ئه‌ڤرۆنيوز:

سه‌رۆكا ليستا (ئيراده‌) حه‌نان فه‌تلاوى راگه‌هاند، حه‌يده‌ر عه‌بادى سه‌رۆك وه‌زيرێن عيراقێ فالح فه‌ياز ژ پۆستێ سه‌رۆكێ ده‌سته‌يا حه‌شدا شه‌عبى ژپۆستێ وى لادا ژئه‌گه‌رێ چوونا وى بۆ ناڤ ريزێن ليستا فه‌تح ب سه‌رۆكاتيا هادى عامرى.

حه‌يده‌ر عه‌بادى دوهى پێنجشه‌مبى بريارا لادانا فالح فه‌ياز ژ سه‌رۆكاتيا حه‌شدا شه‌عبى وشيره‌تكاريا ئاسايشا نيشتمانى ده‌ركربوو ب هێجه‌تا ئه‌نجامدانا فه‌يازى بۆ كارێ سياسى.

حه‌نان فه‌تلاوى د به‌رپه‌رێ خوه‌ ل سه‌ر تۆرا جڤاكى يا تويته‌رى به‌لاڤكر” عه‌بادى يێ ژناڤ دچيت ژبه‌ر چوونا فالح فه‌ياز بۆ ناڤ ريزێن ليستا فه‌تح وژبه‌ر ڤێ چه‌ندێ عه‌بادى ئه‌و ژ پۆستێن وى لادا”.

دهێته‌ زانين فالح فه‌ياز ئه‌ندامێ ليستا نه‌سر بوو ب سه‌رۆكاتيا حه‌يده‌ر عه‌بادى.

ئه‌ڤرۆنيوز:

ليستا فه‌تح ب سه‌رۆكاتيا هادى عامرى راگه‌هاند، پشكه‌كا مه‌زن ژ ليستا ميحوه‌رێ نيشتمانى يێ سونى دێ هێته‌ دناڤ هه‌ڤپه‌يمانيا مه‌ دا بۆ پێكئينانا ليستا په‌رله‌مانى يا مه‌زن.

حه‌سه‌ن سالم، ئه‌ندامێ ليستا فه‌تح گۆت” هه‌ڤتێگه‌هشتنێن سياسى دناڤبه‌را ده‌وله‌تا قانوونێ وفه‌تح وميحوه‌رێ نيشتمانى يێن گه‌هشتينه‌ قۆناغێن پێشكه‌فتى ب رێيا ديدارێن دناڤبه‌را وان هاتينه‌ ئه‌نجامدان وپشكه‌كا مه‌زن ژ ليستا ميحوه‌رێ نيشتمانى دێ هێته‌ دناڤ هه‌ڤپه‌يمانيا فه‌تح وده‌وله‌تا قانوونێ بۆ پێكئينانا ليستا مه‌زن”.

ناڤبرى زێده‌تر بۆ مالپه‌رێ (المعله‌مه‌) يێ عيراقى گۆت” پێكئينانا ليستا په‌رله‌مانى يا مه‌زن دده‌مێ دو رۆژێن داهاتى دا دێ هێته‌ راگه‌هاندن ژلايێ ده‌وله‌تا قانوونێ وليستا فه‌تح ڤه‌”.

ل دووڤ وان ده‌نگوباسێن به‌لاڤ بووين، پشكه‌كا ليستا ميحوه‌رێ نيشتمانى كو پێك دهێت ژ پارێزگه‌رێ ئه‌نبار محه‌مه‌د ئه‌لحه‌لبوسى وجه‌مال كه‌ربولى به‌ر ب هه‌ڤپه‌يمانيێ چووينه‌ ل گه‌ل فه‌تح وده‌وله‌تا قانوونێ بۆ پێكئينانا ليستا په‌رله‌مانى يا مه‌زن به‌رێ ئه‌نجامدانا روونشتنا ئێكێ يا په‌رله‌مانێ عيراقى يێ نوو”.

ئه‌ڤرۆنيوز:

ئۆفيسا سه‌رۆكێ ليستا ده‌وله‌تا قانوونێ نورى مالكى ره‌خنێ ل بريارا عه‌بادى دگريت يا لادانا فالح فه‌ياز ژ پۆستێن وى وه‌كو سه‌رۆكێ ده‌سته‌يا حه‌شدا شه‌عبى وشيره‌تكارێ ئاسايشا نيشتمانى وسه‌رۆكێ ده‌زگه‌هي ئاسايشا نيشتمانى.

هيشام روكابى، رێڤه‌به‌رێ ئۆفيسا نورى مالكى ل به‌رپه‌رێ خوه‌ ل سه‌ر تويته‌رى به‌لاڤكر” لادانا فالح فه‌ياز ژ پۆستێن وى دێ كارڤه‌دانێن به‌روڤاژى ل سه‌ر لستا نه‌سر ل دووڤ خوه‌ ئينيت”.

گۆت ژى” بريارا عه‌بادى ب لادانا فه‌ياز دێ كاغه‌زا ليستا نه‌سر يا دانوستاندنێن پێكئينانا حوكمه‌تا عيراقێ يا نوو لاوازكه‌ت”.

حه‌يده‌ر عه‌بادى سه‌رۆك وه‌زيرێن عيراقێ وفه‌رماندێ گشتيێ هيزێن چه‌كدار ل عيراقێ دوهى پێجشه‌مبى بريارا لادانا فالح فه‌ياز ژ پۆستێن وى ده‌ركربوو.

ئه‌ڤرۆنيوز:

هنارتيێ تايبه‌ت يێ سه‌رۆكێ ئه‌مريكا بۆ عيراقێ، برێت ماكگۆرك ب توندى ره‌تكر وى كۆمبوون ل گه‌ل سه‌رۆكێ ليستا فه‌تح هادى عامرى ئه‌نجام دابن.

برێت ماكگۆرك د به‌رپه‌رێ خوه‌ دا ل سه‌ر تويته‌رى به‌لاڤكر” ئه‌و كۆمبوونا دهنده‌ك ده‌زگه‌هێن راگه‌هاندنێ ل عيراقێ دناڤبه‌را من وهادى عامرى دا به‌حس لێ دهێته‌ كرن، نه‌هاتيه‌ ئه‌نجامدان”.

ل دووڤ به‌يانامه‌كا ئۆفيسا راگه‌هاندنێ يا سه‌رۆكێ ليستا فه‌تح وسه‌رۆكێ رێكخراوا به‌در هادى عامرى، سه‌رۆكێ ليستا فه‌تح ل گه‌ل هنارتيێ سه‌رۆكێ ئه‌مريكا برێت ماكگۆرك كۆمبوويه‌ وهادى عامرى دوێ كۆمبوونێ دا گه‌فێن هه‌لوه‌شاندنا هه‌ر حوكمه‌ته‌كا عيراقێ ژلايێ ئه‌مريكا ڤه‌ بهێته‌ پێكئينان.

ئه‌ڤرۆنيوز:

دادگه‌ها ڤه‌كۆلينا به‌غدا – ده‌ستپاكى، فه‌رمانا ده‌سته‌سه‌ركرنا سه‌رۆكێ هه‌ڤپه‌يمانيا ميحوه‌رێ وه‌ته‌نى يێ عيراقى خه‌ميس خه‌نجه‌ر ده‌ركر.

ل دووڤ بريارا هژمار 288 ل رۆژا پێنجشه‌مبى 30/8/2018 ب ئيمزايا دادوه‌ر محه‌مه‌د ئيبراهيم هاتيه‌ ده‌ركرن، فه‌رمان ل هه‌موو هيزێن پۆليسان هاتيه‌ كرن كو ل هه‌ر جهه‌كێ هه‌بن خه‌ميس فه‌رحان خه‌نجه‌ر ئه‌لعيساوى سه‌رۆكێ هه‌ڤپه‌يمانيا ميحوه‌رێ وه‌ته‌نى يێ عيراقى ده‌سته‌سه‌ر بكه‌ن.

خه‌ميس خه‌نجر ل دووڤ مادێن 430 و431 ژقانوونا سزايێن عيراقى ژلايێ دادگه‌ها ڤه‌كۆلينێن به‌غدا يا ده‌سته‌يا ده‌ستپاكيێ فه‌رمانا ده‌سته‌سه‌ركرنێ بۆ هاتيه‌ ده‌ركرن.