ئه‌ڤرۆ نيوز:

نوری بریمۆ سەرۆکێ نوونەراتیا ئەنجوومەنێ نیشتیمانی یێ کوردی ل ھەرێما کوردستانێ بەحسێ مەترسیێن شەری ئدلبێ دکەت و بۆ رۆژناما ئەڤرۆ دیار کر کو ئیرادەیەکا نێڤدەولەتی ھەیە بۆ شەرێ ئدلبێ و بابەتێ ھێرشا ل سەر باژێرێ ئدلبێ ئێکلا بوویە، ئیدی شەرێ ئدلبێ دێ ھەر ھێتە کرن، ژ بەر کو روسیا، ئەمریکا، تورکیا و ئیران ھەموو ھەڤکاریا ئێکدو دکەن ژ بۆ نەھێلانا رێکخراوا تیرۆرستی یا قاعیدە و ھەموو ئەو گرۆپێن تیرۆرستی یێن نھا د ناڤ ئدلبێ دا کۆمبووینە.

ل دۆر زیانێن شەرێ ئدلبێ بۆ کوردان ژی ناڤبری دیار کر کوردان چو پەیوەندی ب شەرێ ل ئدلبێ ڤە نینە، بەلێ پێشبینی دھێتە کرن چەکدارێن پەیەدێ دگەل لەشکرێ رژێما ئەسەدی بکەڤنە د ناڤا ئدلبێ دا و ئەڤێ چەندێ ژی دێ زیانێن زۆر بۆ کوردان ھەبیت، ژ بەر کو تیرۆرست دێ ببنە دوژمنێ کوردان و دێ ھێرشی رۆژئاڤایێ کوردستانێ کەن. یا دی پرانیا عەرەبێن ھشکباوەر یێن نھا ل ئدلبێ ئاکنجینە دێ ئاوارەی عەفرینێ بن.

ئه‌ڤرۆ نيوز:

جان لودریان وەزیرێ دەرڤە یێ فرەنسا د داخۆیانیەکی دا راگەھاند کو ئەو قەبوول دکەن بەشار ئەسەد د شەرێ ناڤخوە دا ل ھەمبەر کۆمێن چەکدار سەرکەڤتن بدەست خستیە لێ نەشیایە ئاشتیێ بجە بکەت و گۆت: (راستە ئەسەد د شەرێ ناڤخوە یێ سووریێ دا سەرکەڤت لێ یا گرنگ ئەڤە کو چارەکا سیاسی بھێتە دیتن و بۆ ڤێ یەکێ ژی پێدڤیا ئەسەدی ب جڤاکێ نێڤدەولەتی ھەیە و ئەم ژی دخوازین قەیرانا ل سووریێ نەمینیت و خەلکێ سووریێ ڤەگەرنە ڤە مالێن خوە و د بن سەرپەرەشتیا نەتەوێن یەکگرتی دا پێنگاڤێن مەزن بۆ سووریا نوو بھێنە ھاڤێتن).

وەزیرێ دەرڤە یێ فرەنسا د پشکەکا دی یا ئاخڤتنا خوە دا ژی راگەھاند کو ئەو دخوازن ل نەتەوێن یەکگرتی دەست ب قۆناغەکا نوو بکەن و ب دانوستاندنان بناغەکێ بۆ سووریا نوو ئاڤا بکەن و گۆت: (سووریا بەرێ یا مەرکەزی دڤێت نەمینیت و سیستەمەکا دیمۆکراتیک بۆ سووریا نوو بھێتە دەستنیشان کرن و ھەموو نەتەوێن جودا بگەھنە مافێن خوە یێن رەوا و دستوورەکی نوو ب پشکداریا ھەموو ئالیان بھێتە ئامادە کرن).

ناڤھاتی راگەھاند ژی کو ھەتا نھا شەر ل سووریێ بەردەوام دکەت و ل دووڤ ھندەک زانیاریان رژێما ئەسەد دخوازیت ئۆپەراسیۆنەکا مەزن ل ئدلبێ ساز بکەت و گۆت: (ھەکە ئەسەد ئدلبێ ژی کۆنترۆل بکەت دیسان ئالۆزی ب داوی نابن).

ئه‌ڤرۆ نيوز:

مامۆستایەکێ زانکۆیێ دیار دکەت کو ئەمریکا نھا پتر ژ ھەر دەمەکێ پێدڤی کوردانە، چونکو ل رۆژھەلاتا ناڤین روسیا، ئیران، تورکیا و سووریا دژبەریا ئەمریکا دکەن و دخوازن بەرەیەکێ ل دژی ئەمریکا دروست بکەن، ئەمریکا ژی بۆ ستراتیژیا خوە پێدڤی ب کوردێن عیراقێ و سووریێ یە و دڤێت کورد ژی خواندنەکا راست بۆ رەوشا نھا یا سیاسی بکەن.

کەریم ئەحمەدی مامۆستایێ زانستێن سیاسی ل رۆژھەلاتێ کوردستانێ بۆ رۆژناما ئەڤرۆ دیار کر کو دڤێت کورد خواندنەکا راست بۆ سیاسەتا نھا ل رۆژھەلاتا ناڤین بکەن، راستە دەمێ ریفراندۆمێ و روودانێن ل کەرکووکێ ئەمریکا پشتەڤانیا کوردان نەکر، لێ ئەمریکا دوژمناتیا کوردان ژی نەکر، چونکو ئەمریکا نەدخواست ھەرێما کوردستانێ ژ عیراقێ جودا ببیت و نەدخواست عیراق ھەموو بکەڤیتە ژێر کۆنترۆلا ئیرانێ و گۆت: (وی دەمی ئەمریکا دخواست ب رێیا ھەرێما کوردستانێ کۆنترۆلا عیراقێ بکەت و نھا ژی ھەمان سیاسەتێ برێڤە دبەت، نھا رۆژانە نوونەرێ سەرۆکێ ئەمریکا سەرەدانا ھەرێما کوردستانێ دکەت و دخوازیت کورد د کابینا نوو یا حوکمەتا عیراقێ دا پشکدار بن، ئەمریکا پێدڤی کوردانە و ژ بەر ھندێ ژی ھەموو بزاڤەکێ دکەت کو کورد رۆلەکێ کاریگەر د کابینا نوو یا عیراقێ دا بگێرن و ژ قەستان ئەمریکا نابێژیت مە دڤێت کوردستانەکا بھێز ل عیراقێ ھەبیت).

مامۆستایێ زانکۆیێ ئەو یەک ژی دیار کر کو نھا پەیوەندیێن ئەمریکا ل گەل ئیرانێ و تورکیا زۆر خرابن، بەری نھا تورکیا ھەڤپەیمانێ ئەمریکا بوو لێ نھا رەوش ب تەمامی ھاتیە گوھۆڕین، ژ بەر ھندێ ژی مەترسی ل سەر بەرژەوەندیێن ئەمریکا ل رۆژھەلاتا ناڤین ھەنە و کورد ژی ل ھەر چار وەلاتێن رۆژھەلاتا ناڤین کارتەکا بھێزن بۆ ئەمریکا و ژ بەر ھندێ ژی دڤێت کورد نھا ل ھەرێما کوردستانێ و رۆژئاڤایێ کوردستانێ ژی بزاڤێ بکەن کو پەیوەندیێن خوە ل گەل ئەمریکا باشتر بکەن و خوە ژ ئەمریکا دوور نەکەن و گۆت: (ئەمریکا رۆژانە چەکێن گران و سڤک رەوانەی رۆژئاڤایێ کوردستانێ دکەت و چەندین بنگەھێن سەربازی ل وێرێ ئاڤا کرینە، ئەمریکا ژ قەستان سەرمایەگوزاریێ ل رۆژئاڤایێ کوردستانێ ناکەت، ئەمریکا ستراتیژیەکا دەمدرێژ بۆ سووریێ ھەیە و کورد ژی ھەڤپەیمانێ سەرەکی یێ ئەمریکا نە ل سووریێ، ژ بەر ھندێ ژی دڤێت کورد ل رۆژئاڤایێ کوردستانێ بزاڤێ بکەن کو پتر پشتەڤانیا ئەمریکا بدەستڤە بینن، چونکو ھەر مەترسیەک ل سەر کوردان ھەبیت تنێ ئەمریکا دشێت وان بپارێزیت).

ناڤھاتی د دووماھیا ئاخڤتنا خوە دا ئەو یەک ژی دیار کر کو ستراتیژیا نوو یا ئەمریکا بۆ رۆژھەلاتا ناڤین ژ چەندین خالان پێک دھێت کو یا ھەری گرنگ ژی لاوازکرنا رۆلێ تورکیا و ئیرانێ یە و ژ بەر ھندێ ژی نھا دەست ب سزادانا ھەر دو وەلاتان کریە، رەنگە سبێدێ پەیوەندیێن تورکیا و ئەمریکا ئاسایی ببن، لێ ئەو یەک رامانا ھندێ نادەت کو چو ناکۆکی د ناڤبەرا ھەر دو وەلاتان دا نەماینە، دڤێت ئەم باش بزانین کو سیاسەتا ئەردۆگانی ب ھەموو رەنگەکێ ل دژی بەرژەوەندیێن ئەمریکا یە و ئەمریکا ژی ل گۆر ھندێ پیلانێن خوە ل دەڤەرێ برێڤە دبەت و کورد ژی دشێن ببنە ھێزەکا کاریگەر و گۆت: (د سیاسەتێ دا رەش و سپی نینە، تنێ بەرژوەندی ھەنە و دڤێت ھێزێن کوردی ژی باش بزانن کا دێ چاوا شێن بەرژەوەندیێن خوە بپارێزن و ژ بەر ھندێ ژی دڤێت کورد خواندنەکا راست بۆ روودانێن نھا ل رۆژھەلاتا ناڤین بکەن).