ئه‌ڤرۆنيوز:

ئۆفيسا پارێزگه‌ها دهۆكێ يا كۆمسيۆنا بلند يا هه‌لبژارتن وراپرسى ل هه‌ريما كوردستانێ راگه‌هاند، 47 بنگه‌هێن ده‌نگدانێ بۆ تۆماركرن وپشت راستبوون ژ تۆمارا ده‌نگده‌ران ل سه‌رانسه‌رى پارێزگه‌ها دهۆكێ يێن هاتينه‌ ڤه‌كرن وه‌كو به‌رهه‌ڤيه‌ك بۆ هه‌لبژارتنێن په‌رله‌مانێ كوردستانێ.

عه‌لى به‌ندى، رێڤه‌به‌رێ گشتيێ ئۆفيسا پارێزگه‌ها دهۆكێ يا كۆمسيۆنا هه‌لبژارتن وراپرسى ل هه‌رێما كوردستانێ ئه‌ڤرۆ پێنجشه‌مبى دكۆنگره‌كێ رۆژنامه‌ڤانى دا گۆت” به‌رى نوكه‌ 41 بنگه‌هێن ده‌نگدانێ هه‌بوون، به‌لێ نوكه‌ شه‌ش بنگه‌هێن دى مه‌ يێن ڤه‌كرين بۆ وێ چه‌ندێ خه‌لك زێده‌تر به‌ر ب وان بنگه‌هان بچن”.

دياركر ژى” 13 ژ وان بنگه‌هان يێن ل باژێرێ دهۆكێ وهه‌شت يێن ل قه‌زا زخاۆ ويێن دى ژى يێن ل قه‌زايێن سێمێل وئامێديێ وبه‌رده‌ره‌ش وشێخان و ئاكرێ”.

دياركر” 316 كه‌س وه‌گو گرێبه‌ست يێن هاتينه‌دامه‌زراندن ول سه‌ر وان بنگه‌هان يێن هاتينه‌ به‌لاڤكرن”.

برياره‌ ل 30/9/2018 هه‌لبژارتنێن په‌رله‌مانێ كوردستانێ بهێنه‌ ئه‌نجامدان.

ئه‌ڤرۆنيوز:
ئه‌ڤرو پێنجشه‌مبى‌ 12/7/2018 فه‌رهاد ئه‌مين پارێزگه‌رێ‌ دهۆكێ‌ پێشوازیا سیراج بارزانی  به‌رپرسێ‌ ده‌زگایێ‌ مین ل هه‌رێما كوردستانێ‌ و شاندێ‌ دگه‌لدا كر ,
دهه‌ڤدیتنه‌كێ‌ ب ئاماده‌بونا به‌رپرسێ‌ ئوفیسا دهۆكێ‌ یا ده‌زگایێ‌ مین و ته‌قه‌مه‌نیان، به‌حسێ‌ ره‌وشا ده‌ڤه‌رێ‌ ژهه‌موو لایه‌كی ڤه‌ هاته‌ كرن تایبه‌ت كارێ‌ پاقژكرنا ده‌ڤه‌رێ‌ ژ مین و ته‌قه‌مه‌نیان و به‌رنامێن ده‌زگایێ‌ ناڤبری ل ده‌ڤه‌رێ‌ هاته‌ كرن ,
به‌رپرسێ‌ ده‌زگایێ‌ مین ل هه‌رێمێ‌ ئاماژه‌ كره‌ به‌رنامێن وان بۆ پاقژكرنا وان ده‌ڤه‌رێن مین لێ‌ هه‌ین و دیار كر كو كاره‌كێ‌ مه‌زن بۆ پاقژكرنا كوردستانێ‌ ژ مین و ته‌قه‌مه‌نیان هاتیه‌ كرن و به‌رده‌وام پێدڤی ب كاری یه‌، چونكێ‌ دوژمنێن ملله‌تێ‌ كورد گه‌له‌ك ژ ئاخا كوردستانێ‌ ب مین و ته‌قه‌مه‌نیان چاندی یه‌ و پێدڤی ب پاقژكرنێ‌ یه‌ داكو گیانێ‌ وه‌لاتیان بهێته‌ پاراستن ,
پارێزگه‌رێ‌ دهۆكێ‌ ده‌ست خوه‌شی ل كارێ‌ ده‌زگایێ‌ ناڤبری كر و داكوكی كر كو كارێ‌ وان یێ‌ به‌رده‌وام بیت ژبۆ پاراستنا گیانێ‌ وه‌لاتیان ژ ڤان مین و ته‌قه‌مه‌نیان و بشێن بیێ‌ ترس كارێ‌ جوتیاریێ‌ ل سه‌ر ئه‌ردێ‌ خوه‌ بكه‌ن ,
دلایه‌كێ‌ دی دا به‌حسێ‌ ره‌وشا پارێزگه‌هێ‌ و هه‌بوونا رێژه‌كا مه‌زن یا ئاواره‌ و په‌نابه‌ران ل سنورێ‌ پارێزگه‌هێ‌ و كارتێكرنا هه‌بوونا وان ل سه‌ر هه‌موو سكته‌رێن ژیانێ‌ و چاوانیا خزمه‌تكرنا وان هاته‌ كرن ,
سیراج بارزانی ده‌ست خوه‌شی ل پارێزگه‌رێ‌ دهۆكێ‌ و هه‌موو خه‌لكێ‌ پارێزگه‌هێ‌ كر بۆ وی كارێ‌ مروڤایه‌تیێ‌ مه‌زن بۆ ئاواره‌ و په‌نابه‌ران هاتیه‌ كرن .

ئه‌ڤرۆ نيوز:

بەرپرسەکێ وەزارەتا باژێڕڤانی و گەشت و گۆزارێ دیار کر، وەرگرتنا کرێیا گلێشی ل جھێن بازرگانی ھاتیە کۆنتڕۆلکرن و دبێژیت: ھێشتا مە پارێ گلێشی ژ مالێن وەلاتیان وەرنەگرتیە و چو ژڤان ژی دیارنینن دێ کەنگی دەست پێکەت.

عەبدولحەمید مەجید، رێڤەبەرێ گشتیێ پلاندانانێ ل وەزارەتا باژێڕڤانیێ بۆ رۆژناما ئەڤرۆ گۆت: “پلانا حوکمەتا ھەرێما کوردستانێ بۆ وەرگرتنا کڕێیا گلێشی یا دھێتە ب جھئینان، نوکە ب تنێ کرێیا گلێشی ژ جھێن بازرگانی دھێتە وەرگرتن و ب تەمامی ھاتیە کۆنتڕۆلکرن، ئانکو کرێیا گلێشی ل ھەموو جھێن بازرگانی دھێتە وەرگرتن، بەلێ وەرگرتنا پارێ ھاڤێتنا گلێشی ژ مالان ھێشتا ب تەمامی نەھاتیە ب جھئینان و دشێم بێژم جارێ ھاتیە راگرتن، ھەرچەندە بڕیارا سەرۆکایەتیا جڤاتا وەزیرانە و دڤێت بھێتە ب جھئینان، بەلێ ھەتا نوکە ب تەمامی پارە ژ ھەموو مالان ناھێتە وەرگرتن”.

ل دۆر کۆمکرنا گلێشی عەبدولحەمید مەجید دیار کر، ھاڤێتن و کۆمکرنا گلێشی ل سەرانسەری ھەرێما کوردستانێ ژ لایێ حوکمەتێ ڤە ب شێوێ گرێبەستە ژ لایێ کۆمپانیێن کەرتێ تایبەت ڤە دھێتە ب جھئینان و گۆت: “ھەتا نوکە پلانەکا سەرکەفتی بوویە، بەردەوام گرێبەست ل گەل کۆمپانیان دھێنە نووکرن و ھەر کۆمپانیەک ژی ھەکە ئەڤی ئەرکی ئەنجام بدەت نەک وەکو بەرێ باژێڕڤانی بخوە کارێ ھاڤێتنا گلێشی ئەنجام بدەت”.

ئه‌ڤرۆ نيوز:

وەزارەتا خواندنا بلند و ڤەکۆلینێن زانستی بەرھەڤیان بۆ وەرگرتنا قوتابیا ل زانکۆ و پەیمانگەھێن ھەرێما کوردستانێ دکەت، بڕیارە ب رێیا زانکۆ لایەن قوتابی بھێنە وەرگرتن، پەیڤدارێ وەزارەتێ ژی دبێژیت: ھەتا سیستەمێن نێڤدەولەتی بھێنە ب جھئینان، ئەڤ سالە دێ زووتر دەست ب دەواما زانکۆیان ھێتەکرن.

عەباس ئەکرەم، پەیڤدارێ وەزارەتا خواندنا بلند و ڤەکۆلینێن زانستی بۆ رۆژناما ئەڤرۆ گۆت: “سالێن بۆری پێنگاڤ ب پێنگاڤ گوھۆڕین د شێوازێ وەرگرتنا قوتابیان ل زانکۆ و پەیمانگەھێن ھەرێما کوردستانێ دا ھاتینەکرن، ب شێوەکی حەز و ئارەزوویێن قوتابی تێدا رەنگڤەدابن، سالا بۆری 55%ێ یا کۆرسیێن خواندنێ بۆ دەرچوویێن خۆلا ئێکێ یا دەرچوویێن پۆلا 12 ئامادەیی ھاتبوونە تەرخانکرن و 45%ێ ژی بۆ دەرچوویێن خۆلا دویێ ھاتبوونە دیارکرن، ئەڤ سالە ژی ھەموو بزاڤەک یا دھێتەکرن د دەمەکێ زوو دا قوتابی ل زانکۆ و پەیمانگەھان بھێنە وەرگرتن، ب تایبەتی ژی قوتابیێن قووناغا ئێکێ دەست ب دەواما خوە بکەن، لەوڕا ژی وەزارەتێ ھەموو شیانێن خوە مەزاختینە ھەتا ل دەستپێکا ھەیڤا ئیلۆنا داھاتی ناڤێن قوتابیان ب رێیا سیستەمێ زانکۆلاین بھێنە بەلاڤکرن دەست ب دەوامێ بھێتەکرن”.

عەباس ئەکرەم گۆتژی: “دەستپێکرنا دەواما زانکۆیان د دەمێ خوە دا دێ ئاسانکاریان بۆ مە کەت ھەتا چەند سیستەمەکێن نێڤدەولەتی بھێنە ب جھئینان، لەو دێ وەرگرتنا قوتابیان ب قووناغ بیت، ئەڤ سالە ژی مینا سالا بۆری دێ وەرگرتنا قوتابیان ب ھەمان سیستەم بیت، ئانکو 55%ێ یا کۆرسیێن خواندنێ بۆ دەرچوویێن خۆلا ئێکێ یا دەرچوویێن پۆلا 12 ئامادەیی ھاتیە تەرخانکرن و 45%ێ بۆ دەرچوویێن خۆلا دویێ ھاتیە دیارکرن، ئەم قوتابیێن خوە پشتڕاست دکەین دیارکرنا رێژا وەرگرتنا قوتابیان دێ ب شێوەکی بیت کاریگەری ل سەر چو قوتابیەکی نەبیت”.

ئەڤرۆ نيوز:

بریارە ئەڤرۆ ھەردو مەکتەبێن سیاسی یێن پارتی دیمۆکراتی کوردستان و ئێکەتیا نیشتیمانیا کوردستانێ، ل ھەولێرێ کۆم ببن و بەحسێ کارنامەکا ھەڤپشک یا پشکداریکرنێ د حوکمەتا نوو یا عیراقێ دا بکەن.

سەعدی ئەحمەد پیرە پەیڤدارێ مەکتەبا سیاسی یا ئێکەتیێ دیار کر کو ئەو ھیڤیخوازن ھەموو پارتێن سەرکەفتی د ھەلبژارتنان دا پشکداری کۆمبوونێ ببن بۆ وێ چەندێ ئێکرێزیا ناڤ مالا کوردی تێک نەچیت و بشێن پێکڤە وێ کارنامێ دانن.