ئەڤرۆ نيوز:

وەزارەتا دەرڤە یا مەغربێ د داخۆیانیەکێ دا راگەھاند کو د چارچۆڤێ سزایێن ئەمریکا یێن ل سەر ئیرانێ وەلاتێ مە ژی دێ ھەموو پەیوەندیێن خوە یێن سیاسی و ئابووری ل گەل ئیرانێ دەتە راگرتن و ھەتا ئیران دەستان ژ ھەلویستێ خوە یێ خراب ل دژی جڤاکێ نێڤدەولەتی بەرنەدەت ئەم پێداچوونێ د ھەلویستێ خوە دا ناکەین.

د بەردەوامیا داخۆیانیێ دا ئەو یەک ژی ھاتیە دیار کرن کو د چارچۆڤێ ڤان سزایان دا وەلاتێ مە دێ ھەموو پەیوەندیێن بەنکی ل گەل ئیرانێ دەتە راگرتن و ئەم ھێڤیدارین کو وەلاتیێن مە ژی وەکو جاران سەرەدانا ئیرانێ نەکەن.

ئەڤرۆ نيوز:

عەلیرزا نوری زادە شارەزایێ کاروبارێ سیاسی یێ ئیرانی د داخۆیانیەکێ دا دیار دکەت کو سزادانا تورکیا و ئیرانێ ژ ئالیێ ئەمریکا ڤە نھا ب تەمامی د خزمەتا روسیا دایە، چونکو ئیران گەلەک تەنگاڤ بوویە و دێ نەچار بیت گەلەک داخوازیێن روسیا قەبوول کەت و ل ئالیێ دی دو رۆژ بەری نھا ئەردۆگانی ژی دیار کربوو کو تورکیا دێ ژ ھەڤپەیمانێن نوو گەریت کو دیارە ئارمانجا ئەردۆگانی روسیایە، ژ بەر ھندێ ژی سزایێن ئەمریکا یێن ل سەر تورکیا و ئیرانێ ڤان ھەر دو وەلاتان پتر بەر ب روسیا ڤە دبەت و روسیا مفادارێ ئێکێ یە.

ناڤبری ھەروەسا دیار دکەت کو چەندین سالن ئەمریکا ژ بەر سیاسەتا خوە یا ل دژی ھندەک وەلاتێن ھەرێمێ وەسا کریە کو روسیا ب ھێزتر ژ جاران بیت، بەری نھا ژی دەمێ ئەمریکا رێککەفتنا ئەتۆمی ل گەل ئیرانێ ئیمزا کری سعوودیە و چەندین وەلاتێن دی یێن عەرەبی خوە ژ ئەمریکا دوور کرن و بەرێ خوە دانە روسیا، نھا ژی ھەمان تشت ل دۆر ئیرانێ و تورکیا دوبارە دبیت و گۆت: (روسیا نەدشیا ھەڤڕکیا ئەمریکا بکەت، لێ سزادانا ھندەک وەلاتێن رۆژھەلاتا ناڤین ژ ئالیێ ئەمریکا ڤە وەسا کر کو ئەو خوە نێزیکی روسیا بکەن و سعوودیێ بەری نھا گەلەک چەک ژ روسیا کڕین و نھا تورکیا ژی دێ کڕیت و ئەڤە ھەموو د خزمەتا روسیا دانە).

ئه‌ڤرۆ نيوز:

فرۆکێن شەری یێن روسیا ل باژێرێ ئدلبێ بنگەھێن کۆمێن چەکدار یێن کو تورکیا پشتەڤانیا وان دکەت بۆمبەباران کرن و ب دەھان تیرۆرست ھاتنە کوشتن و تۆپخانە و تانکێن رژێما ئەسەدی ژی چیایێن ئدلبێ دانە بەر بۆمبەیان و ھێزێن کوردی ژی ل سەر سنۆرێ عەفرینێ خوە کۆم دکەن.

شەرێ سووریێ بەر ب فینالێ ڤە دچیت و د رەوشا نھا دا وەک باژێر ب تنێ ئدلب و عەفرین و ھندەک باژێرکێن رۆژئاڤا د بن کۆنترۆلا کۆمێن چەکدار دا ماینە کو تورکیا ھەڤکاریا ڤان دکەت و رۆژا ١٠/٨/٢٠١٩ سەرۆک کۆمارێ تورکیا ژ سەرۆکێ روسیا خواستبوو کو ل ئدلبێ ئۆپەراسیۆنا سەربازی نەھێنە کرن لێ فرۆکێن شەری یێن روسیا رۆژا ١١ ڤێ مەھێ ناڤەندێن کۆمێن چەکدار بۆمبەباران کرن و د ئەنجامدا ب دەھان تیرۆرست ھاتنە کوشتن و بریندار بوون.

ھەروەسا لەشکرێن رژێما ئەسەدی ژی ھێزێن تایبەت یێن خوە ژ باشورێ سووریێ ڤەکێشاینە سەر سنۆرێ ئدلبێ و ژ باژێرکێ زەھرا ڤە بنگەھێن تیرۆرستان ب ھاوان و تۆپان بۆمبەباران دکەن و ھەر چەندە روسیا و رژێما ئەسەدی ب فەرمی ئۆپەراسیۆنا رزگارکرنا ئدلبێ نەداینە دەستپێکرن لێ شارەزایێن سەربازی و سیاسی وەسا دبینن کو روسیا و رژێما ئەسەد ل ئالیەکی و یەپەگە و ھێزێن سووریا دیمۆکراتیک و ھەڤپەیمانیا نێڤدەولەتی ل ئالیێ دی دەست ب ئۆپەراسیۆنێن داویێ کرینە و ل سووریا شەرێ فینالێ دھێتە کرن و دێ ھەری زێدە تورکیا د شەرێ فینالێ دا زیانێ ببینیت و دێ ب نەچاری ژ دەڤەرێن رۆژئاڤایێ کوردستانێ و سووریێ ھێزێن خوە ڤەکێشیت.

د ڤێ مژارێ دا دبلۆماتکارەکی روسیا کو ناڤێ خوە ئاشکرا نەکریە راگەھاندیە کو بریارا دەستپێکرنا ئۆپەراسیۆنا ئدلبێ ل سەربازگەھا لازقیە ھاتیە دان و سەدەمێ ڤێ ژی ئەڤە کو کۆمێن چەکدارێن سەر ب تورکیا سۆزێن خوە بجە نەئیناینە و ژ ئدلبێ ھێرشی ھێزێن رژێما ئەسەد و بنگەھێ سەربازی یێ روسیا ل لازقیە کرینە و گۆت: (سەرۆک کۆمارێ تورکیا سۆز دابوو ڤیلادەمیر پوتین کو ژ ئدلبێ و حەما چو ھێرش بۆ سەر ھێزێن رژێما ئەسەد و روسیا ناھێتە کرن لێ تورکیا نەشیا سۆزێن خوە بجە بینیت و کۆنترۆلێ ل سەر کۆمێن چەکدار و تیرۆرست بکەت و ل ھەمبەر دا سەرۆک پوتین گەلەک توورە بوویە و بریارا دەستپێکرنا ئۆپەراسیۆنا ئدلبێ ژی وەسا ھاتیە دان).

ل رۆژئاڤایێ کوردستانێ و باکورێ سووریێ ژی ژ ئالیەکی ڤە شەرێ ل دێرازۆرێ و دەوروبەرێن وێ بەر ب داویێ ڤە دچیت و ژ ئالیێ دی ژی یەپەگە و ھێزێن سووریا دیمۆکراتیک ھێزێن خوە یێن تایبەت ل تل رەفعەتێ و سنۆرێ عەفرینێ کۆم دکەن و دھێتە چاڤەرێکرن ب دژواربوونا شەرێ ل ئدلبێ ئۆپەراسیۆنا رزگارکرنا عەفرینێ ژی بھێتە دەستپێ کرن و د ڤێ مژارێ دا سیپان حەمۆ فەرماندارێ گشتی یێ یەپەگێ راگەھاند کو ئارمانجا وان یا دەستپێکێ رزگارکرنا عەفرینێ، جەرابلوسێ، ئەزاز و بابێ یە و گۆت: (ھێزێن مە د ئامادەباشیێ دانە و دەم یێ ھاتی دەست ب ئۆپەراسیۆنا رزگارکرنا عەفرینێ و دەڤەرێن دی یێن رۆژئاڤایێ کوردستانێ بکەین و ئۆپەراسیۆنا غەزەبا فراتێ نھا ب رەنگەکی پارچە پارچە برێڤە دچیت لێ ئۆپەراسیۆنا مەزن یا ب تەمامی پاقژکرنا رۆژئاڤایێ کوردستانێ دێ دەستپێ کەت).

ل ئالیێ دی ھژمارەکا زێدە شارەزایێن سیاسی وەسا دبینن کو ئەمریکا و روسیا ل دۆر پاشەرۆژا سووریێ و پاقژکرنا ئاخا سووریێ ژ ھەموو کۆمێن تیرۆرست و چەکدار رێککەڤتینە و ل سەر ڤێ یەکێ روسیا و رژێما ئەسەد ل ئدلبێ ئۆپەراسیۆنا رزگارکرنێ دەستپێکرینە و د ھەمان دەمی دا ھێزێن کوردی ژی ب پشتەڤانیا ھەڤپەیمانیا نێڤدەولەتی ئۆپەراسیۆنا رزگارکرنا عەفرینێ و ھەرێما شەھبا دەستپێ دکەن و د شەرێ داویێ ئانکۆ شەرێ فینالێ دا دێ کورد و رژێما ئەسەدی سەرکەفتی بن، تورکیا و کۆمێن چەکدار یێن سەر ب وێ ڤە ژی دێ تووشی شکەستنەکا مەزن ھێن و ئەردۆگانێ سەرۆک کۆمارێ تورکیا گەلەک بزاڤ کرن دا کو ئۆپەراسیۆنا ئدلبێ راوەستینیت و ئەمریکا رازی بکەت کو ھێزێن کوردی ڤەنەگەرنە عەفرین و شەھبایێ لێ ئەردۆگان د ڤێ بزاڤا خوە دا سەرنەکەفت و دەست ب قۆناغا پاقژکرنا ھەموو ئاخا سووریێ ژ تیرۆرستان ھاتیە کرن.