ئه‌ڤرۆنيوز:
ل دووڤ نڤيساره‌كێ كو ئه‌ڤرۆ ئێكشه‌مبى 29 تيرمه‌ها 2018 ب ئيمزايا نێچيرڤان بارزانى سه‌رۆك وه‌زيرێن هه‌رێما كوردستانێ هاتيه ده‌ركرن، رازيبوون ل سه‌ر پله بلندكرنا ئه‌فسه‌رێن ب سه‌ر وه‌زاره‌تا ناڤخوه ڤه هاته ده‌ركرن.
ل دووڤ وێ نڤيسارێ، ئه‌ڤ فه‌رمانه دێ ژ 14/7/2018 چيته دبوارێ بجهئينانێ دا.
ئەڤرۆ نیوز ،باسم قاسم شنگالی
کورتە فلمێ کەزەب كو بەرهەمێ تیپا گرعزێر یا شانۆیی و هۆنەری يه دێ ل وەلاتێ ئۆسترالیا هێتە نيشاندان
سالم حسێن، بەرپرسێ تیپا گرعزێر بۆ ئەڤرۆ نیۆز گۆت” ل رێکەفتی 3/8/2018 ل دەمژمێر 04:00 ی ئێڤاری ل باژێرێ ئەرمیدال ل وەلاتێ ئۆسترالیا ل بیرهاتنا سالڤەگەرا کۆمکوژیا ئێزدیان ئەوا ل 3 تەباخا سالا 2014 ژ لایێ تيرۆرستێن داعشێ ڤە ل قه‌زا شنگالێ هاتیە ئەنجام دان، کورتە فلمێ کەزەب دێ هێتە نیشاندن ل ئۆسترالیا”.
حسێن پتر گۆت” فلمێ کەزەب فلمەکی تراجیدیايێ يه ل سه‌ر وێ هێرشا درندانه‌يا تيرۆرستێن داعشێ، ژ نڤیسینا بەرپرسێ تیپێ و ژدەرهینانا دەخیل جانۆ یە و ب ئێکەم کارێ تیپێ دهێتە هژمارتن کو ل دەرڤەی کوردستانێ دهێتە نیشاندان”.
ئه‌ڤرۆنيوز:
ويستگه‌هه‌كا كاره‌بێ ل قه‌زا چه‌مچه‌مال ئه‌ڤرۆ ئێكشه‌مبى 29 تيرمه‌ها 2018 ژلايێ نێچيرڤان بارزانى سه‌رۆك وه‌زيرێن هه‌رێما كوردستانێ هاته ڤه‌كرن.
ويستگه‌ها ناڤبرى ژلايێ كۆمپانيا نيشتمانى يا په‌ترۆلى يا كورى وهه‌ردو وه‌زاره‌تێن كاره‌بێ وسامانێن سروشتى ل هه‌رێما كوردستانێ هاتيه دروستكرن وكوژمێ 63 مليۆن دۆلاران لێ هاتيه مه‌زاختن.
بريكارێ وه‌زاره‌تا كاره‌بێ ل هه‌رێما كوردستانێ، هۆگر شالى ل گۆتارا ڤه‌كرنا وێ ويستگه‌هێ گۆت” ئه‌ڤ پرۆژه‌يه دچارچۆڤێ وان پرۆژان دايه كو به‌رى چار سالان حوكمه‌تا هه‌رێما كوردستانێ بريار ل سه‌ر داى وژئه‌گه‌رێ قه‌يرانا دارايى وشه‌رێ داعشێ، تمامكرنا وى پرۆژه‌ى گيرۆبوويه”.
دياركر ژى” ڤى پرۆژه‌ى دێ رۆله‌كێ گرنك هه‌بيت د رێكخستنا به‌لاڤكرنا وزا كاره‌بێ دا وشيانێن به‌رهه‌مئينانا 300 ميگاواتێن كاره‌بێ يا هه‌ى”.
گۆت ژى” وه‌زاره‌تا كاره‌بێ ل دووڤ ماسته‌رپلانا خوه، هه‌موو هه‌رێما كوردستانێ ب هێلا 400 كه‌ى ڤى دێ گرێده‌ت وئه‌ڤ پرۆژه ژى دچارچۆڤێ وێ پلانێ دايه”.
ئه‌ڤرۆنيوز:
نڤيسينگه‌ها سه‌رۆك وه‌زيرێن عيراقێ دراگه‌هاندنه‌كێ دا دياركر، ژ ئه‌گه‌رێ گرفتا كاره‌بێ، حه‌يده‌ر عه‌بادى سه‌رۆك وه‌زيرێن عيراقێ وه‌زيرێ كاره‌بێ قاسم ئه‌لفه‌هداوى ژ پۆستى وى لادا.
ژكار لادانا وى وه‌زيرى پشتى وان زنجيره خوه‌نيشادانان دهێت كو ل ده‌ستپێكا ڤێ هه‌يڤێ پارێزگه‌ها به‌سرا وباژێرێن باشوورێ عيراقێ ڤه‌گرتى وتێدا وه‌لاتيان داخوازا ئاڤ وكاره‌بێ وخزمه‌تگوزارى ومافێن خوه دكر.
ئەڤرۆ نیوز ، زنار تۆڤی:
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا خویاکرن : د روودانەکا هاتنوچوونێ ژنەک و زارۆیێ خوە دبنە قوربانی.
ناڤهاتی زێدەتر دا دیارکرن: شڤێدی ل نێزیک بانزینخانا شورەش ل دھوکێ ترۆمبێلەکا تایبەت ل ژنەکێ و زارۆیێ وێ دایە و د ئەنجامدا وێ ژنێ ژیانا خوە ژ دەستدایە و زارۆیێ وێ ژی ب دژواری برینداربوویە و هاتیە رەوانەکرن بۆ نەخۆشخانا تەنگاڤیان ل دهۆکێ.
ئه‌ڤرۆ نیوز، نه‌وزاد هلۆرى:
ده‌مه‌كێ كێم به‌رى نها ئاگر به‌ربوو ترومبێله‌كێ و ب ته‌مامى هاته سوتن.
عه‌گید زێوكى، شایه‌تحاڵى روودانێ و ئێك ژ وان كه‌سێن دناڤا ترومبێلێ دا بۆ ئه‌ڤرۆ نیوز گۆت: (ئه‌م چه‌ند كه‌س دچوینه سه‌ر كارى ل ده‌ڤه‌را بارزان، به‌لێ ل ده‌ما زڤرینێ ما ل سه‌ر جادا گشتى دناڤبه‌را گوندێ بارزان و گوندێ هه‌مدلا ئاگر به‌ربوو ترومبێلا مه).
زێده‌تر گۆت: (ئه‌م نزانین ئه‌گه‌ر چ بوو و به‌رى ئاگر بگه‌هیته مه ، مه شیا خوه قورتال بكه‌ین، به‌لێ تیما به‌ره‌ڤانیا باژێرى ل بلێ هه‌ر زوو ل جهێ روودانێ به‌رهه‌ڤبوو وئاگر كونترولكر).
دهێته زانین كو ترومبێل یا وه‌لاتى دلاوه‌ر باوانى یه و خه‌لكێ كومه‌لگه‌ها سیریێ ي یا سه‌ر ب ناحیا شێلادزێ ڤه.
ئەڤرۆ نیوز، باسم قاسم شنگالی:
ل شەڤا دەرباز بووی ل کەمپا جەمشکۆ ل سنۆرێ قەزا زاخۆ هندەك کەسێن نەناس ئاگر بەردا خیڤەتا ئاواریەکی کەمپا جەم مشکۆ
ئاوارەیەکی ژناڤە کەمپێ کو نەڤیا ناڤێ خوە بێژێت بۆ ئەڤرۆ نیوز دا زانین، ل دەمژمێر 02:30 سبەهێ هندەك کەسان پانزین دگەل خوە ئانی بوو د خیڤەتا ئەوی ئاوارەیێ شنگالێ رەشاندبوون و ئاگر بەربوویێ و د ئەنجام دا هەمی گەل و پەلێن ئەوێ خێزانێ ب تەمامی هاتنە شەوتاندن
پتر گۆت، ئەوێ شەڤێ ئەو خێزان ل مال نەبوو دناڤ کەمپێ دا ئەوان کەسان خیڤەتا وێ خێزانێ ب پانزینێ شەوتاند و زیانێن مادی یێن زۆر ل دیڤ خوە هێلان و لێگەریان یا بەردەوامە ژ لایێ پۆلیسێن کەمپێ ڤە ل ئەوان کەسێن ئەڤ کار ئەنجام داین ل دەرهەقێ ئەوی ئاوارەیی دا
ئه‌ڤرۆ نيوز:
ئەندامەکێ سەرکرداتیا پارتی دیموکراتی کوردستان خویاکر ،پارتی دیموکراتی کوردستان بەردەوام یا دگوھۆرینێ دا ژیان و سروشتێ پارتی بەردەوام د گوھۆرینێ و خو نەکرنەڤێ دایە بابەتەکێ ھەردەمی یە ھەر پارتەکا سیاسی گوھۆرینا ناڤ خوەدا نەکەت دیارە چۆ کارێن پارتایەتیێ تێدا نیە و درەوە گوھۆرین نیشانا ساخبۆنا کارێ پارتایەتیێ یە، دیارنیە ھەتا چۆ قوناغ دی َگوھۆرینا ب خوەڤەگریت ناڤ رێزێن پارتی دا بەلێ ھەرگاڤ بەردەوامبۆیە ھەرجھەکێ د بەرژەوەندیا گشتی دابیت پارتی دی َگوھۆرینا لێ ئەنجامدەت،ئەزێ بەرھەڤم ھەردەمێ پارتی بۆ بەژوەندیا گشتی پارتی من ڤەگوھێزیت ل ھەرجھێ بیت و ل ھەرپوست وپلەیەکێ بم بەلێ ھەتا نوکە چۆ بەحس ل گەل مەنەھاتینە کرن کو بھێمە گوھۆرین .
عەلی عەونی ئەندامێ سەرکرداتیا پارتی دیموکراتی کوردستان و بەرپرسێ لقێ 10 ل سوران بۆ روژناما ئەڤرۆ ئاشکرا کر ،گوھۆرینا بنەرتی ل ناڤ پارتی ل کونگرێ دا دروست دبیت بەرنامەیێ پارتی دھێتە گەنگەشەکرن پەیرەو پرواگرامێن وێ دھێنە گفتوگوکرن بەلێ ل کونگرەیێ ھەتا کونگرەیێ پارتی ل نافخوە دوڤ بەرژەوەندا گوھرینا ب بەرپرسێن خوە دکەت و بەلێ سیستەم ناھێتە دەسکاری کرن ب تنێ دەسھەلاتا سەرکرداتیێ دایە گوھرینا د سیتسەمێ دەسھەلاتێ دا بھێتە کرن ،سازدانا کونگرەیێ پارتی پاشکەفتیە پێدڤی بۆ بەریا دوسالا کونگرە ھاتبا کرن بەلێ ژبەر شەرێ سەپاندیێ داعش و ھەلبژاردنێن رێفراندوما سەربەخویا کوردستانێ کونگرا پارتی نەھاتیە کرن و ھەتا نەھێتە کرن چۆ گوھۆرینێن بنەرەتی ناھێنە کرن.
ئەندامێ سەرکرداتیا پارتی دیموکراتی کوردستان گوتژی ،راگەھاندن و ناساندنا 100 بەربژارێن پارتی کو پرانیا وان گەنجن دیار دکەت، کو ئەو کەسێن ھەتا نوکە نانێ خوە ب ئافکا پارتی دخوار کو ھزر دکر پارتی دکتاتورەو یێ خوە سەپاندی ئەڤە پارتی کاندیدێن خوە ئاشکراکرن و ھندەک لایەن یێ داخوازا پاشئێخستنا ھەلبژاردنا دکەن ، پارتی بەریا نوکە داخوازا ھەلبژاردنێن پێَش وەخت کربۆ ل گەل ھەلبژاردنێن سەروکێ ھەرێمێ بەلێ ئەو لایەن دژی ھەبۆنێ نە لەورا ژی پارتی پێشەنگە ل دیموکراسیا نافخوەدا و یا سەرتاسەری نمونە ژی ھژمارا کونگرێن پارتی کو ھەڤالێن مە ئێکەتی نیشتیمانی کوردستان کو چەند یێ نەشێن کونگرا خوە گرێدەن بزاڤا گوران ھەتا نوکە نەشیایە کونگرێ خوە گرێدەت پارتی لسەر ھەمو ئاستا باوەری ب گوھرین و ھەلبژاردنا ھەیە و ئەنجامداینە و پارتی باوەری ب ھێزا گەنجا ھەیە لەورا پشکەکا باش ل پارتی گەنجن.
ئەڤرۆ نيوز:
دەزگەھێن راگەھاندنا ئەمریکا دیار دکەن کو پشتی گەفێن سەرۆک کۆمار و بەرپرسێن سەربازی یێن ئیرانێ ل دژی ئەمریکا، لیژنەکا ھەڤپشک د ناڤبەرا ئەمریکا، سعوودیێ و چەندین وەلاتێن دی یێن عەرەبی ھاتیە دروست کرن و نھا کار ل سەر دروست کرنا بەرەیەکێ ب ھێز ل دژی ئیرانێ دھێتە کرن، مسر و ئوردن ژی د ناڤا ڤێ بەرەیێ دا جە دگرن و ئەمریکا دخوازیت ب رێیا ڤێ بەرەیەکێ ھێزێن ئیرانێ ل سووریێ، عیراقێ و ھەموو وەلاتێن دی یێن رۆژھەلاتا ناڤین دەرخینیت و سنۆرەکێ بۆ زێدەگاڤیێن ئیرانێ دانێت، ھەکە ئیران ل سەر ھەلویستێ خوە یێ نھا بەردەوام بیت رەنگە ھێرشی ئیرانێ ژی بھێتە کرن.
رۆژناما واشنتۆن پۆست یا ئەمریکی ژی دیار کر کو ٤ مەھا ھەشت سزایێن ئەمریکا د گەلەک بیاڤان دا ل ھەمبەر ئیرانێ دێ ھێنە بجە ئینان و وی دەمی دێ رەوشا ناڤخوەیی یا ئیرانێ ئالۆز بیت، بێگومان ھەکە وەلاتێن عەرەبی ژی ھاریکاریا ئەمریکا بکەن دێ رژێما نھا یا ئیرانێ گەلەکێ تەنگاڤ بیت، دھێتە چاڤەرێکرن کو خوەنیشادان ل دژی سیستەمێ د ناڤخوەیێ ئیرانێ دا ژی دەستپێ بکەن و وی دەمی ئەمریکا و ھەڤپەیمانێن وێ دشێن ب ساناھی رژێما مەلایان ژناڤ ببەن.
ئەڤرۆ نيوز:
دکتۆر عەبدولحەکیم خسرۆ مامۆستایێ زانستێن سیاسی ل زانکۆیا سەلاحەدین بۆ رۆژناما ئەڤرۆ راگەھاند، نوکە باوەریا خەلکێ عیراقێ ب حوکمەتا فیدرالی و دەستھەلاتا خۆجھی گەھشتیە نزمترین ئاست، وەکو دیار ھەر ژ سالا 2003 ھەتا نوکە ل دەڤەرێن ناڤاراست و باشورێ عیراقێ حوکمەتا عیراقێ ھیچ خزمەتگوزاریەکا وەسا بۆ خەلکێ پێشکێش نەکریە، کو خەلک ببینیت، ھەروەسا نە دادپەروەری د دابەشکرنێ دا و گەندەلیەکا زۆر ژی د ناڤا دامودەزگەھێن حوکمەتا عیراقێ دا ھەیە و گەلەک خەلک دناڤا حوکمەتێ دا زەنگین بووینە، ئەڤ چەندە بۆ خەلکێ ھەموویێ یا دیارە و ڤێ چەندێ بێ باوەری ل دەف خەلکێ پەیداکریە و نوکە چو گرێدان دناڤبەرا خەلک و حوکمەتێ دا نەمایە، ب تایبەتی د وارێ شەرعیەتا سیاسی دا، لەوما خوەنیشاندانان ل عیراقێ دەست پێکر و ڤێ چەندی پتر پەیوەندی ب جھئینانا سیستەمێ سیاسی یێ حوکمەتێ ڤە ھەیە، دیسا پارێزگەھێن سوننی یان ژی ھاتینە کاڤلکرن و وێرانکرن و نێزیکی 5 ملیۆن مرۆڤان ئاوارەبووینە، ب سەدان ھزار کەس ھاتینە کوشتن و د ھەمان دەمدا حوکمەتا عیراقێ ئابلۆقا ئابووری دانا سەر حوکمەتا ھەرێما کوردستانێ و ھێرشا سەربازی کرە سەر کوردستانێ ب ھاریکاریا دەولەتێن ھەرێمی، حوکمەتا عیراقێ ھەتا نوکە چو دەستکەفت نەبووینە، ھەروەسا د چارچۆڤێ بەلانسا پەیوەندیێن نێڤدەولەتی دا، عیراق پاشگۆیێ ئیرانێ یە، یان ژی ھەڤسەنگە ل گەل یان ژی دژی ئیرانێ یە، ھەروەسا ل گەل سعودیێ و دەولەتێن دیتر، لەوما ئەم دشێن بێژین عیراق د حالەتەکێ زۆر یێ ئالۆز دایە و ھەکە ھێز و کوتلێن سیاسی دیراسەتەکا جددی بۆ رەوشا نوکە نەکەن، دێ رەوشا عیراقێ ئالۆزتر لێ ھێت و حوکمەت نەشێت کونترۆلێ ل سەر بکەت، دیسا نوکە پتر حزبێن ئیسلامی بووینە ئارمانجا خوە نیشاندەران.
ناڤھاتی گوت ژی: نوکە عیراقێ ھندەک ئاریشێن دیتر ھەنە و ئەڤە دێ بنە ئەگەر کو ھندەک کێماسیێن دیتر دوبارە ببنەڤە، چونکی نوکە شیانێن ئابووری یێن عیراقێ گەلەک لاوازبووینە، ئاستێ یەدەکێ پارێ عیراقێ 50% ھاتیە خوار، ھەروەسا نوکە عیراق نێزیکی 130 ملیار دۆلاران یا دەیندارە، دیسا د ئالیێ ئێمناھیێ دا دەزگەھێن ئەمنی ل عیراقێ د پەرتەوازەنە و فرە فەرماندەیی ل دەزگەھێن ئێمناھیێ دا ھەیە، ئەڤە ھەموو پیڤەرن بۆ دەولەتێن فاشل، چونکی عیراق نەشیایە خوە ژ ڤان پیڤەرێن خراب رزگار بکەت، ھەروەسا نەشیایە د وارێ گەشەپێدانا مرۆڤی و مافێن مرۆڤی و ئابووری دا پێش بکەڤیت و ب تنێ پشت بەستنێ ل سەر نەفتێ دکەت، ھەر چەندە پرانیا سەروەت و سامانێ عیراقێ ل پارێزگەھا بەسرایە، لێ ھەتا نوکە خەلکێ وێ کارەبا و ئاڤ نینە، دیسا ئەو سۆزێن دەستھەلاتێ و حوکمەتا عیراقێ داینە خەلکێ خوە بجە نەئینان و عیراق یا پرە ژ کێشان، چونکی خەلک دزانن کو ھەموو داھاتێ عیراقێ بۆ بەرپرس و گەندەلان دچیت.
ئەو چەند ژی گوت: نوکە رەوشا لایەنێن سیاسی یێن عیراقی د شەرمزاریێ دانە ب تایبەتی حزبێن ئیسلامی و حزبا دەعوە، چونکی سەرۆک وەزیر ژ وێ حزبێ بووینە، لەوما وان شیرەتکاریا خوە ب حزبێن دی نەکریە، ئەڤ رەوشا نوکە دێ کارتێکرنا خوە ل سەر پێکئینانا حوکمەتا نوو ھەبیت، دیسا دوبارەبوونا مالکی و عەبادی بۆ وەرگرتنا پۆستێ سەرۆک وەزیران دێ یا ب زەحمەت بیت، دبیت ھندەک کەسانێن دی ڤی پۆستی وەربگرن، لێ عیراق ب رەنگەکێ گشتی نەشێت چاکسازی و پێنگاڤێن گەشەکرنێ یێن ب لەز ب ھاڤێژیت، ھەروەسا بۆ ستراتیجیەتا دووربین عیراقێ پێدڤی ب 10 سالان ھەیە، ھەتاکو ئەو پلانە بھێتە بجھئینان، ھەر چەندە د ڤان 13 سالێن بوریدا گەلەک روودان و گوھۆرین ل عیراقێ رووداینە، ھەر ژ ھاتنا داعشێ و پەیدابوونا گەلەک روو ب رووبوونان ل عیراقێ و کوردستانێ.
عەبدولحەکیم زێدەتر دبێژیت: نوکە گەلەک فشار ل سەر ئیرانێ ھەنە و ھەکە سیناریۆیا سوویێ ل ئیرانێ دوبارە ببیت و رژێما ئیرانێ ب رووخیت، جارەکادی عیراقێ و ھەرێما کوردستانێ دێ روو ب روو ھەمان گرۆپێن تیرورستی و توندوتیژیان بن، لێ ھەکە ئیران ل سەر ڤێ سیاسەتا خوە یا بەردەوام بیت، دێ دەستێوەردانێن وێ د بەردەوام بن ل سەر کاروبارێن نافخوە یێن عیراقێ و ھەرێما کوردستانێ ژی، ھەروەسا گوھۆرینا سیستەمێ سیاسی ل تورکیا و رەوشا سووریێ ئەڤە ھەموو ھەڤرکیێن ھەرێمی نە روو ب روو عیراقێ دبن و دەستھەلاتا عیراقێ ژی نەگەھشتیە ئاستەکێ پروفشیۆنال کو بشێت روو ب روو ئەڤان ھەموو گورانکاری و ھەڤرکیان ببیت.
ئەو ماموستایێ زانکۆیێ دبێژیت ژی: گیروبوونا ئەنجامێن ھەلبژارتنان ل عیراقێ ھند کارتێکرنا خوە ل سەر پرۆسا سیاسی نابیت، لێ ھەکە حوکمەتەکا نوو ل عیراقێ بھێتە پێکئینان و دەستھەلاتا سیاسی ھەموو بھێتە گوھۆرین، ئەڤە وێ چەندێ ناگەھینیت کو دێ خوەنیشاندان راوەستن، چونکی نەرازیبوونا خەلکێ پەیوەندی ب پەرلەمانی و حوکمەتا عیراقێ و ئەندامێن جڤاتێن پارێزگەھان و پارێزگاران ڤە ھەیە، چونکی گەندەلیەکا زۆر ل ھەموو جھان ھاتیە کرن و پرانیا خوەنیشاندانان ژی ل دژی دەستھەلاتا خوەجھی بوویە.
دەربارەی ھندەک سەرکردێن عیراقی کو داخواز کریە حوکمەتا رزگاریا نیشتیمانی ل عیراقێ بھێتە پێکئینان بۆ ماوێ سێ سالان ناڤھاتی دبێژیت: ھندەک دبێژن دڤێت دستۆر بھێتە گوھۆرین و عیراق ڤەگەریت بۆ قوناغا ڤەگوھاستنێ و ھندەکان ژی دڤێت حوکمەتەکا رزگاریا نیشتیمانی بھێتە پێکئینان، ھەروەسا ھەکە حوکمەتا رزگاریا نیشتیمانی بھێتە دانان و بێی دەستھەلاتا پەرلەمانی بیت و چو بنەمایێن دستۆری بۆ نەبن سەرناکەڤیت، لەوما دڤێت پەرلەمانێ عیراقێ ھەر بھێتە دانان و دڤێت سیستەمێ عیراقێ وەکو خوە بمینیت، چونکی دستۆرێ عیراقێ شەرعیەتەکا نێڤدەولەتی ھەیە و بریارێن نەتەوێن ئێکگرتی پشتگیری ل پرۆسا سیاسی ل عیراقێ کریە و سالانە یۆنامی بەحسێ دەڤەرێن دەرڤەی ئیدارا ھەرێمێ دکەن، کو دڤێت لدووڤ دستۆری بھێنە چارەسەرکرن، لەوما حوکمەتا رزگاریا نیشتیمانی و ھەلوەشاندنا ئەنجامێن ھەلبژارتنان نوکە یا پێشنیارکری نینە، لێ ھەکە جۆداھی دناڤبەرا ڤاڤارتنا دەنگێن ئەلەکترۆنی و دەستی دا ھەبیت، دبیت ئەنجام بھێنە ھەلوەشاندن و ئەڤە لدووڤ دادگەھا بلند یا فیدرالی دمینیت، ھەروەسا نیەتا ئالی و حوکمەتا عیراقێ نیەتەکا پاک نابیت ھەمبەری کوردستانێ و ھەموو ئالیێن سیاسی ب ھەمان چاڤ بەرێ خوە ددەنە کوردستانێ و ئەڤ چەندە دێ یا بەردەوام بیت، چونکی سیاسەتا گشتی یا عیراقێ چو گوھۆرین ب سەردا ناھێن و ھەکە گوھۆرین ھەبن ژی دێ یێن نەچاریێ بن، کو ئەو ژی جڤاکێ نێڤدەولەتی ل سەر عیراقێ سەپاندینە و ھەر دەمێ عیراق بێ منەت بیت، دێ ھەمان سیاسەتا خراب ھەمبەری کوردستانێ ب کار ئینیت.
نيشاندان