ئه‌ڤرۆنيوز:

سه‌رۆكێ جڤاتا ررگاركرنا ئه‌نبار، حه‌ميد ئه‌لهايس، هێزێن ئه‌مريكى تۆمه‌تباركرن ب په‌يداكرنا ئاسانكاريان بۆ لڤينێن چه‌كدارێن داعشێ وهاتنا وان بۆ سنورێ عيراقێ وسووريێ وداخوازكر له‌شكرێ عيراقێ وحه‌شدا شه‌عبى كونترۆلا تمام ل سه‌ر سنورى بكه‌ن.

ئه‌لهايس دداخۆيانيه‌كا رۆژنامه‌ڤانى دا گۆت” هه‌بوونا هێزێن ئه‌مريكى ل نێزيك سنورێ عيراقێ وسووريێ مه‌ترسيه‌ ل سه‌ر ئاسايشا عيراقێ ب گشتى وپارێزگه‌ها ئه‌نبار ب  تايبه‌ت”.

گۆت ژى” پێزانين يێن گه‌هشتينه‌ مه‌ كو هێزێن ئه‌مريكى ئاسانكاريان بۆ لڤينێن داعشێ دكه‌ت دناڤبه‌را سنورێ عيراقێ وسووريێ وچاڤێن خوه‌ دنقينن ل هاتنا چه‌كدارێن داعشێ بۆ ناڤ بيابانا ئه‌نبارێ وهه‌كه‌ ئه‌ڤ چه‌نده‌ يا به‌رده‌وام بيت دێ بيته‌ مه‌ترسيه‌كا مه‌زن ل سه‌ر پارێزگه‌ها ئه‌نبار”.

ناڤبرى داخوازكر هێزێن ئه‌مريكى ژ سنورێ عيراقێ وسووريێ بهێنه‌ ڤه‌كێشان وباده‌كا وى سنورى بهێته‌ راده‌ستكرن بۆ هێزێن عيراقى وحه‌شدا شه‌عبى.

ئه‌ڤرۆنيوز:

ره‌وتێ حيكمه‌ ب سه‌رۆكاتيا عه‌مار حه‌كيم راگه‌هاند، هه‌ڤپه‌يمانى ل گه‌ل سائيرون ب سه‌رۆكاتيا موقته‌دا سه‌در يا ڤه‌بر ودووماهيێ نينه‌ وهه‌تا نوكه‌ دانوستاندن يێن دهێنه‌ ئه‌نجامدان  دناڤبه‌راهه‌ردو لايه‌نان دا بۆ گه‌هشتنا هه‌ڤپه‌يمانيا تمام.

ژێده‌ره‌كى به‌رپرس ژ ره‌وتێ حيكمه‌ بۆ ئاژانسا (عين العراق نيوز) گۆت” هه‌تا نوكه‌ ئه‌م نه‌گه‌هشتيه‌ رێككه‌فتنه‌كا دووماهيێ ل گه‌ل سائيرون وئه‌و هه‌ڤپه‌يمانيا نوكه‌ هێشتا رێككه‌فتنێن لاوه‌كى يێن بۆ ماين”.

گۆت ژى” عه‌مار حه‌كيم وموقته‌دا سه‌در دهه‌ڤرانه‌ دبۆچوونێن سياسى دا وبه‌رنامێ حوكمه‌تا نيشتمانى وكه‌سايه‌تيێن هه‌ڤپه‌يمان، به‌لێ ئه‌ڤه‌ ب تنێ به‌س نينه‌ بۆ پێكئينانا حوكمه‌تێ وهه‌تا نوكه‌ هنده‌ك بابه‌ت يێن بن دانوستاندنێ ڤه‌”.

به‌رى نوكه‌ په‌رله‌مانتارێ ره‌وتێ حيكمه‌، محه‌مه‌د له‌كاش دداخۆيانيه‌كێ دا گۆتبوو” راگه‌هاندنا هه‌ڤپه‌يمانيێ دناڤبه‌را موقته‌دا سه‌در وحه‌يده‌ر عه‌بادى وهادى عامرى پێنگاڤه‌كا ب له‌ز بوو دپێكئينانا ليستا مه‌زن دپه‌رله‌مانێ عيراقێ دا”.

ئه‌ڤرۆنيوز:

سه‌رۆكێ لژنا حه‌جێ وسه‌ره‌دانان يا ئيران، حه‌ميد محه‌مه‌دى، راگه‌هاند زێده‌تر ژ ئێك مليۆن و700 هزار وه‌لاتيێن عيراقى سالانه‌ سه‌ره‌دانا ئيرانێ دكه‌ن وهژمارا ژ ڤێ پتر ژ وه‌لاتيێن ئيرانى سالانه‌ سه‌ره‌دانا عيراقێ دكه‌ن.
حه‌ميد محه‌مه‌دى زێده‌تر بۆ ئاژاسا (مهر) يا ده‌نگوباسان يا ئيرانى گۆت” نێزيكى دو مليۆن و 300 هزار وه‌لاتيێن ئيرانى سالانه‌ سه‌ره‌دانا عيراقێ دكه‌ن ژبلى ب مليۆنان وه‌لاتيێن ئيرانى ئه‌وێن ل چله‌يا ئيمام حوسێنى سه‌ره‌دانا عيراقێ دكه‌ن”.
گۆت ژى” ژێرخانه‌كا ئابوورى يا باژێرێ نه‌جه‌ف يا باش نينه‌ وچو هه‌مبه‌ركرن دناڤبه‌را ئۆتێلێن وى وئۆتێلێن باش يێن كه‌ربه‌لا ناهێته‌ كرن، لێ ئه‌م بزاڤان دكه‌ين ره‌وشێ بۆ سه‌ره‌دانكه‌رێن ئيرانى خوه‌شتر بكه‌ين”.

ئه‌ڤرۆنيوز:

مالپه‌ره‌كێ عه‌ره‌بى به‌لاڤكر كۆمبوونه‌كا نهينى دناڤبه‌را وه‌زيره‌كێ سعودى ونوونه‌رێن عه‌بادى وسه‌در ل عه‌مانا پايته‌ختێ ئوردنێ هاتيه‌ ئه‌نجامدان.

مالپه‌رێ (عه‌ره‌بى 21) ژزارده‌ڤێ ژێده‌ره‌كى به‌لاڤكر” به‌رى چه‌ند رۆژان كۆمبوونه‌كا نهێنى دناڤبه‌را سامر ئه‌لسه‌بهان وه‌زيرێ كاروبارێن كه‌نداڤى  يێ سعوديێ كو پێشتر باليۆزێ سعوديێ بوو ل عيراقێ، ل گه‌ل نوونه‌رێن حه‌يده‌ر عه‌بادى وموقته‌دا سه‌در ل عه‌مان هاته‌ ئه‌نجامدان””.

وى ژێده‌رى دياركر” ئارمانج ژ وێ كۆمبوونێ، پێكهاتنا هه‌ڤپه‌يمانيێ بوو دناڤبه‌را ليستا نه‌سر ب سه‌رۆكاتيا عه‌بادى وليستا سائيرون ب سه‌رۆكاتيا سه‌در، كو ل دووڤ وێ رێككه‌فتنێ سه‌رۆكاتيا وه‌زيران دێ ب عه‌بادى هێته‌ دان”

ديسا وى ژێده‌رى خوياكر ژى كو” رێككه‌فتن هاتيه‌ كرن كو سه‌در پشته‌ڤانيا پێدڤى بۆ عه‌بادى ب ده‌ستڤه‌بينيت بۆ وێ چه‌ندێ ويلايه‌تا دويێ وه‌ربگريت وبزاڤێ بكه‌ت ئيرانێ رازى بكه‌ت كو عه‌بادى ژ سه‌رۆكاتيا وه‌زيران دوور نه‌ئێخيت”.

به‌حسێ وێ چه‌ندێ ژى كر كو رێككه‌فتن دوێ چه‌ندێ دا يا سه‌ركه‌فتى بوو كو عه‌بادى وسه‌در لێك نێزيك بكه‌ت وهه‌ڤپه‌يمانيێ رابگه‌هينن.