ئهڤرۆنيوز:
د تۆپبارانكرنا ئه‌ڤرۆ يا باره‌گايێن هه‌ردو حزبا ديموكراتا كوردستانێ وحزبا ديموكراتا كوردستانا ئيرانێ ( حدك ) و ( حدكا) ل كۆيه، كو ژلايێ ئيرانێ ڤه هاتيه ئه‌نجامدان 13 كه‌س شه‌هيد بوون وب ده‌هان كه‌سێن دى بريندار بوون، دناڤ برينداران دا هه‌رئێك ژ مسته‌فا مه‌ولودى سكرتێرێ حزبا ديموكراتا كوردستانێ وخالدێ عه‌زيزى سكرتێرێ به‌رێ يێ حزبا ديموكراتا كوردستانێ وكه‌مال كه‌ريمى ئه‌ندامێ رێبه‌راتيا حزبا ديموكراتى يێن هه‌ين.
ئه‌وين هاتينه شه‌هيد كرن ژى ناڤێن وان ئه‌ڤه‌نه:
1- سوهەیلا قادری، ئەنداما کۆمیتەيا ناڤەندی
2- برایم زێوەیی، ئەندامێ کۆمیتەیا ناڤەندی
3- نەسرین حەداد، ئەنداما کۆمیتەيا ناڤەندی
4- هاشم عەزیزی، ئەندامێ کۆمیتەیا ناڤەندی
5- کەریم مەهدەوی، ئەندامێ کۆمیتەيا ناڤەندی
6- رەحمان پیرۆتی، ئەندامێ کۆمیتەیا ناڤەندی
7- مام شێرکۆ رەسوڵ زادە
8- عوسمان عوسمانی
9- جەمال ئەکبەری
10- مەنسور مەهابادی
11- فاروق حسێنی
12- یاسر
13- موختار
14- نه‌هاتيه نياسين
ئاژانسا ميهرنيوز يا ئيرانى به‌لاڤكر” به‌رى نيڤرۆيا ئه‌ڤرۆ شه‌مبيێ ب مووشه‌كێن دوورهاڤێژ توپبارانكرنا باره‌گايێن هه‌ردو حزبێن ديموكراتا كوردستانا ئيرانێ (حدكا) وحزبا ديموكراتا كوردستانێ (حدك) ل باژێرێ كۆيه هاته كرن ودئه‌نجامدا 14 كه‌س هاتنه كوشتن و39 كه‌س 1ى بريندار بوون كو هژماره‌كا وان ئه‌ندامێن سه‌ركردايه‌تيێ وربه‌رپرسێن وان هه‌ردو حزبانه.
ئهڤرۆنيوز:
دكۆمبوونا ئه‌ڤرۆ شه‌مبيێ 8/9/2018 يا په‌رله‌مانێ عيراقێ كو تێدا حه‌يده‌ر عه‌بادى سه‌رۆك وه‌زيرێن عيراقێ وهژماره‌كا وه‌زيرێن حوكمه‌تا وى وپارێزگه‌رێ به‌سرا تێدا به‌رهه‌ڤ بووين، شه‌ره ده‌ڤ دناڤبه‌را حه‌يده‌ر عه‌بادى وپارێزگه‌رێ به‌سرا هاته كرن.
ئه‌سعه‌د عيدانى، پاريزگه‌رێ به‌سرا كو هه‌ر ژ ليستا نه‌سر يا حه‌يده‌ر عه‌بادى يه، د روونشتنا په‌رله‌مانێ عيراقێ دا دبێژيت” رێڤه‌به‌رێ پۆليسێن به‌سرا دزيكه‌ره ول سه‌ر من يێ هاتيه سه‌پاندن دوى پۆستى دا بيت”.
دياركر ژى” ئه‌و بريارێن نوكه سه‌رۆك وه‌زيران خواندين بۆ هاريكاريا به‌سرا، به‌رى چه‌ندين هه‌يڤ وسالان ژى هاتبوو دان وچو نه‌هاتينه بجهئينان”.
دبێژيت ژى” ئه‌و ئاخڤتنێن نوكه دهێنه گۆتن ژلايێ سه‌رۆك وه‌زيران ووه‌زيران ڤه وه‌سا دده‌نه دياركرن كو چو كێشه ل به‌سرا نينن”.
عه‌بادى ژى ب توره‌يى ڤه دبێژيته وى” تو پارێزگه‌رێ به‌سرا تو بۆچى ل به‌سرا نينى؟”.
ئەڤرۆ نیوز،باسم قاسم شنگالی
ئەڤرۆ شەمبیێ 8/9/2018 ێ کچەکا ئێزدی ژ دەستێن رێکخراوا داعش يا تیرۆرستی ل سووریێ هاتە رزگارکرن
حسێن قائيدى، بەرپرسێ نڤسینگەها کاروبارێن رەڤاندیان ل دهۆکێ بۆ ئەڤرۆنيوز گۆت “ئەڤرۆ ب هەڤکاریا نڤیسنگەها مە کچەکا ئێزدى ژده‌ستێن داعشێ ل سووریێ هاتە رزگارکرن”.
دياركر” کچا رزگاربووی ب ناڤێ (یناس ناسر رەشۆ ) ژيێ وێ 14 سالن کو خەلکا کۆمالگەها خانەسۆرێ یە سەر ب ناحیا سنونێ ڤە ل باکوری چیایێ شنگالێ “.
پتر گۆت “ل دەمێ ل 3/8/2014 داعشێ دەڤەرا شنگالێ داگێرکری ئەڤ كچە ژی مینا ب هزاران کچ و ژنێن ئێزدی هاتبوو ره‌ڤاندن ژلایێ رێکخراوا تیرۆرستیا داعشێ ڤە”.
خوياكر ژى”،نڤیسنگەها کاروبارێن رەڤاندیان ل دهۆکێ یا بەردەوامە دبزاڤێن رزگاركرنا وان ره‌ڤانديێن هەتا نۆکە ماینه ددەستێن تیرۆرستێن داعشێ دا”.
ئه‌ڤرنيوز:
ڤه‌كۆله‌رين زانكۆيا سوانسى يا بريتانى رێيه‌ك ديتيه كو پلاستيك بهێته گوهۆرين بۆ سوته‌مه‌نيا هايدرۆجينى ووه‌كو وزا كاره‌بێ ترومبێل پێ كار بكه‌ت.
ڤه‌كۆله‌ران بۆ وێ داهێنانێ ماده‌كێ بكاردئينن كو تيشكا رۆژى هه‌لدمێژيت پاشى دهێته خستن دناڤ ماده‌يه‌كا دى ودئه‌نجامدا غازا هايدرۆجين ژێ ده‌ردكه‌ڤيت.
ڤه‌كۆله‌ر دياردكه‌ن كو ئه‌ڤ رێيه گه‌له‌ك يا ب ساناهيتره ومه‌زاختيێن وێ ژى دكێمترن ژ پرۆسا دوباره بكارئينانا پلاستيكى، چونكى پێدڤى ب پاقژكرنا پلاستيكى نينه، به‌لێ ل گه‌ل وێ چه‌ندێ ژى دا دبيت چه‌ند سالێن بهێت بڤێت تاكو ب ڤێ رێ بگه‌هيته ئاستێ وه‌به‌رهێنانێ.
ئهڤرۆنيوز:
ڤه‌كۆلينه‌كا نوشدارى يا نوو دياركريه كو زه‌يتا زه‌يتۆنێ رۆلێ ڤياگرا سروشتى دبينيت بۆ زه‌لامان بۆ باشتركرنا ساخله‌ميا سيكسى.
زه‌يتا زه‌يتۆنێ چه‌ندين مفايێن ساخله‌مى يێن هه‌ين وخوينێ چالاك دكه‌ت ل هه‌موو پشكێن لاشى دا.
هژماره‌كا ڤه‌كۆله‌ران ل ئه‌سينا پايته‌ختا يۆنانێ ڤه‌كۆلينه‌ك ل سه‌ر 660 زه‌لامان كر كو سيسته‌مێ خوارنا ده‌ريا ناڤه‌راست په‌يره‌ودكر كو تێكه‌ليه‌كه ژ كه‌سكاتيێ وفێقى وماسى وجه‌ره‌زات وزه‌يتا زه‌يتۆنێ كو رۆل دبلندكرنا شيانێن سيكسى هه‌يه.
ڤه‌كۆله‌ران گۆت” زه‌يتا زه‌يتۆنێ دبيته ئه‌گه‌رێ زێده‌كرنا هۆرمه‌نێ (تستوستيرۆن) ب ڤێ چه‌ندێ ژى مه‌ترسيا لاوازيا سيكسى ل ده‌ڤ زه‌لامان كێم دكه‌ت”.
وان ڤه‌كۆله‌ران به‌حس ل وێ چه‌ندێ ژى كر كو زێده‌بارى گوهۆرينا شێوازێ ژياني وخوارنا ساخله‌م وئه‌نجامدانا وه‌رزشێ، ب كارئينانا زه‌يتا زه‌يتۆنێ ژى پارێزگاريێ ل خوينێ دكه‌ت ومرۆڤى ژ نه‌خوه‌شيێن فشارا خوينێ وشه‌كرێ وقه‌له‌ويێ دپارێزيت.
ئهڤرۆنيوز:
ژێده‌ره‌كێ ئه‌منى ئه‌ڤرۆ شه‌مبيێ 8/9/2018 راگه‌هاند، جاره‌كادى دوكێل ژ ئاڤاهيێ كونسۆلخانا ئيرانى ل به‌سرا بلندبوو پشتى دوهى ئه‌ينيێ ژلايێ خوه‌نيشانده‌ران ڤه هاتيه سوتن.
وى ژێده‌رى بۆ مالپه‌رێ (بغداد اليوم) گۆت” ئێڤاريا ئه‌ڤرۆ شه‌مبيێ جاره‌كادى دوكێل ژ ئاڤاهيێ كونسۆلخانا ئيرانى ل به‌سرا بلندبوو”.
ئهڤرۆنيوز:
دبه‌ياننامه‌كا هه‌ڤپشك يا هه‌ردو فراكسيۆنێن پارتى ديموكراتى كوردستان وئيكه‌تى نيشتمانى كوردستان ل په‌رله‌مانێ عيراقێ، ب توندى هێرشا ئيرانى يا ئه‌ڤرۆ ل سه‌ر وه‌لاتيێن كوردێن رۆژهه‌لاتا كوردستانێ ل كويه شه‌رمزار دكه‌ن كو تێدا چه‌ندين وه‌لاتيێن رۆژهه‌لاتا ئيرانێ شه‌هيد وبرينداربووين.
د وێ به‌يانناما هه‌ڤپشك دا داخواز هاته كرن كو ئه‌و جۆره هێرشه بهێنه راگرتن وپرسه وسه‌ره‌خوه‌شيا خوه ژى ل كه‌سوكارێن شه‌هيدان كر وهيڤيا چاكبوونێ بۆ برينداران خواست.
ئهڤرۆنيوز:
هه‌ردو فراكسيۆنێن پارتى وئيكه‌تى ل په‌رله‌مانێ عيراقێ به‌ياننامه‌كا هه‌ڤپشك ل دۆر توپبارانكرنا كۆمه‌لگه‌ها ئاكنجيبوونا كوردێن رۆژهه‌لات ل باژێرێ كويه به‌لاڤكر.
هه‌ردو فراكسيۆنێن پارتى ديموكراتى كوردستان وئێكه‌تى نيشتمانى كوردستان ل په‌رله‌مانێ عيراقێ دكۆنگره‌كێ رۆژنامه‌ڤانى دا ل به‌غدا دبه‌ياننامه‌كا هه‌ڤپشك دا پشته‌ڤانيا خوه بۆ داخوازيێن ره‌وا يێن خوه‌نيشانده‌رين به‌سرا دياركر، كو ژبه‌ر نه‌بوونا خوزمه‌تگوزاريان خوه‌نيشادان كرينه وتێدا داخوازا خزمه‌تگوزاريان ونه‌هێلانا گه‌نده‌ليێ دناڤ حوكمه‌تێ دا كرين.
هه‌ر دوێ به‌يانناما هه‌ڤپشك دا هه‌ردو فراكسيۆنان دلته‌نگيا خوه ل دۆر شه‌هيدبوونا هژماره‌كا خوه‌نيشانده‌ران وبرينداربوونا هژماره‌كا دى ل به‌سرا راگه‌هاند وسه‌ره‌خوه‌شى ئاراسته‌ى كه‌سوكارێن شه‌هيدان وهيڤيا چاكبوونێ بۆ برينداران خواست وداخواز ژ حوكمه‌تا عيراقێ كر ب شێوه‌كێ ب له‌ز بزاڤا چاره‌سه‌ريا كێشين پارێزگه‌ها به‌سرا بكه‌ت وخزمه‌تگوزاريێن پێدڤى بگه‌هينيته وێ پارێزگه‌هێ.
ئهڤرۆنيوز:
هه‌ڤپه‌يمانيا سائيرون ب سه‌رۆكاتيا موقته‌دا سه‌در راگه‌هاند، به‌رسڤێن حوكمه‌تێ ئه‌ڤرۆ ل په‌رله‌مانى دباوه‌رپێكرى نه‌بوون وداخوازا ده‌ست ژكاركێشانا حوكمه‌تێ دكه‌ين.
فراكسيۆنا سائيرون پشتى كۆمبوونا ئه‌ڤرۆ يا په‌رله‌مانێ عيراقێ ل دۆر كێشێن به‌سرا كو تێدا حه‌يده‌ر عه‌بادى سه‌رۆك وه‌زيرين عيراقێ وچه‌ند وه‌زير تێدا به‌رهه‌ڤ بووين، داخوازا ده‌ست ژكاركێشانا حه‌يده‌ر عه‌بادى كر.
فراكسيۆنا سائيرون ل په‌رله‌مانێ عيراقێ دكۆنگره‌كێ رۆژنامه‌ڤانى دا دياركر” پێدڤيه حه‌يده‌ر عه‌بادى ده‌ست ژكارى بكێشيت وكار بهێته كرن بۆ پێكئينانا حوكمه‌ته‌كا ب هيز كو خواستێن گه‌لێ عيراقێ بجهبينيت”.
نيشاندان