ئەڤرۆ نیوز:
پەیڤدارێ وەزارەتا بەرەڤانیا ئەرمەنستانێ راگەهاند کو هێزێن وان شیاینە سێ تانکێن ئازەربایجانێ ل سەر سنوری ژناڤ ببەن.
شوشان ستەپانیان پەیڤدارێ وەزارەتا بەرەڤانیا ئەرمەنستانێ راگەهاند کو هێزێن وان ب هەموو رەنگەکێ د ئامادەباشیێ دانە و دێ بەرسڤا هەر هێرشەکێ ژی دەن و گۆت: (مە شیایە دربێن مەزن ل ئازەربایجانێ بدەین و سێ تانکێن وان هەتا نها هاتینە ژناڤبرن).
ئەڤرۆ نیوز:
دەزگەهێن راگەهاندنا ئەمریکا ئاماژە ب ئۆپەراسیۆن و شەرێ تورکیا ل سووریێ، عیراقێ و لیبیا دکەن و دیار دکەن کو ئەردۆگانی دڤێت تورکیا بکەتە وەلاتێ هەری ب هێز ل رۆژهەلاتا ناڤین، لێ ئابوورێ تورکیا و گەلەک فاکتەرێن دی رێگرن.
ل گۆر دەزگەهێن راگەهاندنا ئەمریکا تورکیا پتر ژ هەر دەمەکێ د ئاستێ جیهانی دا ب تنێ مایە و پرانیا وەلاتێن کو بەری نها پەیوەندیێن وان و تورکیا باش بوون نها ژ تورکیا دوور کەفتینە.
ئەڤرۆ نیوز:
رێڤەبەرێ گشتی یێ نەخوشخانا خانەقینێ راگەهاند کو ئەڤرۆ سێ کەس ب کۆرۆنایێ مرینە کو دو ژ وان زەلام و ئێک ژ ئافرەت بوویە.
ئازاد دەلوی رێڤەبەرێ گشتی یێ نەخوشخانا خانەقین ئەو یەک ژی دیار کر کو هەتا نها ١٠ کەس ل خانەقینێ ژ بەر کۆرۆنایێ مرینە و رێژەکا باش تووشبوویێن کۆرۆنایێ ژی باش بووینە و نها ٦٠ تووشبوو ل نەخوشخانێ دانە و چارەسەریا پێدڤی بۆ وان دهێتە کرن.
ئەڤرۆ نیوز:
ئەنجوومەنێ نشتیمانی یێ کوردی ل سووریێ (ئەنەکەسە) د داخۆیانیەکێ دا دەستخوشی ل هەلویستێ هێزێن سووریا دیموکرات و رێڤەبەریا خوەسەر کر کو نەهێلاینە هەلبژارتنێن پەرلەمانێ سووریێ ل دەڤەرێن کوردی یێن رۆژئاڤایێ کوردستانێ برێڤە بچن.
ئەڤرۆ هەلبژارتنێن پەرلەمانێ سووریێ برێڤە دچن و هێزێن سووریا دیموکرات و رێڤەبەریا خوەسەر ژی نەهێلان کو هەلبژارتن ل رۆژئاڤایێ کوردستانێ بریڤە بچن و چو سندوق ل دەڤەرێن کوردی نەهاتینە دانان.
ئەڤرۆ نیۆز:
بەرپرسێ پشکا پەیوەندی و ڕاگەهاندنێ ل رێڤەبەریا پۆلیسێن پارێزگەها دهۆکێ بۆ ئەڤرۆ نیۆز ئاشکرا کر: پشتی کچەکا 24 سالی دوهی رۆژا 18/7/2020
کۆژمەکێ پارەی ل قەزا زاخۆ یا سەر ب پارێزگەها دهۆکێ ڤە دیتی ئێکسەر ب رێیا پۆلیسێن زاخۆ بۆ خودانی زڤراندن.
موقەدەمێ مافپەروەر هێمن سلێمان، بەرپرسێ پشکا پەیوەندی و ڕاگەهاندنێ ل رێڤەبەریا پۆلیسێن پارێزگەها دهۆکێ خویا کر کو پشتی وێ کچێ
٨٨۰۰ دۆلارێن ئەمریکی (٨٨ وەرەقە) ل بازاری دیتین ئێکسەر پەیوەندی ب پۆلیسێن ھەوارھاتنێ کر ب رێیا ژمارا ۱۰٤ یا ژوورا کونترۆلێ پۆلیسان و ب رێیا پۆلیسێن زاخۆ ئەو کوژمێ پارەی بۆ خودانی ھاتنە زڤراندن.
ناڤهاتی خویا کر کو ئەو کچا پارە زڤراندین نەڤیا وێنە و ناڤ و نیشانێن وێ دیاربن ب ئامادەبوونا وێ و برایێ وێ ل بارەگایێ رێڤەبەریا پۆلیسێن قەزا زاخو پارە ھاتنە زڤراندن.
ئەڤرۆ نیوز:
دەزگەهێن راگەهاندنا ئیرانێ دیار کرن کو ئەڤرۆ ل باژێرێ ئەسفەهانێ ژ ئەنجاما پەقینەکا مەزن ل بنگەهەکێ وزێ زیانەکا مەزن گەهشتیە وی بنگەهی، لێ چو زیانێن گیانی نەبووینە.
دەمەکە ل باژێرێن جودا جودا یێن ئیرانێ چەندین بنگەهێن ئەتۆمی و کارەبێ هاتینە پەقاندن و بەرپرسێن ئیرانێ ژی دبێژن پەقین ژ بەر ئاریشێن تەکنیکی بووینە.
ئەڤرۆ نیوز:
سەرۆکێ ژوورا بازرگانی یا سلێمانیێ راگەهاند کو دەمەکە وەلاتی ل پارێزگەها سلێمانیێ دەست ب کڕینا پارێ ئیرانێ دکەن، لێ ئەو یەک مەترسیا خوە هەیە، چونکو بهایێ تمەنێ ئیرانی بەردەوام دهێتە خوارێ و باشترە وەلاتی پارێ ئیرانێ نەکڕن.
سیروان محەمەد ئەو یەک ژی دیار کر کو د ماوەیێ چەند مەهێن بۆری دا تمەنێ ئیرانێ ٤٠% بهایێ خوە ژ دەست دایە و بەردەوام ژی بهایێ تمەنی دهێتە خوارێ و باشترە وەلاتی تمەنێ ئیرانی نەکرن.
ئەڤرۆ نیوز:
رێکخراوا چاڤدێریا مافێن مرۆڤی یا سووریێ دیار دکەت کو چەند رۆژن تورکیا هێزێن زێدەتر ل سەر سنورێ سووریێ ب تایبەتی ژی ل وان دەڤەران کو ناکۆکیێن خوە ل گەل روسیا هەنە، کۆم دکەت و ئەو یەک ژی بوویە جهێ نەرازیبوونا روسیا.
ل ئالیێ دی تورکیا ل سنورێ باژێرێ کۆبانێ یێ رۆژئاڤایێ کوردستانێ ژی بەرهەڤیان بۆ ئۆپەراسیۆنەکا سەربازی دکەت.
ئه‌ڤرۆ نیوز:
وه‌زیرێ ساخله‌میا هه‌رێما كوردستانێ سوپاسیا توركیا كر بۆ هه‌ڤكاریێن نوژداری پێشكێش كرین.
د.سامان به‌رزنجی وه‌زیرێ ساخله‌میا هه‌رێما كوردستانێ راگه‌هاند توركیا ب رێا كۆمپانیا ماكزیمو هه‌ڤكاریێن نوژداری پێشكێشی هه‌رێمێ كرینه ئه‌و هه‌ڤكاری ژی جل و به‌رگێن تایبه‌ت ب به‌رهنگاربوونا ڤایرۆسێ كورونایێ نه.
قونسولێ توركیا ل هه‌رێمێ ژی راگه‌هاند ئه‌و هه‌ڤكاری د چارچوڤه‌یێ ئه‌وان هه‌ڤكاریان دانه كۆ توركیا پێشكێشی عیراق و هه‌رێما كوردستانێ كرین.
نيشاندان