ئه‌ڤرۆ:
بەھرام قاسمی پەیڤدارێ وەزارەتا دەرڤە یا ئیرانێ راگەھاند کو ئەمریکا بێی ئیرانێ نەشێت پرسێن ل رۆژھەلاتا ناڤین چارە بکەت، ترامپ نھا خوە توند کریە و دخوازیت ئیران ل ھەمبەر ھندەک دخوازیێن ئەمریکا نەرم بیت و گۆت: (د سیاسەتێ دا نەرمی و توندی پێکڤە دھێنە برێڤەبرن و رەنگە سبێدێ ترامپ داخوازا دانوستاندنان ژ مە بکەت، چونکو ئەو ژی باش دزانن بێی ئیرانێ نەشێن پرسێن ل رۆژھەلاتا ناڤین چارە بکەن و بەری نھا ژی مە دیارکریە کو ئیران فاکتەرێ چارەسەریێ یە، لێ دڤێت ترامپ دەستان ژ ھەلویستێ خوە یێ توند بەردەت).

ئه‌ڤرۆ نيوز:

مالپەرێ دیبکا یێ ئیسرائیلی ئاشکراکر کو سەرکردێن سەربازی یێن ئەمریکی و ئیسرائیلێ ب شێوەیەکێ نھێنی ل واشنتۆنا پایتەختێ ئەمریکا ل رۆژا 29-6-2018 کۆم بووینە و پیلانەک بۆ لێدانا ئیرانێ بەرھەڤ کرینە.

مالپەرێ دیبکا یێ ئیسرائیلی ئاگاھییان ژ ژێدەرێن سەربازی و ھەوالگیریێ یێن ئیسرائیلی وەردگریت، ئەو پیلان ل ژێر ناڤێ پرۆژەیێ ئیرانێ ھاتیە بەرھەڤکرن، کو یا ھەڤدەمە د گەل ھەوا ئەمریکا ل دژی ئیرانێ و دژواربوونا پێشبینیێن دروستبوونا شەرەکی د ناڤبەرا ئیرانێ و ئیسرائیلێ دا.

پێشتر میدیایێن ئیسرایلی ئاشکرا کربوون، جەنەرال نەتران ئەلۆن، فەرماندارێ ئۆپەراسیۆنان ل سوپایێ ئیسرائیلێ ب فەرمانا جەنەرال گادی ئیزنکۆت، سوپاسالارێ ئیسرائیلێ ڤە بۆ وی پرۆژەی ھاتیە دامەرزاندن، نەتران ئەلۆن ژی د گەل جۆزێف دانفۆرد، سەرۆک ئەرکانێن سوپایێ ئەمریکا ل دۆر وێ یەکێ کۆمبوون کرینە.

مالپەرێ دیبکا ئاشکرا ژی کر د کۆمبوونێن سەرکردێن ئەمریکا و ئیسرائیلێ دا ل سەر پێکئینانا چار فەرماندارییان بۆ پرۆژەیێ ئیرانێ رێککەفتینە، ژ وان فەرمانداریا ئەتۆمی کو ئەرکێ وێ دەستنیشانکرنا بنگەھێن ئەتۆمی و ھەر بنگەھەکێ گرێدای وی بەرنامەی نە.

گرۆپێ دویێ ژی دێ بنگەھێن مۆشەکێن بالستی یێن ئیرانێ دەستنیشان کەت ژ وان بنگەھێن ھاڤێتنێ و عۆمبارێن ژێر ئەردی و کارگەھێن چێکرنێ و بنگەھێن لێکۆلینان، ئەرکێ گرۆپێ سیێ ژی ئۆپەراسیۆنێن سەربازی یێن نھێنی و ئاشکرا دژی بنگەھێن سەربازی و ھەالگیری یێن ئیرانی بیت ل رۆژھەلاتا ناڤین و ل سوورێی و لوبنان و یەمەنێ.

گرۆپێ چارێ ژی دێ چاڤدێریا سزایێن ئابۆری ل سەر ئیرانێ کەت و ئیسرائیل دێ یا ھاریکار بیت بۆ کۆمڤەکرنا زانیاریێن ھەوالگیری ل سەر بزاڤێن ئیرانێ بۆ شکاندنا دۆرپێچێ، وەکو ژێدەرێن ھەوالگیری و سەربازی یێن ئیسرائیلی دیار دکەن.