ئه‌ڤرۆنيوز:

سه‌رۆك وه‌زيرێن هه‌رێما كوردستانێ، نێچيرڤان بارزانى، ئه‌ڤرۆ پێنجشه‌مبى 5/7/2018 پێشوازى ل ئه‌مين عه‌واد به‌رپرسێ رۆژهه‌لاتا ناڤه‌راست وباكوورێ ئه‌فريقيا ل كۆمسيۆنا بلند يا په‌نابه‌ران يا سه‌ر ب نه‌ته‌وێن ئێكگرتى ڤه‌ UNHCR وبرۆنۆ گيدۆ به‌رپرسێ وێ كۆمسيۆنێ ل عيراقێ وشاندێ دگه‌لدا كر.

دديداره‌كێ دا عه‌وادى سوپاسيا خه‌لك وحوكمه‌تا هه‌رێما كوردستانێ كر بۆ پێشوازيكرن ودابينكرنا جهێ حه‌واندنێ بۆ ئاواره‌ وپه‌نابه‌ران وپێشكێشكرنا هاريكارى وخزمه‌تكاريێن پێدڤى بۆ وان، هه‌روه‌سا روناهى خسته‌ سه‌ر پلانا كۆمسيۆنا په‌نابه‌ران ب مه‌ره‌ما ڤه‌گه‌راندنا ئاواران بۆ سه‌ر جهێن وان وباشتركرنا ژيانا په‌نابه‌ران دناڤ كه‌مپان دا.

ژلايێ خوه‌ڤه‌ نێچيرڤان بارزانى، سه‌رۆك وه‌زيرێن هه‌رێما كوردستانێ سوپاسيا كۆمسيۆنا په‌نابه‌ران كر بۆ گه‌هاندنا هاريكاريان بۆ ئاواره‌ وپه‌نابه‌ران وهه‌ماهه‌نگى وهاريكاريا وان ل گه‌ل داموده‌زگه‌هێن حوكمه‌تا هه‌رێما كوردستانێ، به‌رهه‌ڤيا حوكمه‌تا هه‌رێمێ بۆ هه‌ر هاريكاريه‌كێ وهه‌ماهه‌نگيه‌كێ ل گه‌ل حوكمه‌تا عيراقێ و UNHCRنيشان دا ب مه‌ره‌ما ڤه‌گه‌راندنا ئاواران بۆ سه‌ر جهێن وان پشتى باوه‌رى بۆ وان دزڤريت وئاسايشا ده‌ڤه‌رێن وان سه‌قامگير ببيت، شاندێ مێهڤان ئه‌ڤ هاريكارى وئاسانكاريێن سه‌رۆك وه‌زيرێن هه‌رێمێ بلند نرخاندن.

ئه‌ڤرۆنيوز:

سه‌رۆك مه‌سعود بارزانى، ئه‌ڤرۆ پێنجشه‌مبى 5/7/2018 پێشوازى ل فۆميۆ ئيوان باليۆزێ چاپۆنێ ل عيراقێ كر.

دديداره‌كێ دا كو كاتسوومى مۆريامۆ كونسۆلێ چاپۆنێ ل هه‌ولێرێ به‌رهه‌ڤ بووى، باليۆزێ چاپۆنێ سوپاسيا سه‌رۆك بارزانى وحوكمه‌تا هه‌رێما كوردستانێ كر كو دهاريكار بوون دده‌مێ كاركرنا وى دا وه‌كو باليۆزێ چاپۆنێ ل عيراقێ كو دووماهى ب ئه‌رك وكارێن

وى هاتيه‌، هيڤيا به‌رده‌واميا په‌يوه‌نديێن دناڤبه‌را هه‌رێمێ ووه‌لاتێ خوه‌ خواست، هه‌روه‌سا كورتيه‌ك ژ چالاكيێن كۆمپانيێن چاپۆنى ل كه‌رتێ كاره‌بێ وئاڤێ ل هه‌رێما كوردستانێ به‌رچاڤكر.

ژلايێ خوه‌ڤه‌ سه‌رۆك بارزانى هيڤيا سه‌ركه‌فتنێ بۆ باليۆزێ چاپۆنێ خواست وپێزانين هه‌بوون بۆ رۆلێ وه‌لاتێ چاپۆنێ ل عيراقێ وجيهانێ وهيڤيا خورتكرنا په‌يوه‌نديێن دناڤبه‌را هه‌رێما كوردستانێ وچاپۆنێ خواست.

ره‌وشا سياسى يا عيراقێ پشتى هه‌لبژارتنان ته‌وه‌ره‌كێ دى يێ وێ ديدارێ بوو وباليۆزێ چاپۆنێ نێگه‌رانيا خوه‌ ووه‌لاتێ خوه‌ ل دۆر پرۆسا سياسى يا عيراقێ ل قۆناغا بهێت ب سه‌رۆك بارزانى گه‌هاند، سه‌باره‌ت پرۆسا سياسى ل عيراقێ، سه‌رۆك بارزانى دياركر هه‌كه‌ پره‌نسيبێن هه‌ڤپشكيێ ل ده‌ستهه‌لاتا بجهئينانێ وسازانێ ل قانوون دانانێ وهه‌ڤسه‌نگى ل ده‌زگه‌هان بهێنه‌ ل به‌رچاڤ وه‌رگرتن، هه‌رێما كوردستانێ به‌رهه‌ڤيا بتمام يا هه‌ى بۆ هاريكاريا پرۆسا سياسى ل عيراقێ وچاره‌كرنا گرفتان.

ئه‌ڤرۆنیوز:

په‌یڤدارێ رێڤه‌به‌ریا هاتنوچوونا هه‌ولێرێ دبه‌رپه‌رێ خوه‌ ل سه‌ر تۆرا جڤاكى یا فه‌یسبووكى به‌لاڤكر، ل سه‌ر جادا 60 مه‌ترى ل هه‌ولێرێ، شوفێرى ترومبێله‌كێ ژبه‌ر ب له‌ز هاژووتنێ وته‌ربوونا جادێ، كونترۆل ل سه‌ر ترومبێلێ ژ ده‌ستدا وخو ل شوستێ جادێ دا وپاشى ب ستوینه‌كا كاره‌بێ كه‌فت.

فازل حاجى، په‌یڤدارێ رێڤه‌به‌ریا هاتنوچوونا هه‌ولێرێ گۆت ژى” ژبه‌ركو شوفێرى خوه‌ ب قاویشا سلامه‌تیێ نه‌ گرێدا بوو، ب هێزه‌كا مه‌زن ژ ترومبێلێ كه‌فته‌ خوار وكه‌فته‌ سه‌ر جادێ وب گرانى بریندار بوو”.

ناڤبرى داخواز ژ شوفێران كر كو هه‌تا  ل ده‌مێن سپێدێ ژى وجاده‌ دڤالا بن ژترومبێلان، پێدڤیه‌ له‌زاتى نه‌هێته‌ بكارئینان بۆ پاراستنا وان ژ روودانان.

گۆت ژى” هیڤیدارین شوفێر به‌رده‌وام قاویشا سلامه‌تیێ بكارئینن ل ده‌مێ هاژووتنا ترومبێلێ”.