ئەڤرۆ نیوز:
یاریزانێ ئسپانی رافائێل نادال شیا جھێ خوە ل رێزا ئێکێ یا پولێنا یاریزانێن تەنسا ئەردی و ھەڤرکێ وی یێ سویسری فێدرێر ژی شیا جھێ خوە پارێزێت و یێ سربی جوکوڤیچ پێشڤە ھاتە رێزا شەشێ ل دووڤ نووترین پولێنا ئێکەتیا جیھانی یا تەنسا ئەردی ئەڤرۆ رۆژا دوشەمبی دەرخستی.

نووترین رێزبەند ب ڤی شێوەی یە:
١/ رافائێل نادال ١٠,٠٤٠ خال
٢/ روجێ فێدرێر ٧,٠٨٠ خال
٣/ خوان مارتن دیل پوترو ٥,٥٠٠ خال
٤/ ئەلێکسەندەر زڤیریف ٤,٨٤٥ خال
٥/ کیڤن ئەندرسون ٤,٦١٥ خال
٦/ نوڤاک جوکوڤیچ ٤,٤٤٥ خال
٧/ مارتن شیلیتچ ٤,٤٤٥ خال
٨/ گریگور دیمتروڤ ٣,٤٨٥ خال
٩/ دومینیک تیم ٣,٤٨٥ خال
١٠/ دیڤێد جوڤین ٣,٤٣٥ خال

ئەڤرۆ نیوز:
کارگێریا یانا بەرشلونە گەھشتە رێککەفتنێ بۆ نووکرنا ھەڤبەستا یاریزانێ خوە یێ ھێلا ناڤین سێرجیو بوسکێتس پێخەمەت رێگریێ ل وان یانا بکەن یێن حەزا ئیمزاکرنا ھەڤبەستا ڤی یاریزانی ھەی.
رۆژناما مارکا ئسپانی ئاشکرا کر ئەڤرۆ رۆژا دوشەمبی یانا بەرشەلونە بریاردا ھەڤبەستا یاریزانێ خوە یێ خودان شیان ل ھێلا ناڤین سێرجیو بوسکێتس نوو بکەت ھەتا سالا ٢٠٢١ دگەل مافێ درێژکرنا وێ ژی بۆ دو سالێن دی ئانکو ھەتا ٢٠٢٣ ل دویف رێککەفتنەکا دی.
ھەمان ژێدەر ئەو چەندە ژی دیارکر کو کارگێریا یانا بلوگرانا ل دووڤ ھەڤبەستا نوو مووچێ یاریزانێ خوە بوسکێتس ژی زێدەکریە دیسان مەرجێ سزایێ شکاندنا ڤێ ھەڤبەستێ ژی ٢٠٠ ملیۆن یورویە.

ئەڤرۆ نیوز:
بریارە ئەڤرۆ یاریێن گەرا دوماھیێ ژ خولا پلە ئێکا عیراقێ بۆ دەربازبون بۆ خولا نایاب بھێنە کرن و د ڤێ گەرێ دا ھەولێر دێ ل یاریگەھا خوە فرەنسو حەریری مێڤانداریا یانا دیفاع مەدەنی کەت ل دەمژمێر پێنجی ئێڤاری.
د ڤێ یاریێ دا ھەولێر ژبلی سەرکەفتنێ چو ئەنجامێن دی د بەرژەوەندیا وێ دا نینن ژبەرکو ھەڤرکا وێ یانا دیفاع مەدەنی ب ھەڤپشکی ل گەل ھەولێر رێزا ئێکێ و دویێ ب ھەشت خالان دھێن و یانا قاسم ژی ب حەفت خالان رێزا سیێ دھێت، لەورا تنێ ئەڤرۆ پێدڤیە ھەولێر ب ھەر ئەنجامەکی بیت سەرکەفتنێ دەستخوە ڤە بینت پێخەمەت دەربازبونا خوە مسوگەر بکەت بۆ خولا نایابا عیراقێ ل وەرزێ بھێت.

ئەڤرۆ نیوز:
چونا ستێرا پرتوگالی کرستیانو رونالدو ژ ریال مەدرید بۆ یانا یوڤانتوس بۆ ئەگەرێ نەبەرھەڤ بونا پشتەڤانێن ڤێ یانێ د یاریا ئێکێ یا مێرێنگێ ھەمبەر یانا خیتافی ژ چارچوڤێ یاریێن گەرا ئێکێ یا خولا ئسپانی دا.
رۆژناما موندو دیبورتیڤو یا کەتالونی ئاشکرا کر کو شڤێدی د یاریا ریال مەدرید دگەل خیتافی دا زوربەیا کورسیێن یاریگەھێ د ڤالا بون ژ پشتەڤانا و تنێ د ڤێ یاریێ دا ٤٨ ھزار و ٤٦٦ کەس ئامادەی دیتنا یاریێ بون کو دبیتە جارا دویێ ئەڤ چەندە روودەت بەری نوکە ژی ل سالا ٢٠٠٩ کێمترین پشتەڤان ئامادەی دیتنا یاریا ریال مەدرید دگەل مایورکا بون ئەو ژی ٤٤ ھزار و ٢٢ کەس ئامادەبون ل یاریگەھێ کو یاریگەھا بێرنابیو جھێ ٨١ ھزار کەسان ھەیە.
ھەمان ژێدەر ئەڤ چەندە بۆ نەبونا یاریزانێن ستێر ڤەگەراند د یانا ریال مەدرید دا کو بویە ئەگەر پشتەڤان ژ سیاسەتا سەروکێ یانا مەلەکی فلرونتینو پێرێز دلگران بوینە ھەمبەر فروتنا یاریزانێن ستێر و نە ئینانا چو پێگوھورێن دی ل ھەمان ئاست.

ئەڤرۆ نیوز:
یاریزانێ سربی نوڤاک جوکوڤیچ ب ناسناڤێ قارەمانیا سینسیناتی یا جیھانی یا ھزار خالی ھاتە خەلات کرن پشتی د یاریا دوماھیێ دا شیای سەرکەفتنێ ل سەر ھەڤرکێ خوە یێ سویسری روجێ فێدرێر تومار بکەت.
جوکوڤیچ شیا د ڤێ یاریێ دا سەرکەفتنێ توماربکەت ل سەر پلەدارێ دویێ ل جیھانێ روجێ فێدرێر ب دو کومان بێ بەرامبەر (٦-٤، ٦-٤) ئەوا ھەڤرکیێن وێ ل وەلاتێ ئەمریکا ھاتیە کرن.
ب ڤێ سەرکەفتنێ جوکوڤیچ بەردەوامی دا زنجیرەیا دەستڤەئینانا ناسناڤان کو شیایە ھەمی ناسناڤێن ماستەرز دەستخوە ڤە بینت دیسان تنێ ناسناڤێ سینسیناتی مابوو ئەو ژی دەستخوە ڤە ئینایە، دیسان د بیتە ناسناڤێ دویێ ل ڤی وەرزی ژ سەرجەمێ ٧٠ ناسناڤێن وی دەستخوە ڤە ئینای ژ سالا ٢٠٠٣ وەرە.