ئەڤرۆ نیوز:

سەرۆکێ ژوورا بازرگانی یا دھۆکێ دیار دکەت کو رۆژ ب رۆژ لێکگوھاڕتنا بازرگانی د ناڤبەرا ھەرێم و تورکیا دا د زێدەبوونێ دایە و ژمارەکا زۆر یا کۆمپانیێن بیانی ژی ل دھۆکێ کار دکەن، ئاماژە ب بزاڤێن حوکمەتا عیراقێ ژی کر کو دڤیا د رێیا ڤەکرنا دەرگەھەکێ نوو د ناڤبەرا عیراق و تورکیا دا ڤەکەن، دا کو لێکگوھاڕتنێ ل گەل ھەرێمێ نەکەن، بەلێ شکەستن ئینا.

ئەیاد حەسەن، سەرۆکێ ژوورا بازرگانی ل دھۆکێ بۆ ئه‌ڤرۆ نيوز راگەھاند کو رۆژ ب رۆژ لڤینێن بازرگانی ل سنورێ پارێزگەھا دھۆکێ ل گەل تورکیا د زێدبوونێ دایە، ئەڤسالە ژی ھەڤبەرکی ل گەل سالا بۆری زۆر زێدە بوویە، حوکمەتا ھەرێمێ و تورکیا ژی بەردەوام کۆمبوونان ئەنجام ددەن، دا کو ھەموو ئاسانکاریەک ل خالێن سنوری بھێتە کرن، د پێناڤی زێدەکرنا ئاستێ لێکگوھاڕتنا بازرگانی دا ب تایبەت ل گەل تورکیا ژ ئەگەرێ ھاتنە خوارا بھایێ لیرەیی، دڤێت کەلوپەلێن زێدەتر رەوانەیی ھەرێمێ بکەت”.

دەربارەیی ڤەکرنا پرا سیێ یا خالا سنوری یا ئیبراھیم خەلیل، ئەیاد حەسەن گۆت: “ڤەکرنا پرا سیێ مفایێن زۆر بۆ لێکگوھاڕتنا بازرگانی ھەبووینە، نوکە ئەو قەرەبالغا ھەیی نەمایە، گەشتیار ژی ب ساناھیتر ھاتنوچوونێ دکەن، ژ بەر ھندێ پرێ کارتێکرنەکا زۆر ل سەر لێکگوھاڕتنا بازرگانی ھەبوویە”.

دەربارەیی بزاڤێن حوکمەتا عیراقێ بۆ داخستنا خالا سنوری یا سێمالکا و ڤەکرنا خالەکا نوو ل ناڤبەرا عیراق و تورکیا، سەرۆکێ ژوورا بازرگانی یا دھۆکێ ئاشکەرا کر کو ئەوان ھەموو بزاڤ بۆ لێکگوھاڕتنا بازرگانی ل گەل عیراقێ بیت و ل ھەرێما کوردستانێ نەبیت، ژ بەر ھندێ دڤیا وەکو پێگوھۆڕەک خالا سنوری یا سێمالکا ب دایخن و خالەکا نوو د ناڤبەرا عیراق و تورکیا دا ڤەکەن، بەلێ د سەرکەفتی نەبوون.

ئەیاد حەسەن دەربارەیی ژمارا کۆمپانیێن بیانی ل سنورێ پارێزگەھا دھۆکێ ژی گۆت: “ژمارەکا زۆر یا کۆمپانیێن بیانی ل سنورێ پارێزگەھا دھۆک کا دکەن و ب گۆرەیی دووماھی ئامار، ژمارا وان 300 کۆمپانی نە، پتریا وان ژی تورکی نە، پلانا حوکمەتا ھەرێما کوردستانێ یە ژی کو ھەموو ئاسانکاری بۆ راکێشانا کۆمپانیێن زێدەتر یێن بیانی بکەن دا کو ل ھەرێما کوردستانێ وەبەرھێنانێ بکەن.

گۆتژی: “ب بڕیارا جڤاتا بلندا وەبەرھێنانێ، ھەموو ئەو پرۆژێن ل سنورێ پارێزگەھا دھۆکێ یێن ژ ئەگەرێ شەرێ داعش و قەیرانا دارایی ھاتینە راگرتن، جارەکا دی دەست پێ بکەن”.

ئه‌ڤرۆ نيوز، فاتما مزوورى:

رێڤەبەرێ گشتی یێ وەبەرھێنانێ ل ھەولێردا زانین کو ھەموو بەلێندەر ھاتینە ئاگەھدارکرن یێن پرۆژە د دەستی دا، ھەکە دەست ب پرۆژێن خوە نەکەن دێ مۆلەتا کاری ژێ ھێتە وەرگرتن.

دا زانین ژی کو نوکە رەوشا ئابووری بەر ب باشتر دچیت و ئەو پرۆژێن کو ب ئەگەرێ قەیرانا ئابووری ھاتبوونە راوەستاندن، جارەکا دی دێ دەست پێ کەنەڤە و حوکمەتا ھەرێمێ ژی ئامادەیا خوە نیشان دایە ھاریکاریێ بکەت.

سامان عارەب، رێڤەبەرێ گشتی یێ وەبەرھێنانێ ل ھەولێرێ تایبەت بۆ رۆژناما ئەڤرۆ راگەھاندیە کو ئەوێن پرۆژێن خوە ژ ئەگەرێ شەرێ داعش و قەیرانا ئابووری راگرتین، پێدڤیە د نھا دا دەست ب پرۆژێن خوە بکەنەڤە ژ بەر کو رەوشا ئابووریا ھەرێما کوردستانێ بەر ب ئاستێن بلندتر دچیت.

ئاماژە ب وێ چەندێ ژی کر کو ل سنورێ پارێزگەھا ھەولێر 460 پرۆژێن وەبەرھێنانێ ھەنە و کارکرن د نێزیکی 70 پرۆژەیان دا ھاتبوو راگرتن و گۆت: “ژ بەر وێ چەندێ دووماھی مۆلەت ب وان ھاتینە دان کو دەست ب پرۆژەیێن خوە بکەن و ھەکە دەست ب کار نەکەن دێ دەستووریا کارکرنێ ژێ ھێتە وەرگرتن”.

ئەڤ پرۆژێن ھاتینە راگرتن د سێکتەرێن جودا دانە وەکو بنەجھکرن، چاندن، ساخلەمی، پێشەسازی و گەشتیاری.

ل سلێمانیێ ژی ب ھەمان رەنگ، ھەڤال ئەبۆ بەکر، پارێزگارێ سلێمانیێ راگەھاند کو ئەو ھەموو پرۆژێن ژ ئەگەرێ شەرێ داعش و قەیرانا دارایی ھاتینە راگرتن دێ دووبارە کار تێدا ھێتە کرن و ھێنە تەمامکرن.