ئه‌ڤرۆنيوز:
ژێده‌ره‌كى رۆژنامه‌ڤانى ژ به‌سرا بۆ ئه‌ڤرۆنيوز دياركر كو ره‌وشا به‌سرا يا پتر ئالۆزبووى وهژمارا كوشتى وبرينداران دناڤ خوه‌نيشانده‌ران دا به‌ر ب زێده‌بوونێ يه.
عه‌لى سارى، رۆژنامه‌ڤان ژ به‌سرا بۆ ئه‌ڤرۆ نيوز گۆت” هه‌تا نوكه پێنج وه‌لاتى ژناڤ خوه‌نيشانده‌ران يێن هاتينه كوشتن ووبريندار ژى پترن ژ 20 كه‌سان”.
سارى گۆت ژى” خوه‌نيشانده‌ر يێن ل جادێن ده‌روبه‌رێ ئاڤاهيێ پارێزگه‌ها به‌سرا به‌لاڤبووين كو فه‌رماندێ ئۆپه‌راسيۆنێن به‌سرا دناڤ وى ئاڤاهى دايه”.
ئه‌ڤرۆ نيوز:
ده‌زگایێ ره‌وشه‌نبیرى و راگه‌هاندنا پارتى دیموكراتى كوردستان برۆسكه‌كا به‌هیداریێ پێشكێشى بنه‌مالا رۆژنامه‌ڤان و هونه‌رمه‌ند (محه‌مه‌د عه‌لى ئه‌ترووشى) كر كو تێدا هاتیه : به‌رێزان مالباتا رۆژنامه‌ڤان و هونه‌رمه‌ند (محه‌مه‌د عه‌لى ئه‌ترووشى) ب خه‌م و كۆڤانه‌كا مه‌زن ڤه مه گۆه ل ده‌نگوباسێ وه‌غه‌ركرنا دووماهیێ یا رۆژنامه‌ڤان و هونه‌رمه‌ند (محه‌مه‌د عه‌لى ئه‌ترووشى) بوو، ب ڤێ هه‌لكه‌فتێ سه‌ره‌خوه‌شیێن خوه ئاراسته‌یى هه‌وه‌یێن به‌رێز و كه‌سوكار و بنه‌مالا هه‌وه دكه‌ین و خوه ب هه‌ڤپشكێن خه‌ما هه‌وه دزانین.
رۆژنامه‌ڤان و هونه‌رمه‌ند (محه‌مه‌د عه‌لى ئه‌ترووشى) هه‌ر ژ ده‌ستپێكا سالێن نوتان ل رادیۆ و ته‌له‌ڤزیۆنا دهۆك وه‌كو كادره‌كێ چالاك و دیار ژ روویێ هۆنه‌رى و رۆژنامه‌ڤانى ڤه ده‌ست ب كارى كریه و كار و چالاكى و به‌رهه‌مێن وى ژ ڤى ئالیى ڤه دیار و به‌رچاڤن.
ب چوونا به‌ردلۆڤانیا رۆژنامه‌ڤان و هونه‌رمه‌ند (محه‌مه‌د عه‌لى ئه‌ترووشى) ڤالاهیه‌كا دى كه‌فته د ناڤ بوارێ هونه‌رى و ره‌وشه‌نبیریا كوردى دا، هیڤیخوازین هه‌ڤخه‌مێن ره‌وشه‌نبیران و دلسۆزان و هه‌ڤالێن به‌رهه‌م و كارێن خودێ ژێ رازى ببیته جهێ ڤه‌ره‌ڤاندن و كێمكرنا خه‌مێن هه‌وه، دووباره هه‌ڤخه‌میا خوه دیار دكه‌ین و ژ خودایێ مه‌زن دخوازین سه‌بروهه‌دارێ بده‌ته هه‌موو لایه‌كى و گیانێ خودێ ژێ رازى ب به‌هشتا خوه شاد بكه‌ت.
ئه‌ڤرۆنيوز:
سه‌رۆكێ ده‌سته‌يا پاراستنا ژينگه‌هێ ل هه‌رێما كوردستانێ راگه‌هاند، ژ سه‌رجه‌مێ 200 پالاوگه‌هان دێ 172 پالاوگه هێنه داخستن وتنێ 28 دێ مينن.
هەلۆ عەسكەری، سەرۆكێ دەستەیا پاراستنا ژینگەهێ ل هه‌رێما كوردستانێ دكۆنگره‌كێ رۆژنامه‌ڤانى دا گۆت” سه‌رۆكێ جڤاتا وه‌زيرێن هه‌رێما كوردستانێ كو هه‌ڤده‌م سه‌رۆكێ لژنا بلند يا په‌ترۆلێ وغازێ يه، برياردا ئه‌و پالاوگه‌هێن نه‌قانوونى بهێنه داخستن يێن مه‌رجێن ژينگه‌هێ وساخله‌مى تێدا نه‌بن”.
دياركر ژى” هژمارا وان پالاوگه‌هان 172 پالاوگه‌نه وتنێ دێ 28 مينن”.
گۆت ژى” پێشتر هژماره‌كا پالاوگه‌هان هاتبوونه داخستن، به‌لێ ده‌ست ب كارى يا كرى وهه‌موو كۆمپانيێن په‌ترۆلێ وغازێ يێن هاتينه گازيكرن بۆ ڤه‌كۆلينێ ل دۆر پيسكرنا ژينگه‌هێ وبۆ رێگريكرن ل پيسبوونا ژينگه‌هێ ولێپرسينێ وداخستنا پالاوگه‌هان دو كۆمبوون يێن هاتينه ئه‌نجامدان”.
ئاماژه دا” ئه‌و 28 پالاوگه‌هێن دێ مينن وناهێنه داخستن، چو ژوان مۆله‌تا فه‌رمى نينه، به‌لێ پێدڤيه مه‌رج ورێنمايان بجهبينن ژروويێ ژينگه‌هێ وساخله‌ميێ كو ژلايێ ده‌سته‌يا پاراستنا ژينگه‌هێ 21 مه‌رج بۆ كاركرنا وان پالاوگه‌هان هاتينه دانان تاكو بشێن كارێ پالاوتنێ بكه‌ن”.
خوياكر ژى” ئه‌و پالاوگه‌هێن بووينه ئه‌گه‌رێ پيسبوونا ژينگه‌هێ، پێدڤيه خودانێن وان جهێن وان چاك بكه‌ن”.
ئه‌ڤرۆنيوز:
ل دۆر وان ده‌نگوباسێن ل ڤێ دووماهيێ به‌لاڤبووين سه‌باره‌ت نه‌مانا ڤيزا توركيا بۆ وه‌لاتيێن عيراقى، باليۆزێ توركيا ل عيراقێ رۆهنكرنه‌ك به‌لاڤكر.
فاتح يه‌لدز، باليۆزێ توركيا ل عيراقێ ل به‌رپه‌رێ خوه ل سه‌ر تۆرا جڤاكى يا تويته‌رى به‌لاڤكر” گه‌له‌ك پرسيار دگه‌هنه من ل دۆر گوهۆرين يان نه‌گوهۆرينا سيسته‌مێ ڤيزێ بۆ وه‌لاتيێن عيراقى”.
دياركر ژى” چو گوهۆرين د سيسته‌مێ دانا ڤيزێ دا نه‌هاتيه كرن”.
ئه‌ڤرۆنيوز:
وه‌زاره‌تا په‌روه‌ردێ ل هه‌رێما كوردستانێ دنڤيساره‌كێ دا بۆ جڤاتا وه‌زيرێن هه‌رێمێ داخوازا نووكرنا گرێبه‌ستێن هه‌موو مامۆستايێن گرێبه‌ست بۆ سالا خواندنێ 2018 -2019 دكه‌ت.
وه‌زاره‌تا په‌روه‌ردێ ل هه‌رێما كوردستانێ ب نڤيسارا خوه يا هژمار 10545 ل 27/8/2018 كو ئاراسته‌ى جڤاتا وه‌زيرێن هه‌رێما كوردستانێ كريه، داخوازا نووكرنا گرێبه‌ستێن هه‌موو مامۆستايێن گرێبه‌ست دكه‌ت.
وه‌زاره‌تا په‌روه‌ردێ دوێ نڤيسارا خوه دا داخواز كريه ئه‌و مامۆستايێن گرێبه‌ست ببنه هه‌ميشه‌يى ودياركريه” هه‌كه مامۆستايێن گرێبه‌ست ببنه هه‌ميشه‌يى، دێ وه‌زاره‌ت مه‌زنترين مفاى ژێ وه‌رگريت”.
خانه و ئه‌ندامێن پيرێن لاشى دووباره چالاك دكه‌ت
ئه‌ڤرۆنيوز:
ژێده‌ره‌كێ رۆژنامه‌ڤانى ژ باژێرێ به‌سرا ب ئه‌ڤرۆ نيوز راگه‌هاند كو خوه‌نيشادانين ئه‌ڤرۆ يێن باژێرێ به‌سرا به‌ر ب ئالۆزبوونێ چوون وقوربانى دناڤ خوه‌نيشانده‌ران وهێزێن ئه‌منى دا يێن هه‌ين.
عه‌لى سارى، رۆژنامه‌ڤان ژ باژێرێ به‌سرا بۆ ئه‌ڤرۆنيوز گۆت” ژ ئه‌نجامێ ئالۆزيێن كه‌فتينه دناڤ خوه‌نيشادانا ئه‌ڤرۆ دا، ده‌نگوباس هاتينه به‌لاڤكرن كو دو خوه‌نيشانده‌ر يێن هاتينه كوشتن، به‌لێ ب پشت راستى ڤه دشێم دووپات بكه‌م كو خوه‌نيشانده‌ره‌ك يێ هاتيه كوشتن وناڤێ وى مه‌كى ياسر ئه‌لكه‌عبى يه”.
سارى دياركر ژى” حه‌فت خوه‌نيشانده‌رێن دى ژى ب چه‌كێن هێزێن ئه‌منى هاتينه برينداركرن و10 كه‌س ژ هێزێن ئه‌منى ژى برينداربوون كو ئێك ژ وان ئه‌فسه‌ره‌كێ پله بلنده”.
خوياكر ژى” خوه‌نيشانده‌ران هژماره‌كا ترومبێلێن هێزێن ئه‌منى ژى سوتن وچه‌ندين كه‌ره‌ڤان وخاله‌كا چاڤدێريێ ل ديوانا پارێزگه‌ها به‌سرا”.
ئاشكرا كر ژى” دڤێ خۆله‌كێ دا ئاگر گه‌هشته قاتێ دويێ يێ ديوانا پاريزگه‌ها به‌سرا”.
ئه‌ڤرۆ نيوز:
كۆمسيۆنا بلندا سه‌ربه‌خۆيا هه‌لبژارتن و راپرسيێ ل هه‌رێما كوردستانێ ژڤانێ ده‌سپێكرنا بانگه‌شا هه‌لبژارتنێن په‌رله‌مانێ كوردستانێ بۆ ماوێ شه‌ش رۆژان زێده كر.
شێروان زرار، ئاخفتنكه‌رێ ب ناڤێ كۆمسيۆنا هه‌لبژارتنا د كۆنگره‌كێ رۆژنامه‌ڤانى دا راگه‌هاند كو پتريا ده‌نگێن ئه‌ندامێن جڤاتا كۆمسياران بڕيار دايه ده‌سپێكرنا بانگه‌شا هه‌لبژارتنان بۆ رۆژا سێشه‌مبى 11ى ئيلۆنا 2018ێ بهێته پاشخستن.
بڕيار بوو ئه‌ڤ شه‌ڤه ده‌مژمێر 12:00ى شه‌ڤ كو دبيته 5ى ئيلۆنا 2018ێ بانگه‌شا هه‌لبژارتنان بۆ هه‌لبژارتنێن په‌رله‌مانێ كوردستانێ ده‌سپێكرن.
ئه‌ڤرۆنيوز:
ل دووڤ دووماهى ئامارێن هژمارا په‌رله‌مانتارێن چووينه دناڤ هه‌ردو هه‌ڤپه‌يمانيێن هه‌ڤركيێ دكه‌ن بۆ پێكئينانا مه‌زنترين هه‌ڤپه‌يمانى كو سه‌رۆك وه‌زيران ژ وێ بيت، ديار دبيت كو تنێ ئيك ليستا كوردى چوويه دناڤ رێزێن ئێك ژ وێ هه‌ڤپه‌يمانيێ، ئه‌ندامه‌كێ ده‌وله‌تا قانوونێ ژى بۆ ئه‌ڤرۆنيوز دياردكه‌ت كو هژماره‌كا په‌رله‌مانتارێن ليستا عه‌بادى گه‌هشتينه هه‌ڤپه‌يمانيا مالكى وعامرى.
ئاماره‌كا نوو ئه‌ڤرۆ سێشه‌مبى 4/9/2018 كو ژ په‌رله‌مانێ عيراقێ ده‌ركه‌فتى دياردبيت كو هه‌ڤپه‌يمانيا (چاكسازى وئاڤه‌دانى) يا عه‌بادى وسه‌درى وحه‌كيم وعه‌لاوى 142 په‌رله‌مانتار دناڤ هه‌ڤپه‌يمانيا خوه دا كۆمكرينه وهه‌ڤپه‌يمانيا ( ئاڤه‌دانى) ب سه‌رۆكاتيا مالكى وعامرى 117 په‌رله‌مانتار كۆمكرينه.
بۆ پێكئينانا مه‌زنترين هه‌ڤپه‌يمانى كو ب راگه‌هاندنا وێ ب شێوه‌كێ فه‌رمى ژلايێ سه‌رۆكاتيا په‌رله‌مانى ڤه، ئه‌و هه‌ڤپه‌يمانى دشێت سه‌رۆك وه‌زيران ديار بكه‌ت وبۆ پێكئينانا وێ هه‌ڤپه‌يمانيێ ژى پێدڤى ب 165 كورسيێن په‌رله‌مانى هه‌يه.
دناڤ وان هه‌ردو هه‌ڤپه‌يمانيان دا ديار دبيت كو تنێ ليسته‌كا كوردى بريارا خوه دايه وگه‌هشتيه هه‌ڤپه‌يمانيا (چاكسازى وئاڤه‌دانى) ئه‌وژى ليستا نه‌وه‌ى نوويه كو چار كورسى يێن هه‌ين، هه‌تا نوكه ليستێن پارتى وئێكه‌تيێ وئێكگرتووى وهه‌ڤپه‌يمانى بۆ ديموكراسيێ ودادپه‌روه‌ريێ وكۆمه‌لێ بريار خوه نه‌دايه بۆ چوونا دناڤ هه‌ڤپه‌يمانيه‌كێ دا.
عه‌دنان ئه‌لمه‌ياحى، ئه‌ندامێ ليستا ده‌وله‌تا قانوونێ ب سه‌رۆكاتيا نورى مالكى بۆ ئه‌ڤرۆ نيوز گۆت” ئه‌و هژمارا عه‌بادى وهه‌ڤپه‌يمانێن وى پێشكێشكرى يا راست نينه ونوكه ژ ليستا عه‌بادى 42 ئه‌ندام نه‌ماينه، وپتر ژ 10ئه‌ندامێن وێ ليستێ يێن گه‌هشتينه هه‌ڤپه‌يمانيا ( ئاڤه‌دانى) ب سه‌رۆكاتيا مالكى وعامرى”.
نيشاندان