ئه‌ڤرۆنيوز:
سه‌رۆك مه‌سعود بارزانى ئه‌ڤرۆ شه‌مبيێ 20/5/2018 په‌يامه‌ك به‌لاڤكر وتێدا ئاماژه ب پێنجى وشه‌ش ساليا پێشمه‌رگايه‌تيا خوه دكه‌ت ودبێژيت، ئه‌و شه‌ره‌ف ب من هاته به‌خشين كو به‌رى پێنجى وشه‌ش سالان بوويم پێشمه‌رگه.
سه‌رۆك بارزانى دياركر” ژ وێ رۆژێ وهه‌تا نوكه مه‌زنترين پله وپۆست بۆ من پێشمه‌رگايه‌تيه، ئه‌ڤه بلندترين وب شه‌ره‌فترين ده‌ستكه‌فتا ژيانا منه”.
گۆت ژى” هه‌ر ب هيمه‌تا پێشمه‌رگه‌يه كو گه‌لێ كوردستانێ خوه بۆ چو هێز ولايه‌نه‌كى نه‌چه‌مانديه ژبلى خودايێ مه‌زن”.
ئه‌ڤرۆ نيوز:
كۆمسيۆنا بلندا سه‌ربه‌خۆيا هه‌لبژارتنان ل عيراقێ ئه‌نجامێن دووماهيێ يێن هه‌لبژارتنێن جڤاتێن نوونه‌رێن عيراقێ به‌لاڤكرن و تێدا هنده‌ك كه‌سان ژماره‌كا زۆر يا ده‌نگان ژ ده‌ست داينه هنده‌ك كه‌ساتيێن گه‌له‌ك به‌رنياس ژى نه‌گه‌هشتنه جڤاتا نوونه‌ران و به‌رنياسترين كه‌س ژى سه‌رۆكێ جڤاتا نوونه‌ران سه‌ليم جبۆرى و حه‌نان فه‌تلاوى سه‌رۆكا ليستا ئيراده و نوونه‌را به‌رێ يا جڤاتا نوونه‌رێن عيراقێ.
ل پارێزگه‌ها دهۆكێ ژى نوونه‌رێ دووباره خوه به‌ربژار كرى، دكتور جه‌مال كۆچه‌ر، بوو وه‌كو سه‌رۆكێ ليستا ئێكگرتوو بۆ جڤاتا نوونه‌رێن عيراقێ، به‌لێ وى ژى ل گه‌ل پارتيا خوه، ئێكگرتوو ئيسلامى كوردستان ژماره‌كا زۆر يا ده‌نگان ژ ده‌ست دان.
ب گۆره‌ى ئامارێن فه‌رمى يێن كۆمسيۆنێ ل سالا 2014ێ ئانكو د هه‌لبژارتنێن بۆرى يێن جڤاتا نوونه‌رێن عيراقێ دا، ل پارێزگه‌ها دهۆكێ ئێكگرتوو ئيسلامى كوردستان شيابوو 84 هزار و 464 ده‌نگان ب ده‌ست خوه ڤه بينيت و به‌ربژارێ وێ جه‌مال كوچه‌ر كو ل وى ده‌مى ژى ژماره ئێك بوو شيا بوو 51 هزار و 358 ده‌نگان ل ده‌ست خوه ڤه بينيت كو ده‌نگێن وى ب تنێ به‌هرا هندێ هه‌بوون ئێكگرتوو دو كورسيان ل پارێزگه‌ها دهۆكێ ب ده‌ست خوه ڤه بينيت.
د هه‌لبژارتنێن ئه‌ڤ ساله يێن جڤاتا نوونه‌رێن عيراقێ دا، ئێكگرتوو ئيسلامى كوردستان ب هه‌موو هێزا خوه ڤه نه‌شيا هندێ ده‌نگێن به‌ربژاره‌كێ خوه يێن هه‌لبژارتنێن بۆرى بينيت كو ده‌نگێن ئه‌ڤ ساله يێن ئێكگرتوو هه‌موو بوونه 43 هزار و 470 و كانديدێ ئێكانه يێ ده‌ركه‌فتى ژى بۆ جڤاتا نوونه‌رێن عيراقێ، دكتور جه‌مال كۆچه‌ر 27 هزار و 744 ده‌نگ بوون.
ب گۆره‌ى چاڤدێران چه‌ند ئه‌گه‌رێن سه‌ره‌كى هه‌بوون بۆ كێمكرنا ده‌نگێن دكتور جه‌مال كۆچه‌ر و ئێكگرتوو ئيسلامى كوردستان كو به‌رچاڤترين ئه‌گه‌ر ژى ئه‌و بوو كو هه‌تا به‌رى چه‌ند هه‌يڤه‌كێن كێم يا پشكدار بوو د حوكمه‌تێ دا و پاشان ژى خوه ڤه كێشا دا بێژيت ئه‌ز د حوكمه‌تێ دا نه‌بووم و كێماسى يێن پارتيا ده‌سته‌لاتدار بوون، د ده‌مه‌كى دا د حوكمه‌تا خوه‌جهيا دهۆكێ دا يا پشكدار بوو.
ئه‌گه‌رێ دويێ يێ گه‌له‌ك به‌رچاڤ ئه‌و بوو هه‌لويستێ دكتورى بوو يێ ل ده‌مێ هه‌وا هه‌لبژارتنان ب كارئينايى، ده‌ما گۆتى كو ئه‌وى كۆژمه‌كێ پاره‌ى يێ بۆ كه‌رتێ په‌روه‌ردێ ل پارێزگه‌ها دهۆكێ دابين كرى و پاشان ژى چه‌ندين روونكرن ل سه‌ر بابه‌تى هاتينه دان و گه‌له‌ك هاتى و چوويى و ل دووماهيێ ژى كه‌سێ راستيا بابه‌تى نه‌زانى.
ئه‌گه‌رێ سيێ ژى يێ كو گه‌له‌ك به‌حس لێ دهێته كرن ئه‌وه كو پشتى هاتنا چه‌كدارێن داعش باوه‌ريا وه‌لاتيان ب پارتيێن ئيسلامى كێم بوويه و ئێدى خه‌لك پشته‌ڤانيا پارتيێن ئيسلامى ناكه‌ن و نموونا ڤێ چه‌ندێ ژى گه‌له‌ك ب ئاشكه‌رايى ل هه‌رێما كوردستانێ ديار بوو كو ئێكگرتوو نيڤا كورسيێن خوه يێن جڤاتا نوونه‌رێن عيراقێ ژ ده‌ست دان.
هه‌ر گرۆڤه ل سه‌ر ڤى بابه‌تى جارا ئێكێ يه ژى ئێكگرتوو ده‌نگێن خوه و جه‌ماوه‌رێ خوه ژ ده‌ست دده‌ت، ب ره‌نگه‌كى د هه‌موو هه‌لبژارتنان دا ده‌نگێن ئێكگرتوو زێده بووينه، به‌لێ د هه‌لبژارتنێن ڤێ جارێ دا ب تنێ ل دهۆك ئێكگرتوو زێده‌ترى نيڤا ده‌نگێن خوه ژ ده‌ست داينه و به‌ربژارێ وێ دكتور جه‌مال كۆچه‌ر ژى نێزيكى 25 هزار ده‌نگان ژ ده‌ست داينه.
ئەڤرۆ نيوز:
زور جاران ژ ئەگەرا ھندێ کو مرۆڤ رۆژانە د مەھا رەمەزانێ دای ێ ب رۆژی یە ئاڤ و خوارنێ ناخوت ئەڤ یەک ژی دبیت کارتێکرنەکا خراب لسەر ساخلەمیا مویێن پرچێ بکەت و زور ژ خانمان دمەھا رەمەزانێ دا ئاریشەییا وەریانا پرچێ ھەیە ژ ئەگەرا کێمبوونا فیتامین و کانزا و ئاڤێ د لەشی دا.
تو دکاری چارەسەریا وەریانا پرچێ بکەی ب ڤان رێییێن سادەیێن ل خوارێ
– مەساجێ ب پیستێ سەرێ خوە بکە: جار جار ب نێنوکێن دەستێن خوە مەساجێ ب پیستێ سەرێن خوە بکەن بو ھاریکاریکرن ل دەورا خوینێ د پشتێ سەری دا.
– بکارئینانا زەیتا زەیتوونان و زەیتا گویزا ھندی: ھندەک ژ زەیتێ بێخە سەر دەشتێ خوە و ب تبلێن دەستان ژ پیستێ سەرێ خوە بدە و مەساج بکە.
– ماسکێ چایا کەسک: دکاری ھەواریێ بو ماسکا چایا کەسک بدەی بو رزگاربوون ژ وەریانا پرچێ ژبەرکو چایا کەسک زور مادیێن پارێزڤانی تێدا ھەنە بو مویێن پرچێ و پیستێ سەری.
– داھێنانێن پرچێ کێم بکە : ئەگەر تە پرچ داھێنا ل وی دەمی ب ئێک ئاراستە داھێنانێ لسەر بکە و دویر بکەڤە ژ کارئینانا ددانێن شەیی ب نێزیک بەلکو ددانێن شەری زور دویری بکاربینەداکو چوو زیانان ب پارچا تە نەگەھینن.
ئەڤرۆ نيوز:
وەرزشکرن ب باشترین کریار دھێتە دانان د ھەیڤا رەمەزانێ دا، چونکو مفایێن ئەرێنی و ساخلەمی یێن بۆ لاشی ھەین. ھەستی و زەبلەکان چالاک دکەت و ژ دودلیێ و بێزاریێ د پارێزیت.
وەرزشکرن د ھەیڤا رەمەزانێ دا یا ھاریکارە بۆ مانا بەژن رزاڤیا لاشی ب رەنگەکێ رێک، بەلێ باشترین دەم بۆ وەرزشکرنێ چ دەمە د رەمەزانێ دا؟ چونکو وەکو دەمێن ئاسایی نەشێی گەلەک وەرزشێ بکەی.
د ھەیڤا رەمەزانێ دا پێدڤیە رۆژانە وەرزشەکا چەند دەقیقەی بکەی، بەلێ پێدڤیە جورێ لڤاندنێ ل گەل شیانێن لاشی بیت، مرۆڤی بێھێز نەکەت، وەکو رێڤەچوونا ب پیان یان غاردان یان وەرزشا ئایرۆبیک یان یا بلندبوونێ.
باشترین دەم بۆ وەرزشکرنێ د ھەیڤا رەمەزانێ دا، یا ئێکێ دەمژمێرەکێ یە یان دەمژمێر و نیڤان پشتی فتارێ، دشیان دایە نیڤ دەمژمێرێ یان 15 دەقیقان بکەی. ھاریکاریا دەرکرنا ژەھرێ ژ لاشی ددەت و مرۆڤ ھێمن دکەت.
یا دوویێ ژی ئەنجامدانا وەرزشێ یە پشتی 2 یان سێ دەمژمێران پشتی خوارنا فتارێ، چونکو پشتی وی ماوەی مەعیدە خوارنێ ھەرس دکەت و لاش یێ ئامادەیە بۆ لڤینێ.
گەلەک یا پێدڤی یە بۆ رۆژیگران سنورەکی بۆ وەرزشکرنێ ب دانن د ھەیڤا رەمەزانێ دا، چونکو زێدەتری شیانێن خوە ژی زیان یێن ھەین، بزاڤێ بکە ژ 15 ھەتا 30 دەقیقان زێدەتر نەبیت.
ئه‌ڤرۆ نيوز:
بڕیارە ئینانا تڕۆمبێلێن سیستەمکری بھێنە قەدەغەکرن بۆ ھەرێما کوردستانێ ئەو ژی ب مەرەما پاراستنا سلامەتیا وەلاتیان ژ روودانێن ھاتن و چوونی.، بەرپرسەکێ کەرتێ ھاتن و چوونێ ژی دبێژیت: ھێشتا بڕیار نەچوویە د بیاڤێ بجە ئینانێ دا، بەلێ قەدەغەکرنا وان جورێن تڕۆمبێلان چو کاریگەری ل سەر روودانێن ھاتن و چوونێ نابیت و دیار کر، تڕۆمبێلێن ژ دوبەی دھێنە ھەرێما کوردستانێ ئاریشەیێن بچووک ھەنە و ھێشتا ئەم نەھاتینە پشتڕاستکرن ببنە ئەگەر بۆ روودانان.
رائید فازل حاجی، پەیڤدارێ ھاتن و چوونا پارێزگەھا ھەولێرێ بۆ رۆژناما ئەڤرۆ گۆت “ھێشتا بڕیارا قەدەغەکرنا ئینانا تڕۆمبێلێن ئیڕباکێ وان پەقی نەچوویە د بیاڤێ بجھئینانێ دا، بەلێ کوالێتا کۆنتڕۆل و وەزارەتا دارایی بڕیار دەرکریە بۆ ڤێ چەندێ رێ نەھێتە دان ئەف تڕۆمبێلێن سیستەمکری نەھێنە ھەرێما کوردستانێ و بھێنە قەدەغەکرن، مەرەم ژ سیستەمکرنێ ئەڤە ھژمارەکا تڕۆمبێلان یێن دبێژنێ خەلیجی کو ل وەلاتێن ئەمریکا دچنە دوبەی پاشی دھێنە ھەرێما کوردستانێ بازاڕێ کڕین و فرۆتنا تڕۆمبێلان گەرمکریە، بەلێ پتریا وان تڕۆمبێلا قولپینە و ئێڕباکێ وان تەقیە، بەلێ ل وەلاتێن خەلیج تێنە سیستەمکرن واتە تێنە راستڤەکرن و ھنارتن بۆ ھەرێما کوردستانێ.
رائید فازل حاجی دیار کر “ب دیتنامە وەک ھاتن و چوون ئەف بابەتە زۆر ھاتیە مەزنکرن و ب ڤی شێوەی نینە، چونکو ھەتا نوکە مە حالەتەک نەبوویە ئەف تڕۆمبێلێن سیستەمکرن تووشی ئاریشەیەکێ ببن ب ئەگەرێ راستڤەکرنا بۆ ھاتیەکرن، پتریا وان تڕۆمبێلان ل دوبەی دھێنە ھەرێما کوردستانێ و ل گۆرەی قانوونا ھاتن و چوونا دوبەی ھەر تڕۆمبێلەکا تووشی روودانەکێ ببیت کەسەکی تێدا گیانێ خوە ژ دەستدابیت ناھێتە راستڤەکرن و ئێکسەر دھێتە ھەلوەشاندن و ب تنێ مفا ل پارچێن ڤێ تڕۆمبێلێ دھھێتە وەرگرتن، واتە کڕین و فرۆتن ب ڤان جورێن تڕۆمبێلا ناھێتەکرن یێن تووشی روودانەکا مەزن بووینە ئەڤێن دھێنە ھەرێما کوردستانێ راستە بەری نوکە ئاریشە ھەبووینە، بەلێ ھەموو دڕبێن بچووک بەرکەفتینە و چو ئاریشە نینە بۆ بکارئینانێ، ھەموویان ژی مەرجێن ھاتن و چوونێ تێدا ھەنە و ب قەدەغەکرنا وان تڕۆمبێلا چو کاریگەری ل سەر کەرتێ ھاتن و چوونێ نابیت وەکی ھندەک کەس و لایەنێن حوکمەتێ دبێژن دێ روودان کێمبن.
ئه‌ڤرۆ نيوز:
بەرپرسێ نڤسینگەھا قەرزێن بچووک ل دھۆکێ ئاشکرا کر کو ژ نەدانا قەرزێن خوە کێشێن جڤاکی دناڤبەرا کەفیل و کەسێ مفادار ژ قەرزی دروست بووینە و ھەتا نوکە پتر ژ 200 کەفیلا پارە ژێ دھێتە برین و گۆت: پتر کور مفادار بووینە ژ پرۆژێن قەرزێ بچووک و ھەتا نوکە 152 کچان کەسان قەرزێن بچووک وەرگرتینە، 2194 کوران پرۆژی مفادار بووینە سەرانسەری پارێزگەھێ و پتر کچ مفادار بووینە و پتر وەرگرتنا پارەی بۆ ڤەکرنا جوانکاریێن ئافرەتان و درینگەھێن جلکان بووینە، ل دووڤ پرۆژەی پارە بۆ دھێتەدان و ژ 15 ملیۆن دیناران نابوریت.
گوھدار عەبدوللا یوسف بەرپرسێ نڤسینگەھا قەرزێن بچووک ل دھۆکێ بۆ رۆژناما ئەڤرۆ ئاشکراکر کو ل سالا 2011 ھەیڤا حەفت رێڤەبەریا ناڤبری ھاتیە دانان ل 2346 مرۆڤان ل سەرانسەری پارێزگەھێ مفادارێن ڤی پرۆژەی بووینە، پارێ خەلکی وەرگرتی 17 ملیار و چارێکەک بووینە و ئەوێ مە وەرگرتی ھەر مە دایە خەلکی، ئانکو نێزیکی 25 ملیاران مە داینە خەلکی و یێ بۆ مە ڤەگەریایی نێزیکی چوار ملیاران بوویە، ل رێکەفتی 3/4/2016 ل دووڤ بریارا حوکمەتا ھەرێما کوردستانێ و پشتی تێکچوونا کاودانێن دارایی و ئابووری ل کوردستانێ مە چو پارە ژ کەسەکێ نە وەرگرتینە و مە نەدایە کەسەکێ ژی ھەتا 3/4/2018 بریار دەرکەفتیە پارەی ژ خەلکی وەربگرین و ئەگەر نەدەت دێ پرۆژە ھێتە ھەلوەشاندن و دێ ژ کەفیلێ وی ھێنە برین.
ھێشتا گۆت: ھەتا نوکە 230 پرۆژان کێشە یا ل سەر و ل ژڤانێ خوە پارە نەدایە و بووینە کێشە و نەچار بووینە پارەی ژ کەفیلێن وا ب برین، ھەکە پرۆژە ھاتبیتە ھەلوەشاندن دڤێت ئەوێن وەرگرتی پارەی سەر ئێک بزڤریت و ئەگەر نەشێت بزڤریت دێ بۆ کەینە چەند قست و ھەر نەشیا دێ ژ کەفیلی ھێتە برین و کەفیل ژی ب چ رەنگان نەشێت خوە قورتال بکەت، چونکو بوویە کەفیل دا پاران پێشڤە بدەت و ھەتا نوکە دو حالەت چووینە دادگەھێ ئێک ئامێدی و ئێک دھۆک.
ھێشتا گۆت: پتر کور مفادار بووینە ژ پرۆژێن قەرزێ بچووک و ھەتا نوکە 152 کچان کەسان قەرزێن بچووک وەرگرتینە، 2194 کوران پرۆژی مفادار بووینە سەرانسەری پارێزگەھێ و پتر کچ مفادار بووینە و پتر وەرگرتنا پارەی بۆ ڤەکرنا جوانکاریێن ئافرەتان و درینگەھێن جلکان بووینە، ل دووڤ پرۆژەی پارە بۆ دھێتەدان و ژ 15 ملیۆن دیناران نابوریت، ئەڤە ژ 3/4/2016 پارە راوستاینە، لێ مە خواستیە بدەینە خەلکی ڤە ب مەرجەکی ژ خەلکی وەربگرین و بدەینە خەلکەکێ دی، نوکە مە پتر ژ چوار ملیاران ل بانکێ ھەنە و سیولە نینە و حوکمەت نەشێت بدەت و ئەگەر نەشێین بدەینە ھندەکێن دی مە خواستیە سالەکا دی ژی بھێنە راوستاندن.
ھێشتا گۆت: ھەر کەسەکێ پارەی وەربگریت دڤێت پێنچ سال و نیڤان ئەوی پارەی ڤەگەرینیت و ھەر کەسەکێ وەرگرت بیت دشێت جارەکا دی ژی وەربگریت و ئەڤ پرۆژە بۆ کارانە و ل دووڤ رێنمایان ژ 16 سالان کێمتر نەبیت و ژ 35 سالان زێدەتر نەبیت، ئاکنجیێ ھەرێمێ بیت و نە فەرمانبەر و نە قوتابی بیت و بێ کاربیت و ھەر رێنمایێن بەرێ نە و ئەڤ پرۆژە بۆ ھەموو تشتی دروست بیت ب تنێ بۆ کرینا ترۆمبێلێ و دروستکرنا خانی و پرۆژێن چاندنێ ناگریت.
ھێشتا گۆت: ھەتا نوکە 66 فایل رازیبوون ھاتیە و پارە ھاتیە دیارکرن و ئەگەر پرۆژە و دانا قەرزان بھێتەڤکرن دێ پتر دەسپێکی بۆ ئەڤان 66 فایلان بیت، ھەکە پرۆژە نەھاتبیتە ھەلوەشاندن و پارە ژ کەفیلی بھێتە برین دشێن سەرەدانا مە بکەن دێ ھاریکاریێ بۆ کەین.
بەرپرسێ پرۆژێ قەرزێن بچووک گۆت: ژ نەدانا قەرزێن خوە ئاریشێن جڤاکی دروست بووینە پارێ خوە نەدایە یان چوویە دەرڤە و برا یان جیران یان مرۆڤێ وی ددەتن و کێشە دروست بووینە.
ھێشتا گۆت: پتریا گەنجێن مفادار یێن دھۆک بووینە 1413 گەنج ژ دھۆک بووینە 321 زاخۆ 228 ئامێدی 364 ئاکرێ بووینە، 1312 پرۆژە بازرگانی 299 پێشەسازی نە، 628 خزمەت گوزاری نە، 80چاندن، 11 گەشت و گوزار بووینە، 16 جۆرە و جۆر بووینە و 860 پرۆژە ژی ھاتینە رەتکرن و ئاریشە ل سەر ھەبووینە و ھاتینە رەتکرن.
ئه‌ڤرۆ نيوز:
بەری دو رۆژان تەرمێ ژنەکێ ل نێزیک باژێڕێ ھەولێرێ ھاتە دیتن و د تۆڕێن جڤاکی دا زێدەتر کارڤەدان لدووڤ ھاتن و پەیڤدارێ پۆلیسێن ھەولێرێ ژی دیار کر کو ئەڤ ژنە ژلایێ برایێ وێڤە ھاتیە کوشتن و تەرمێ وێ ھاتیە ھاڤێتن، چالاکڤانەکا بیاڤێ ژنان ژی گۆت: تەرمێ ھەشت ژنان ل پەیمانگەھا نۆشداریە و کەس یێ بەرھەڤ نینە تەرمێ وان وەربگریت.
چالاکڤان د بیاڤێ ژنان دا بەھرە حەمە رەش، بۆ رۆژناما ئەڤرۆ دیار کر کو،ئەڤ قەیرانا سیاسی یا نوکە ل ھەرێما کوردستانێ ھەی کاریگەری ل سەر زۆر پرسێن دی کریە ئێک ژ وانا پرسا توندوتیژیێ یە ل ھەمبەر ژنان و گۆت:پۆلیس و لایەنێن پەیوەندیدار ل ڤێ دووماھیێ زۆر گرنگیێ ب پرسا کوشتنا ژنان و توندوتیژیێ نادەن وەکی بەرێ.
بەھرەیێ د بەردەوامیا ئاخفتنێن خوە دا گۆت: مخابن وەک پێدڤی کار بۆ ڤێ مەرەمێ ناھێتە کرن، ئەڤە تەرمێ ژنەکا دیتر ژی ھاتە دیتن کو ب دەستێ زەلامی ھاتیە کوشتن و تۆڕێن جڤاکی پێڤە مژوول بۆینە، ھەکە ئەڤ حالەتێن بەرێ یێن کوشتنا ژنان ھاتبانە سزادان دبیت ئەڤا نوکە چێبوی روو نەدابا، لەوڕا ژی پرسێن سیاسی کاریگەری ل سەر بلندبوونا توندوتیژیێ ل ھەمبەر ژنان ھەبویە و ئەگەرێن جورا و جورژی ھەنە بۆ کوشتنا ژنان.
بەھرەیێ ئەو چەندە ژی نە ڤەشارت و دا زانین کو،ل ئەڤان سێ ھەیڤێن دووماھیێ نێزیکی ھەشت ژنان ھاتینە کوشتن ئەڤە ژی رێژەکا زۆرە و مەترسیدارە، نوکە ئەم یێ ل گەل کۆمەکا چالاکڤانێن د بیاڤێ ژنان دا کار دکەین بۆ کێمکرنا حالەتێن کوشتنا ژنان و گۆت: بدیتنا من حوکمەت بەرپرسا ئێکێ یە ژ کوشتنا ژنان، ھەروەسا جڤاک و کۆمەلا مەدەنی بتایبەت بەرپرسن ل ھەمبەر زێدەبوونا توندوتیژیێ.
ئەڤێ چالاکڤانا ژنان گۆتژی: پێشبینی دھێتە کرن ئەڤ سالە ئامارا توندوتیژیا ل ھەمبەر ژنان بلند ببیت و ژ سالا بۆری زێدەتر لێ بھێت، ئەڤە د دەمەکی دایە کو نابیت پرسێن سیاسی کاریگەری ل سەر لێپرسینا ل گەل تۆمەتبارێن کوشتنا ژنان ھەبیت.
بەھرە زێدەرتر دبێژیت: دەمێ ژنەک دھێتە کوشتن و تەرمێ وێ دھێتە ھاڤێتن بۆ جھەکی بێگومان دەزگەھێن ئەمنی یێن ھەرێما کوردستانێ زۆر بھێزن و دکارن بکوژێن ژنان ب ساناھی دەستەسەر بکەن، بەلێ بۆچی ناگرن ئەڤە جھێ پرسیارێ یە بۆ مە؟ چونکی ئەم یێ دبینین تیرۆرست چەند بھێزن نکارن ل ھەرێما کوردستانێ چالاکیان بکەن، ئەڤە ژی نیشانا وێ چەندێ یە کو دەزگەھێن ئەمنی بھێزن و شیانێن کۆنتڕۆلکرنا رەوشێ ھەنە، ئەڤجا یا فەرە ب ھەمان شێوە بکۆژێن ژنان ژی بھێنە دەستەسەر کرن.
بەھرە حەمە رەش ئەو چەندە ژی ئاشکرا کر کو، نوکە تەرمێ ھەشت ژنان ل پەیمانگەھا نۆشداریە و کەس یێ بەرھەڤ نینە ئەڤان تەرمان وەربگریت و ھەکە کوشتنا ژنان بڤی شێوەیێ نوکە یا بەردەوام بیت دێ کاریگەریێن خراب ل سەر جڤاکی ھەبن، ھەتا دێ کاریگەری ل سەر رەوشا ھەرێما کوردستانێ بگشتی ھەبیت و گۆت: ب باوەریا من دڤێت حوکمەت بخوە دەست ب لێپرسینێ بکەت و رێکێ نەدەت ب ساناھی کەسێن تۆمەتبار ب کوشتنا ژنان دەرباز ببن و دڤێت بھێنە دەستەسەر کرن.
ئەڤرۆ نيوز:
کۆمپانیا گەنەل ئینێرجی یا تورکی راگەھاندیە،کو وان پلان ھەیە ل ھاڤینا ئەڤ سالە دا،دەرئینانا پترۆلێ ل زەڤیێن پترۆلا پێشابیرێ ژ 15 ھزار بەرمیلان بۆ 30 ھزار بەرمیلان رۆژانە زێدە بکەت.
کۆمپانیا گەنەل ئینێرجی یا تورکی د وێ راگەھاندنێدا کو ل 17 گولانێ بەلاڤکریە، ئاماژە ب ھندێ دایە کو وان ل گەل کۆمپانیا DNO یا نەرویجی پلان ھەیە ل زەڤیێن پیشابیرێ ل سنوورێ زاخۆ،ھەتاکو دەستپێکا ھاڤینا ئەڤ سالە رۆژانە ئەو دێ بەرھەمئینانا پترۆلێ ژ زەڤیێن پێشابیرێ زێدە کە‌ن ژ 15 ھزار بەرمیلان بۆ 30 ھزار بەرمیلان.
ستیڤن وایت، سەرۆکێ گەنەل ئینێرجی بۆ مالپە‌رێ گەنەل ئینێرجی گۆتیە، کۆلان و لێدانا سێ بیران ژ وان شەش بیرێن پترۆلێ،کو پلانا کۆمپانیێ بوو بۆ زێدەکرنا ئاستێ دەرخستنا پترۆلێ تەمامبوویە و کار بۆ تەمامکرنا سێ بیرێن دیتر دکەن. ئەڤ زێدەکرنە ژ بە‌رھە‌مئیناننا پترۆلێ ڤەدگەریت بۆ ئیمزاگرنا رێککە‌فتنەکێ ل گەل وەزارەتا سامانێن سروشتی یێن حوکمەتا ھەرێمێ بۆ دەرئینانا پترۆلێ ل زەڤیێن ھەرێما کوردستانێ کو ئەڤ رێککەفتنە بۆ ماوێ ٥ سالان و ژ ١/٨/٢٠١٧ ھەتا ٣١ / ٧ / ٢٠٢٢ ڤەدکێشیت. کۆمپانیا گەنەل ئێنێرجی کۆمپانیەکە نیڤەک تورکی نیڤەک بریتانیە و ماوێ چەندین سالانە ل ھەرێما کوردستانێ کار دکەت کارێ لێگەرین و کولان و دەرخستنا پترۆلێ دکەت،ئەڤ کۆمپانیە خودانا 25% یا پشکێن دەرئینانا پترۆلێ یە ل ھەردوو زەڤیێن تاوکێ و پیشخابوورە ل گەل کۆمپانیا DNO یا نەرویجی،کو خودانا 55% یا قازانجێ پشکێن بلۆکێن تەوکێ و پێشابیرێ.
ئەڤرۆ نيوز:
لیژنا فەتوایێ ل ھەرێما کوردستانێ راگەھاند کو ئەو قوتابیێن ل دەمێ ئەنجامدانا ئەزموونان شیانێن رۆژیگرتنێ نەبن و وەسا دبینن ژ بەر رۆژیگرتنێ نەشێن ئەزمونێن خوە ئەنجام بدەن بۆ وان دروستە ب رۆژی نەبن.
لیژنا فەتوایێ دیارکریە، دڤێت قوتابی ب شەڤ ئنیەتێ بنیت و پاشیڤێ ژی بخۆت و ب رۆژی بیت ھندی شیان ھەبیت یێ ل سەر گرتنا رۆژیێ بەردەوام بیت و دووڤ دا ھەکە شیانێن گرتنا رۆژیێ نەمان رۆژیا خوە بشکێنیت.
نيشاندان