ئەڤرۆنیوز,رەزوان رۆژبەیانی:
ئیڤاریا ئەڤرۆ پێنجشه‌مبى 30/8/2018 د روودانەكا هاتنوچوونێ دا ل ناڤ سەنتەرێ قەزا بەردەرەش زارۆیەكێ شەش سالی گيانێ خوە ژ دەست دا.
كۆمیسەر حازم موحەمەد ژ راگەهاندنا هاتنوچوونا قەزا بەردەرەش بۆ ئەڤرۆنیوز خویاكر ئه‌ڤرۆ ئێڤارى ترومپێلەكا بارهەلگر ل ناڤ سەنتەرێ قەزا بەردەرەش خوە ل زارۆیەكێ شەش سالى دا و ئێك سەر گيانێ خوە ژدەست دا,
گوت ژی” هەر ل سپێدەهییا ئەڤرۆ ل سنوورێ قەزا بەردەرەش ژ ئەگەرێ دو روودانان چار كەسان بریندار بووينه كو برێنێن ئێك ژوان د دژوار بوون”.
ئەڤرۆ نیوز،باسم قاسم شنگالی
بەرپرسێ راگەهاندنا رێڤه‌به‌ريا بەرگریا شارستانی ل دهۆکێ ئيبراهيم ئه‌حمه‌د، راگەهاند ،ئەڤرۆ پێنجشه‌مبيێ 30/8/2018 ل دەمژمێر 06:00 ئێڤاری دو گەنج ل دەمێ مەلڤانیکرنێ د بەنداڤا مووسلێ دا ل نێزیك کۆمه‌لگەها خانکێ سەر ب قەزا سێمێلێ ڤە، خەندقین.
دا زانین ژی ،ئەڤ هەردو گەنج ب ناڤێ وقەوال قاسم یێ 20 سالی و گەدۆ ئەلیاس یێ 19 سالی دگەل ئێك خەندقین کو ئێك ژ دوان خەلکێ ناحیا سنونێ بوو و یێ دنى ژی خەلکێ کۆمه‌لگەها بۆرك بوو ل باشورێ قەزا شنگالێ و پشتی داگێرکرنا شنگالێ ئەو وەکو ئاوارە ل کەمپا خانکێ ئاکنجی بوون.
گۆت ژى” دڤێ سالێ دا هژمارا کەسێن دناڤ ئاڤ و رووباران دا ل پارێزگەها دهۆکێ خەندقین گەهشتە 50 كەسان.
وه‌زاره‌تا په‌روه‌ردا حكومه‌تا هه‌رێما كوردستانێ رۆهنكرنه‌ك ل دۆر بڕیارا بهێنڤه‌دانا رۆژێن شه‌مبی به‌ری ده‌مه‌كێ كێم به‌لاڤكر:
د خالا ئێكێ یا رۆهنكرنێ دا هاتیه: ل دووڤ قانوونا وه‌زاره‌تا په‌روه‌ردێ د شیان دا نینه رۆژێن شه‌مبی بكه‌نه بهێنڤه‌دانێن به‌رده‌وام و ئه‌و بڕیاره ب تنێ بۆ سالا بۆری یا خواندنێ هاتبوو دان و په‌یوه‌ندی ب وێ ره‌وشا نه‌خواستی ڤه هه‌بوو یا كو په‌یدابووی.
د خالا دویێ دا هاتیه: ل دووڤ سالناما خواندنێ، د شیان دا نینه رۆژا شه‌مبی بهێنڤه‌دان “ئۆف” بیت، چونكو نه‌هه‌ڤسه‌نگی د به‌هرێن وانان دا دروست دبیت و دبیته ئه‌گه‌رێ كێمیا ده‌می د ته‌مامكرنا پرۆگرامان دا و ب ڤێ چه‌ندێ قوتابی زه‌ره‌رمه‌ندێن سه‌ره‌كی نه ژ ئالیێ زانستی ڤه.
د خالا سیێ دا هاتیه: وه‌زاره‌تا په‌روه‌ردێ دێ هه‌موو بزاڤێن خوه ل گه‌ل جڤاتا وه‌زیران ئێخیته كاری بۆ كاركرنێ ل سه‌ر پاشكه‌فتێ مووچه‌ی د به‌رژه‌وه‌ندیا مامۆستایێن به‌رێز دا.
A. N
ئه‌ڤرۆنيوز:
سه‌رۆك وه‌زیرێن هه‌رێما كوردستانێ، نێچيرڤان بارزانى، ئه‌ڤرۆ پێنجشه‌مبى 30/8/2018 ل گه‌ل شانده‌كێ رووسی كۆمبوو كو ژ پاڤێل سۆرۆكين جێگرێ وه‌زيرێ وزێ يێ رووسى وڤلاديسلاڤ باريشينكوڤ جێگري سه‌رۆكێ كۆمپانيا گازپرۆم وكونسۆلێ رووسياپێكهاتبوو، وبه‌حسێ پێشڤه‌برنا په‌یوه‌ندییان دوێ كۆمبوونێ دا هاته كرن، ب تایبه‌ت د بياڤێ په‌ترۆلێ و ووزێ دا.
د كۆمبوونێ دا، شاندێ رۆسی به‌حسێ هه‌ڤكاری و هه‌ماهه‌نگیا د ناڤبه‌را هه‌رێما كوردستانێ و رووسیا كر، هه‌روه‌سا په‌یوه‌ندیێن دیرۆكی یێن هه‌ردو لايه‌نان.
شاندێ رۆسی ئاسانكاریێن حوكمه‌تا هه‌رێما كوردستانێ بۆ كۆمپانیێن رووسی بلند نرخاندن و هیڤی خواست په‌یوه‌ندیێن هه‌رێمێ ورووسيا بهێزتر بن.
ژلايێ خوه‌ڤه ، نێچیرڤان بارزانی به‌رهه‌ڤیا حوكمه‌تا هه‌رێمێ بۆ هه‌ر ئاسانكاریه‌كێ نیشان دا، ب تایبه‌ت باشكرنا كارێ كۆمپانیێن رووسی ل هه‌رێمێ د وارێ په‌ترۆل و ووزێ دا، هه‌روه‌سا پێشڤه‌برنا گرێبه‌ستێن دناڤبه‌را هه‌ردو لايه‌نان.
گۆت ژی: نوكه هه‌رێما كوردستانێ د ڤه‌ژا‌ندنه‌كا باش دایه و بوویه جهێ سه‌رنجا سه‌رمایه‌دارێن بیانی، حوكمه‌ت ژی دێ ئاسانكاریێن به‌رده‌وام بۆ كۆمپانیێن رووسی به‌رهه‌ڤكه‌ت.
ئەڤرۆ نیوز:
کارگێریا یانا زاخۆ بۆ وەرزێ نوو یێن خولێن ھەرێمێ چەندین گوھورین ل دەستەیا راھێنەران کرن و بۆ خولا نایاب ژی راھێنەرێ یانا ئاکرێ دەستنیشان کر.
ھشیار دوبانکی ئەندامێ دەستەیا کارگێریا یانا زاخۆ د داخویانیەکێ دا بۆ ئەڤرۆ نیوز ئاشکرا کر ئەو گەھشتینە رێککەفتنێ دگەل راھێنەرێ یانا ئاکرێ مەحمود مەجید بۆ سەرپەرشتیا تیما ئێکێ یا خولا ھەرێما کوردستانێ بۆ یانێن نایاب دیسان ھاریکارێ وی ژی مەناف شێخو ھاتە دەستنیشان کرن دگەل نزار عەبدولعەزیز وەک راھێنەرێ گۆلپارێزا.
ناڤبری زێدەتر دیارکر ئەوان ناجی عومەر دیارکریە بۆ راھێنەراتیا تیما لاوان دگەل محەمەد رەشو راھێنەرێ گۆلپارێزا، دیسان نەوزاد عەلی ژی دێ یێ بەردەوام بیت وەک راھێنەرێ تیما تازەپێگەھشتیان.
ئه‌ڤرۆنيوز:
هژماره‌كا چه‌كدارێن داعشێ به‌رپرسه‌كێ حه‌شدا شه‌عبى ل گه‌ل هه‌موو ئه‌ندامێن خێزانا وى ل باشوورێ پارێزگه‌ها نه‌ينه‌وا، گوله‌باران كرن.
موزهر خه‌له‌ف ئه‌لبه‌ياتى، ئه‌فسه‌ر ل رێڤه‌به‌ريا پۆليسێن نه‌ينه‌وا راگه‌هاند” هژماره‌كا تيرۆرستێن داعشێ كو جلكێن هێزێن ئه‌منى ل به‌ركربوون هێرش كره سه‌ر مالا ( عه‌لى حسێن) كو به‌رپرسه ل هێزێن حه‌شدا شه‌عبى ل گوندێ ( خوين ئه‌لبو حه‌مه‌د) ل باشوورێ پارێزگه‌ها نه‌ينه‌وا”.
ئه‌لبه‌ياتى بۆ ده‌زگه‌هێن راگه‌هاندنێ گۆت ژى” تيرۆرستێن داعشێ ئه‌و به‌رپرسێ حه‌شدا شه‌عبى ل گه‌ل هه‌ڤژينا وى وپێنج زارۆيێن وى گووله‌باران كرن وپاشى به‌ر ب جهه‌كێ نه‌ديار ره‌ڤين”.
به‌یاتی باسی له‌وه‌كرد كه تیرۆریسته‌كانی داعش، عه‌لی حوسێن له‌گه‌ڵ خێزانه‌كه‌ی و پێنج منداڵه‌كه‌ی گولـله‌باران ده‌كه‌ن و دواتر به‌ره‌و شوێنێكی نادیار هه‌ڵدین.
شێلادزێ , ئێقبال عومەر:
ل ناحیا شێلادزێ ل گور گوتنا وەلاتیان كرێكار سەلكێن گلێشی دشكێنن, و دهاڤێژن یان و دهێلنە د نیڤەكا جادێ دا و ناپارێزن, بویە جهێ دلگرانیا وەلاتیان یێن دەڤەرێ, و هند وەلاتی ژی دیاردكەن, كو دڤێت هەر كرێكارەكێ سەرپێچیێ بكەت بهێتە سزادان, بەلێ پا خودانكرنا ئاژەلان ژی دناڤ باژێری دا بویە ئەگەر كو دەوار و گارەش سەلكێن گلێشی ل بەردەرێ مالان یان ل ناڤا بازاری بشكێنن ژبەر بەرمایكێن وەلاتیان دناڤ سەلكێ دا كو ئاژەل بێخن و بشكێنن.
فەرهاد حەجی، چالاكڤانێ مەدەنی یە بۆ ئەڤرۆنيوز دیاركر: كرێكارێن پاقژكرنا گلێشی ل ناحیا شێلادزێ دەمێ پاقژكرنا گلێشی كرێكار سەلكێن گلێشی دشكێنن و و دهێلنە دنیڤا جادێ دا وە دیسان دەمێ راكرنا گلێشی نیڤا وی گلێشی بنیڤا جادێ وەردكەن, و گوت: مە چەندین جاران باژێرڤانیا ناحیا شیلادزێ ل سەر ڤێ دیاردا كرێت ئاگەهدار كریە لێ هیچ گرنگیەك پێنەهاتیە دان ژلایێ باژێڤانیێ ڤە,براستیژی وەلاتی زور زەرەر مەند دبن ب شكاندنا سەلكێن گلێشی و شوفێرێن ترومبێلان زور دلگران دبن بەرامنبەری هێلانا سەلكێن گلێشی د نیڤا جادان دا كو دبنە رێگكر بو هاتن و چونا ترومبێلان لەوما ئەز باژێرڤانیا شێلادزێ ب كەمتر خەم دبینم و كومپانیا هاڤێتنا گلێشی, هیڤی دارم كو چارەسەریەك بو ڤێ دیاردا كرێت بهێتە دیتن داكو بەس وەلاتی زەرەر مەند ببن.
ڤیان ئەحمەد دبێژیت: ئەم زور دلگرانین بەرامبەری ڤان كریارێن كرێت یێن كرێكارێن پاقژكرنا گلێشی كو سەلكێن گلێشی دهاڤێژن و دشكێنن وە دیسان دهێلنە نیڤا جادێ دا, و هەروەسا یا ژ هەمیێ خرابتر ئەوە ب سەدان دەوار و گارەش ب شەڤ و روژ دناڤا باژێری دانە و دچنە سەر سەلكێن گلێشی ژ بو خارنا وان بەرمایكێن ژبەر وەلاتیان مای دناڤا سەلكێ دا وان سەلكا دشكێنن و درێژنە بەر دەرگەهێن مالا و دوكانا و سەر جادا, ئەڤجا هیڤی دارین كو رێچارەك بو ڤێ دیاردا كرێت بهێتە دیتن.
وەلاتی ئەحمەد عەبدولا بو ئەڤرۆنيوز گۆت , ل ناحیا شێلادزێ كومپانیا پاقژكرنا باژێری هند ژ كرێكارێن وان رادبن ب هاڤێتنا سەلكێن گلێشی ل ناڤا باژێری كو بویە جهێ دلگرانیا وەلاتیان و ژبەر شكەستن وان سەتلكێن گلێشی و هێلانا سەتلكا گلێشی دنیڤا جادان دا كو دبیتە ئەگەر رێك ل هاتو چویا ترومبێلان بهێتە گرتن, لەوما ژی هەر فەرمانبەرەك یان كرێكارەكێ ڤی كاری بكەت كومپانیا بەرپرسە ژڤێ یەكێ, و ئەگەر دیار بی كوكیش كریكارە پێتڤیە ئەو كریكار بهێتە سزادان داكو چو كرێكار یان فەرمانبەرێن دی وەك وی نەكەن.
روژنامەڤان و چالاكڤانێ مەدەنی سامی بەنستانی دبێژیت: دبیت كومپانیا هاڤێتنا گلێشی كەمتر خەمبیت و باژێرڤانیا شێلادزێ گرنگیێ ب چارەسەركنا ڤێ ئاریشێ نادەت, ژبەركو نابیت كو ئەڤ كارێ نەیێ جوان بهێتەكرن و پێتڤیە سەلكێن گلێشی بهێنە پاراستن داكو زەرەر نەگەهیتە وەلاتیان و هەروەسا داكو باژێر ژی ب دروستی بهێتە پاقژكرن نەك پیساتی برێژیتە سەر جادان ژبەر شكەستنا سەلكێ, و سامی دا خویاكرن كو نها رێژەكا زور یا ئاژەلان ژلایێ وەلاتیان ڤە دناڤا باژێری دهێنە بخودانكرن و بەردانە دناڤ باژێریدا و ئەڤ ئاژەلە ئانكو گارەش و دەوار ژبەر بەرمایكێن خارنا وەلاتیان دچنە دناڤ ڤان سەلكاندا و دشكێنن و هەروەسا گلێشی ژی درێژن و دبنە ئەگەرێ پیسكرن و شكاندنا سەلكێن گلێشی, هیڤی دارین ژ خودانێن ئاژەلان كو ئاژەلێن خوە نەبەردەنە دناڤا باژێری دا كو دبنە ئەگەرێ پیس بو و تێكدانا سیمایێ باژێری و هەروەسا باژێرڤانیا شێلادزێ ژی خوە لڤێ دیاردا كرێت بكەتە خودان.
مە پەیوەندی ب سەروكاتیا باژێرڤانیا شێلادزێ كر، بەلێ چو داخویانی ل سەر ڤی بابەتی نەدان ب تنێ دیاركرن كو بەلكو ل ڤان نێزیكان كومپانی بهێتە گوهۆرین و كومپانیەكا دی وه‌ربگريت.
ئه‌ڤرۆنيوز:
ب سه‌رپه‌رشتيا سه‌رۆك مه‌سعود بارزانى، ئه‌ڤرۆ پێنجشه‌مبى 30/8/2018 جڤاتا سه‌ركردايه‌تيا پارتى ديموكراتى كوردستان كۆمبوو.
مه‌حموود محه‌مه‌د، په‌يڤدارێ فه‌رميێ پارتى ديموكراتى كوردستان دكۆنگره‌كێ رۆژنامه‌ڤانى دا خالێن دناڤ كۆمبوونێ دياركرن كو گرێداى هه‌لبژارتنێن داهاتى يێن په‌رله‌مانێ كوردستانێ ژلايه‌كى، ژلايه‌كى دى بزاڤێن رێكخستنا ناڤمالا كوردى بۆ دانوستاندنێ ل گه‌ل لايه‌نێن عيراقى ژبۆ بده‌ستڤه‌ئينانا مافێن نه‌ته‌وى يێن كوردان دپێكئينانا كابينا نوو يا حوكمه‌تا عيراقێ دا.
گۆت ژى” پارتى دووپاتيێ ل وێ چه‌ندێ دكه‌ت كو پێدڤيه پرۆسا هه‌لبژارتنێن په‌رله‌مانێ كوردستانێ ل ژڤانێخوه بهێنه ئه‌نجامدان، چونكى ژ روويێ ته‌كنيكى وسياسى وجڤاكى چو كێشه ورێگريه‌ك بۆ پاشخستنا وان هه‌لبژارتنان نينن”.
سه‌باره‌ت پێكئينانا حوكمه‌تا نوو ياعيراقێ ژى، په‌يڤدارێ فه‌رميێ پارتى گۆت”ل ده‌مێن بۆرى مه بزاڤ كريه پێكڤه ل گه‌ل لايه‌نان پرۆژه‌كى به‌رهه‌ڤ بكه‌ين، وه‌كو ئێكه‌تى وپارتى مه به‌رهه‌ڤ كر ومه داخواز ژى ژ لايه‌نێن دى كر پشكدارببن، ده‌ياره وان پێ باش نه‌بوو، مه ژبۆ مافێن دستوورى ئه‌و بزاڤكر كو پێكڤه بين”.
ئه‌ڤرۆ نیوز ، نه‌وزاد هلۆرى:
خودان بازار و وه‌لاتیێن شێلادزێ و دێره‌لووكێ گازندا وێ یه‌كێ دكه‌ن ده‌ما كو گه‌شتیار سه‌ره‌دانا هاڤینگه‌هێن سنوورێ هه‌ردوو ناحیان دكه‌ن ، ب بریارا هنده‌ك كه‌سان رێك ناهێته‌دان كو كوسته‌ر و پاسێن گه‌شتیاران ل شێلادزێ و دێره‌لووكێ راوستن و ل بازارێن وان كه‌لوپه‌لان بكرن.
دلبرین مێزى وه‌لاتیه‌كێ ناحیا دێره‌لووكێ یه دایه دیاركرن كو هه‌تا نوكه ئه‌و نوزانن كێ ل پشت وێ یه‌كێ یه كو ترومبێلێن گه‌شتیارى ل دێره‌لووك نه‌راوستن و بۆ ئه‌ڤرۆ نیوز گۆت: (چه‌ند ساله‌كه به‌رێ گه‌شتیارێن عیراقى كه‌فتیه سنوورێ دێره‌لووك و شێلادزێ و هاڤینگه‌هێن وێ، ب تایبه‌تى د وه‌رزێ هاڤینێ دا، و ئه‌ڤ یه‌ك بویه جهێ دلخوشیا وه‌لاتیان و داهاته‌ك بو خودانكاران ده‌ستڤه دهێت، به‌لێ یا جهێ داخێ ئه‌وه كو ده‌ستێوه‌ردانه‌ك ل كه‌رتێ گه‌شتوگۆزاریێ ده‌ڤه‌رێ دا دهێته‌كرن و هنده‌ك ب ئه‌ركێ قورخكاریێ رابوینه و زیانێ دگه‌هینن بازارێ دێره‌لووك)
زێده‌تر گۆت: (هنده‌ك كه‌س پاس و كوسته‌رێن گه‌شتیاران قورخكرینه و گه‌شتیاران سوار دكه‌ن و بو هاڤینگه‌هێن سنوورێ ناحیا دێره‌لووك و شێلادزێ دئینن ، پشتى كو دوماهى دهێن جاره‌كا دى باركه‌ن و ڤه‌گوهێزن بو ناڤا سه‌نته‌رێ قه‌زا ئامێدیێ و دهۆكێ و هاڤینگه‌ها سیلاڤێ بێى كو خه‌لكێ شێلادزێ و دێره‌لووك مفاى ژ وان گه‌شتیاران وه‌ربگرن، و ئه‌م دخوازین كو ئه‌ڤ بابه‌ت بهێته چاره‌سه‌ركرن و گه‌شتیار بهێنه سه‌رپشتكرن كو ب كه‌یفا خوه و جهێ وان بڤێت كه‌لوپه‌ل و پێدڤیێن خوه بكرن ، و ئه‌ڤه د ده‌مه‌كێ دایه كو به‌رى نوكه گه‌شتیار د ئازادبوون و ل بازارێن ده‌ڤه‌رێ كه‌لوپه‌ل دكرین به‌لێ نوكه ئه‌ڤ یه‌ك نه‌مایه ئه‌ڤه سه‌ره‌راى كو گه‌شتیار زور ژى بوویه)
نه‌زیر بێزه‌لى، ئه‌و ژى خودان خوارنگه‌ه و چایخانه‌كا ده‌ڤه‌رێ یه لسه‌ر بابه‌تى بۆ ئه‌ڤرۆ نیوز گۆت: (به‌رى نوكه هه‌موو روژان سپێده‌هیان ئه‌م دهاتینه به‌ر دوكان و بازارێن خوه ژبه‌ركو گه‌شتیار زوربوون و پێدڤیێن خوه ل بازارى دكرین ، و ل خوارنگه‌هێن مه ژى خوارن دخوار، به‌لێ نوكه ناهێلن ب چوو شێوه‌یان كوسته‌ر و پاسێن گه‌شتیارى دناڤا بازارێن شێلادزێ و دێره‌لووكێ ب راوستان هه‌تا خوه ناهێلن بتله‌كێ ئاڤا دلوپاندى بخوه بكرن، و ئێكسه‌ر ئه‌وان گه‌شتیاران ڤه‌دگوهێزن ، و ئه‌م دخوازین كو رێك ب گه‌شتیاران بهێته‌دان ئازادبن ل كیش ده‌ڤه‌رێ بگه‌ریێن و ل كیش بازارى بخوه پێدڤیان بكرن ، و نوكه ئه‌م زێده‌تر ب هوڤیا وان كه‌سانین یێن كو وه‌كو ترومبێلێن تایبه‌ت و كه‌سى دهێنه ده‌ڤه‌رێ)
ژلایێ خوڤه حه‌مید محه‌مه‌د سالح رێڤه‌به‌رێ گه‌شتوگۆزارا ئامێدیێ دیاركر كو ب چوو شێوه‌یان پاس و كوسته‌ر و گه‌شتیارێن ئامێدیێ ناهێنه قورخكرن و بۆ ئه‌ڤرۆ نیوز گۆت: (گه‌شتوگۆزارا ئامێدیێ باشترین چه‌نس هه‌یه ئه‌و ژى زێده‌تر ژ هه‌ر ده‌ڤه‌ره‌كا دى یا كوردستان و پارێزگه‌ها دهۆك جهێن گه‌شتوگۆزارى هه‌نه و پاس و كوسته‌رێن گه‌شتیارى زێده‌تر ژ هه‌موو ده‌ڤه‌ران قه‌ستا هاڤینگه‌هێن ده‌ڤه‌رێ دكه‌ن ب تایبه‌تى ژى بو سنوورێ ناحیا دێره‌لووك و شێلادزێ و سیلاڤێ)
زێده‌تر گۆت: (كومپانیێن گه‌شتوگۆزارى ب گوره‌ى به‌رنامه و كارێن خوه كاردكه‌ن و ئه‌و بریارێن چه‌وانیا گه‌هشتنا جهێن گه‌شتوگۆزارى و راوستیان و كرینا كه‌لوپه‌ل و مانه‌ڤا ل جهێن گوزارى دده‌ن ، و ب چوو شێوه‌یان گه‌شتوگۆزارا ئامێدیێ و كارگێریا ده‌ڤه‌رێ ژى مایتێكرنێ و قورخكاریێ د كه‌رتێ گه‌شتوگۆزارێ دا ناكه‌ت و گه‌شتیار ب وه‌كهه‌ڤى هاتینه دابه‌شكرن)
ناڤبرى دیاركر ژى كو دحه‌فتیێ دا دوو روژ كوسته‌ر و پاسێن گه‌شتیارى دهێنه ده‌ڤه‌را ئامێدیێ ب شێوه‌یه‌ك رۆژه‌كێ قه‌ستا سنوورێ دێره‌لووك و شێلادزێ دكه‌ن و رۆژه‌كێ ژى قه‌ستا سنوورێ ئامێدیێ و ئاشه‌وا دكه‌ن و زێده‌تر گۆت: (پێشتر ژى ئه‌ڤ بابه‌ت هاتیه به‌حسكرن كو ب چوو شێوه‌یان قورخكارى نینه و پێدڤى یه خودانبازار و وه‌لاتیێن ده‌ڤه‌رێن شێلادزێ و دێره‌لووك زێده‌تر دوڤچوونێ لسه‌ر بابه‌تى بكه‌ن)
نيشاندان