھاڤینا ئەڤ سالە گەلەک یانا ھەڤبەستا یاریزانێن نوو ئیمزا کرن، لێ ھێشتا ھژمارەکا ڤان یاریزانێن نوو ئێک خولەک ژی یاری نەکریە پشتی بورینا چار گەران ژ پرێمەرلیگێ.

١.بێرند لینو:

ل ھاڤینا ئەڤ سالە ئەڤ یاریزانە ژ یانا بایرن لیڤەرکوزن یا ئەلمانی پەیوەندی ب یانا ئارسینال کریە بەرامبەر کوژمێ ٢٥ ملیۆن یورویان، ھوسا د ھاتە پێشبینیکرن بیتە یاریزانێ سەرەکی د پێکھاتێ راھێنەر یونای ئێمری، لێ ڤی راھێنەری بریارا خوە یا دوماھیێ دا کو پشتبەستنێ ل سەر گۆلپارێزێ خوە یێ چیکی پیتەر چیک بکەت بۆ ھەڤرکیێن خولێ ژبەر شارەزایا ڤی گۆلپارێزی سەرەرای کو ئەڤ گۆلپارێزێ نوو دگەل یانا خوە یا ئەلمانی ب شێوەکێ سەرەکی یاری دکر ل وەرزێ بوری.
٢.بن جیبسون:

جیبسون ل ڤێ ھاڤینا چوی ژ یانا میدلزبرە ھاتبو یانا بێرنلی ب کوژمێ ٢١ ملیۆن یورویان، ئەڤ کاپتنێ بەرێ یێ یانا مێدلزبرە ل وەرزێ بوری ئاستەکێ باش پێشکێش کر و ھوسا ھزر دکر دێ بیتە یاریزانەکێ گرنگ دگەل یانا بێرنلی، لێ پشتی زنجیرەیا ئەنجامێن لاواز یێن ڤێ یانێ ل ڤی وەرزێ پرێمەرلیگ دا دبیت ل گەرا بھێت راھێنەرێ یانێ پشکداریێ ب ڤی یاریزانی بکەت بۆ جارا ئێکێ.
٣.ئەندرێ گۆمێز:

یاریزانێ پرتوگالی ژ یانا بەرشەلونە پەیوەندی ب یانا ئێڤەرتون کریە ب شێوێ خواستن بەرامبەر کوژمێ دو ملیۆن یورویان ناڤھاتی یاریزانەکێ خودان شیانە، لێ ئاستێ وی یێ خراب دگەل یانا بەرشەلونە بوو ئەگەر بیتە یاریزانەکێ یەدەگ لێ پشتی پەیوەندی ب یانا ئێڤەرتون کری ھەتا نوکە ژی یادەگە و پشکداری د چو یاریان دا نەکریە و پشتگوە ھاتیە خستن تایبەت نوکە پشتی توشی ھنگافتنێ بوی.
٤.یاری مینا:

بەرەڤانێ کولومبی یێ یانا بەرشەلونە سەرەرای ئاستێ وی یێ باش دگەل وەلاتێ وی د موندیالا روسیا دا، لێ نەشیا جھێ خوە د پێکھاتیێ بەرشەلونە دا بکەت، لەورا بریار دا بەرب یانا ئێڤەرتون بچیت ب ھەڤبەستەکێ کو بھایێ وی گەھشتە زێدەتر ژ ٣٠ ملیۆن یورویان، لێ ھەتا نوکە پشکداری د چو یاریێن یانا خوە ئێڤرتون دا نەکریە ژ ئەگەرێ تووشبونا ھنگافتنەکا مەزن و دبیت ئەو ژی بۆ حەفتیا بھێت یێ بەرھەڤ بیت یاریا خوە یا ئێکێ د خولا پرێمەرلیگ دا بکەت.

٥.سێرجیو ریکو:

گۆلپارێزێ ئسپانی و بەرێ یێ یانا ئەشبیلیا ئەوێ ھاتیە ڤەگوھاستن بۆ رێزێن یانا فولھام ب شێوێ خواستن بۆ ماوێ وەرزەکی بێ کو بھایێ ڤەگوھاستنا وی بھێتە ئاشکرا کرن سەرەرای کو سێرجیو ریکو ژ گۆلپارێزێن خودان شیانە، لێ ژبەر ھەڤرکیا وی دگەل گۆلپارێزێن دی یێن سەرەکی د یانا فولھام دا ھەتا نوکە نەشیایە ھەبونا خوە دیار بکەت ژبەر ڤێ چەندێ ژی ھەتا نوکە پشکداری د چو یاریان دا نەکریە.
٦. فابینیو:

یاریزانێ بەرازیلی ل ڤێ ھاڤینا چوی پەیوەندی ژ یانا موناکو یا فرەنسی بەر ب یانا لێڤەرپول یا ئنگلیزی کریە ب کوژمێ ٤٥ ملیۆن یورویان، یاریزانێ ناڤھاتی ل وەرزێ بوری شیابو ٢٠ گۆلان بۆ یانا خوە موناکو توماربکەت و ھوسا د ھاتە پێشبینی کرن یاریزانێ سەرەکی بیت ل ڤی وەرزی دگەل یانا رێدز لێ بەروڤاژی بوچونان ناڤێ وی نەھاتیە تومارکرن د لیستا یاریزانێن یەدەگ ژی دا.
٧. دیوگو دالوت:

ئەڤ یاریزانە ژ یانا پورتو یا پرتوگالی بەرب یانا مانچستەر یونایتد ڤە ھاتبو ڤەگوھاستن ب کوژمێ نزیکی ٢٥ ملیۆن یورویان، لێ یاریزانێ ١٩ سالی دھێتە ھژمارتن ژ یاریزانێن گەنج یێن خودان شیان کو چاڤەرێ پاشەروژەکا مەزنە ل ئوروپا و دھێتە پێشبینی کرن ل حەفتیا بھێت پشکداری یاریا بیت ل جھێ ئەنتونیو ڤالێنسیا ژبەرکو ئەڤ یاریزانە نوکە پێدڤی ب بھێنڤەدانێ یە.
٨. لیندر دیندونکر:

ئەڤ یاریزانە ژ یانا ئەندرلەخت یا بەلجیکی ھاتە رێزێن یانا ولڤرھامبتون ل ھاڤینا ئەڤ سالە بێ کو بھایێ ھەڤبەستا وی بھێـە ئاشکرا کرن، سەرەرای ڤی یاریزانی ل ماوێ بوری پشکداری د ١٧١ یاریێن فەرمی دا کرینە د گەل یانا خوە ئەندرلەخت دگەل شەش یاریان دگەل ھەلبژارتیێ وەلاتێ خوە لێ ھەتا نوکە دەلیڤە بۆ ڤی یاریزانی پەیدا نەبویە پشکداریی د ئێک خولەک دگەل یانا خوە یا ئنگلیزی بکەت.