ئەڤرۆ نیوز ، زنار تۆڤی:
پشتی روودانا 16 ئوکتۆبەرێ تەعریبکرن ب رەنگەکێ بەرفرەه ل کەرکووکێ دەستپێکریە و کورد ل سەر جهێن وان دهێنە دەرخستن و عەرەب ل جهێ وان دهێنە ئاکنجی کرن، نوکە ژی رێڤەبەریا گشتی یا پۆلیسێن کەرکووکێ داخواز ژ خەلکێ سێ گوندان کریە کو گوندێن خوە چوول بکەن و ئاکنجیێن وان گوندان کوردن.
خەلکێ هەرسێ گوندێن ھەنجیرە و باجوان و جولیجە یێن سەر ب پارێزگەھا کەرکووکێ ڤە ژ لایێ رێڤەبەریا گشتی یا پۆلیسێن وێ پارێزگەھێ ڤە ھاتینە ھایدارکرن، کو گوندێن خوە چوول بکەن و کارمەندێن کۆمپانیا نەفتولشیمال دێ ل جھێ وان ھێنە ئاکنجیکرن.
هەر چەندە چەندین گوندێن تورکمان و عەرەبان ژی ل نێزیک وان 3 گوندێن کوردان ھەنە، لێ پۆلیسان داخوازا چوولکرنا وان گوندێن کوردان کریە.
هەروەسا ل وان سێ گوندان پتری 600 مالان ھەنە، ئاکنجیێن وان پتری 2500 کەسانە و ل سەر دەمێ رژێمێن بەرێ یێن عیراقێ ئەو گوند ھاتبوونە تەعریبکرن، لێ پشتی سالا 2003 کورد ڤەگەریاینە سەر گوندێن خوە، لێ نوکە هێرشێن چوولکرنێ لێ دهێنه کرن.
نيشاندان
