ئەڤرۆ نيوز:
بەرپرسێ راگەھاندنا رێڤەبەریا گشتی یا ساخلەمیا پارێزگەھا دھۆکێ بۆ رۆژناما ئەڤرۆ دیار کر، ھەوەکا ڤاکسیندانێ دژی نەخوشیا سۆرکان ل سەرانسەری پارێزگەھا دھۆکێ دێ ھێتە ئەنجام دان و دبێژیت: د ڤێ ھەوێ دا نێزیکی 200 ھزار زارۆ دێ ھێنە ڤاکسیندان.
حەمزە رەزیکی، بەرپرسێ راگەھاندنا رێڤەبەریا گشتی یا ساخلەمیا پارێزگەھا دھۆکێ ئاشکرا ژی کر، ئەڤرۆ 2/9/2018 ھەوا ڤاکسیندانێ دژی نەخوشیا سۆرکان ل سەرانسەری پارێزگەھا دھۆکێ دێ ھێتە ئەنجام دان و گۆت: “تیمێن مە یێن گەڕۆک مال ب مال دێ گەڕێن، دیسا د ناڤ کەمپێن ئاواران ژی دا، تیمێن پەنابەران مە یێن ھەین و دێ زارویان ڤاکسیندەن”.
رەزیگی گۆتژی: “د ڤێ ھەوا ڤاکسیندانێ دا، ئەو زارۆیێن ژیێ وان نەە ھەیڤ ھەتا پێنج سالیێ دێ ھێنە ڤاکسیندان، بەری نوکە ڤاکسین وەرگرت بیت یان نە وەرگرت بیت، دڤێت ڤێ ڤاکسینێ ھەر وەربگریت”.
حەمزەی ئاماژە ب وێ چەندێ ژی کر کو ئەڤ ھەوە بۆ دەمێ 10 رۆژان دێ یا بەردەوام بیت و و 255 تیم تێدا د پشکدارن و گۆت: “د ڤێ ھەوێ دا، بڕیارە نێزیکی ٢٠٠ ھزار زارۆ ل دژی نەخوشیا سۆرکان بھێنە ڤاکسیندان”.
خویا ژی کر، ئەڤ ھەوە ھاتیە کرن پشتی راوەستیانا وێ بۆ دەمێ چەندین سالا، چونکو نەخوشیا سۆرکان ل پارێزگەھا نەینەوا و ھەولێرێ دەرکەفتیە و چەندین حالەت ل دھۆکێ ژی ھەبووینە.
بەرپرسێ راگەھاندنا رێڤەبەریا گشتی یا ساخلەمیا پارێزگەھا دھۆکێ داخواز ژ دەیک و بابان کر، ل گەل تیمێن وان د ھەڤکار بن و ھەموو زارۆیێن خوە ڤاکسین بدەن، داکو ژ نەخوشیا سۆرکان بھێنە پاراستن.
ژ لایەکێ دیڤە دکتۆر خالس قادر، پەیڤدارێ وەزارەتا ساخلەمیا خوکمەتا ھەرێما کوردستانێ راگەھاند، ئەڤ ھەوە ل ھەموو پارێزگەە، قەزا، ناحی و گوندێن ھەرێما کوردستانێ ب ھەڤکاریا رێکخراوا ساخلەمیا جیھانی و یونیسێف ھێتە ئەنجامدان.
نيشاندان