ئەڤرۆ،ھەژار مەعروف:
چاڤەرێ دھاتەکرن یانا دالکورد دخۆلا پلا نایاب یا سوید دا ببیتە ژمارەکا ب زەحمەت بوو ھەموو یانێن پشکدار دخۆلا سوید دا لێ ئەو پێشبینی ھەموو بەروڤاژی بوون یانا دالکورد نوکە بوویە پاریەکێ ب سانەھی بۆ ھەموو یانێن پشکدار و نوکە د رەوشەکا لاواز دا بوریت د لیستەیا خولێ دا ل رێزا ١٦ و دووماھیێ دھێت ھەردیسان رەوشا وێ یا دارایی ژی بەر ب لاواز بوونێ ڤە چویە تایبەت پشتی سپونسەرێ سەرەکی یێ یانێ ھەتا رادەیەکێ مەزن دەست ژ پشتەڤانیا یانێ بەردەی .
ھەر ژ بەر ئەو رەوشا نوکە یا یانە کەڤتی یە تێدا یانە نەچار بوویە ھژمارەکا مەزن یا یاریزانێن خوە فروشیت داکو بارێ ئەوێ یێ یانێ سڤک بیت ھەردیسان ب دەسڤە ئینانا کوژمەکێ پارەی بشێت خوە ب رێڤەبیت بو ماوێ بھێت کو ل مێرکاتویا ھاڤینا ئەڤ سالە دا یانێ ھەشت یاریزانێن خوە فروتن و نێزیکی چار ملیون یورۆیان ل ماوێ ھەیڤەکێ دا ب دەستخوڤە ئینان .
دو ژ ئەوان یاریزانان ب بلندترین کوژمە ھاتنە فروتن د مێژویا یانێ دا ئەوژی ئێک ژ ئەوان کورێ باژێرێ دھۆکێ رێوان ئەمین بوو ب کوژمێ ٨٥٠ ھەزار یورۆیان ھاتە فروتن بۆ یانا ئوسترسوند یا سویدی ھەردیسان ھێرشبەرێ خوە و ھەلبژارتیێ سرالیون محەمەد بای تورای ب کوژمێ ٢ ملیون یورۆیا فروتە یانا سینت ترویدن یا بەلجیکی و ژبلی ئەوان یاریزان شەش یاریزانێن دی ژی فروتن کو کوژمێ فروتنا ئەوان ھەموو یاریزانان نێزیکی ٦٥٠ ھەزار یورۆیان بوون .

ئەڤرۆ، زنار زوبێر:

ئاستێ فوتسالا پارێزگەھێ سال بۆ سالێ بەر ب پاشڤە زڤرینێ و ل ماوێ بھێت بیتە قەیرانا فوتسالا کچان سەرھلدەت، راھێنەرێن ڤێ یاریێ ژی دیاردکەن پێدڤیە ھزر ل چێکرنا شەنگستێ ڤێ یاریێ بکەین بەری قەیران سەرھلدەت.

ل دۆر ڤی بابەتی خوزی حەمید راھێنەرا فوتسالێ بۆ رۆژناما ئەڤرۆ گۆت: ماوەکە پارێزگەھا دھۆکێ پشتبەستن ل سەر یاریزانێن بەرھەڤ کریە بۆ قارەمانیێن عیراقێ و کوردستانێ لێ کەس ھزر د چێکرنا یاریزانان دا نە کریە لەورا نوکە پێدڤیە ئەم ھزر د ڤەکرنا فێرگەھێن فوتسالێ بکەین ل سەر ئاستێ کچان ژبەرکو ڤی شێوەی ل سالێن بھێت تشتەک نا مینت ب ناڤێ فوتسالێ.

خوزی ئەو چەندە ژی گۆت: نوکە ب شێوەکێ گشتی ل ھەمی پارێزگەھێن ھەرێمێ ئاستێ فوتسالا کچان پێشکەفتیە و یانێن پارێزگەھێ ئەگەر ب ڤی شێوێ نوکە کار بکەن دێ پاشڤەزڤریت و ل ماوێ بھێت دێ یا ب زەحمەت بیت بشێن ھەڤرکیێ بکەین.

ژلایێ خوە ڤە راھێنەرێ بەرێ یێ فوتسالا یانا گارە بۆ رۆژناما ئەڤرۆ دبێژیت: چەندین سالە پشتبەستنا فوتسالا پارێزگەھێ ب گشتی ل سەر چەند کەسان کری یە و ئەگەر ئەڤ چەند کەسە نەمان ل سالێن بھێت دێ کەڤینە د قەیرانا فوتسالا کچان دا لەورا پێدڤیە ھزر د چێکرنا شەنگستێ وەرزشا کچان دا بکەین باشترین چارەسەری ژی ئەوە کو پشتەبستنێ ل سەر ئەکادیمیێن وەرزشی بکەین بۆ چێکرنا یاریزانێن فوتسالا کچان دیسان ل کەرتێ پەروەدێ ژی ھەر ژ قوناغا بنەرەت ڤێ یاریێ پێشبێخن ژبەرکو ئەگەر یاریزان ل تەمەنەکێ بچیک وەرزشی بکەت دێ خێزانێن وان ژی ھاریکاربن بەروڤاژی ئەگەر د مەزن بن دبیت خێزانێن وان رێگریێ لێ بکەن.

ھەر د ڤی چارچوڤەی دا سیروان نەجمەدین بەرپرسێ لژنا فوتسالا کچان ل ئێکەتیا تەپا پێ یا کوردستانێ بۆ رۆژناما ئەڤرۆ گۆت: سال بۆ سالێ ئاستێ فوتسالا پارێزگەھا دھۆکێ بەر ب پاشکەفتنێ یە و ل ڤی وەرزێ بوری ژی دیاربوو پشتی چەندین سالا یانێن پارێزگەھا دھۆکێ کونترولا ڤێ قارەمانیێ کری لێ ل وەرزێ بوری نەشیان و دبیت ل سالێن بھێت ژی ئەڤ چەندە روو بدەت ژبەرکو ئێکەتیا تەپا پێ بریار دایە بۆ وەرزێ بھێت تنێ یانێن پشکدار مافێ ھەی دو یاریزانا ژ دەرڤەی پارێزگەھێن خوە بینن لەورا دێ گەلەک کێشە بۆ یانا پەیدابن پێکھاتەکێ بھێز بۆ خوە چێکەن دیسان دێ دەلیڤێ دەتە ھەمی پارێزگەھان پشتبەستنێ ل سەر یاریزانێن خوە بکەن و شەنگستەکێ باش دێ پەیدابیت دیسان ل ماوێ بھێت دێ وەرزشا کچان ژی پێشڤەچونەکا باشتر ب خوە ڤە بینت.

ئەڤرۆ نیوز:
پەیوەندیێن ستێرا فرەنسی و یانا مانچستەر یونایتد پول پوگبای دگەل راھێنەرێ خوە یێ یانێ یێ پرتوگالی جوزێ مورینھوی بەر ب ئالوزیەکا دژوار چوی پشتی داخویانیێن پوگبای یێن دوماھیێ.
رۆژناما زە سەن یا بریتانی ئەڤرۆ رۆژا پێنجەشەمبی پەیامەک بەلاڤ کریە و تێدا ئاماژە دایە وێ چەندێ پشتی پوگبای دوماھی داخویانیێن خوە دا دیارکربوو کو ئەو ژ سەرەدەریا راھێنەرێ خوە مورینھوی دگەل وی یێ رازی نینە لەورا نوکە ئەو نە یێ ئارامە دگەل مانچستەر یونایتد و ئەڤ چەنەد ژی بویە ئەگەر مورینھوی تورە ببیت و ھەردو لا تورەبوینە و مورینھوی داخواز ژ وی کریە ئەگەر وی بڤێت رێزێن یانا مانچستەر بھێلیت تنێ ل سەر وی پێدڤیە داخوازیەکێ پێشکێشی کارگێریا یانێ بکەت و داخوازا چونێ ژێ بکەت و ڤێ چەندێ ژی ئاریشەیێن ناڤبەرا وان دا مەزن بوینە و دبیت پوگبا یانێ بھێلیت و بەر ب یانەکا دی بچیت و بەرشەلونە ژی نێزیکترین یانە یە بۆ وی.