ئەڤرۆ نيوز:

ئەندامێ جڤاتا نوونەرێن عیراقێ یێ بەرێ، عەلی ئەلبەدری راگەھاند، بزاڤێن ھێزێن سیاسی یێن سوننی ل کومبوونا ستەنبۆلێ ھاتیە ئەنجامدان، کو ھەر ئێک ژ سەلیم جبوری و حمال کەربۆلی و پارێزگەھێ سەلاحەددین ئەحمەد جبوری، بزاڤەکە بۆ پەیداکرنا تائفەرگەریێ ب ئێک بازنەدا، و مەرەم ژێ سلێم جبوری یە کو بیتە سەرۆک پەرلەمان.

عەلی ئەلبەدری ھەروەسا گۆت: کومبوون بۆ رێکخستنا ھەڤسەنگی ھاتیە و ڤەگەراندنا سەلیم جبوری بۆ پۆستێ سەرۆکێ جڤاتا نوونەرێن عیراقێ، ھەر چەندە لیستێن سوننی بەری ھەلبژارتنان پەرلەمانی دگۆتن ئەو دێ ھەڤپەیمانیەکێ چێکەن سنۆرێن تائیفەرگەی دەرباز بکەت، بەلێ پشتی سەرکفتنان جارەکا دیتر ڤەگەریان بۆ ھەمان قەوانا تائیفەگەری و کومبوونا ستەنبۆلێ بتنێ بەحسێ مافێن سوننیا ھاتینە کرن.
ژئالیەکێ دیتر ڤە، تەلال زوبەعی ئاشکراکر، کومبوونا ھێز و ئالیێن سوننی ل تورکیا، ب سەرپەرشتیا قەتەرێ، بتنێ بۆ دەستنیشان کرنا کەسەکێ بۆ پۆستێ سەرۆک پەرلەمانی بوویە.

تەلال الزوبەعی خوەیاکر، میحوەرێ قەتەر و تورکیا کو ب سەرپەرشتیا کومبوونێ رابووینە، پتر نێزیکی میحوەرێ وەلاتێ ئیرانێ یە، بەرامبەری میحوەرێ سعودیێ و ئیمارات، دووپاتکر، ھەڤڕکی دناڤبەرا ئوسامە نوجیفی و سەلیم جبوری و محەمەد ئەلحلبوسی و محەمەد تەمیمی ل سەر پۆستێ سەرۆک پەرلەمانی ھەیە.

ناڤبری ھەروەسا ئاشکراکر، پۆستێ سەَوکێ پەرلەمانی ل گۆڕ پێشبینا زوبەعی، دبیت بەھرا پارێزگەھا ئەنبار یان سەلاحەددین یان کەرکووک بین، بەلێ ئەو پۆستە ناھێتە دان بۆ سونیێن بەغدا، جونکو ل گۆڕ گۆتنا وی عورفێ سیاسی ل سالا 2010 پەیدابوویە کو ھێزێن سوننی ل بەغدا کەمینەنە و نلبیت پۆستێ سەرۆک پەرلەمانی ب وان بھێتە راسپاردن یان ھەر وەزارەتەکا دیتر یا گرنگ بیت.

ل گۆڕ پێزانینێن رۆژناما شەرق ئەلئەوسەت، سەرۆکێ پەرلەمانی یێ ژکار کەفتی سەلیم جبوری بەری حەفتیا بۆری ل گەل مەزنە بەرپرسێن سوننی جەمال کەربۆلی سەرکردێ حزبا ئەلحەل و ئەحمەد عەبدوللا ئەلجبوری پارێزگەھێ سەلاحەددین و خەمیس ئەلخەنجەر خودانێ پرۆژێ ئەلعەرەبی و سەعد ئەلبزاز راگەھاندکار و سیاسی بەرنیاس خودانێ کەنالێ ئەلشەرقیە، ل تورکیا بوون.

د ھەمان بیاڤی سوننی دا، ئەمیندارێ حزبا (ئەلحەل) محەمەد کەربۆلێ ئەو دەنگۆباس ھەموو رەتکرن، کو میحورەکێ سوننی بناڤێ (میحوەرێ نشتیمانی) ب سەرۆکاتیا خەمیس خەنجەری ل تورکیا دناڤبەرا ئالیێن سونی دا ھاتیبتە پێکئینان.

کەربۆلی د بەیاننامەکێ دا دیار کر، کومبوونا سەرکردێن سوننی بۆ تێکگەھشتنەکێ بۆ نەک دانوستاندن ل سەر پێکئینانا ھەڤپەیمانیەکێ ببوویە کو ھەتا نوکە ل چو جھان دیار نینە، ھەروەسا دووپاتکر، چو دانوستاندن ل سەر سەرۆکاتیا ھەڤپەیمانیێ و بەلاڤکرنا وەزارەتان ژی نینە، ئەو کومبوون بتنێ ھندەک لێک تێگەھشتنبوون کو ناگەھنە ئاستێ دانوستاندنان.

ئه‌ڤرۆ نيوز:

سەرۆکێ بەرێ یێ فڕاکسیۆنا پارتی ل پەرلەمانێ عیراقێ ئەشکرەکر، ھەتا نوکە چو رێکەفتن دناڤبەرا پارتی و لایەنێن عیراقی بۆ پێکئینانا حوکمەتا نوویا عێراقێ نەھاتینەکرن و دیارکر، پارتی و سەرۆک بارزانی دێ رۆل ھەبیت ل دیارکرنا سەرۆک وەزیرێن داھاتیێ عیراقێ و ئەف زۆرینەیا دخواست کوردان لاواز بکەت شکست ئینا.

دکتۆر عەرەفات کەرەم سەرۆکێ بەرێ یێ فڕاکسیۆنا پارتی ل پەرلەمانێ عیراقێ بۆ رۆژناما ئەڤرۆ گۆت: بەری نوکە مە چەندین بزاف کرن داکو رەوشا عیراقێ وەکی بەرێ ڤەگەڕیت، بەلێ مخابن پشتی رەوش ب تەمامی ئالۆز بوی نوکە ل بەغدا کار یێ دھێتەکرن، رەوش بھێتە وەکی بەری سالا2014ێ بھێتە ئاسایکرن، ھەموو بابەت ل گورەی تەوافووق و رێککەفتن بڕێڤەبچن، بەلێ ھەتا نوکە مە وەک پارتی دیموکراتی کوردستان ل گەل چو لایەنەکێ عیراقێ رێککەفتن لدۆر چو پرسەکێ نەکریە، چونکو بڕیارە ل گەل ئێکەتیێ ب پلان و بەرنامەکێ ھەڤپشک بچینە بەغدا، بەرێ سەرکردەیێن عیراقی دگوتنە مە بەغدا یا بویە حەجا ھەوە ھندی شاندێن ھەرێمێ سەرەدانا باژێڕێ بەغدا دکەن، سوپاس بۆ خودێ نوکە ھەولێر یا بویە حەجا لایەنێن عیراقی و چەندین شاندێن وان ھاتینە ھەرێما کوردستانێ ب مەرەما رێککەفتنێ ل گەل لایەنێن کوردی، نوکە ھەولێر چاوا بەرێ بنگەھێ رێککەفتنا لایەنێن عیراقێ بوویە نوکە ژی ھەمان شێوە ھەولێر دبیتە سەنتەرێ پێکئینانا حوکمەتا عیراقێ.

دکتۆر عەرەفات کەرەم گۆت: پارتی شیایە شتکستێ ب پڕۆژێ عێراقا زۆرینە بینیت، یاکو ھندەک لایەنێن عیراقی دخواست ولاتێ عیراقێ تنێ ببیتە جھێ دەستھەلاتا لایەنەکی و ھەموو پێکھاتەیێن دی بھێنە پشتگۆھاڤێتن، بەلێ نوکە ھەموو لایەنێن عیراقی گەھشتینە ئەڤێ باوەریێ حوکمەتا زۆرینە یا سەرکەفتی نابیت، بتایبەتی پارتی دیموکراتی کوردستان و سەرۆک بارزانی دێ رۆلەکێ بەرچاف ل پێکئینانا کابینا نوویا حوکمەتا عیراقێ و دیارکرنا کەسەکی بۆ پۆستێ سەرۆک وەزیران ھەبیت، ل گەل ڤێ چەندێ ژی پارتی خەتا سۆر ل سەر چو کەس و لایەنەکی نینە بۆ پێکئینانا حوکمەتێ و دێ ھەموو بزاڤێ کەین ل گەل وی لایەنی بگەھینە رێککەفتنێ یێ داخوازیێن کوردان و ھەرێما کوردستانێ ب جھبینیت.