ئه‌ڤرۆ نيوز:

هه‌ر چه‌نده‌ ب تنێ 22 رۆژ يێن بۆ هه‌لبژارتنێن په‌رله‌مانێ كوردستانێ ماين، به‌لێ هه‌تا نوكه‌ ب پشت راستى نه‌هاتيه‌ دياركرن كو دێ هه‌لبژارتن هێنه‌ كرن و لايه‌نێن سياسى چاڤه‌رێ هه‌لويستێ گۆڕان بوون، گۆڕان ژى ئه‌ڤرۆ دێ ل دۆر ئاماده‌كاريێن هه‌لبژارتنان كۆم بيت.

به‌لێن ئسماعيل جێگرێ ژۆرا هه‌لبژارتنێن بزاڤا گۆڕان راگه‌هاند كو ئه‌ڤرۆ رۆژا شه‌مبى 8ى ئيلۆنا 2018ێ به‌ربژێرێن پارتيا وان بۆ په‌رله‌مانێ كوردستانێ دێ ل گه‌ل لژنا بلندا هه‌لبژارتنان كو ژ لايێ مسته‌فايێ سه‌يد قادر دهێته‌ سه‌رپه‌رشتيكرن روونن و مه‌ره‌م ژى خوه‌ ئاماده‌كرنه‌ بۆ هه‌لبژارتنێن په‌رله‌مانێ كوردستانێ هه‌ر وه‌كو ناڤبرى ئاماژه‌ پێكرى.

هه‌تا نوكه‌ ب ره‌نگه‌كێ زاره‌كى ب تنێ بزاڤا گۆڕان داخواز كربوو كو هه‌لبژارتن بهێنه‌ پاشخستن، ئێكه‌تيێ ژى راگه‌هاند بوو كو ئه‌و دخوازن بهێنه‌ ئه‌نجام دان، به‌لێ هه‌كه‌ بهێنه‌ پاشخستن ژى ئه‌و په‌سه‌ند دكه‌ن و پارتى و ئێكگرتوو و كۆمه‌ل ژى ل گه‌ل ئه‌نجامدانا هه‌لبژارتنانن.

ئه‌ڤرۆنيوز: ئێقبال عومەر

 فرۆكێن توركى ئەڤرۆ ۷/۹/۲۰۱٨ گوندێن  شاجا و بێزەل  و کوکەرێ و دهیك و سارکێ و بێسەپێ خالکا و کاڤلکا ل دەڤەرا رێکان، و چەندین دەڤەر و گوندێن دی یێن سەر ب ناحیا شێلادزێ ڤە ل سنورێ قەزا ئامێدیێ بوردومانکرینە.

فەرهان مەجید، خەلکێ وێ ده‌ڤه‌رێ یە بۆ ئه‌ڤرۆنيوز گۆت، ئەڤە بۆ ده‌مێ ۱۰ رۆژانە ئەڤ دەڤەرە و چه‌ندين ده‌ڤه‌رێن سه‌ر ب ناحیا شێلادزێ ڤە ل سنورێ قەزا ئامێديێ ژلایێ فرۆكێن توركى ڤه‌ دهێنە بوردومانکرن.

گۆت ژى ، بوردومانا فرۆكێن توركى گوندێن شاجا و بێزەل  و کوکەرێ و دهیك و سارکێ و بێسەپێ خالکا و کاڤلکا ل دەڤەرا رێکان و چەندین دەڤەرێن دی ل سنورێ ناحیا شێلادزێ ڤه‌گرتيه‌  و زیانێن مەزن گەهشتینە وەلاتیێن ڤێ دەڤەرێ كو ب سەدان دارێن بەری و دارێن دێم یێن ئاقاری و یێن ئاڤی و ب دەهان هزاران دونەمێن ئەردی هاتینە سوتن و مێشێن هنگڤینی یێن وەلاتیێن ڤێ دەڤەرێ ژی هاتینە سوتن،هەروەسا خەلکێ ڤێ دەڤەرێ ئێدی نەشێن سەرەدانا گوندێن خوە بکەن ب مەرەما کارێ چاندنێ ئانکو رەز و بیستانێن وان هاتینە بەری و هەموو دێ ب هەدەر چیت، ژبەرکو نەشێن به‌رهه‌مێ رەز و بیستانێن خوە بیننە بازاری و بفرۆشن وهەروەسا هه‌نگه‌ڤان ژى نەشێن بچن هنگڤینێ مێشێن خوە ببرن و بینن ل بازاران بفرۆشن”.

 خوياكر ژى”چو زيانێن گيانى ب وه‌لاتيێن ده‌ڤه‌رێ نه‌كه‌فتى نه‌، به‌لێ ئاگر ب پيش وپاوان و دارسانێن گوندێن وێ دەڤەرێ کەفتیە  و زيان ژى گه‌هشتنه‌ ره‌زێن وه‌لاتيان”.