ئه‌ڤرۆ نيوز، فاتما مزوورى:
سه‌ره‌دانا فه‌رمی یا وه‌زیرێ ده‌رڤه یێ ئه‌مه‌ریكا، مایك پۆمپیۆ ژبۆ كوریا باكوور ب دووماهی هات.
ب گۆره‌يی ئاژانسا یونیهاپی یا كۆریا باشوور، پۆمپیۆ سه‌ره‌دانا خوه ژبۆ پیانگ یۆنگ ب دووماهی ئينا و به‌ره‌ڤ تۆكیۆ برێكه‌فت، هه‌روه‌سا هاتیه راگه‌هاندن كو پۆمپیۆ د ناڤ فرۆكه‌یێ دا به‌رسڤا پرسیارێن رۆژنامه‌ڤانان ل دۆر سه‌ره‌دانا خوه دایه.
پۆمپیۆ راگه‌هاندیه كو كۆمبوونا وی ل گه‌ل به‌رپرسێن كۆریا باكوور ل دۆر ژناڤبرنا چه‌كێن ئه‌تۆمی يا ئه‌رینی بوو، گۆتژی: “ل سه‌ر پشكه‌ك ژ بابه‌تان بۆچوونێن جودا يێن هه‌ين، به‌لێ ل سه‌ر پرانیا بابه‌تان گاڤێن باش مه ئاڤێتنه.
پۆمپیۆ هه‌روه‌سا ئه‌شكه‌را كر كو به‌رپرسێن ئه‌مه‌ریكا و كۆریا باكوور رۆژا پێنجشه‌مبيا بێت ل سنورێ ناڤبه‌را كۆریا باكوور و باشوور كۆمبوونه‌ك ل دۆر راده‌ستكرنا رووفاتێن وان سه‌ربازێن ئه‌مه‌ریكی كو د شه‌رێ كۆریا د سالا 1950ێ ژبۆ سالا 1953 هاتنه كوشتن ئه‌نجام دده‌ن.
ژ ئالیه‌كی دن ڤه به‌رپرسێن بلند د وه‌زاره‌تا ده‌رڤه یا كۆریا باكوور ب ئاژانسا نووچه‌یێن ” كه‌ی سی ئێن ئێ ” راگه‌هانديه كو شاندێ ئهمریكا دخوازيت ئێك لا و ب زۆرێ گڤاشتنان بێخيته سه‌ر ئیداره‌یا كوریا باكوور ب مه‌به‌ستا ژناڤبرنا چه‌كێن ئه‌تۆمی.
وی به‌رپرسی هه‌روه‌سا ته‌كه‌ز ل سه‌ر وێ یه‌كێ كریه كو پێدڤیه پرسا ژناڤبرنا چه‌كێن ئه‌تۆمی ب قۆناغ قۆناغ بكه‌ڤيته د وارێ بجهئينانێ دا.
ئه‌ڤرۆ نیوز ، نه‌وزاد هلۆرى:
سپێده‌هیا ئه‌ڤرۆ هه‌تا پشتى نیڤرۆ رێیا سه‌ره‌كى دناڤبه‌را هه‌ردو پارێزگه‌هێن هه‌ولێرێ و دهۆكێ ل خالا قه‌زا به‌رده‌ره‌ش ژبه‌ر خوه‌نشاندانێن كرێكارێن كۆمپانیه‌كا په‌ترۆلێ هاتبوو گرتن، قایمقامیا قه‌زا به‌رده‌رش ژى دیاركر كو كێشا وان ب ده‌مى هاته چاره‌سه‌ركرن.
ب گۆره‌ى وان پێزانينێن ب ده‌ست ئه‌ڤرۆ نیوز كه‌فتین ، كۆمپانیا په‌ترۆل ئوێل گوتیه كرێكارێن خوه ئه‌م دێ كارێن كۆمپانیا خوه راگرین و ب ڤێ یه‌كێ هه‌موو كرێكارێن خوه ده‌ركرینه و ئه‌ڤ چه‌نده ژى بوویه ئه‌گه‌ر كو كرێكارێن وێ كومپانیێ رابن ب ئه‌نجامدانا خوه‌نيشاندانه‌كێ و رێیا سه‌ره‌كى یا دناڤبه‌را هه‌ولێرێ و دهۆكێ ل نێزیك ناحیا رۆڤیا یا سه‌ر ب قه‌زا به‌رده‌ره‌ش ڤه بگرن وهزاران خه‌لك و ترومبێل هاتبوونه راگرتن.
بوتان شه‌مسه‌دین، ژ راگه‌هاندنا قه‌زا به‌رده‌رش بۆ ئه‌ڤرۆ نیوز گۆت: (قایمقامیا به‌رده‌ره‌ش ل گه‌ل نوونه‌رێن وان كرێكاران ئاخڤتیه و داخوازیێن وان ب نڤیساره‌كێ بۆ پارێزگارێ دهۆكێ ره‌وانه‌كریه و چاڤه‌رێ به‌رسڤا پارێزگارێ دهۆكێ دكه‌ن و نها نه‌رازیبوونا كرێكارێن كوۆمپانیێ يا ب دووماهى هاتیه و رێ ژى هاتیه ڤه‌كرن و كێشا وان ژى به‌روه‌خت هاتیه چاره‌سه‌ركرن)
ب گۆره‌ى پێزانينان كرێكارێن ل وێ كۆمپانیێ كاردكر نێزیكێ 350 كرێكارانه ل هه‌موو پشكێن كۆمپانیێ.
ئه‌ڤرۆ نيوز، فاتما مزوورى:
ده‌سته‌لاتدارێن يابان ئه‌ڤرۆ سپێدێ به‌لاڤكرن كو هژمارا قوربانيێن با و باران و له‌هيان كو باكوور و باشوورێن وه‌لاتى ڤه‌گرتين زێده‌بوويه و گه‌هشتيه 64 كوشيتا و 44 كه‌س ژى د بێ سه‌روشوونن.
ئه‌ڤه د ده‌مه‌كى دايه كو دوهى ژمارا وان كه‌سێن ژيانا خوه ژ ده‌ست داين 39 كه‌س بوو.
هنده‌ك ده‌زگه‌هێن راگه‌هاندنێ ژى به‌لاڤكرينه كو د سێ رۆژێن بۆرى دا ژ ئه‌گه‌رێ بارينا با و بارانان ب كێمى نێزيكى 50 كه‌سان گيانێ خوه ژ ده‌ست دايه و نێزيكى 50 كه‌سێن دژى د بێ سه‌روشوونن.
ئه‌ڤه ژبلى زيانێن ماددى يێن گه‌هشتينه وان ده‌ڤه‌ران، هه‌ر وه‌سان زێده‌ترى مليۆن كه‌سان ژ مال و جهێن خوه ژ به‌ر له‌هيان كوچبه‌ر بووينه.
ئەڤرۆ نیوز ، تۆڤی:
رۆژنامەکا سەر ب رژێما سووریێ ڤە بەلاڤەکریە، کو یەپەگێ بالێ سەربازی یێ پەکەکێ ل رۆژئاڤایێ کوردستانێ،دێ نەفتا وێ پشکا کوردستانێ رادەستی دیمەشقێ کەت.
ئەڤرۆ ئێکشەمبی 8/7/2018 رۆژناما (ئەلوەتەن) یا سووری ژ زارێ ژێدەرەکێ ئیداری یێ خۆجهێ رۆژئاڤایێ کوردستانێ بەلاڤەکریە کو یەپەگە و رژێما سووریێ رێککەفتینە ل سەر هندێ کو رژێما سووریێ دامەزراوێن نەفتێ یێن پارێزگەها حەسەکێ برێڤە ببەت و وێ نەفتێ بۆ خوە بفروشیت.
وی ژێدەری ئاشکرا کریە، کو ل چەند رۆژێن بوریدا شاندەکێ بەرپرسێن رژێما سووریێ سەرەدانا قامیشلۆ کریە و ل گەل یەپەگێ رێککەتینە.
ئەڤرۆ نیوز:
سپێدەھیا ئەڤرۆ رێیا سەرەکی دناڤبەرا ھەردوو پارێزگەھێن ھەولێر و دھۆک ل خالا قەزا بەردەرەش ژبەر خوپێشاندانێن کرێکارێن کومپانیەکا پەترۆلێ ھاتیە گرتن، و ھەتا نھا ژی نەھاتیە ڤەکرن.
ب گورەی ئەوان زانیاریێن کو دەست ئەڤرۆ نیوز کەفتین ، کومپانیا پەترول ئوێل گوتیە کرێکارێن خوە ئەم دێ کارێن کومپانیا خوە راگرین و بڤێ یەکی َھەموو کرێکارێن خوە دەرکرینە و ئەڤ یەک ژی بویە سەدەم کو کرێکارێن وێ کومپانیێ رابن ب ئەنجامدانا خوپێشاندانەکێ و رێیا سەرەکی یا دناڤبەرا ھەولێر و دھۆک ل نێزیک ناحیا روڤیا یا سەر ب قەزا بەردەرەش بگرن وھزاران خەلک و ترومبێل ھاتینە راگرتن.
ب گورەی زانیاریان کرێکارێن کو ل وێ کومپانیێ کاردکر نێزیکێ 350 کرێکارانە ل ھەموو بەشێن کومپانیێ.
بوتان شه‌مسه‌دین ژ راگه‌هاندنا قه‌زا به‌رده‌رش بو ئه‌ڤرۆ نیوز گۆت: (قایمقامیه‌تا به‌رده‌ره‌ش ل گه‌ل نونه‌رێن وان ئاخفتینه و داخوازیێن وان ب نڤیساره‌كێ بو پارێزگارێ دهۆكێ ره‌وانه‌كریه و چاڤه‌رێ به‌رسڤا پارێزگارێ دهۆكێ دكه‌ن، و نها نه‌رازیبونا كرێكارێن كومپانیێ دوماهى هاتیه و رێك ژى هاتیه ڤه‌كرن).
ئەڤرۆ نیوز ، زنار تۆڤی:
كۆمسیۆنا بلند یا سه‌ربه‌خۆ یا هه‌لبژارتن و راپرسیێ ل هه‌رێما كوردستانێ تۆماره‌كا نوو یا ده‌نگده‌ران بۆ هه‌لبژارتنێن په‌رله‌مانێ كوردستانێ چێكریە و ده‌نگده‌رێن مادێ 140 ژ تۆمارێ ده‌رخستن.
راگه‌هاندنه‌كا كۆمسیۆنا هەرێما کوردستانێ دیارکریە، کو شڤێدی تۆمارا نوویا ده‌نگان بۆ هه‌لبژارتنێن په‌رله‌مانێ كوردستانێ ب دوماهی هاتیه و بۆ چاپێ هاتیه هنارتن. هەروەسا تۆمارا نوو ژ تۆمارا كۆمسیۆنا هه‌لبژارتنێن عیراقێ یا جۆدایه و هژمارا دروست یا ده‌نگده‌ران تێدا هاتیه رێزكرن و ناڤێن دوباره و مری و ئاواران ژی هاتینه ده‌رخستن.
هه‌روه‌سا كۆمسیۆنێ ناڤێن ده‌نگده‌رێن مادێ 140 ژ تۆمارا نوو ده‌رخستیه و بریاره پشتی چاپكرنێ، كۆپیه‌كا تۆمارێ بۆ رایا گشتی و ئالیێن سیاسی یێن هه‌رێمێ بهێته هنارتن.
ئه‌ڤرۆ نيوز، فاتما مزوورى:
په‌يڤدارێ هه‌ڤپه‌يمانيا ئۆپۆزسيۆنا سوريێ ئه‌نه‌س عه‌بدى د كرنگره‌كێ رۆژنامه‌ڤانى دا ل باژێرێ سته‌مبۆلێ راگه‌هاند كو بنپێكرنا رێكه‌فتنا ل باشوورێ سوريێ د زێده‌بوونێ دايه و رۆسيا ل دووڤ سوزێن خوه نه‌ده‌ركه‌فت.
عه‌بدى ئاشكه‌را ژى كر كو ژ ئه‌نجامێ شه‌رێ كو ل باشوورێ سوريێ هه‌يى ب هزارا سڤيل كۆچبه‌رى سه‌ر سنوران بووينه، د ده‌مه‌كى دا كو پارێزگه‌ها ده‌رعا چو شه‌رێن وه‌سا لێ نه‌هاتينه كرن.
داخواز ژى ژ جڤاكێ نێڤده‌وله‌تى كر كو ب ئه‌ركێن خوه رابن و شه‌رى ب راوه‌ستينن و ژ وه‌لاتێن جيهانێ خواست كو فشاران ل سه‌ر رۆسيا زێده كه‌ن دا كو بڕيارێن خوه ب جهـ بينيت و به‌رسينگێ كوشتنا سڤيلان بگريت.
ژ 19 خزيرانێ و هه‌تا نها رژێما سوريا ب پشته‌ڤانيا رۆسيا و ميليشياتێن ئيرانى، ده‌ست ب ئۆپه‌راسيۆنه‌كا به‌رفره‌هـ ل دژى هێزێن ئۆپۆزسيۆنێ ل ده‌رعا كريه.
ب گۆره‌ى ئامارێن نه‌يێن فه‌رمى هه‌تا نها 10 هزار وه‌لاتيێن وێ پارێزگه‌هێ ل سه‌ر سنورێ ئوردن و ئسرائيلێ كۆچبه‌ر بووينه.
ئه‌ڤرۆ نيوز، فاتما مزوورى:
سه‌رۆكێ توركيا ره‌جه‌ب ته‌يب ئه‌ردوگان جاره‌كا دى گه‌ف ل په‌كه‌كێ و يه‌په‌گێ كرن و راگه‌هاند كو ل رۆژئاڤايێ كوردستانێ و هه‌تا قه‌نديل ئه‌و دێ شه‌رێ په‌كه‌كێ كه‌ن.
ئه‌ردوگان د په‌رله‌مانێ توركيا دا بۆ په‌رله‌مانتارێن پارتيا خوه گۆت: “مه ل ناڤ سنورێن توركيا په‌كه‌كه يا شكاندى و ئه‌م دێ ژ ده‌رڤه‌يى سنورێن توركيا ژى دێ شه‌رى كه‌ين هه‌تا په‌كه‌كێ ب دووماهى بينين”.
ئه‌ردوگان خۆيا ژى كر كو ل رۆژئاڤايێ كوردستانێ گرێ سپى هه‌تا قامشلۆ ل عيراقێ ژى ل شنگال و قه‌نديلى ئه‌و دێ ب زۆرى شه‌رى كه‌ن.
ژ لايه‌كێ دى ڤه ئه‌ردوگان گازى جه‌هه‌پێ كر و ژێ خواست كو پێداچوونه‌كێ د په‌يوه‌نديێ، خوه ل گه‌ل هه‌ده‌پێ دا بكه‌ن و گۆت: “په‌كه‌كه ل باكوورێ كوردستانێ ل مه‌يدانا شه‌رى ته‌نگاڤ بوويه و دڤێت سياسه‌تا خوه ب هێز بكه‌ت”.
گۆتژى: “هه‌ده‌په ب خێرا ده‌نگێن جه‌هه‌پێ چوو د ناڤ په‌رله‌مانى دا و ب سياسه‌تا خوه پشته‌ڤانيا په‌كه‌كێ دكه‌ن”.
ئەڤرۆ نیوز ، زنار تۆڤی:
نوونەرێ ئیرانێ ل ئۆپک راگەهاندیە،کو بەرپرسیارەتیا بلندبوونا نهایێ نەفتێ،ب تایبەتی ل ویستگه‌هێن دابه‌شكرنا سوتەمەنیێ ل ئهمریكا، ب تنێ د ستوویێ دۆنالد ترامپی دایە.
د لێدوانەکێدا بۆ ئاژانسا نووچەیێن رویته‌رز، زارى حسێن کازمپوور ئەردەبێلی، نوونه‌رێ ئیرانێ ل رێكخراوا ئۆپك راگه‌هاندیە، کو بهایێ نەفتێ لڤان نێزیکان ب كاریگه‌ریا سیاسەتا ترامپی سەرۆکێ ئەمریکا، هەر به‌رمیلەک دێ گەهیتە ١٠٠ دۆلاران.
هەروەسا گوتیە،بەرپرسیارەتیا بلندبوونا بهایێ نەفتێ زێدەتر ژ ئاستێ پێدڤی یێ نەفتێ ژ لایێ هەموو بکارهێنەران و ب تایبەتی ل بنگەهێن دابه‌شكرنا سووتەمەنیێ ل ئهمریكا، ب تنێ د ستوویێ ترامپی دایە و دڤێت چاڤەرێی بهایێ ١٠٠ دۆلاری یێ نەفتێ ببین.
سەرۆکێ ئەمریکا د نووترین تویتا خوە دا ل تویته‌ری ئۆپک ب بلندکرنا بهایێ نەفتێ و سووتەمەنیێ تاوانبارکریە، داخواز ژ عەرەبستانا سعودیه و هەڤپەیمانێن خوە کریە کو هایکاریا واشنتۆن بكه‌ن و بەرهەمئینانا نەفتا خوە زێدەتر لێ بكه‌ن.
نيشاندان