ئه‌ڤرۆنيوز:

سوباهى ئێكشه‌مبى 27/5/2018 قوتابيێن پۆلا 12 ئاماده‌يى دێ پشكداريێ دئه‌زموونێن وزارى دا كه‌ن، وه‌زاره‌تا په‌روه‌ردێ ل هه‌رێما كوردستانێ ڤيديۆيه‌كێ به‌لاڤ دكه‌ت كو ئاراسته‌ى قوتابيان دكه‌ت ل دۆر چاوانيا پشكداريا وان د ئه‌نجامدانا ئه‌زموونێن وه‌زارى دا.

ل دووڤ ده‌مێ دياركرى يێ په‌روه‌ردێ، سوباهى ئێكشه‌مبى ئه‌و ژڤانه‌ كو قوتابيێن پۆلا 12 ئاماده‌يى پشكداريێ دئه‌زموونێن وه‌زارى دا دكه‌ن ل پشكێن زانستى، وێژه‌يى، پيشه‌يى وئيسلامى

وه‌زاره‌تا په‌روه‌ردێ رادگه‌هينيت ژى كو ل رۆژا دوشه‌مبى 28/5/2018 ئه‌زموونێن گشتى يێن پۆلا نه‌هێ بنه‌ره‌تى دێ هێنه‌ ئه‌نجامدان.

ئه‌ڤرۆنيوز:

ب هه‌لكه‌فتا 42 ساليا ده‌ستپێكرنا شوره‌شا گۆلانێ، ئه‌ڤرۆ شه‌مبيێ 26/5/2018 سه‌رۆك مه‌سعود بارزانى په‌يامه‌ك به‌لاڤكر.

سه‌رۆك بارزانى دپه‌ياما خوه‌ دا، زيده‌بارى پێرۆزباهى كرنێ ل گه‌لێ كوردستانێ، راگه‌هاند” شوره‌شا گۆلانێ سه‌لماند كو هه‌كه‌ گه‌لێ كوردستاني ل قۆناغه‌كێ تووشى نسكۆيێ ژى هاتبيت، ئيرادا خه‌باتا گه‌لێ كوردستانێ چو ده‌مه‌كى نه‌شكه‌ستيه‌ وب هه‌ناسه‌ وتێهنه‌كا نوو دێ به‌رده‌وام بيت بۆ گه‌هشتنێ ب ئازاديێ”.

 هه‌روه‌سا سه‌رۆك بارزانى گۆت” ئه‌و ده‌ستكه‌فتێن نوكه‌ گه‌لێ كوردستانێ ب ده‌ستڤه‌ئيناين، به‌رهه‌مێ خوين وقوربانيدانا گه‌لێ مه‌يه‌ ل شوره‌شا گلانێ وهه‌موو شوره‌شێن دى”.

سه‌رۆك بارزانى ددرێژيا په‌ياما خوه‌دا، ژبلى سلاڤان بۆ هێزێن پێشمه‌رگێ كوردستانێ گيانێ پاقژێ شه‌هيدێن كورد وكوردستانێ، ئاماژه‌ ب ناڤێ ئێكه‌م شه‌هيدێ شوره‌شا گۆلانێ كر كو شه‌هيد (سه‌يد عه‌بدوللا حاجى ئۆمه‌رانى) بوو.

دپه‌ياما خوه‌ دا كو ل مالپه‌رێ فه‌رميێ خوه‌ دا به‌لاڤكريه‌، سه‌رۆك بارزانى دووپاتى ل وێ چه‌ندێ كر كو ئيرادا گه‌لێ كوردستاني يا ب هێزه‌ وسه‌ره‌راى هه‌بوونا پيلاگێريێ، به‌لێ ب ئيراده‌كا بلندتر ژجاران خه‌باتێ دكه‌ت بۆ  ب ده‌ستڤه‌ئينانا مافێن خوه‌ يێن ره‌وا وبه‌رده‌وامى ل په‌ياما ئاشتيێ وپێكڤه‌ژيانێ وپێشكه‌فتنخوازيێ.

شوره‌شا گۆلانێ ل 26/5/1976 ب سه‌ركردايه‌تيا پارتى ديموكراتى كوردستان هاته‌ هه‌لكرن وپاشى ل سه‌رده‌مێ وێ شوره‌شێ دا، به‌ره‌يێ كوردستانێ دروست بوو وسه‌رهلدان دژى رژێما به‌عس ل بهارا 1991 هاته‌ كرن وهه‌رێما كوردستانێ ئازاد بوو.

‌ئه‌ڤرۆنيوز:

ل سنورێ ده‌ڤه‌را گه‌رمه‌سێر هێزێن پێشمه‌رگه‌ى كه‌فتنه‌ دحاله‌تا ئاماده‌باشيێ دا، فه‌رماندێن پێشمه‌رگه‌ى، ل دووڤ مالپه‌رێ كوردستان تى ڤى،  ل وى سنورى دبێژن، بۆ هه‌رحاله‌ت ورێگرى ل هاتنا چه‌كدارێن داعشێ، هێزێن مه‌ يێن كه‌فتينه‌ دئاماده‌باشيێ دا ژبۆ پاراستنا وه‌لاتيێن مه‌ وده‌ڤه‌رێ ورێ ناده‌ين چه‌كدارێن داعشێ بهێنه‌ دناڤ ئاخا كوردستانێ دا.

ل ده‌مه‌كى هێزێن پێشمه‌رگه‌ى ل وێ ده‌ڤه‌رێ دكه‌ڤنه‌ دحاله‌تا ئاماده‌باشيێ دا، ل چه‌ند رۆژێن بۆرى چه‌كدارێن داعشێ ل گوندێ سمايل وه‌هاب ل ده‌ڤه‌را شێخ باوه‌ى ل ناحيا جه‌له‌ولا هێرش كر وچه‌ند وه‌لاتى كوشتن.

هه‌ر ل دووڤ ده‌نگوباسه‌كێ سومه‌ريه‌نيوز، زێده‌تر ژ هزار چه‌كدارێن داعشێ ل ده‌وروبه‌رێن جه‌له‌ولا ل گوندێن ئيسلاح، نيدا، شێخ باوه‌، ئه‌وم حنته‌ وده‌ڤه‌رێن مه‌نسووريه‌ ونه‌فتخانه‌ يێن هه‌ين وب شێوێ گرۆپێن 50 كه‌سى ده‌ست ب چالاكيێن خوه‌ ل ده‌ڤه‌رێ كريه‌.

عه‌قيد (غالب عه‌تيه‌) په‌يڤدارێ پۆليسێن پارێزگه‌ها ديالا ب سومه‌ريه‌نيوز گۆت” ئه‌و چه‌ندا ل راگه‌هاندنێ هاتيه‌ به‌لاڤكرن سه‌باره‌ت هه‌بوونا هژماره‌كا مه‌زن يا چه‌كدارێن داعشێ ل سنوورێ ناحيا جه‌له‌ولا، زێده‌يى يا تێدا ومه‌ره‌م پێ ئه‌وه‌ ئاكنجيێن وان ده‌ڤه‌ران تووشى ترسێ بكه‌ن وره‌وشا ته‌ناهيێ ل ده‌ڤه‌رێ تێك بده‌ن”.

ئه‌ڤرۆ نیوز ، نه‌وزاد هلۆرى:

پشتی راگەهاندنا ئەنجامێن هەلبژارتنان و سەرکەفتنا لیستا هەڤپەیمانیا سائیرون ئەوا کو موقتەدا سەدر سەروکاتیێ لێ دکەت ، دنهادا وەرگرتنا پوستێن سیادی ل عیراقێ بویه‌ رۆژه‌ڤا سه‌ره‌كى یا میدیایێن جیهانى ، و رۆژنامه‌كا كوێتى به‌حس ل وه‌رگرتنا پوستێ سه‌روك كومارێ عیراقێ ژلایێ كوردان دكه‌ت كو ئه‌و ژى چوار كه‌سن.

رۆژنامه‌یا ره‌ئى یا كوێتى دایه‌ دیاركرن كو هه‌ڤركیێن زور ل هه‌ولێرێ لسه‌ر وه‌رگرتنا پوستێ سه‌روك كومارێ عیراقێ دهێته‌كرن و گۆت: (هه‌ر ئێك ژ پارتى دیموكراتى كوردستان و ئێكه‌تیا نیشتمانیا كوردستانێ ب ئه‌نجامدانا چه‌ند كومبوونان بو گه‌هشتنا هه‌ڤپه‌یمانیه‌كا نوو ل گه‌ل هه‌ر ئێك ژ هادى عامرى و نورى مالیكى دخوازن مه‌زنترین فراكسوون ل په‌رله‌مانێ عیراقێ درۆست بكه‌ن و بڤێ یه‌كێ پوستێ سه‌روك كوماریا عیراقێ بو كوردان ده‌ستخوڤه‌ بینن و ناڤێن هه‌ر ئێك ژ نێچیرڤان بارزانى ، فوئاد مه‌عسوم ، به‌رهه‌م سالح و فوئاد حسێنى بو وه‌رگرتنا وى پوستى هاتینه‌).

ل بارا چه‌نسێ وان هه‌ر چوار كه‌سان ژى رۆژنامه‌ دبێژیت: (هه‌ر ئێك ژ فوئاد مه‌عسوم و به‌رهه‌م سالحى چانسێ وه‌رگرتنا پوستێ سه‌روك كومارێ عیراقێ لاوازه‌ ب تایبه‌تى پشتى كو فوئاد مه‌عسوم كارا و سه‌ركه‌فتى نه‌بویه‌ دهنارتنا بودجا هه‌رێمێ ئه‌وا كو پێشتر ژلایێ عیراقێ هاتیه‌ برین ، به‌رهه‌م سالح ژى لیسته‌كا جودا هه‌یه‌ و گه‌له‌ك ب زه‌حمه‌ته‌ بكاریت وه‌ربگریت ، دیسان فوئاد حسێن سه‌روكێ دیوانا سه‌روكاتیا هه‌رێمێ كو نێزیكه‌ ل مه‌سعود بارزانى چه‌نسێ وه‌رگرتنا پوستێ سه‌روك كومارێ عیراقێ هه‌یه‌ ژبه‌ركو ئه‌و تا راده‌یه‌كێ دناڤبه‌را ئێكه‌تى و پارتى بێ لایه‌نه‌ و ب فه‌رمى ل گه‌ل كه‌س ژ وان نینه‌ ، و به‌ربژاركرنا ناڤێ نێچیرڤان بارزانى بو وه‌رگرتنا پوستێ سه‌روك كومارێ عیراقێ ره‌نگه‌ ببیته‌ سوپرایز دناڤبه‌را هه‌ولێر و به‌غدا و نه‌یا مه‌حاله‌ كو وه‌ربگریت).

هه‌لبژارتنێن په‌رله‌مانێ عیراقێ ل 12ێ ئه‌ڤێ مه‌هێ هاتنه‌ ئه‌نجامدان و تێدا بو ئێكه‌مین جار سیسته‌مێ ئه‌لیكترونى هاته‌ په‌یروه‌كرن و چه‌ند حزبه‌كێن عیراقێ و هه‌رێما كوردستانێ ژى نه‌رازیبوونێن خوه‌ دیاركرن و پارتى و ئێكه‌تى ب زورترین كورسیێن هه‌رێما كوردستانێ بونه‌ بهێزترین فراكسوون ل به‌غدا، و بیێ ئێك ژ وان هه‌ردوو حزبان ب تایبه‌تى پارتى ب زه‌حمه‌ت فراكسونێن عیراقى بكارن حوكمه‌تا داهاتیا عیراقێ پێكبینن.