ئەڤرۆ نیوز ، زنار تۆڤى :
هه‌ر چه‌نده د به‌رێدا جۆتیاران گه‌له‌ك زه‌حمه‌ت و وه‌ستیان دبر هه‌تاكو دشیان پاریێ ژیانا خوه یا رۆژانه په‌یدا بكه‌ن و وان پرانیا ده‌مێ خوه كارێ جۆتیاریێ ڤه دبوراند ، دیسا د به‌رێدا خه‌لكێ گوندان هه‌ڤكاریا ئێكودۆ دكر و خه‌لكێ زبارێن كولانێ و هه‌رى كێلێ و دروونا گیاى بۆ ئێك دكرن ، لێ نوكه ئه‌ڤ كاره نه‌ماینه و خه‌لك وه‌كى به‌رێ هاریكاریا ئێكدۆ ناكه‌ن ، جۆتیار دده‌نه دیاركرن ، كو نوكه كارێ چاندنێ و جۆتیارى گه‌له‌ك ژ به‌رێ ب ساناهیتره ، لێ به‌رهه‌مێ وان ل بازارى لدووڤ دلێ وان ناچیت.
جۆتیاره‌كێ دانعه‌مر ب ناڤێ حوسنى سه‌عید بۆ رۆژناما ئه‌ڤرۆ دبێژیت : د به‌رێدا مه گه‌له‌ك زه‌حمه‌ت و وه‌ستیان ب كارێ چاندنێ ڤه دبر ، چونكى هه‌موو كارێ مه ب حێلا ملان دهاته كرن و هه‌موو كارێن ب هیڤیا مه‌رێ ڤه دهاتنه كرن ، هه‌ر چه‌نده خه‌لكێ گا بۆ جوتوكێلانێ ب كار د ئینان ، لێ شۆلێ ئاقارى و كه‌رتك و خه‌پاره و كولانا زه‌ڤیان هه‌موو ب پیان دهاته كرن و سال ب سال مه شول دكر هه‌تاكو ئه‌م دشیاین ده‌بارا ژیارا خوه و یا زارۆیێن خوه پێ په‌یدا بكه‌ین ، هه‌روه‌سا خه‌لكێ ل ده‌ستپێكێ ب شالوكان گیا د دروى پاشى ترپان په‌یدا بوون و ئه‌م دشیاین ب ساناهیتر گیایێ ناڤ زه‌ڤیان ب دروین ، دیسا د وى ده‌میدا گه‌له‌ك ئاسته‌نگى د كه‌فتنه د رێیا كارێ مه دا ب زۆرى مه د قه‌تاند.
ناڤهاتى گوت ژى : هه‌ر چه‌نده ل ڤى سه‌رده‌مى هه‌موو كار یێن ب ساناهى كه‌فتین و هنده‌ك ژ وان جۆتیارێن بارێ وان یێ دارایى یێ باش یێن شیاین بۆ خوه هنده‌ك ئامیر و كه‌ره‌ستێن نوو یێن چاندنێ بكرن و نوكه كارێ جۆتیاریێ یێ ب ساناهى كه‌فتى و ڤان ئامیرێن نوو مفایه‌كێ باش یێ گه‌هاندیه جۆتیاران د هه‌موو وارێن جۆتكاریێ دا ، لێ مخابن سه‌ره‌راى ڤێ هه‌موو پێشكه‌فتنێ كارێ چاندنێ ل كوردستانێ یى بێ بهابووى ، له‌وما گه‌له‌ك ژ خه‌لكێ مه ده‌ست یێ ژ كارێ چاندنێ به‌رداى.
فه‌ریق عومه‌رجۆتیاره‌كێ دیتر یێ ده‌ڤه‌را به‌روارى بالا یه بۆ ئه‌ڤرۆ دبێژیت : هێشتا مه وه‌كو پێدڤى مفا ژ وان ئامیر و كه‌ره‌ستێن نوو یێن چاندنێ نه دیتینه و دیسا نوكه پرانیا جۆتیارێن ل ڤێ ده‌ڤه‌رێ ل ده‌مێ ئاڤدانا زه‌ڤیێن خوه ئاڤێ ب سه‌ر زه‌ڤیێ دا به‌ر دده‌ن و هێشتا خه‌لكێ مه سیسته‌مێ ئاڤا چپكێ ب كار نه‌ئینایه بۆ ئاڤدانا تشتێن خوه ، لێ ل وان جهێن ئاڤا وان كێم ئه‌ڤ سیسته‌مه ب كارئینایه لێ ب ره‌نگه‌كێ گه‌له‌ك كێم ، لێ تاراده‌كێ جۆتیارێن مه ماتۆرێن كێلانا ئه‌ردى و ماتۆرێن دروونا گیاى و په‌مپێن ره‌شاندنا داروبارى ب كار دئینن و ڤێ چه‌ندێ كارێ مه وه‌كو جۆتیار ب ساناهى كریه و وه‌كى به‌رێ ئه‌م زه‌حمه‌تێ نابینین.
فه‌ریق زێده‌تر دبێژیت : ئه‌ڤه ماوێ پتر 25 سالانه ئه‌ز كارێ جۆتیاریێ دكه‌م ، لێ هێشتا ئه‌م نه‌شیاینه ب كارێ چاندنێ و جۆتیاریێ خوه بخودان بكه‌ین ، چونكى ئه‌و فێقى و كه‌سكاتیێ ئه‌م به‌رهه‌م دئینین ل بازارى وه‌كو حه‌زا مه ناچیت و حه‌قێ زه‌حمه‌ت و كرێیا مه یا سالانه ناگریت ، نوكه ئه‌م چو مفاى ژ كارێ جۆتیاریێ نابینین ، هه‌ر چه‌نده ئه‌و فێقى و كه‌سكاتیێ ئه‌م به‌رهه‌م دئینین گه‌له‌كێ لاوه و چو كێماسى لێ نینه ، لێ مخابن پرانیا فێقى و كه‌سكاتیێ مه ژ ده‌رڤه دهێت و ڤێ وه‌كریه كو ئێدى ئه‌م نه‌شێن كارێ چاندنێ و جۆتیاریێ بكه‌ین ، هه‌روه‌سا هه‌كه سالانه ئه‌و فێقیێ مه دكر داهاته‌كێ باش بۆ مه ژێ هاتبا ئه‌م ژى دا پرانیا وان ئامیر و كه‌ره‌ستێن نوو یێن چاندنێ بۆ خوه كرین ، لێ ژبه‌ركو ب چو ناچیت ، ئه‌م ژى نه‌شیاینه وه‌كو پێدڤى وان ئامیر و كه‌ره‌ستان بۆ خوه بكرین ، له‌وما هه‌تا نوكه وه‌كو پێدڤى مه مفا ژ وان ئامیران نه‌دیتیه ، هه‌روه‌سا نوكه هه‌موو كارێ چاندنێ ب شیانێن دارایى دهێته كرن و ئێدى جۆتیار نه‌شێت ب ه‌رێ كارێ چاندنێ بكه‌ت ن چونكى چو بۆ پێڤه ناهێت ، چونكى كارێ نوكه یێ چاندنێ مه‌زاختن بۆ دڤێت .
ئەڤرۆ نیوز، مەحمود نهێلی
فرۆكێن لەشكەرێ یێن توركیى د دو هێرشێن جودا دا بۆ سەر گوندێن دەردورێن ناحیا دێرەلۆك ل دەمژمێر 12 نیڤرۆیا ئەڤرۆ چارشه‌مبى 6/6/2018 زیانێن دراڤى گەهاندنە وه‌لاتیان .
لەزگین ردینى، خەلكێ دەڤەرا بەرێ گارێ بۆ رۆژناما ئەڤرۆ دیاركر، كو ل شەڤا شەشێ ڤێ هەیڤێ فرۆكێن لەشكەرى یێن توركی گه‌له‌ك ب دژواری گوندێن وانا بوردومانكرينە هەروەسا ل نیڤرۆیا ئەڤرۆ 6/6/2018 فرۆكێن توركى ب بهانەیا هەبوونا چەكدارێن پەكەكێ گوندێن نهێلێ و نێروە و رێكان و بەرێ گارێ و زێبارێ یێن سەر ب ناحیا دێرەلۆك ڤە ب دژواری بوردومانكرن وزیانێن مادی گەهاندنە وه‌لاتیان كو ئێدی ئەو نەشێن ب سەرەدان ژی بچنە سەرگوندێن خوە.
له‌زگينى دياركر ژى كو دڤێ بوردومانێ دا زێدەباری زیانێن گەهاندنە رەز و باغێن وان و كارتێكرن ل سەر مێشێن هنگڤینی ژی كریە و هەروەسا ل گوندێ ساركێ خانیێ وه‌لاتیەكی ب تمامی ژناڤ بریە.
ناڤبری هیڤی خواستن كو ئەڤ بوردومانە بهێتە راوەستاندن بۆ وێ یەكێ بشێن بچنە هانا مێشێن خوە یێن هنگڤینی و دەرامەتێ وانا ژ ناڤ نەچیت.
ئه‌ڤرۆنيوز:
ئێڤارا دوهى سێشه‌مبى ل باژێرێ يه‌نيشه‌هير ل ويلايه‌تا دياربه‌كر ل توركيا ل ده‌مێ هاتنا بارانه‌كا ب هێز، بريسيه‌كێ ل منارا مزگه‌فته‌كێ دا وبۆ ئه‌گه‌رێ ژناڤبرنا پشكه‌كا وێ منارێ وچو زيانێن گيانى ل دووڤ خوه نه‌هێلان.
مه‌همه‌ت چه‌تين، ژ باژێرڤانيا دياربه‌كر بۆ ئاژانسا ئه‌نادۆل يا توركى گۆت” روودان به‌رى بانگێ فتارێ په‌يدابوو كو بوويه ئه‌گه‌رێ ژناڤبرنا منارا مزگه‌فتا (سومه‌ر)”.
ئەڤرۆ نیوز ، زنار تۆڤی :
ئەڤرۆ چارشەمبی 6.6.2018 وه‌زاره‌تا ناڤخوە یا حوکمەتا هه‌رێما كوردستانێ د رێوره‌سمه‌كی دا ل هه‌ولێرا پایتەخت باوه‌رنامه‌یا ئایزۆ یا ستانده‌ردێن جیهانێ وه‌رگرت.
ئه‌ڤرۆ چارشەمبی د رێوره‌سمه‌كی دا ل ئۆتێلا رۆتانا ل هه‌ولێرا پایتەخت ب ئاماده‌بوونا نێچیرڤان بارزانی سه‌رۆك وه‌زیرێن هه‌رێما كوردستانێ باوه‌رناما ئایزۆ 9001 ب وه‌زاره‌تا ناڤخوە یا حوکمەتا هه‌رێما كوردستانێ هاتە به‌خشین.
وه‌زاره‌تا ناڤخوە یا هه‌رێما كوردستانێ باوه‌رنامه‌یا ئایزۆ ژبه‌ر كوالێتییا خزمه‌تێ وه‌رگرتیه كو لدووڤ ستانده‌ردێن جیهانی نه.
ئایزۆ ئانكو رێكخستنا نێڤده‌وله‌تی یا پیڤه‌را كوالێتیێ ، کو باره‌گایێ وێ ل باژارێ جنێڤە ل وه‌لاتێ سویسرا ، ل سالا 1947 هاتیه دامه‌زراندن و ب رێكخستنه‌كا نه‌حوكومی دهێتە هژمارتن ، هەروەسا باوه‌رناما كوالێتیێ ژی دده‌تە وان كۆمپانی و سازیێن كه‌رتێ گشتی و تایبه‌ت ، ئه‌وێن کو مه‌رج و ستانداردێن وێ د كاری دا په‌یره‌و دكه‌ت.
ئه‌ڤرۆ نیوز، نه‌وزاد هلۆرى:
سه‌رۆكێ حوكمه‌تا هه‌رێما كوردستانێ، نێچيرڤان بارزانى د چارچوڤێ رێزگرتن ل فه‌رمانبه‌ر و كارمه‌ندێن وه‌زاره‌تا ناڤخو ل هه‌ولێرێ، دیاركر كو پێدڤیه حوكمه‌تا هه‌رێما كوردستانێ سیسته‌مێ ئه‌لیكترۆنیا رێڤه‌به‌ریا هاتنوچۆنا دهۆكێ ل سه‌ر هه‌ردو رێڤه‌به‌ریێن هاتنوچۆنا هه‌ولێر و سلێمانیێ ژى بجه بينيت و حوكمه‌تێ ئیراده‌یه‌كا ب هێز ژى هه‌یه بۆ چاكسازیێ ب تایبه‌تى د كارگێريێ دا.
نێچيرڤان بارزانى، سه‌رۆكێ حوكمه‌تا هه‌رێما كوردستانێ دیاركر ژى كو پێدڤیه مفا ژ سیسته‌مێ ئه‌لیكترۆنى و چاكسازى بهێته وه‌رگرتن بۆ ب ساناهیكرنا كاروبارێن وه‌لاتیان و گۆت: (حوكمه‌تا هه‌رێما كوردستانێ دخوازیت سیسته‌مێ ب رێڤه‌برنا كاروبارێن وه‌لاتیان وه‌كو هه‌موو جیهانێ مفاى ژ سیسته‌مێ ئه‌لیكترۆنى وه‌ربگریت و ب شێوه‌یێ ئونلاین خزمه‌تێ بۆ وه‌لاتیان بكه‌ت و پێدڤى ب هه‌موو ڤان فه‌رمانگه‌هان نینه و حوكمه‌تا ئه‌لیكترۆنى دێ زێده‌تر خزمه‌تا وه‌لاتیان كه‌ت ب كێمترین ده‌م و كێمترین مه‌زاختى و دوور ژ رووتنى و نها ئه‌ڤ سیسته‌مه ل سه‌ر رێڤه‌به‌ریا هاتنوچۆنا دهۆكێ و ده‌سته‌یا گه‌شتوگۆزارێ ده‌ستپێكریه و دێ به‌رده‌وام بیت ل سه‌ر ڤى جۆرێ سیسته‌مى).
زێده‌تر گۆت: (خه‌لكێ كوردستانێ و پێشمه‌رگێ قاره‌مان و حوكمه‌تا هه‌رێما كوردستانێ د قۆناغه‌كا دژوار دا بۆرين كو ئه‌و ژى شه‌رێ داعشێ و قه‌یرانا دارایى بوویه و ئه‌ڤێ نیشا مه‌دا كو حوكمه‌تا هه‌رێما كوردستانێ ئیراده‌یه‌كا ب هێز بۆ چاكسازیێ يا هه‌ى و هه‌رێما كوردستانێ خودانا سامانه‌كێ مرۆڤاتیێ ب هێزه و ژێرخانه‌كا ئابوورى يا هه‌ى و یا گرنگ ئه‌وه كو ژێرخانه‌كا كارگێریا يا ب هێز ژى هه‌بیت و گرنگه ئه‌ڤ یه‌ك ب سه‌ركه‌ڤیت ، و پێدڤیه مافێن وه‌لاتیان ل به‌غدا ژى بهێنه دابینكرن) .
نێچیرڤان بارزانى دیاركر ژى كو چاكسازى دهه‌موو فه‌رمانگه و وه‌زاره‌تێن حوكمه‌تێ ب تایبه‌تى دوارێ كارگێرى دا یا به‌رده‌وامه و دێ هه‌موو فه‌رمانگه‌هان ڤه‌گریت و گۆت ژى: (پێدڤیه شه‌فافیه‌ت ل داموده‌زگه‌هێن حوكمه‌تێ بهێته‌كرن و به‌رهنگاریا گه‌نده‌لیێ و روتنیێ بهێته‌كرن داكو سه‌ركه‌فتنێن مه‌زن ب ده‌ستخوه‌ڤه بینین و پێدڤیه كاروبارێن وه‌لاتیان بهێنه ب ساناهیكرن و حوكمه‌تێ دڤى واری دا خزمه‌ته‌كا باش كریه و گه‌له‌ك يا گرنگه كو مه گیانێ پێكڤه كاركرنێ هه‌بیت و ببیته به‌رنامه‌یێ كارى).
ئەڤرۆ نیوز ، زنار تۆڤی :
ئه‌ندامەکێ مه‌كته‌با سیاسی یا پارتی دیموكراتی كوردستان ئاشكرا دکەت ، کو حه‌یده‌ر عه‌بادی سه‌رۆك وه‌زیرێن عێراقێ و سه‌لیم جبوری سه‌رۆكێ په‌رله‌مانی كو هه‌ردوو د به‌ره‌یێ شکەستی خواریان دانن ، وان دڤێت وەلاتی به‌ره‌ف ئالۆزیا و بۆشایا د‌ستووری ڤه ببه‌ن.
هشیار زێباری ئه‌ندامێ مه‌كته‌با سیاسی یا پارتی و وه‌زیرێ پێشی یێ دارایی ل عێراقێ د فه‌یسبووكێ خوە دا نڤێسیە ، هه‌ماهه‌نگی دناڤبەرا شکەستن خوارا د هه‌لبژارتنێن 2018 د ئەڤرۆ دا بۆ سوبەهی دێ وه‌كو رۆژێ روونتر لێهێت دناڤبەرا سه‌رۆكێ جڤاتا وه‌زیران عه‌بادی و سه‌رۆكێ په‌رله‌مانێ شکەستن ئینای.
هەروەسا نڤێسیە ، سه‌رۆكێ په‌رله‌مانی و حوکمه‌تێ دڤێت دەمژمێرێ به‌ره‌ف پاشڤه ڤەگەرینن و پرۆسا هه‌لبژارتنێن دیموكراتی یێن وەلاتی شکەسەنێ پێ بینن و وەلاتی به‌ره‌ف ئالۆزیێ و بۆشایا د‌ستووری و قانوونی ببه‌ن ، ب ئەگەرێ خۆپه‌رستتنا وان و داخوازكرنا ره‌تكرنا ئه‌نجامێن هه‌لبژارتنان.
دیسا گوتیە ژی ، شکەستن خواری دێ عێراقێ به‌ره‌ف چاره‌نڤیسەکێ نەدیار ڤە‌به‌ن و دێ باوەریا ده‌نگده‌ران وێران كه‌ن بۆ هه‌ر هه‌لبژارتنەکا بهێت ، لەوما ئه‌وا روو ددەت سه‌رپێچیەکا روون یا دستوور و قانوون و بهایێن دیموكراتیە ل جیهانێ ، لەوما پێدڤیه دادگەه ب تنێ گوهێ خوە ل سكالا و تانه‌یان بگریت ، نه‌كو بریارا حوکمه‌تێ و په‌رله‌مانی.
ئەڤرۆ نیوز ، زنار تۆڤی :
پشتی روونشتنا جڤاتا كۆمسیۆنا بلند یا هه‌لبژارتنان ، بڕیار هاتەدان کو پارێ قه‌وارێن سیاسی بهێتە كێم کرن ، قه‌وارێن سیاسی ژی دێ هێنە پابه‌ند کرن ب پێدانا وی گۆژێ پارەی.
ل خولا پێشی یا په‌رله‌مانێ كوردستانێ هه‌ر قه‌واره‌کێ سیاسی د‌بوو گوژمێ 50 ملیۆن دیناران بدەتە كۆمسیۆنا بلند یا سه‌ربه‌خۆیا هه‌لبژارتنان ، هەروەسا قه‌وارێ پێكهاتێن جۆدا ژی گۆژمێ 25 ملیۆن دیناران ، به‌لێ د كۆمبوونا خوەدا جڤاتا كۆمسیاران بریار دا كۆ ئەڤ گوژمە بهێتە كێم کرن.
کێمکرن ب ڤی جۆری یە، قه‌وارێ سیاسی یێ گشتی ژ 50 ملیۆنان بۆ 30 ملیۆن دیناران هاتە کێم كرن ، قه‌وارێ پێكهاتێن جۆدا و ئه‌رمه‌ن و كلدان و ئاشوور ژ 25 ملیۆنا بۆ 10 ملیۆنان هاتنە كێم كرن.
ئه‌ڤ بریاره ل رۆژا 5\6\2018 دێ چیته وارێ جێبه‌جێكرنێ و هەموو قه‌وارێن سیاسی دشێن ل سه‌ر ئەڤان رێنمایێن نوو بچن.
لدووڤ په‌یره‌وێ كۆمسیۆنا بلند یا سه‌ربه‌خۆیا هه‌لبژارتن و راپرسیێ ل هەرێما كوردستانێ ، دڤێت هه‌ر قه‌واره‌کێ سیاسی بەری هه‌لبژارتنان گوژمه‌کێ پاره‌ی ل بانكێن كوردستانێ وه‌ك گه‌ره‌نتی دانیت.
ئەڤرۆ نیوز ، زنار تۆڤی :
ل رۆژا سێشەمبیا بهێت ل سەنگافورە دێ ئێکەمین كۆمبوونا دناڤبەرا دۆنالد ترامپی سەرۆكێ ئەمریكا و كیم جۆنگ ئون سەرۆكێ كۆریا باكور هێتە ئەنجامدان.
كۆچکا سپی بەلاڤەكریە کو رۆژا سێشەمبی 12-6 ل دەمژمێر 9 سپێدێ ل سەنگافورە دێ ئێكەمین كۆمبوون دناڤبەرا دۆناڵد ترامپی سەرۆكێ ئەمریكا و كیم جۆنگ ئون سەرۆكێ كۆریا باكور هێتە سازکرن.
سارا ساندرز پەیڤدارا سەرۆكێ ئەمریكا راگەهاند: ئامادە كاریێن تەمام هاتینە كرن بۆ كۆمبونا ڤی لوتكەی و پێشكەفتنێن مەزن د دانوستانێن دناڤبەرا واشنتۆن و بیۆنگ یانگ بدەستڤە هاتینە.
دۆنالد ترامپێ سەرۆكێ ئەمریكا راگەهاند : کو ئارمانجا وان د وێ كۆمبوونێدا رامالینا چەكێ ئەتۆمیە ل نیمچە دوورگەیا كۆریا ،لێ هەتا نوکە خشتێ تەمام یێن کارێ وێ كۆمبوونێ نەهاتیە راگەهاندن.
ئەڤرۆ نیوز ، زنار تۆڤی :
پشتی کو حەیدەر عەبادی سەرۆك وەزیرێن عێراقێ راگەهاندی كو لیژنا بلند یا حوکمەتێ هەبوونا سەختەكاریێ د هەلبژارتنان دا ئاشكرا كریە و هژمارەکا رێکاران دەركر و كۆمسیۆن ب بەرپرس ژ كێشان زانیە ، سەلیم جبووری سەرۆكێ پەرلەمانی پێشوازی ل بڕیارێن حوکمەتا عێراقێ كر و پەرلەمانتار بۆ روونشتنا نە ئاسایی یا ئەڤرۆ چارشەمبی گازیکرینە.
لدووڤ بەیاننامەکا نڤێسینگەها سەرۆكێ پەرلەمانێ عێراقێ ، دۆخێ هەڵبژارتنان و ئەو پێشێلكاری و سەختەكاریێن تێدا هاتینە كرن ، ب شێوەکێ نەرێنی كار كریە سەر دۆخێ وەلاتی و تەنگژێن نوو دروست كرینە، لەوما هەموو رێکارێن ئاشكراكرنا سەختەكاریان د بەرژەوەندیا وەلاتی دا دزانین.
پەرلەمانی د بەیانناما خۆدا داخواز ژ پەرلەمانتارێن عێراقێ كریە کو ئەڤرۆ چارشەمبی ئامادەببن د روونشتنا نە ئاسایی ب مەبەستا تەمامكرنا رۆلێ پەرلەمانی بۆ راوەستیانێ ل دژی پرۆسا سەختەكاریێ و یاریكرن ب ئەنجامان و پاراستنا سلامەتیا پرۆسا سیاسی.
تاریق حەرب شارەزایێ قانوونی راگەهاند ، کو هەکە پەرلەمان ب شێت ئەڤرۆ پرۆژە قانوونێ سییێ ژ هەمواركرنا قانوونا هەلبژارتنان تێپەڕ بكەت، دێ بیتە ئەگەرێ پاشکەفتنا پێكئینانا حوکمەتا نوو ، بەلێ تەمامبوونا نیسابی بۆ ڤێ روونشتنێ یا ب زەحمەتە و هەکە ئەڤ پرۆژە بهێتە دەربازکرن دێ ل دادگەها بلند یا فیدرالی تانە لێ هێتە دان.
نيشاندان