ئه‌ڤرۆ نيوز:
قونسولخانا ئه‌مريكا ل هه‌رێما كوردستانێ چه‌ند پێزانينان سه‌باره‌ت ئاڤاهيێ قونسولخانا خوه يا نوو رادگه‌هينيت و ئاشكرا كريه بودجێ پرۆژه‌ى 795 مليون دولاره.
ئه‌ڤرۆ رۆژا ئه‌ينى ب به‌رهه‌ڤبوونا نێچيرڤان بارزانى سه‌رۆك وه‌زيرێن هه‌رێمێ و باليوز و قونسولێ ئه‌مريكا ل به‌غدا و هه‌ولێرێ،به‌رێ بنياتى ئاڤاهيێ قونسلخانا نوو يا ئه‌مريكا ل هه‌ولێرێ دانا.
قونسولخانا ئه‌مريكا ل هه‌ولێرێ، ل سه‌ر رووبه‌رێ 200 هزار مترێن دوجاركى ل هه‌ولێرێ به‌رێ بنياتى بۆ هاتيه دانان كو دێ 4 سالان ڤه‌كێشيت و ل سه‌ر ئاستێ جيهانێ دبيته مه‌زنترين قونسولخانه.
ئه‌ڤرۆ نيوز:
شانده‌كێ هه‌ڤپه‌يمانيا فه‌تح يا هادى عامرى بۆ دانوستاندنا سه‌باره‌ت پێكئينانا حوكمه‌تا نوو يا عيراقێ گه‌هشته هه‌ولێرێ، به‌نگين رێكانى ئه‌ندامێ شاندێ دانوستاندكار يێ پارتى ديموكراتى كوردستان راگه‌هاند كو شاندێ هه‌ڤپه‌يمانيا فه‌تح بۆ دانوستاندنا ل دۆر حوكمه‌تا نوو يا عيراقێ هاتينه هه‌ولێرێ .
شاندێ هه‌ڤپه‌يمانيا فه‌تح يا هادى عامرى برياره ل گه‌ل پرانيا ليستێن كوردستانى يێن سه‌ركه‌فتى د هه‌لبژارتنێن عيراقێ دا كۆم ببن.
ئه‌ڤرۆنيوز:
پۆليسێن ئيدارا راپه‌رين رۆهنكرنه‌ك ل دۆر سوتنا عه‌مباره‌كا چه‌كى ل چوارقورنه به‌لاڤ دكه‌ت وتێدا دياردكه‌ت كو دێ ڤه‌كۆلينێ ل دۆر وان ته‌قينێن رووداين ل ده‌مێ ئاگربه‌ربوونێ ئه‌نجام ده‌ن.
رۆهنكرنا پۆليسان دبێژيت” ئاگر به‌ربوو باخچه‌كێ وه‌لاتيه‌كى ل نيزيك گوندێ گردجان ل ناحيا چوارقورنه وده‌نگێ ته‌قينێ ژى هات وپاشى شيان ئاگرى كونترۆل بكه‌ن.
پێرابوونێن قانوونى دێ هێنه وه‌رگرتن ودوسيا ڤه‌كۆلينێ بۆ روودانێ هاتيه ڤه‌كرن، نوكه هێزێن مه مژوولى ڤه‌كۆلينه‌كا هوورن ل سه‌ر ئه‌گه‌رێ ئاگربه‌ربوونێ وئه‌و په‌قينێن ل ده‌مێ ئاگربه‌ربوونێ رووداين”.
پۆليس دبێژن” چو زيانين گيانى ژ ئه‌گه‌رێ روودانێ نه‌بوون، به‌لێ هه‌موو ئاڤاهى هاتيه ژناڤبرن، كه‌سه‌ك ژى ژبه‌ر روودانێ يێ هاتيه ده‌سته‌سه‌ركرن ل دووڤ مادێ 21 ژ قانوونا چه‌كى كو دژيێ 40 ساليێ دايه وڤه‌كۆلين ژى دروودانێ دا يا به‌رده‌وامه.
حسێن عه‌بدوللا، په‌يڤدارێ رێڤه‌به‌ريا به‌رگريا شارستانى ل ئيدارا راپه‌رين، دوهى پێنجشه‌مبى راگه‌هاندبوو” ل شه‌ڤا پێنجشه‌مبى 5/7/2018 ل گوندێ گردجان ل سنورێ ئيدارا راپه‌رين، عه‌مباره‌كا ته‌قه‌مه‌نيێ يا وه‌لاتيه‌كى په‌قى”.
گۆتبوو ژى” ئاگر ل ناڤ باخچه‌كێ گوندێ گردجان سه‌ر ب ناحيا چوارقورنه به‌ربوو كو چه‌ك وته‌قه‌مه‌نى تێدا بوو وزيانێن گيانى نه‌بوون، تنێ زيانێن دراڤى هه‌بوون”.
دياركربوو ژى” ژئه‌گه‌رێ وى ئاگربه‌ربوونێ وه‌لاتيه‌ك بريندار بوو”.
ئه‌ڤرۆنيوز:
هه‌لبژارتيێ فره‌نسا د ياريا ئێكێ ژ قۆناغا چارێك دووماهيێ دا شيا سه‌ركه‌فتنێ ل سه‌ر هه‌لبژارتيێ ئوروگواى ب ئه‌نجامێ 2-0 تۆمار بكه‌ت.
گۆلێن هه‌لبژارتيێ فره‌نسا ژلايێ ڤاران وگرێزمان ل خۆله‌كێن 40 و 61 هاتن تۆماركرن.
ب ڤى ئه‌نجامى فره‌نسا گه‌هشته قۆناغا به‌رى دووماهيێ ودێ ل گه‌ل هه‌لبژارتيێ سه‌ركه‌فتى د ياريا ئه‌ڤرۆ ئه‌ڤ شه‌ڤه دا دناڤبه‌را به‌رازيل وبه‌لجيكا كه‌ت.
برياره ل ده‌مژمێر 9 ئه‌ڤ شه‌ڤه ياريا دويێ ژقۆناغا چارێك دووماهيێ دناڤبه‌را به‌رازيل وبه‌لجيكا دا بهێته ئه‌نجامدان.
ئه‌ڤرۆنيوز:
حوكمه‌تا هه‌رێما كوردستانێ كۆژمێ 400 مليۆن دينار بۆ كرين وره‌شاندنا ده‌رمانى بۆ به‌رهنگاريا نه‌خوه‌شيا تايا خوين به‌ربوونێ ته‌رخانكر.
رێباز حه‌ملان، وه‌زيرێ دارايى وئابوورى ل هه‌رێما كوردستانێ، دبه‌ياننامه‌كێ دا راگه‌هاند” 400 مليۆن دينار بۆ كرين وره‌شاندنا ده‌رمانێ بۆ به‌رهنگاريا نه‌خوه‌شيا تايا خوين به‌ربوونێ يێن هاتينه ته‌رخانكرن”.
حه‌ملانى گۆت ژى” هه‌كه پێدڤى بكه‌ت دێ كۆژمه‌كێ زێده‌تر ژى بۆ ڤێ مه‌ره‌مێ هێته ته‌رخانكرن”.
دياركر” ل رۆژێن داهاتى دێ ده‌ست ب ره‌شاندنا ده‌رمانى هێته كرن ول ده‌ستپێكێ دێ ل تاخ وجهێن هه‌ژارنشين هێته ئه‌نجامدان”.
ئه‌ڤرۆنيوز:
ترومبێله‌كا بارهه‌لگر ئه‌ڤرۆ ئه‌ينيێ 6/7/2018 ل سه‌ر رێيا سێمێل – زاخۆ وه‌رگه‌ريا وچو زيانێن گيانى نه‌بوون.
رێڤه‌به‌ريا هاتنوچوونا دهۆكێ دبه‌رپه‌رێ خوه دا ل سه‌ر تۆرا جڤاكى يا فه‌يسبووكى به‌لاڤكر” ئه‌ڤرۆ ل سه‌ر رێيا سێمێل – زاخۆ ترومبێله‌كا باهه‌لگر وه‌رگه‌ريا وچو زيانێن گيانى نه‌بوون، تنێ زيانێن دراڤى هه‌بوون”.
نيشاندان