ئه‌ڤرۆ نیوز  ، نه‌وزاد هلۆرى:

شاها مێشا یان بێژین میرا مێشا دبیته‌ ب رێڤه‌به‌ر و به‌رپرسیارێ سه‌ره‌كیێ رێكخستنا كاروبارێن مێشێ دناڤ خلیف و سندوقێن ب خودانكرنا مێشان دا، و بێى وى چوو كار ناهێنه‌كرن بو باشتركرنا هنگڤینى، شاها مێشان به‌رپرسیاره‌ ژ دانانا هێكا داكو مێش یا به‌رده‌وام بیت ، و ئه‌وى شاهێ خوارنه‌كا تایبه‌ت هه‌یه‌ و ره‌نگێ وێ سپى یه‌ و هنده‌ك جاران ژى ره‌نگێ وێ زه‌ره‌ ، و تاما وێ تێكه‌له‌ ل ترش و شیرینى و باشترین چاره‌سه‌ریه‌ بو چه‌ندین نه‌خوشیان.

 نه‌زیر موسته‌فا ئێكه‌ ژ مێشه‌ڤانێن ده‌ڤه‌را بارزان و 19 ساله‌ مێشان ب خودان دكه‌ت و روله‌كێ به‌رچاڤ هه‌یه‌ دخودانكرنا مێشان دا و سالانه‌ نێزیكێ نیڤ كیلویا خوارنا شاها مێشان به‌رهه‌م دئینیت و دفرۆشیت بۆ ئه‌ڤرۆ نیوز گۆت: (به‌رهه‌مئینانا خوارنا شاها مێشا رێیه‌كا تایبه‌ته‌ و هه‌موو مێشه‌ڤان نكارن به‌رهه‌مبینن و ده‌ستبێخن ژبه‌ركو زور كێمه‌ و ئه‌گه‌ر شاره‌زایى نه‌بیت دێ هه‌موویێ ژ ده‌ست ده‌ت ، و پێدڤى یه‌ ئه‌و مێشه‌ڤانێ كو دخوازیت خوارنا شاها مێشان ده‌ستخوڤه‌ بینیت خوه‌ دویربێخیت ژ شه‌كرێ و ئه‌گه‌ر بكار ژى ئینا زور كێم بكاربینیت، و دیسان پێدڤى یه‌ مێشێن خوه‌ ببه‌ت زوزان و ده‌شت و چیا و جهێن خوش و ب دار و بارو كولیل ، داكو هنگڤینه‌كێ ساف و ئه‌سلى ب ده‌ستڤه‌ بهێت و دیسان خوارنا شاها مێشان ژى ده‌ست مێشان بكه‌ڤیت و بو شاها خوه‌ بینن).

زێده‌تر گۆت: (من نێزیكێ 200 مێشان هه‌نه‌ و ئه‌ڤه‌ 19 ساله‌ بێ ڤه‌برین ئه‌ز مێشان ب خودان دكه‌م و ب چه‌ندین رێیا هه‌تاكو ئه‌ز بشێم سالانه‌ نێزیكێ نیڤ كیلو ژ خوارنا شاها مێشان ده‌ستخوڤه‌ بینم و بده‌م نه‌خوشان، چونكى خوارنا شاها مێشان باشترین ده‌رمانه‌ بو چه‌ندین نه‌خوشیان هه‌تا نوكه‌ هاتیه‌ دیتن ، و گه‌له‌ك یا ب زه‌حمه‌ته‌ ژى مرۆڤ بشێت ده‌ستخوڤه‌ بینیت).

 نه‌زیرى ل بارا مفایێن خوارنا شاها مێشان دیاركر كو خوارن و بكارئینانا خوارنا شاها مێشان بو مه‌ره‌مێن ساخله‌میێ كاره‌ك ب زه‌حمه‌ته‌ و شاش بكارئینان ره‌نگه‌ كارتێكرنێ بكه‌ت و زێده‌تر گۆت: (خوارنا شاها مێشان ده‌رمانه‌ بو وان زاروكێن كو ژ روویێ ئه‌قلى و له‌شى ڤه‌ پێنه‌گه‌هشتینه‌، و دیسان ده‌رمانه‌ بو وان ژن و زه‌لامێن كو زارو په‌یدا نابن یان كێشه‌ هه‌نه‌، و چاره‌سه‌ریه‌ بو ئاشكێ مرۆڤى ئه‌گه‌ر روژانه‌ بهێته‌خوارن ، و چاره‌سه‌رییه‌كا زور باشه‌ بو وان كه‌سانێن كو ژ روویێ ده‌روونى ڤه‌ نه‌ دئارامن و توره‌ و دلنه‌خوشن، و دلێ مرۆڤى دبه‌ت خوارنێ بێ كو كارتێكرنێ ل قه‌له‌ویا مرۆڤى بكه‌ت ئانكو رێكخستنا له‌شێ مرۆڤى دكه‌ت، و له‌شێ مرۆڤى ژ میكروبان دپارێزیت و  هه‌ند چاره‌سه‌ریێن سێكسى ژى بو نه‌خوشان دكه‌ت ئه‌و ژى ب زێده‌كرنا مادده‌یێ زه‌لامى كو دهێته‌ بناڤكرن مه‌نى یان سپێرم،  ئه‌ڤ خوارنه‌ ب دوو ره‌نگێن سپى و زه‌ر هه‌یه‌، به‌لێ بكارئینانا وێ پێدڤى ب شاره‌زایه‌كا باش هه‌یه‌ ژبه‌ركو بو هه‌ر نه‌خوشیه‌كێ دڤێت رێژه‌یه‌ك بهێته‌ بكارئینان و هه‌ر شاشیه‌كا بچوك تێدا بهێته‌كرن دێ كارتێكرنێن به‌روڤاژى هه‌بن ، ئانكو نابیت ئێك گرام كێم یان زێده‌ بهێته‌كرن، بو نموونه‌ ئه‌و كه‌سانێن كو خوارنا شاها مێشان بو مه‌ره‌مێن په‌یدابوونا زاروكان لده‌ڤ ژنان یان زه‌لامان بكاربینن پێدڤى یه‌ ئێك گرامێ ل گه‌ل 250 گرامێن هنگڤینى تێكه‌ل بكه‌ت ، و رۆژانه‌ كه‌چكه‌كێ خوارنێ بخوت هه‌تاكو ئه‌و هنگڤین دوماهى دهێت، و ئه‌گه‌ر چاره‌سه‌رى نه‌بوو ب هه‌مان رێك دێ دووباره‌ كه‌ت و بڤى ره‌نگى نابیت زێده‌ و كێمى بهێته‌ بكارئینان ، ئانكو ئه‌گه‌ر بو 250 گرامێن هنگڤینى دوو گرامێن خوارنا شاها مێشان بهێته‌ بكارئینان ل وى ده‌مى دێ كارتێكرن به‌روڤاژى بن ، ژبه‌رڤێ گرنگه‌ كو ئه‌و كه‌سانێن خوارنا شاها مێشان بكاردئینن پێزانینان و رێنمایان ل كه‌سانێن شاره‌زا و نوژداران وه‌ربگرن).

 ل بارا بهایێن وان ژى گۆت: (پرانیا جاران مێشه‌ڤان خوارنا شاهێ مێشان بێ به‌رامبه‌ر دده‌ن نه‌خوشان ب تایبه‌تى ئه‌گه‌ر زور ب كێمى و ب گرامان بهێته‌ به‌رهه‌مئینان، به‌لێ ئه‌گه‌ر ریژه‌ گه‌هشته‌ نێزیكێ 10 گرامان و زێده‌تر ل وى ده‌مى مێشه‌ڤان دفروشیت، و نها كیلو دناڤبه‌را 20 بو 25 هزار دیناران دهێته‌ فروتن).