ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن:ل رۆژا چارێ یا چەژنا قۆربانێ د روودانەکا ترافیکێ دا کەسەکێ گیانێ خوە ژدەست دا.
ناڤهاتی زێدەتر ئاشکرار کر: ل شەڤا بوری و ل دەمژمێر ( 8:45 ) خولەک ل سەر جادا خراب بابکێ ترۆمبێلەکا هوندا تایبەت جێب خوە ل کەسەکێدا و د ئەنجامدا وی کەس ئێکسەر گیانێ خو ژ دەست دا.
ئه‌ڤرۆنيوز:
راهێنه‌رێ يانا به‌رشه‌لونا (ئه‌رنستۆ فالفيردى) چاره‌نڤيسێ ياريكه‌رێ كرواتى (ئيڤان راكيتيتش) ل دۆر مانا وى ل به‌رشه‌لونا ل ڤێ هاڤينێ ئێكلاكر.
راكيتيتش ئه‌وێ ل گه‌ل هه‌لبژارتيێ خوه كرواتيا گه‌هشتبوو ياريا دووماهيێ ل گه‌ل فه‌ره‌نسا دمونديالا رووسيا دا، دڤێ هاڤينێ دا ده‌نگوباسێن ڤه‌گوهاستنا وى بۆ يانا باريس سان جيرمان ب هيز ببوون.
فالفيردى دكۆنگره‌كێ رۆژنامه‌ڤانى دا ئه‌ڤرۆ ئه‌ينيێ 24/8/2018ى گۆت” راكيتيتش ياريكه‌ره‌كێ سه‌ره‌كى يه ل يانا به‌رشه‌لونا وئه‌ز پشت بستنێ ل سه‌ر دكه‌م، ئه‌و ياريكه‌ره‌كێ گرنگ بوو ل وه‌رزێ بۆرى ودخوازم ل ڤێرێ بمينيت”.
دبه‌رسڤا پرسياره‌كا رۆژناما (ماركا) يا ئيسپانى دا ل دۆر چوونا راكيتيتشى، فالفيردى گۆت” دخوازم باشترين تشتان بۆ ياريێن ڤى وه‌رزى بده‌ستڤه بينم، راكيتيتش ئێك ژباشترين ياريكه‌رانه، ئه‌و دزانيت ئه‌م چاوان ياريێ دكه‌ين، ئه‌م ل ڤێرێ نينين بۆ ئه‌نجامدانا دانوستاندنان، ئه‌م دخوازين ژۆرا جامێن بده‌ستڤه‌دئينينن مه‌زنتر لێ بهێت”.
ئه‌ڤرۆنيوز:
سێ حاله‌تێن خه‌ندقينێ دئاڤا رووباران دا ئه‌ڤرۆ ئه‌ينيێ 24/8/2018 ل هه‌رێما كوردستانێ هاتن تۆماكرن.
رێڤه‌به‌ريا پۆليسێن قه‌زا سۆران دياركر كو گه‌نجه‌ك ب ناڤێ (ئيبراهيم بيستون) كو قوتابى يه دئاڤا رووبارێ شانه‌ده‌ر ل ناحيا گورتوو خه‌ندقى.
رێڤه‌به‌ريا پۆليسێن گه‌رميان ژى ئه‌ڤرۆ راگه‌هاندبوو كو گه‌نجه‌ك ب ناڤێ (ئالان وريا) ژدايكبوويێ سالا 2000 ل ده‌مێ مه‌له‌ڤانيكرنێ درووباره‌كى دا ل گۆندێ گرمكى ل ناحيا زنانه خه‌ندقى.
هه‌ر ئه‌ڤرۆ ئه‌ينيێ گه‌نجه‌ك ب ره‌گه‌ز عه‌ره‌ب ل ئاڤا ده‌رياچا دۆكان ل سلێمانيێ خه‌ندقى.
ئه‌ڤرۆنيوز:
رێڤه‌به‌ريا پۆليسێن دارستانان وژينگه‌هێ ل پارێزگه‌ها سلێمانيێ ئه‌ڤرۆ ئه‌ينيێ 24/8/2018 راگه‌هاند، ئاگره‌كى پتر ژ هزار دونه‌مێن ئه‌ردێ چاندنێ ل قه‌زا قه‌ره‌داغ سوتن.
رێڤه‌به‌ريا ناڤبرى درۆهنكرنه‌كێ دا به‌لاڤكر” ل شه‌ڤا بۆرى ئاگره‌ك ل سنورێ ده‌ڤه‌را هه‌رگێنه ل قه‌زا قه‌ره‌داغ به‌ربوو كو دبيته جارا دويێ ئه‌ڤ روودانه ل وێ ده‌ڤه‌رێ په‌يدا دبيت وتيمێن پۆليسێن دارستانان ل قه‌ره‌داغ گه‌هشتنه جهێ روودانێ، به‌لێ ئاگر به‌رفرهه تربوو وگه‌هشته سنورێ گوندێن كانى روشنايى وگله زه‌رده”.
دياركر ژى” پشتى بزاڤێن به‌رده‌وام يێن پۆليسێن دارستانان وتيمێن ئاگر ڤه‌مراندنێ وخه‌كلێ وان گوندان وتيما ئه‌سمانى يا ئاگر ڤه‌مراندنێ، كۆ‌نترۆل ل سه‌ر ئاگرێ پشتى چار ده‌مژمێران هاته كرن”.
ئاماژه دا كو ئه‌گه‌رێ ئاگربه‌ربوونێ يێ ديار نينه وڤه‌كۆلين يا به‌رده‌وامه ل دۆر وێ روودانێ.
ئه‌ڤرۆنيوز:
ژئه‌گه‌رێ كێمكرنا يه‌ده‌كێ په‌ترۆلا خام يا ئه‌مريكى وسزايێن ئه‌مريكا ل سه‌ر ئيرانێ، ئه‌ڤرۆ ئه‌ينيێ 24/8/2018 بهايێ په‌ترۆلێ ل بازارێن جيهانى دبلندبوونێ دابوو وئاسته‌كێ نوو دبلندبوونێ دا تۆماركر.
ل رۆژا دوشه‌مبيا بۆرى كو حه‌فتيه‌كا نوو ل بازارێ بورسێ هاته ڤه‌كرن، بهايێ په‌ترۆلێ به‌ر ب بلندبوونێ ڤه چوو، بهايێ په‌ترۆلێ ژ 71 دۆلار و 70 سه‌نتان بۆ 72 دۆلار و 27 سه‌نتان بلندبوو، په‌ترۆلا خام يا تكساس گه‌هشته 68 دۆلار و27 سه‌نتان بۆ هه‌ر به‌رميله‌كێ، كو ب گۆژمێ 1 دۆلار و20 سه‌نت بلندبوو.
ل دو رۆژێن دووماهيا حه‌فتيا بۆرى ژى بهايێ په‌ترۆلێ بلندبوون تۆماركر بوو پشتى كو ب رێژه‌كا به‌رچاڤ هاتى خوار.
ب گورەی “fxnewstoday” ل ده‌ستپێكا حه‌فتيێ بلندبوونا رێژا گشتى يا كۆمكرى يا ئه‌مريكا ژلايه‌كى وگه‌شه‌كرنا شه‌رێ ئابوورى دناڤبه‌را ئه‌مريكا وچينێ بۆ ئه‌گه‌رێ هاتنا خوارا بهايێ په‌ترۆلێ.
ئه‌ڤرۆنيوز:
په‌يڤدارێ جڤاتا سه‌ركردايه‌تيا پارتى ديموكراتى كوردستان ل پارێزگه‌ها كه‌ركووكێ، عه‌ندنان كه‌ركووكى راگه‌هاند، هه‌تا نوكه حه‌شدا شه‌عبى ژ كه‌ركووكێ نه‌هاتيه ڤه‌كێشان وپرۆسا ب عه‌ره‌بكرن وشێعه‌كرنا كه‌ركووكێ يا به‌رده‌وامه.
ل رۆژێن بۆرى ل چه‌ند ده‌ڤه‌رێن پارێزگه‌ها نه‌ينه‌وا پشكه‌ك ژ هيزێن حه‌شدا شه‌عبى ڤه‌كێشان ولايه‌نێن كوردى وسونى پێشوازى ل وێ پێنگاڤا حه‌شدا شه‌عبى كر بۆ وێ چه‌ندێ ره‌وشا عيراقێ به‌ر ب ئاسايى بوونێ ڤه بچيت. عه‌دنان كه‌ركووكێ په‌يڤدارێ جڤاتا سه‌ركردايه‌تيا پارتى ل كه‌ركووكێ بۆ مالپه‌رێ فه‌رمى يێ پارتى ديموكراتى كوردستان گۆت” حه‌شدا شه‌عبى نه‌هاتيه ڤه‌كێشان ژ كه‌ركووكێ وپێناچيت خوه ڤه‌كێشيت چونكى ئه‌و رۆژه‌كێ ب جلكێن له‌شكرێ عيراقێ دهێنه دناڤ كه‌ركووكێ دا ورۆژه‌كێ ب جلكێن پۆليسێن فيدرالى وهێزا دژه تيرۆر وخوه دگوهۆرن ب چه‌ند جۆر وناڤان وهه‌موو ژى هه‌ر حه‌شدا شه‌عبى يه وئيك ئامرانج يا هه‌ى، چونكى ناڤه‌رۆك هه‌ر ئيكه وپێشتر ژى مه يا گۆتى كو هێزێن حه‌شدا شه‌عبى خوه ناڤه‌كێشن ول كه‌ركووكێ تنێ جلكێن خوه دگوهۆرن”.
وى به‌رپرسێ پارتى گۆت ژى” هه‌موو ئه‌و گرۆپێن حه‌شدا شه‌عبى يێن ئيناينه كه‌ركووكێ ئه‌ون كو دژى خواستێن گه‌لێ كوردن وفه‌رمانان ژ وه‌لاته‌كێ ده‌ڤه‌رێ وه‌ردرگن ب تايبه‌تى گرۆپێن ( ئيمام عه‌لى، عه‌سائب ئه‌هلولحه‌ق وحزبوللا) وچه‌ند گرۆپێن دى يێن وه‌كو وان كو ئه‌م دزانين ب سه‌ر كێ ڤه‌نه وپيلانا وان بۆ كه‌ركووكێ چيه، وان ب خوه ژى نه‌ڤه‌شارتيه بۆ چ مه‌ره‌مه‌كێ ل وێ سنورێ كوردستانێ نه”.
دياركر ژى” فشاره‌كا مه‌زن يا هه‌ى بۆ ئاساييكرنا ره‌وشا كه‌ركووكێ وده‌ركرنا حه‌شدا شه‌عبى ژ وێ ده‌ڤه‌رێ، به‌لێ هه‌تا نوكه نه‌هاتينه ڤه‌كێشان”.
ل دۆر پرۆسا ته‌عريبكرنا كه‌ركووكێ، عه‌دنان كه‌ركووكى گۆت” ته‌عريبكرن وشيعه‌كرن ژى هه‌روه‌كو خوه يا ب رێڤه‌دچيت وپلان ژلايێ حوكمه‌تا عيراقێ ڤه هاتيه دارێشتن وحه‌شدا شه‌عبى وهێزێن عيراقى بجه دئينن، هه‌ر مه‌ره‌ما جێگيركرنا حه‌شدا شه‌عبى دناڤ كه‌ركووكێ دا بۆ وێ چه‌ندێ يه ديموگرافيا كه‌ركووكێ ب گوهۆرن، هه‌تا چه‌ندين مال وباره‌گايێن مه ولايه‌نێن دى يێن كرينه باره‌گايێن خوه، ئه‌و ژ جاده‌يا قير لاناده‌ن وتني دخوازن ل وى جهێ خه‌لك تێدا ب زۆرى ده‌ربكه‌ن وتالان بكه‌ن.
ئه‌ڤرۆنيوز:
په‌رله‌مانتاره‌كێ كوردێ ئێزدى ل په‌رله‌مانێ كوردستانێ راگه‌هاند، ئێزدى جاره‌كێ ب ده‌ستێ تيرۆرستێن داعشێ وجاره‌كا دى ژى ب ده‌ستێ ميليشيێن حه‌شدا شه‌عبى قوربانى داينه.
شێخ شامۆ، په‌رله‌مانتارێ ئێزدى ل په‌رله‌مانێ كوردستانێ گۆت ژى” مخابن ئه‌ڤه بۆ ده‌مێ چار سالانه ئێش وئازارێن ئێزديان درێژى بۆ هه‌يه وهێشتا ره‌وشا ژيانا وان يا باش نينه وده‌ربه‌ده‌ر بووينه ونوكه ژى ئه‌زيزێن مه ل گۆرێن ب كۆم دانه وته‌رمێن وان نه‌هاتينه ده‌رئينان تاكو ل جهێن شايسته بهێنه ڤه‌شارتن ونوكه ده‌ڤه‌رێن ئێزدى ژى ب تايبه‌ت شنگالێ بووينه جهێن ده‌ستێوه‌ردانا ئه‌جيندێن ده‌ره‌كى ونه ئاراميه‌كا تمام ب سه‌ر وان ده‌ڤه‌ران دا هاتيه وژيان ل شنگالێ نه‌مايه، ئانكو نوكه شنگاليان دو جاران قوربانى دايه، جاره‌كێ ب ده‌ستێ تيرۆرستێن داعشێ وجاره‌كادى ژى ب ده‌ستێ حه‌شدا شه‌عبى”.
شێخ شامۆ ئاشكراكر ژى” هه‌تا نوكه تنێ 10% ژ خه‌لكێ شنگالێ يێن زڤرين بۆ شنگالێ، ره‌وشا ژيانا وان ژى يا باش نينه”.
سه‌باره‌ت ره‌وشا ئاوارێن ئێزدى ل هه‌رێما كوردستانێ، شێخ شامۆ بۆ باسنيوز گۆت” ره‌وشا ژيارا وان يا خرابه وئه‌و ئه‌ڤه چار ساله دكه‌مپان ڤه وسه‌رما وگه‌رم ژى كاريگه‌ريێ ل سه‌ر ئاواران دكه‌ت وئه‌و يێن ژ ژيانا ئاواره‌ييێ بێ زار بووين وئه‌و ره‌وشا ب سه‌ر كوردێن ئێزدى دا هاتى بوويه ئه‌گه‌رێ وێ چه‌ندێ خه‌لك تووشى نه‌خوه‌شيێن سايكلوژى ببن وخه‌لك ژى يێن هه‌ين بێ ئومێد بووينه ژ پاشه‌رۆژا خوه، به‌لێ پێدڤيه بزاڤ بهێته كرن ره‌وشا ژيانا وان ئاواران بهێته باشكرن”.
ئه‌ڤرۆ نیۆز، هەرهین محەمەد:
سترانبێژا گەنجا باكوورێ كوردستانێ (جانێ حەیران) كو نوكە ل هەولێرێ دژیت دیدارەكێ دا بۆ ئەڤرۆ نیۆز دیاركر نوكە ئەو مژوولی بەرهەمەكێ دوازدە تراكیە و شەش ستران ژ تۆماركرنێ ب دووماهی ئیناینە و شەش ژی ل بەر تۆماركرنێ نە و ئەڤ سترانە پتریا وان فلكلۆری وئەڤینی نە ، لێ هەتا نوكە چو ناڤ بۆ ڤی بەرهەمی نەهاتینە دەستنیشانكرن.
ئەڤرۆنیۆز، هەرهین محەمەد:
هونەرمەند دكتورە بەلقیس ب هەلكەفتا جەژنا قوربانی نووترین كلیپا خوە یا بناڤێ ( باسی تو) به‌لاڤكر كو ژ پەیڤێن دینا و ئاوازێن هەلكەوت زاهرە وئەندازیاریا دەنگی ئاریۆس و ژدەرهێنانا محەمەد جەمیل.
ناڤەرۆكا ڤێ كلیپێ ژی ل سەرهندێ یە كو ل هەموو جهان ل خوەشتڤیێ خوە دگەریت و بەحسێ وی دكەت.
ئه‌ڤرۆنيوز:
ئێڤاريا ئه‌ڤرۆ ئه‌ينيێ 24/8/2018 ب ئاماده‌بوون وسه‌رپه‌رشتيا عومه‌ر عه‌لى تاها رێڤه‌به‌رێ گشتى يێ په‌روه‌ردێ ل پارێزگه‌ها دهۆكێ كوۆمبوونه‌كا تايبه‌ت ل دۆر ئه‌زموونێن گشتى قۆناغا 12 ئاماده‌يى وئه‌زموونێن نيشتيمانى قۆناغا نه‌هێ بنه‌ره‌تى خۆلا دوويێ سالا خواندنێ 2017/2018 هاته كرن .
راگه‌هاندنا رێڤه‌به‌ريا گشتى يا په‌روه‌ردا پارێزگه‌ها دهۆكێ به‌لاڤكر” د كۆمبوونێ دا و ب ئاماده‌بوونا هاريكارێ رێڤه‌به‌رێ گشتى بۆ كاروبارێن ته‌كنيكى وهه‌موو رێڤه‌به‌رێن په‌روه‌ردێن قه‌زا ورێڤه‌به‌رێ سه‌رپه‌رشتيا په‌روه‌رده‌يى ل پارێزگه‌ها دهۆكێ وسه‌رپه‌رشتێن ئێكێ ل يه‌كه‌يێن سه‌رپه‌رشتيا ئاماده‌يى وپيشه‌يى ل سه‌نته‌رێ باژێرێ دهۆكێ وئاكرێ، چه‌ندين خالێن گرنگ سه‌باره‌ت ئه‌زموونێن خۆلا دويێ وبه‌رهه‌ڤى وئاماده‌كاريێن هاتينه ئه‌نجامدان بۆ سه‌رخستنا ئه‌زموونان هاتنه به‌حسكرن” .
ئه‌زموونێن گشتى قوناغا 12 ئاماده‌يى وئه‌زموونێن نيشتيمانى قوناغا نه‌هێ بنه‌ره‌تى خۆلا دويێ سالا خواندنێ 2017/2018 دێ ل 27/8/2018 ده‌ست پێ كه‌ن .
نيشاندان