ئه‌ڤرۆنيوز:

سه‌رۆك مه‌سعود بارزانى، ئه‌ڤرۆ شه‌مبيێ 7/7/2018 پێشوازى ل شانده‌كێ هه‌ڤپشكى دانوستاندكار يێ هه‌ردو ليستێن فه‌تح وده‌وله‌تا قانوونێ كر.

دديداره‌كێ دا شاندێ مێهڤان زێده‌بارى ئاماژه‌دان ب رۆل وپێگه‌هێ سه‌رۆك بارزانى دئاڤه‌دانكرنا عيراقێ دا هه‌روه‌سا ئێش وئازار وقوربانيدانا ده‌هان سالان يا گه‌لێ كوردستانێ، دووپاتى ل په‌يوه‌نديێن ديرۆكى دناڤبه‌را گه‌لێ كوردستانێ وهيزێن عيراقى وقوربانيدانا هه‌ڤپشك ژى ديكتاتۆريه‌تێ كر وداخواز كر كو ل عيراقێ هه‌موو لايه‌م پێكڤه‌ قۆناغه‌كا نوو ده‌ست پێ بكه‌ن وشاشيێن بۆرى دوباره‌ نه‌كه‌نه‌ڤه‌ ول پێناڤى گه‌هشتن ب سه‌قامگيريێ وهه‌ڤپشكيا راسته‌قينه‌ ته‌حه‌دياتێن سياسى يێن نوكه‌ ده‌ربازبكه‌ن وبه‌رچاڤكر ژى كو بێ سازان وهه‌ڤپشكيا راسته‌قينه‌ دشيان دا نينه‌ پرۆسا سياسى ب رێڤه‌بچيت وچو ده‌ستكه‌فته‌ك بۆ چو لايه‌نه‌كى بده‌ستڤه ‌ناهێت.

شاندێ مێهڤان ديتن وبۆچوونا سياسى يا ليستێن فه‌تح وده‌وله‌تا قانوونێ بۆ سه‌رۆك بارزانى شرۆڤه‌كر ورۆناهى خسته‌ سه‌ر بۆچوونێن هه‌ردو ليستان بۆ پێكئينانا هه‌ڤپه‌يمانيا مه‌زن د په‌رله‌مانێ عيراقێ دا ونڤيسينا پرۆگرامێ ب رێڤه‌برنا وه‌لاتى ل قۆناغا داهاتى.

د وێ كۆمبوونێ دا، بيرا ورا ل دۆر بجهئينانا دستوورى هاتن ئالوگوركرن وهه‌ردو لا ل سه‌ر وێ چه‌ندێ دهه‌ڤرا بوون كو پێدڤيه‌ په‌يوه‌نديێن ديرۆكى وبجهئينانا دستوورى وهه‌وروه‌سا لۆژيك وعه‌قلانيه‌ت ببيته‌ هێڤێنێ پرۆسا سياسى وپرنسيبێن هه‌ڤپشكيێ وسازانێ وهه‌ڤسه‌نگيێ دپرۆسا سياسى دا بهێته‌ په‌يره‌وكرن ول بن رۆناهيا وان هه‌رسێ پرنسيبان، هه‌ڤپه‌يمانيا مه‌زن يا په‌رله‌مانى بهێته‌ دامه‌زراندن وحوكمه‌تا نوو بهێته‌ پێكئينان وپێدڤيه‌ ژى هه‌موو لايه‌م بۆ وان مه‌نهه‌ج وبنه‌ما بزڤرن كو ل پشتى 2003 عيراقا نوو ل سه‌ر هاتيه‌ ئاڤاكرن.

ئه‌ڤرۆ نيوز، فاتما مزوورى:

دادگه‌ها سزايێن گران ب هێجه‌تا كو “ئه‌ندامێ رێكخستنێ” بوويه‌ و “پرۆپاگندا رێكخستنێ” كريه‌، 10 سال و 15 رۆژان سزا خسته‌ سه‌ر هه‌ڤسه‌رۆكێ باژێرڤانيا سێرتێ تونجه‌ر باكرهان.

هه‌ڤسه‌رۆكێ باژێرڤانيا سێرتێ يێ باكوورێ كوردستانێ تونجه‌ر باكرهان 30ى ئادارا 2014ێ ببوو سه‌رۆكێ باژێرڤانيێ، به‌لێ ل 2016ێ ژ لايێ پۆليسێن توركيا ڤه‌ هاته‌ گرتن.

پاشان هه‌ر ئێكسه‌ر حوكمه‌تا توركيا قه‌يومه‌ك دانا جهێ وى و ژ ده‌ستێ پارتيا هه‌رێمێن ديموكراتيك ده‌رخست.

كێشا باكرهان رۆژا ئه‌ينى 6ى تيرمه‌ها 2018ێ ل دادگه‌ها سزايێن گران 2 هاته‌ ديتن.

ئه‌ڤرۆنيوز:

سكرتێرا مه‌كته‌با سياسى يا پارتى ديموكراتى كوردستان، فازل ميرانى، راگه‌هاند كۆمبوونا هه‌ردو شاندێن هه‌ڤپه‌يمانيا فه‌تح وده‌وله‌تا قانوونێ ل گه‌ل پارتى ديموكراتى كوردستان، ئه‌ڤرۆ شه‌مبيێ، پێنگاڤه‌كا باش وئه‌رێنى بوو.

شانده‌كێ هه‌ڤپه‌يمانيا فه‌تح وئێكێ ده‌وله‌تا قانوونێ گه‌هشتبوونه‌ هه‌رێما كوردستانێ ب مه‌ره‌ما ئه‌نجامدانا دانوستاندنان ل دۆر پێكئينانا حوكمه‌تا عيراقى يا داهاتى ورۆلێ وپشكداريا كوردان تێدا.

فازل ميرانى، سكرتێرێ مه‌كته‌با سياسى يا پارتى، بۆ رۆژنامه‌ڤانان گۆت” هه‌ردو شاندان بۆچوونێن خوه‌ ل دۆر پێكئينانا فراكسيۆنا مه‌زن ل په‌رله‌مانێ عيراقێ ژ شيعه‌ وسونه‌ وكوردان وچو ڤيتۆ ل سه‌ر كه‌سێ نين، به‌رنامه‌كێ حكومى يا هه‌مه‌لايه‌نى دڤێت وئه‌ڤه‌ خالا هه‌ڤپشك بوو دناڤبه‌را مه‌ ووان دا”.

ميرانى گۆت ژى” دشيان دا نينه‌ بريار بهێته‌ دان به‌رى په‌سه‌ندكرنا ئه‌نجامێن هه‌لبژارتنان ب شێوه‌كێ رۆهنتر، به‌لێ ده‌ستپێكه‌ك يا هه‌ى ودێ دانوستاندن ل دۆر كه‌ين”.

دياركر” ئه‌و شاند دێ سه‌ره‌دانا سلێمانيێ ژى كه‌ن بۆ كۆمبوونێ ل گه‌ل لايه‌نێن سياسى يێن دى، هنده‌ك شاندێن دى ژى ژ به‌غدا دێ هێنه‌ هه‌ولێرێ”.

ئاماژه‌ دا” ئه‌و نا خوازن عيراق به‌ر ب ڤالاهيا دستوورى وده‌زگه‌هى بچيت”.

ئه‌ڤرۆنيوز:

ئه‌ڤرۆ شه‌مبيێ 7/7/2018 ب سه‌رپه‌رشتيا سه‌رۆك مه‌سعود بارزانى، كۆمبوونا جڤاتا سه‌ركردايه‌تيا پارتى ديموكراتى كوردستان هاته‌ ئه‌نجامدان.

پشتى كۆمبوونێ، مه‌حموود محه‌مه‌د، په‌يڤدارێ پارتى ديموكراتى كوردستان دكۆنگره‌كێ رۆژنامه‌ڤانى دا گۆت” دكۆمبوونا جڤاتا سه‌ركردايه‌تيێ دا، ره‌وشا نوكه‌ يا كوردستانێ وهه‌لبژارتنێن په‌رله‌مانێ عيراقێ وهه‌لبژارتنێن داهاتى يێن په‌رله‌مانێ كوردستانێ كو برياره‌ ل 30/9/2018 بهێنه‌ ئه‌نجامدان ته‌وه‌رين كۆمبوونێ بوون”.

گۆت ژى” دكۆمبوونێ دا په‌يوه‌نديا پارتى ل گه‌ل لايه‌نێن ده‌رڤه‌ دانوستاندن ل سه‌ر هاته‌ كرن، ژبلى وێ چه‌ندێ دناڤخوه‌يا حزبێ دا ڤالاتيه‌ك ل مه‌كته‌با سياسى هه‌بوو كو عارف ته‌يفوور ئه‌و ڤالاتيه‌ پركر”.

په‌يڤدارێ پارتى راگه‌هاند ژى” دكۆمبوونێ دا بريار هاته‌ دان پارتى ده‌ست ب به‌رهه‌ڤيان بكه‌ت بۆ هه‌لبژارتنێن داهاتى ل كوردستانێ”.

دياركر” هه‌رێما كوردستانێ پێدڤى ب هه‌لبژارتنان هه‌يه‌ ودڤێت بهێنه‌ ئه‌نجامدان ل پێناڤى وێ چه‌ندێ په‌رله‌مان بهێته‌ كاراكرن وببيته‌ چاره‌سه‌ريه‌كا باش بۆ كێشان”.

ئاماژه‌ دا” ب شانده‌كێ هه‌ڤپشك ل گه‌ل ئێكه‌تيێ دێ چينه‌ به‌غدا ب به‌رنامه‌كێ هه‌ڤپشك دناڤبه‌را هه‌ردو لا”.

ل دۆر گوهۆرينێن دناڤ پارتى دا گۆت” گوهۆرينێن دناڤ پارتى دا پێدڤى ب ديراسه‌ وپێداچوونێ هه‌يه‌ تاكو بزانين ل كويرێ كوهۆرين هه‌يه‌ وكێشه‌ چنه‌، له‌وما جڤاتا سه‌ركردايه‌تيێ ده‌ستهه‌لاتێن خوه‌ دانه‌ سرۆك بارزانى ومه‌كته‌با سياسى”.

سه‌باره‌ت پۆستێ سه‌رۆك كۆمارا عيراقێ، مه‌حموود محه‌مه‌د گۆت” ڤێ جارێ مافێ پارتى ديموكراتى كوردستانه‌ پۆستێ سه‌رۆك كۆمارى ديار بكه‌ت وپارتى هه‌ژى وێ چه‌ندێ پۆستێ سه‌رۆك كۆمارى وه‌ربگريت”.