ئه‌ڤرۆ نيوز:

رێڤەبەرێ چاڤدێری و گەشەپێدانا جڤاکی ل ئامێدیێ راگەھاند، بێ پلانی و نەھەماھەنگیا وەزارەتا کار و کاروبارێن کومەلایەتی د پروسا دووبارەکرنا پشکنینا خودان پێدڤیێن تایبەت دا، بۆ ئەگەرێ نەداد پەروەریێ د دەر ئەنجامان دا و خەلکەکێ زور ژ ھاریکاری یا مەھانە بێ بەھر بوون.

مافپەروەر سەرھەنگ حسێن بۆ ئەڤرۆ دیار کر، ھەرسال ئەم پشکنینەکێ دکەین و داوی پشکنینا کێم ئەندامان ئەنجام دای ل 15-7-2017 بو و بەری دوو حەفتیان ئەنجامێن وان کێم ئەندامان زڤرین ئەوێن ل لێژنا پزیشکی دەرنەچووین، لێ د ڤی ئەنجامی لێژنا پزیشکی کو بۆ کێم ئەندامان دایە دیارکرن زۆر شاشی دناڤ وی ئەنجامێ نمرا بۆ کێم ئەندامان دانای ھەیە، ئانکو نەدادپەروەری د ڤان ئەنجامان دا ھەیە.

خویاژی کر، ل سنورێ پارێزگەھا دھوکێ چار ھزار و 404 ناڤ یێن زڤرین کو نەدەرچووینە ل پشکنینا لیژنا پزیشکی و ژ ڤان ھەمی ناڤان گەلەک یێن دەرچوی و ناڤێ وان جارەک دن دگەل دەرنەچوویان ژی یێ بۆ مە ھاتی، ئانکو ناڤێن وان دگەل دەرچوویان ژی یێ ھاتی و دگەل دەرنەچوویان ژی یێ ھاتی، مە دوونیایەکا تێبینیان ل سەر ھەیە و ئەو شاشیە ژ وەزارەتێ یا دەرکەفتی و ئەڤە دێ بیتە ئاریشەکا زورا مەزن بۆ وەلاتیان، ژ بەر کو ھاتن و چون بۆ وان زۆر یا ب زەحمەتە و زەرەرمەندێ ئێکێ د ڤێ پروسێ دا ھەر وەلاتیە.

مافپەروەری خوەیاکر، ئەڤە ھەر ژ 2015 ل ھەیڤا 10 تاکو نھا چۆ مۆچەک بۆ وان وەلاتیێن سەر ب چاڤدێرێن خێزانی نەھاتیە دابینکرن و یێن ھاتیە راگرتن نەک برین، و گۆت: پشتی ڤێ پشکنینا مە ل دووماھی جار ئەنجام دای ئەم د گەشبینین دێ چارەنڤیسێ وان یێ باش و دیاربیت، چونکو گەلەک د ناڤ وان دا کێم ئەندام بوون و ھاتبونە ڤەگوھاستن بۆ ناڤ لیستێن چاڤدێرێن خێزانی ژ بەر تەمەنێ وان یێ سەر 60 سالیێ دا و ئەڤە دەلیڤەکا زێرینە بۆ وان کێم ئەندامان کو بزڤرنە سەر لیستا کێم ئەندامان و مفادارببن ژ وەرگرتنا ھاریکاریێ.

ئه‌ڤرۆ نيوز:

پەیڤدارێ وەزارەتا ساخلەمیا حوکمەتا ھەرێما کوردستانێ بۆ رۆژناما ئەڤرۆ دیار کر کو وەزارەتا ساخلەمیێ داخوازا دامەزراندنا کارمەندێن خوەبەخش ل کەرتێ ساخلەمیێ کاردکەن ژ جڤاتا وەزیرێن ھەرێما کوردستانێ کریە کو ب شێوێ گرێبەست بھێنە دامەزراندن و دبێژیت: “جڤاتا وەزیران ب شێوەکێ زارەکی رازیبوونا خوە ل سەر داخوازیا مە دیارکریە”.

د. خالس قادر، پەیڤدارێ وەزارەتا ساخلەمیا حوکمەتا ھەرێما کوردستانێ ئاشکرا کر نێزیکی دو ھزار کارمەندان کو دەرچوویێن پشکێن ساخلەمیێ نە ل کۆلیژ و پەیمانگەھان بۆ دەمێ چەند سالانە ب شێوەکێ خوەبەخش د ناڤ کەرتێ ساخلەمیێ دا ل ھەرێما کوردستانێ کار دکەن، لێ ژ بەر خانەنشینبوون و ھێلانا دەوامێ و ئەگەرێن دی ڤالاھیەکا مەزن ل نەخۆشخانە و بنگەھێن ساخلەمیێ پەیدابوویە ژ بەر ڤێ چەندێ وەزارەتا ساخلەمیێ داخواز ژ جڤاتا وەزیران کریە ھژمارەکا ڤان کارمەندێن خوەبەخش ب شێوێ گرێبەست ب دامەزرینیت.

ناڤھاتی ئاماژە دا وێ چەندێ کو جڤاتا وەزیرێن ھەرێما کوردستانێ ب شێوەکێ زارەکی رازیبوونا خوە ل سەر دامەزراندنا ھژمارەکا وان کارمەندێن خوەبەخش ل کەرتێ ساخلەمیێ کار دکەن دیارکریە کو ب شێوێ گرێبەست بھێنە دامەزراندن، لێ ئەو چاڤەرێ نڤیسارا رازەمەندیێ نە ب گەھیتە دەستێ وان و گۆت: “ھەر دەمێ نڤیسارا رازەمەندیێ گەھشتە مە ل وی دەمی دێ رێنما و مەرجێن دامەزراندنێ ئاشکرا کەین”.

ئه‌ڤرۆ نيوز:

بەرپرسێ لقا سێ یا پارتی دیموکراتی کوردستان ل پارێزگەھا کەرکوکێ، موحەمەد خورشید بۆ رۆژناما ئەڤرۆ راگەھاند ئێکەتی نیشتمانی کوردستان چو پرۆژەک ل سەر ئاسایی بوونا رەوشا کەرکوکێ نەدایە پارتی و ئەوێ کو د ڕاگەھاندنێ دا نوکە دھێتە بەحسکرن تنێ پروپاگندەیێن ڕاگەھاندنێ نە.

محەمەد خورشید، بەرپرسێ لقا سێ یا پارتی ل کەرکووکێ زێدەتر بۆ ئەڤرۆ گۆت” پارتی چو تشتەکی ژ ئێکەتیێ ل پارێزگەھا کەرکوکێ ناخوازیت، چونکی ئێکەتی ب خوە یا بێ دەسھەلاتە ل کەرکوکێ و ڤەگەڕاندن و نەڤەگەڕاندنا پارتی بۆ کەرکوکێ پەیوەندی ب پارتی ب خوەڤە ھەیە وچو پەیوەندی ب ئێکەتیێ ڤە نینە چونکو نوکە بارەگایێن پارتی ژ لایێ ھێزێن عیراقی ڤە ھاتینە داگیر کرن و دەسھەلاتەکا لەشکری ژی ل سەر کەرکوکێ ھاتیە سەپاندن , ژبەر ڤێ یەکێ پارتی دخوازیت ئەڤە ب دوماھی بھێت و رەوشا کەرکوکێ بھێتە ئاساییکرن ودەستھەلات بۆ خوەجھیا مەدەنی ل کەرکوکێ بھێتە ڤەگەراندن پاشی پارتی ڤەگەریتە کەرکوکێ”.

محەمەد خورشید ئاشکرا ژی کر” ھەکە ئەم دیالۆکێ ل سەر دانانا کەسەکی بۆ پۆستێ پارێزگارێ کەرکوکێ بکەین ,جارێ ئەو بریارێن کو ل بەغدا ل سەر کەرکوکێ ھاتینە دان ب ھیچ رەنگەکێ ئەم درازی نینین و ھەکە برایێن ئێکەتی ژی بخوازن ئەم گەنگەشێ ل سەر پۆستێ پارێزگارێ کەرکوکێ بکەین ، دڤێت ئەو مە تێبگەھینن و بۆمە رۆھن بکەن کا ژبەر چ دکتۆر نەجمەدین کەریم ژپۆستێ پارێزگارێ کەرکوکێ بھێتە لادان و ئەگەرێ لادانا وی ژی چییە ؟ چونکو نوکە تنێ نەجمەدین کەریم پارێزگارێ شەرعیێ کەرکوکەو تنێ ژلایێ بەغدا ڤە نەبیت کو دان ب پارێزگاری بوونا وی ناھێتە دان”.