ئه‌ڤرۆنيوز:
عه‌بدولا ئه‌لزه‌يدى، ئه‌ندامێ شاندێ دانوستاندكارێ ره‌وتێ حكمه ب سه‌رۆكاتيا عه‌مار حه‌كيم كو ئه‌و ره‌وته پشكه‌كه ژ هه‌ڤپه‌يمانيا په‌رله‌مانى يا مه‌زن ئه‌وا به‌رى ده‌مه‌كێ كێم هاتيه راگه‌هاندن، پشكه‌كا دانوستاندنان ل گه‌ل شاندێ كوردى ل به‌غدا ئاشكرا دكه‌ت.
عه‌بدوللا ئه‌لزه‌يدى، ل دووڤ سومه‌ريه نيوز، گۆت” كۆمبوونا شاندێ كوردى ل گه‌ل شانده‌كێ هه‌ڤپه‌يمانيا مه‌زن هاته كرن وكوردان دو كاخه‌ز پێشكێشكرن كو ئيك ژوان پرنسيبێن گشتى بوون ويا دى ميكانيزمێن بجهئينانا كاخه‌زا ئيكێ بوون”.
گۆت ژى” كاخه‌زا ئێكێ يا شاندێ كوردى پرسێن دستوورى بوون كو پێدڤيه به‌رى ده‌مه‌كێ درێژ چاره‌سه‌رى بۆ هاتبان ديتن ئه‌وژى بجهئينانا مادێ 140 يێ دستوورى وده‌ركرنا قانوونێن په‌ترۆلێ وغازێ وجڤاتا فيدرالى ونه‌هێلانا گه‌نده‌ليێ ولهه‌ڤهاتنێ وهه‌ڤپشكيێ”.
ئاماژه دا” كاخه‌زا دويێ به‌حسێ ميكانيزمێن بجهئينانا ديتنا كوردان د كاخه‌زا ئێكێ دكر”.
خوياكر ژى” هه‌ڤپه‌يمانيا مه‌زن دێ كاخه‌زا ئيكێ يا كوردان ب شێوه‌كێ هووربين ڤه‌خوينيت ب مه‌ره‌ما به‌رسڤدانا لايه‌نێ كوردى ب زووترين ده‌م”.
دياركر ژى” شاندێ كوردى ئه‌ڤرۆ ئێكشه‌مبى سه‌ره‌دانا سه‌رۆكێ ره‌وتێ حيكمه عه‌مار حه‌كيم كر ودوێ كۆمبوونێ دا شاندێ كوردى ژ ئاخڤتنين عه‌مار حه‌كيم هه‌ست ب هه‌بوونا پرۆژه‌كێ باش كر كو دێ بيته چاره‌سه‌رێ دروست يێ كێشان ب رێيا وێ هه‌ڤپه‌يمانيا مه‌زن ئه‌وا دێ هێته دروستكرن”.
ئاشكرا كر ژى” مه ب شاندێ كوردى راگه‌هاند كو هژمارا په‌رله‌مانتارێن هه‌ڤپه‌يمانيا مه‌زن دگه‌هيته 160 په‌رله‌مانتاران ومه بۆ دياركر كو مه حه‌ز نينه كۆمبوونا سوباهى يا په‌رله‌مانى بهێته پاشخستن وه‌كو رێزگرتنه‌ك ل دستوورى ول دووڤ راسپاردێن مه‌رجه‌عيه‌تا بلند وداخوازيێن جادێ ل دۆر ب له‌زكرنێ دپێكئينانا حوكمه‌تێ دا ب مه‌ره‌ما پێشكێشكرنا خزمه‌تگوزاريان”
گۆت ژى” شاندێ كوردى حه‌زا خوه دياركر كو ئه‌و ژ دامه‌زرێنه‌رێن هه‌ڤپه‌يمانيا مه‌زن بن، له‌وما ده‌رگه‌ه يێ ڤه‌كريه بۆ كوردان وبۆچوونێن مه ووان پتر يێن نێزيكى هه‌ڤدو بووين ووان حه‌ز يا هه‌ى بگه‌هنه هه‌ڤپه‌يمانيا مه‌زن پشتى گره‌نتيێن راسته‌قينه ديتين كو داخوازيێن وان بهێنه بجهئينان ونه‌هێنه پشت گوه هاڤێتن”.
نيشاندان