ئەڤرۆ نیوز ، بارزان مزووری:
دلشاد محەمەد راگەھاندنکار ژ پشکا ھاتنوچوونا شێخان بۆ ئەڤرو نیوز گۆت: ل شەڤا بوری ٢٠١٨/٨/٤ ل دەمژمێر ٩:٣٠ خولەک ل کۆمەلگەها چرە یا سەر ب قەزا شێخان ڤە روودانەکا هاتنوچوونێ روودایە ژ جورێ لێگدان دناڤبەرا دو ترومبێلان دا کو ترۆمبێلەک تایبەت ئوپل ڤیکترایە و ئێک ژی بارهەلگر تریلە مارسیدس و د ئەنجامدا شۆفێرەک بریندار بوویە و زێدەباری زیانێن ئابووری ژی گەهشتینە هەردو ترۆمبێلان.
ئه‌ڤرۆنيوز:
ده‌زگه‌هێن راگه‌هاندنێ يێن سعودى به‌لاڤكر كو به‌فر وباران ل باژێره‌كێ سعوديێ بارين و به‌فرێ جادێن وى باژێرى سپى كرن.
وه‌لاتيێن وى باژێرى ژى ئاماژه دا كو جهێ حێبه‌تيێ يه ل ڤێ هاڤينێ به‌فر ل باژێرێ وان بباريت.
باژێرێ خه‌ميس مشيت مه‌زنترين باژيرێ باشوورێ سعوديێ يه ژ لايێ رووبه‌رى وهژمارا ئاكنجيان ڤه ودكه‌ڤيته نيڤا ده‌ڤه‌را عه‌سير و1850 متران ژ ئاستێ ده‌رياى يێ بلنده.
ئه‌ڤرۆنيوز:
ل دووڤ ئامارێن فه‌رمى يێن ئۆفيسا ئامارێن نيشتمانى ل بريتانيا، دده‌مێ دو هه‌يڤێن بۆرى دا 650 وه‌لاتيێن بريتانى ژگه‌رمادا گيانێ خوه ژده‌ست دايه.
ئۆفيسا ئامارێن بريتانى دياركر كو دهه‌ردو هه‌يڤێن خزيرانێ وتيرمه‌ها 2018 دا 650 حاله‌تێن گيان ژده‌ست دانێ ژبه‌ر گه‌رمێ ل بريتانيا هاتينه تۆماركرن وپێشبينێ دكه‌ت كو هژمارا وان بۆ هزار كه‌سان زێده ببيت.
ل رۆژا ئه‌ينيێ 3 ته‌باخا 2018 پلا گه‌رمێ ل بريتانيا گه‌هشتبوو 33 .
ئه‌ڤرۆنيوز:
باليۆزخانا وه‌لاتێ هندستانێ ل به‌غدا پێدانا ڤيزێ ب وه‌لاتيێن عيراقى راگرت ومه‌رجه‌كى بۆ دوباره پێدانا ڤێزێ به‌رچاڤ دكه‌ت.
باليۆزخانا هندستانێ درۆهنكرنه‌كێ دا دبێژيت” هه‌موو خزمه‌تگوزارى هاتينه راگرتن ژوان ژى پێدانا ڤيزێ ب وه‌لاتيێن عيراقى ئه‌وێن دخوازن سه‌ره‌دانا هندستانێ بكه‌ن، تاكو هێزێن ئه‌منى يێن عيراقى به‌ربه‌ستێن كونكريتى ل ده‌وروبه‌رێن باليۆزخانێ نه‌ڤه‌گه‌رينن”.
سالانه ب سه‌دان قوتابيێن عيراقى ب مه‌ره‌ما خواندنێ وهزاران وه‌لاتى ژى بۆ چاره‌سه‌ريا نوشدارى سه‌ره‌دانا هندستانێ دكه‌ن، له‌وما وه‌لاتيێن عيراقى ژبه‌ر وێ بريارا باليۆزخانا هندستانێ ل عيراقێ نه‌شێن سه‌ره‌دانا وى وه‌لاتى بكه‌ن.
ل دووڤ رۆهنكرنا باليۆزخانا هندستانێ ل به‌غدا، ل رۆژا 21 تيرمه‌ها 2018 هه‌موو خزمه‌تگوزاريێن باليۆزخانێ هاتينه راگرتن ژوان ژى پێدانا ڤيزێ بۆ وه‌لاتيێن عيراقى، تا كو حوكمه‌تا عيراقێ هه‌موو به‌ربه‌ستێن ئه‌منى يێن ل به‌رده‌م باليۆزخانێ وده‌وروبه‌رين وێ نه‌دانيته‌ڤه”.
ل چه‌ند رۆژێن بۆرى دا، فه‌رمانده‌يا ئۆپه‌راسيۆنێن له‌شكرى ل به‌غدا، هه‌موو به‌ربه‌ستێن كونكريتى ل به‌رده‌م باليۆزخانا هندستانێ ل به‌غداراكربوون، بێ كو چو رۆهنكرنه‌كێ بده‌ت.
ئه‌ڤرۆنيوز:
ژێده‌ره‌كێ رۆژنامه‌ڤانى ژپارێزگه‌ها زيقار ل باشوورێ عيراقێ بۆ ئه‌ڤرۆنيوز دياركر، ئه‌ڤرۆ ئێڤارى بيڤه‌له‌رزه‌كێ ل پارێزگه‌ها زيقار دا وچو زيانێن گيانى نه‌بوون.
محه‌مه‌د ئه‌لهيلالى، رۆژنامه‌ڤان ژ باژێرێ ناسريه سه‌نته‌رێ پارێزگه‌ها زيقار بۆ ئه‌ڤرۆنيوز گۆت” ئه‌ڤرۆ ئێڤارى بيڤه‌له‌رزه‌كێ ل پارێزگه‌ها زيقار دا ووه‌لاتيێن هه‌ست ب بيڤه‌له‌رزێ ولڤينا ئه‌ردى كر”.
گۆت ژى” مه په‌يوه‌ندى ب رێڤه‌به‌ريا ساخله‌ميا زيقار كر وبۆمه دووپاتكر كو چو زيانێن گيانێ ومادى ژ ئه‌نجامێ وێ بيڤه‌له‌رزێ هه‌تا نوكه نه‌هاتينه تۆماركرن”.
ئه‌ڤرۆنيوز:
وه‌زاره‌تا خواندنا بلند وڤه‌كۆلينێن زانستى ل هه‌رێما كوردستانێ راگه‌هاند، يوزه‌ر وپاسورد بۆ په‌روه‌ردێ هاتيه دان وچاڤه‌رێ دهێته كرن ل ناڤه‌راست يان ل دووماهيا ڤێ حه‌فتيێ سيسته‌مێ زانكۆلاين بكه‌ڤيته كارى.
وه‌زاره‌تا ناڤبرى راگه‌هاند ژى” قوتابى دشێن ل ده‌مێ ده‌ست بكاربوونا مالپه‌رى ب رێيا ڤى لينكى (http://regayzanko.com) فۆرما پێشكێشكرنێ بۆ زانكۆيێ داگرن”.
دياركر” چاڤه‌رێ دهێته كرن سيسته‌مێ زانكۆلاين بۆ وه‌رگرتنا قوتابيێن 12 ئاماده‌يى ل زانكۆ وپه‌يمانگه‌هان ل ناڤه‌راست يان ل دووماهيا ڤێ حه‌فتيێ بكه‌ڤيته كارى”.
ئەڤرۆ نیوز،بارزان مزووری:
جێگرا سەرۆكێ پارتی چاكسازی توركمان، مونا قه‌هوه‌چى بۆ ئەڤرۆ نیوز دياركر، بۆ دەربازبوونێ ژڤێ رەوشا نها ئەم تێدا كو بەر ب باشبوونێ بچیت بتنێ ئەنجامدانا هەلبژارتنايه بۆ ئێك لاكرنا كێشان و سندوقا دەنگدانێ بریارا چارەنڤیسێ خەلكێ كوردستانێ ددەت لەوما پێدڤیە هەموو پارتێن سیاسی یێن كوردستانێ پێگیربن ب ئەنجامدانا هەلبژارتنان بێ پاشخستن،
مونايێ گۆت ژى” پارتی چاكسازی توركمان و فراكسیونا چاكسازی توركمان دگەل درێژكرنا خولا پەرلەمانێ كوردستانێ دا نینین ودێ رێزێ ل پرۆسا هەلبژارتنان گرین”.
ئه‌ڤرۆنيوز:
كۆنفرانسێ فيدراسيۆنا كۆمه‌لێن كوردى ل وه‌لاتێن سوڤيه‌تى يا به‌رێ ئه‌ڤرۆ شه‌مبيێ 4 ته‌باخا 2018 ده‌ست ب كارێن خوه كر.
دپه‌يامه‌كێ دا بۆ كۆنفرانسێ ناڤبرى، سه‌رۆك بارزانى راگه‌هاند، ده‌ستخوه‌شيێ ل گرێدانا ڤى كۆنفرانسى دكه‌م ومن رێز بۆ بزاڤێن ئێك ب ئێك يێن هه‌وه بۆ رێكخسن ويه‌كخستنا كاروبار وچالاكيێن كۆمه‌لێن كوردى ل وان وه‌لاتان وهێڤيا سه‌ركه‌فتنێ بۆ هه‌وه دخوازم.
سه‌رۆك بارزانى دپه‌ياما خوه دا گۆت ژى” ب مخابنيه‌كێ زۆرڤه گه‌لێ كورد ب زۆرى وبێ ئيرادا خوه هاتيه پارچه‌كرن ووێ پارچه‌كرنێ وه‌كريه گه‌لێ كورد تووشى كاره‌سات وسته‌مه‌كێ مه‌زن ببيت وكوردان بۆ به‌رگريێ ژ هه‌بوونا خوه به‌رخوه‌دانى كريه وشوره‌شێن ئيك ل دووڤ ئێك يێن كوردان به‌لگه‌يا وێ راستيێ نه. جينۆسايد وئه‌نفال وكيمياباران وئاواره‌كرن وهێرشا تيرۆرستان وئه‌و كاره‌ساتا ب سه‌رێ خوشك وبرايێن ئێزدى هاتى وب ده‌هان كاره‌ساتێن دى وروودانێن پشتى ريفراندۆما هه‌رێما كوردستانێ، هه‌ر هه‌موو بۆ نه‌هێلانا گه‌لێ كورد بوو، به‌لێ خوراگريا گه‌لێ مه وقه‌هره‌مانيا پێشمه‌رگه‌ى، گه‌لێ كورد يێ زيندى يه وئيرادا وى نه‌هاتيه شكاندان ودخه‌باتا خوه دا يێ به‌رده‌وامه”.
سه‌رۆك بارزانى ئاماژه ب وێ چه‌ندێ كر كو گه‌لێ كورد به‌رده‌وام ئاشتى وپێكڤه‌ژيان ڤيايه وچو جاران نه‌خواستيه سته‌مێ ل گه‌لێن دى بكه‌ت ودخوازيت ب ئاشتى وسه‌ربلندى بژيت، ئه‌ركێ مه هه‌موويانه ب باشترين شێوه په‌ياما ئاشتيێ بگه‌هينين وجيهانێ ل دۆزا ره‌وا يا گه‌لێ كوردستانێ تێبگه‌هينين. ل گه‌ل وێ چه‌ندێ بزاڤێ دكه‌ين په‌يوه‌نديێن كه‌لتوورى وسياسى ودۆستايه‌تى ب باشترين شێوه ل گه‌ل گه‌لێن جيهانێ دروست بكه‌ين.
هه‌روه‌سا گۆت” گه‌له‌ك پێخوه‌ش حالم كو هوون بزاڤا وێ چه‌ندێ دكه‌ن ب رێيا ئێكگرتنێ وخوه رێكخستنێ ل سه‌ر شێوازێ سه‌رده‌ميانه ببن پره‌كا ب هێز بۆ په‌يوه‌نديێن كوردان ووان وه‌لاتێن كو دناڤ جوگرافيا سوڤيه‌تا به‌رێ دا، ل ڤێرێ ب ده‌ليڤه دزانم كو دووپاتيێ ل په‌يوه‌نديێن ديرۆكى دناڤبه‌را هه‌رێما كوردستانێ ورووسيا ووه‌لاتێن دى يێن سوڤيه‌تى يێن به‌رێ بكه‌م كو ئه‌و ديرۆكه ل سه‌ر ده‌ستێ بارزانيێ نه‌مر بناخه بۆ هاته دانان وگه‌هشته لوتكێ، هه‌روه‌سا من رێز يا هه‌ى بۆ سياسه‌تا حوكمه‌تا رووسيا ووه‌لاتێن دى يێن وێ ده‌ڤه‌رێ ل به‌رانبه‌ر دۆزا كوردى ورێ دان ب چالاكيێن سياسى وكه‌لتوورى ووێ سياسه‌تێ ب بلند دنرخينم”.
سه‌رۆك بازرانى گۆت ژى” ب پێدڤى ژى دزانم سوپاسيا بێ سنور يا خوه ئاراسته‌ى هه‌وه‌يێن خوه‌شتڤى بكه‌م بۆ هه‌ستێ هه‌وه يێ نه‌ته‌وايه‌تى ونيشتيمانپه‌روه‌ريا هه‌وه وده‌ستخوه‌شيێ ل هه‌وه دكه‌م بۆ بزاڤێن هه‌وه ژبۆ پاراستنا ره‌سه‌نايه‌تى وزمان وكولتوورێ كوردى دناڤ خوه دا، هه‌روه‌سا هه‌لويستێ هه‌وه‌يێن خوه‌شتڤى بۆ پشته‌ڤانيا هه‌وه ل خوشك وبرايێن هه‌وه ل هه‌رێما كوردستانێ ل ده‌مێ ريفراندۆمێ وژبير ناكه‌ين وجهێ شانازى وخوه‌شحاليا مه‌يه”.
دياركر ژى” ريفراندۆم ده‌ربرينا بۆچوونا ره‌وا يا ملله‌ته‌كێ سته‌ملێكرى بوو ب ئاشتيانه‌ترين شێواز، راسته روودانێن پشتى ريفراندۆمێ ونه‌پاقژيا هنده‌ك كه‌سان زيانێن مه‌زن ل گه‌لێ كوردستانێ دا، به‌لێ هه‌وه پشت راست دكه‌م نوكه گه‌لێ كوردستانێ ب ئيراده‌كا بلندتر وب هشياريه‌كا زێده‌تر يێ ماى وبه‌ر ب پاشه‌رۆژه‌كا گه‌ش وپێشكه‌فتى يه”.
سه‌رۆك بارزانى دپه‌ياما خوه دا خوياكر” هوون جهێ ئومێدا مه‌نه وپشته‌ڤانيێ ل كار وچالاكيێن فه‌رهه‌نگى وسياسى يێن هه‌وه دكه‌ين وهيڤيدارم كۆنفرانسێ هه‌وه ب بريار وراسپاردێن باش ب دووماهى بهێت وده‌رگه‌هه‌ك بيت بۆ يه‌كخستنا گۆتارا هه‌وه وكوردێن ئورۆپا وهه‌موو ره‌ڤه‌ندا كوردى ل وه‌لاتێن جيهانێ”.
كنياز ئيبراهيم، سه‌رۆكێ فيدراسيۆنا كۆمه‌لێن كوردى ل وه‌لاتێن سوڤيه‌تى يا به‌رێ دداخۆيانيه‌كا رۆژنامه‌ڤانى دا گۆتبوو” دڤى كۆنفرانسى دا، نوونه‌ر وكه‌سايه‌تيێن ديار يێن كوردێن وه‌لاتێن سوڤيه‌تى يا به‌رى وپشكه‌ك ژ وه‌لاتێن ئورۆپى، هه‌روه‌سا به‌رپرس وچه‌ند كه‌سايه‌تيێن ناڤدار يێن هه‌رچار پارچێن كوردستانێ دپشكدارن”.
دياركربوو ژى” دوى كۆنفرانسێ دا دێ دانوستاندن ل دۆر ئێكگرتنا سه‌رجه‌م رێكخراوێن كوردى ل وه‌لاتێن سوڤيه‌تى يا به‌رێ دچارچۆڤێ فيدراسيۆنا نێڤده‌وله‌تى يا كوردێن سوڤيه‌تى دا هێته كرن”.
ئه‌ڤرۆنيوز:
سه‌رۆك كۆمارێ توركيا، ره‌جه‌ب ته‌يب ئه‌ردۆگان، ل گۆتاره‌كێ دا ل كۆنگرێ ژنێن ئه‌ندام د حزبا وى دا ( داد وگه‌شه‌پێدان) گه‌فان ل ئه‌مريكا دكه‌ت.
ئه‌ردۆگانى گۆت” توركيا دێ به‌رسڤ بۆ سزايێن ئه‌مريكا هه‌بين ودێ ده‌ست ب سه‌ر سامانێ هه‌ردو وه‌زيرێن داد وناڤخوه يێن ئه‌مريكا ل توركيا گرين”.
سه‌رۆكێ توركى گۆت ژى” توركيا چاڤه‌رێ هه‌لويستێ ترامپي يه، ئه‌گه‌ر نه دێ مه كارڤه‌دان هه‌بيت”.
په‌يوه‌نديێن ئه‌مريكا وتوركيا ژئه‌گه‌رێ تۆمه‌تباركرن وزيندانكرنا قه‌شه‌كێ ئه‌مريكى ل توركيا ئالۆزيێن زۆر بخوه‌ڤه دبينن ودوهى ئه‌ينيێ 3 ته‌باخا 2018 هه‌ردو وه‌زيرێن ده‌رڤه يێن ئه‌مريكا وتوكريا ل سينگاپۆرا ل سه‌ر پرسا وى قه‌شه‌ر كۆمبوون.
ئەڤرۆ نیوز،بارزان مزووری:
ژێده‌ره‌كى ژ رێڤەبەریا دارستان و پاوانا ل پارێزگەها دهۆكێ بو ئەڤرۆ نیوز ئاشكرا كر كو پرۆژێ بژارە و بنكۆل و چێكرنا هێلێن ئاگربرا بۆ دارستانێن دەڤەرا” زاویتە،شێخان،سكرێ دهۆكێ،ئەتروش،قەسرۆك ،ئاكرێ،سێمێل وفه‌يديێ” بۆ پاراستنا دارستانێ ژ هەر كریارەكا سوتنێ دهێته به‌رهه‌ڤكرن.
حه‌ميد وه‌رمێلێ ئه‌ندازيارێ چاندنێ ل رێڤه‌به‌ريا دارستان وپاوان زێده‌تر گۆت” ئەڤ پرۆژە ژلایێ رێڤەبەریا مه ب پشته‌ڤانيا رێكخراوا giz یا ئەلمانی دهێته به‌رهه‌ڤكرن وده‌مێ پرۆژەی 40 رۆژن “.
نيشاندان