ئه‌ڤرۆنيوز:

هێمن هه‌ورامى، ئه‌ندامێ سه‌ركردايه‌تيا پارتى ديموكراتى كوردستان ل دۆر ئالايێ كوردستانێ وريفراندۆمێ به‌رسڤا وه‌زيرێ ده‌رڤه‌يێ ئيرانێ دده‌ت.

هێمن هه‌ورامى دبه‌رپه‌رێ خوه‌ ل سه‌ر تۆرا جڤاكى يا فه‌يسبووكى به‌لاڤكر” ل رۆژا 2/9/2018 ل به‌رده‌م په‌رله‌مانێ وه‌لاتێ خوه‌، وه‌زيرێ ده‌رڤه‌يێ ئيرانێ، محه‌مه‌د جه‌واد زه‌ريف، ل دۆر ئالايێ كوردستانێ، چه‌ند بابه‌ته‌ك تێك هه‌لكرن، گه‌له‌ك جاران خه‌لكێ نه‌شاره‌زا وبه‌رچاڤ ته‌نگ وكين ددل دا، داخۆيانى وده‌ربرينێن بێ سه‌روبه‌ر دده‌ن وكه‌س لێ ناگريت”.

گۆت ژى” به‌لێ جهێ حێبه‌تيێ يه‌ مه ‌باوه‌رنه‌دكر، وه‌زيرێ ده‌رڤه‌يێ ئيرانێ كو ب كه‌سه‌كێ دبلوماتكار وئه‌كاديمى وب رێز يا ناڤداره‌، وان جۆره‌ داخۆيانى وئاخڤتنان ژێ گوهلێبين”.

هێمنى خوياكر” دانانا ئالايێ كوردستانێ بۆ هه‌ر كورد وكوردستانيه‌كى، جهێ سه‌ربلندى وشانازيه‌كا مه‌زنه‌، ل دۆر وێ چه‌ندێ كو سه‌رێ خوه‌ بۆ ئالايێ كوردستانێ نه‌چه‌مانديه‌ د رێ وره‌سمێن ئينانا ته‌رمێ رحمه‌تى مام جه‌لالى، به‌رى هه‌ر تشته‌كى پێدڤى بوو وه‌زيرێ ده‌رڤه‌يێ ئيرانێ زانيبا، هه‌موو پێرابوونێن رێ وره‌سمێن ئينانا ته‌رمێ مام جه‌لالى، بنه‌مالا وى ژى به‌رپرس بوو، نه‌ سه‌رۆك بارزانى”.

زێده‌تر دبێژيت” سه‌باره‌ت ريفراندۆمێ، مافه‌كێ سروشتى يه‌ هه‌ر ملله‌ته‌ك دچارچۆڤێ برياردانێ ل مافێ چاره‌نڤيسى ب شێوه‌كێ ئاشتيانه‌ وديموكراسيانه‌ وكاره‌كێ دروست وره‌وايێ گه‌لێ كوردستانێ بوو، هه‌كه‌ يا شاش بايه‌، گه‌لێ كوردستانێ ب 93% ده‌نگ ب به‌لێ بۆ سه‌ربخوه‌يا كوردستانێ نه‌ددا، ئه‌وا شاش ئه‌وبوو، دژايه‌تيا وێ پرۆسا ئاشتيخواز وديموكراسيانه‌ يا گه‌لێ كوردستانێ بوو”.

هێمن هه‌ورامى دبه‌رسڤا خوه‌ دا بۆ وه‌زيرێ ده‌رڤه‌يێ ئيرانێ دبێژيت” هه‌رچه‌نده‌، ساله‌ك ل سه‌ر ريفراندۆمێ يا بۆرى و يا سه‌يره‌ ل ڤى ده‌مى، بيرا وه‌زيرێ ده‌رڤه‌يێ ئيرانێ دهێت وبه‌حسێ ڤى بابه‌تى د ڤى ده‌مى دا بكه‌ت وب ڤى شێوه‌ى وده‌ربرينا هه‌لويستێ نه‌ره‌وا  يێ هوسا به‌رامبه‌ر خه‌لكێ كوردستانێ، ب پشت راستى ڤه‌ كێشێن ناڤخوه‌يى يێن ئيرانێ چاره‌سه‌ر ناكه‌ت وئه‌م ل وێ باوه‌رێ نه‌بووين گوه ل ڤان جۆره‌ داخۆيانى وده‌ربرينا بين ژ وى”.

ئه‌ڤرۆنيوز:

په‌يڤدارێ پارتى ديموكراتى كوردستانێ وئه‌ندامێ مه‌كته‌با سياسى، مه‌حمود محه‌مه‌د، راگه‌هاند، پارتى ل گه‌ل هه‌لبژارتنه‌كا پاقژ وبێ كێشيه‌ وئاشكراكر ژى كو هنده‌ك لايه‌ن ترس يا هه‌ى پارتى ده‌نگێن زۆر ب ده‌ستڤه‌بينيت.

مه‌حمود محه‌مه‌د زێده‌تر گۆت” هه‌موو  پێرابوونێن قانوونى بۆ هه‌لبژارتنان يێن هاتينه‌ ئه‌نجامدان وچو كێشه‌كا قانوونى وجڤاكى ل به‌رده‌م ڤێ پرۆسێ دا نينه‌ بۆ وێ چه‌ندێ رێگر بيت بۆ ئه‌نجامدانا وان، ئانكو هوكار دێ چه‌ بيت؟ كو كاديرێن ئێكه‌تى نيشتمانى كوردستان وگۆران  ل كه‌نالێن ته‌له‌ڤزيۆنى به‌حسێ وێ چه‌ندێ دكه‌ن كو ترسا وان ئه‌وه‌ پارتى ده‌نگێن زۆر ب ده‌ستڤه‌ئينيت”.

په‌يڤدارێ پارتى گۆت ژى” باشه‌ هه‌لبژارتن دێ بۆچى هينه‌ ئه‌نجامدان؟ هه‌موو بزاڤێ دكه‌ن ده‌نگێن زۆرتر بينن، له‌وما چو هێجه‌ته‌كا مه‌نتيقى بۆ پاشخستنا هه‌لبژارتنان ناهێته‌ ديتن وئه‌نجامدانا وان د به‌رژه‌وه‌نديا خه‌لكێ كوردستانێ دايه‌ وپێشبينى ژى دهێته‌ كرن كو هه‌لبژارتن بهێنه‌ ئه‌نجامدان”.

دياركر” هه‌رچه‌نده‌ پێدڤى بوو ل بوهارا بۆرى هه‌لبژارتن هاتبانه‌ ئه‌نجامدام، به‌لێ وى ده‌مى پتريا لايه‌نان داخوازا درێژكرنا په‌رله‌مانى كر، ئه‌م ژى وه‌كو پارتى رازى نه‌بووين ب وێ چه‌ندێ، به‌لێ ژبه‌ر پاراستنا ئێكرێزيا ناڤمالا كوردستانێ وژبه‌ر وێ چه‌ندێ نه‌بێژن پارتى ب تنێ بۆچوونا جودا يا هه‌ى، پێ رازى بووين”.

ئاشكراكر ژى” ئه‌وێن وان هه‌موو گازندان دكه‌ن، خه‌لك پێ سه‌ردا دبر وبه‌حسێ نه‌ زه‌لالى ونه‌ديار ونه‌ رۆهنيا چه‌ندين تشتان دكر، بلا ب فه‌رموون هه‌لبژارتنه‌كا نوو بكه‌ين وپه‌رله‌مانه‌كێ نوو ژلايێ خه‌لكى ڤه‌ بهێته‌ هه‌لبژارتن وحوكمه‌ت وكابينا نوو بهێته‌ دامه‌زراندن تاكو پشته‌ڤانيا سياسى وجڤاكى يا ب هێز هه‌بيت”.

خوياكر ژى” پێدڤيه‌ ئه‌م هه‌موو بزاڤێ بكه‌ين رێ بۆ ئه‌نجامدانا هه‌لبژارتنان خوه‌ش بكه‌ين تاكو ده‌ستهه‌لاتێن سه‌رانسه‌رى كوردستانێ بهێنه‌ بجهئينان وببيته‌ حوكمه‌تا سه‌راسنسه‌رى كوردستانێ، هه‌روه‌سا ئه‌ڤ زۆن وزۆنكاريه‌ ژى نه‌مينيت كو تاكو نوكه‌ ژى هه‌ر يا ماى”.

په‌يڤدارێ پارتى زێده‌تر بۆ باسنيوز گۆت” پارتى ل گه‌ل ئه‌نجامدانا هه‌لبژارتنه‌كا پاقژ وبێ كێشه‌يه‌، ژبه‌ركو جارا بۆرى زيان گه‌هشتێ، ب تايبه‌ت ل سلێمانيێ ومووسلێ، نيگه‌رانى هه‌بوو، بۆ نه‌كو مه‌رج يێن هه‌ين وپێدڤيه‌ ره‌وشه‌كا گه‌نجاى بهێته‌ دروستكرن، هه‌موو وه‌كو ئێك ده‌نگده‌رێن خوه‌ ببه‌نه‌ سه‌ر سندووقێن ده‌نگدانێ وده‌نگ بده‌ن وچو لايه‌نه‌ك ده‌ست بۆ كارێ نه‌ره‌وا وسه‌خته‌كاريێ نه‌به‌ت”.

ئه‌ڤرۆنيوز:

سياسه‌تمه‌دارێ ناڤدارێ كورد مه‌حموود عوسمان راگه‌هاند، پشتى دو ليستێن شيعى هاتينه‌ دياركرن، كورد يێن بووينه‌ ئێكلاكه‌ر وهه‌كه‌ كورد پشته‌ڤانيێ ل هه‌ر ليسته‌كا ژوان بكه‌ن، ئه‌و ليسته‌ دێ بيته‌ مزنترين ليستا په‌رله‌مانى، له‌وما پێدڤيه‌ كورد ژى ل دووڤ به‌رژه‌وه‌نديا خوه‌ پشته‌ڤانيێ ل ليسته‌كێ بكه‌ن.

هه‌ر ئێك ژ به‌ره‌يێ سائيرون وبه‌ره‌يێ فه‌تح كو هه‌ردو شيعه‌نه‌، مه‌زنترين ليستا په‌رله‌مانى راگه‌هانديه‌ ونوكه‌ تنێ كورد ماينه‌ خوه‌ ئێكلابكه‌ن، كو ئه‌وژى دانوستاندنێن به‌رده‌وام دانه‌ ل گه‌ل لايه‌نان وهێشتا بريارا دووماهيێ نه‌دايه‌.

مه‌حمود عوسمان بۆ مالپه‌رێ فه‌رمى يێ پارتى ديموكراتى كوردستان گۆت” كورد دێ بنه‌ ئێكلاكه‌ر كا چ ليست دێ بيته‌ مه‌زنترين ليستا په‌رله‌مانى تاكو حوكمه‌تا نوو پێك بينيت، له‌وما كورد پشته‌ڤانيێ ل كيش ليستێ بكه‌ت، ئه‌و دێ بيته‌ مه‌زنترين ليست”.

دياركر” پێدڤيه‌ كورد ل دووڤ به‌رژه‌وه‌نديا خوه‌ مامه‌لێ بكه‌ت وكيش ليست زێده‌ترين داخوازيێن كوردان بجهبينيت، پشته‌ڤانيێ ل وێ ليستێ بكه‌ن، ب تايبه‌تى داخوازيێن گرێداى ده‌ڤه‌رين كوردستانى وكه‌ركووكێ ونابيت ل بن چو فشاره‌كێ پشته‌ڤانيێ ل ليسته‌كێ بكه‌ن، چونكى ده‌مێ 15 سالايه‌ گوه ل وه‌لاتان دگرين وچو بۆ كوردان نه‌كريه‌”.