ئەڤرۆ نيوز:
پشتی دەمژمێر 6 ئێڤاری یا رۆژا 12/5 دەرئەنجامێن دەنگدانێ ل سیڵمانیێ ھاتینە بەلاڤکرن، ب سەرکەفتنەکا مەزن ژ ئالیێ حزبا ئێکەتی نیشتیمانی کوردستان، ھێزەکا حزبا ناڤبری ب چەکەکێ قورس و سەڤک ھێرش کرنە سەر بارەگایێ سەرەکی یێ بزاڤا گۆڕان ل گردێ زەرتەک، پشتی داخوزا پاستنێ ژ حوکمەتا ھەرێمێ خوساتی گۆڕان داخواز ژ لایەنگرێن خوە کرن، بچنە گرێ ناڤبری و مەزارگەھێ نەوشیروان موستەفای ب پارێزن، دھەمان دەمدا بزاڤێن دروستکرنا ھێزەکا چەداری دناڤا وێ حزبێ دا پەیدا بوویە.
عەبدوللا کۆیخا موبارەک ئەندامێ جڤاتا گشتی یا بزڤا گۆڕان بۆ رۆژناما ئەڤرۆ راگەھاند، ئەز بخوە ھەردەم ل گەل وێ ئێکێ بووم، مە وەک گۆڕان ھێزەکا چەکداری ھەبیت، بو ھەر رەوشا نەخوازیار و نەقانوونی ئەم روو ب روو ببین، بەلێ ھەتا نوکە ئەم نەشیاینە وێ باوەری بۆ بزڤا گۆران پەیدا بکەم، وێ ھێزا چەکداری دروست بکەم.
عەبدوللا کۆیخا ھەروەسا گۆت: پشتی ھێرشا ئێکەتیێ بۆ سەر بارەگایێ سەرەکی یێ گۆڕان ل سلێمانیێ، دناڤ گۆڕان و دەزگەھێن وێ ئەو بیروکە یا بەلاڤ بووی و زێدەبوویە بۆ دروستکرنا ھێزەکا چەکداری، بەلێً ئەو بڕیارە بتنێ دکونگرەکێ تایبەت دا دەنگ ل سەر بھێتە دان نە بتنێ کەسێ ئێکێ و دوێ ل سەر رازی ببن.
ئەندامێ جڤاتا گشتی یا گۆڕان خوەیاکر، ھێزا چەکداریا گۆڕان وەکی ھێزێن 70 و 80 یێن پارتی و ئێکەتیێ نابن، دێ ئەو ھێزا چەکداری بیت یا لایەنگرێن گۆڕان بن دناڤا ھێزا پێشمەرگەی بھێنە رێکخستن ل گەل وان ئەندام و لایەنگرێن مە ھەی کونتاتەکا راستەوخوە مە ل گەل ھەبیت بۆ ھەر ئەرکەکێ پێدڤی بشێن بەرەڤانیێ ل گۆڕان بکەن.
ژئالیێ دی ڤە، سەرۆکێ ناڤەندا چاڤێ کوردان بۆ پێشڤەبرنا سیاسی مەشخەل کەوڵۆسی دبێژیت، ئەز باوەرنا کەم گۆڕان ھێزەکا چەکداری دروست بکەت، ئەو دەنگێن نوکە بتنێ دەرئەنجامێ دەروونی یە دروست بووی، کو باسکەکێ دناڤا حزبا گۆڕانێ دایە کو ب زووترین دەم بگەھنە دەستھەلاتێ و شکاندنا کەسێن بەرامبەری خوە ببینن و ژمارەکا ڤاڤارتنێن کەڤن و نوو ل کەل کومەکا نەیارێن سیاسی یێن خوە بکەن، نەک ستراتیژیا بزاڤا گۆڕان بیت.
مەشخەل کەوڵۆسی ھەروەسا گۆت: بزاڤا گۆڕان ل گۆپیتکا پێشڤەچوونا خوە دا ل سالا 2009 ھەتا 2010 دەست بۆ چەکی نەبرن، دیسان رەوشا ناڤخوە و کوردستانێ و دەرڤە ژی بۆ گۆڕان یا بەرھەڤ نینە ھێزەکا چەکداری دروست بکەت.
سەرۆکێ رێکخراوا ناڤبری ھەروەسا گۆت: ھەکە گۆڕان ھێزەکا چەکداری دروست بکەت، وی دەمی ئێمناھیا نیشتیمانی و جڤاکی ژی دێ تێکچیت، دیسان لادانە ژ پەیرەوێ نەوشیروان موستەفای رێکخەرێ بەرێ یێ بزاڤا گۆڕان، کو ل سەر وی سیستەمی ھاتیە ئاڤاکرن، لەوڕا ئەز باوەرناکەم چو سەرکردێن بزاڤا گۆڕان ئەو وێرەکی ھەبیت خوە ژ پەیرەوێ نەوشیروان لا بدەت و گوھۆڕینان د نەخشێ سیاسی یێ کوردستانێ دا بکەت.
نيشاندان
