ئه‌ڤرۆ نيوز:
رێڤه‌به‌ريا گشتى يا په‌يوه‌ندى و راگه‌هاندنێ يا كومسيونا بلندا سه‌ربخوه‌يا هه‌لبژارتن و راپرسيێ ل هه‌رێمێ د راگه‌هاندنێ دياركريه، كو رۆژا 7-7-2018 تاوەکو 25-7-2018 كومسيون دێ ناڤێ به‌ربژێران وه‌رگريت.
نێچیرڤان بارزانی، سه‌رۆكێ حوكمه‌تا هه‌رێما كوردستانێ، رۆژا 30 ئه‌يلونێ وه‌كو رۆژا ئه‌نجامدانا هه‌لبژارتنێن په‌رله‌مانێ كوردستانێ دياركر.
ئه‌ڤرۆنیوز:
په‌یڤدارێ رێڤه‌به‌ریا هاتنوچوونا هه‌ولێرێ دبه‌رپه‌رێ خوه ل سه‌ر تۆرا جڤاكى یا فه‌یسبووكى به‌لاڤكر، ل سه‌ر جادا 60 مه‌ترى ل هه‌ولێرێ، شوفێرى ترومبێله‌كێ ژبه‌ر ب له‌ز هاژووتنێ وته‌ربوونا جادێ، كونترۆل ل سه‌ر ترومبێلێ ژ ده‌ستدا وخو ل شوستێ جادێ دا وپاشى ب ستوینه‌كا كاره‌بێ كه‌فت.
فازل حاجى، په‌یڤدارێ رێڤه‌به‌ریا هاتنوچوونا هه‌ولێرێ گۆت ژى” ژبه‌ركو شوفێرى خوه ب قاویشا سلامه‌تیێ نه گرێدا بوو، ب هێزه‌كا مه‌زن ژ ترومبێلێ كه‌فته خوار وكه‌فته سه‌ر جادێ وب گرانى بریندار بوو”.
ناڤبرى داخواز ژ شوفێران كر كو هه‌تا ل ده‌مێن سپێدێ ژى وجاده دڤالا بن ژترومبێلان، پێدڤیه له‌زاتى نه‌هێته بكارئینان بۆ پاراستنا وان ژ روودانان.
گۆت ژى” هیڤیدارین شوفێر به‌رده‌وام قاویشا سلامه‌تیێ بكارئینن ل ده‌مێ هاژووتنا ترومبێلێ”.
ئه‌فرۆونيوز، سالار دۆسكی
به‌رپرسێ راگه‌هاندنا كۆمه‌لا ئه‌كاديمیێن زانستێن سیاسی دیاركر كو كۆمه‌لا وان كۆمه‌له‌كا سیاسی، هزری ، ره‌وشه‌نبیری، سه‌ربه‌خوه‌یه ئارمانجا وێ گه‌شه‌پێدانا ئاستێ هشیاركرنا سیاسی یه و شروڤه‌كرنا روودانێن سیاسی و پێشكێشكرنا ڤه‌كۆلین و شیره‌تان ژبۆ خزمه‌تكرنا به‌رژه‌وه‌ندیێن بلندێن هه‌رێما كوردستانێ هاتیه دامه‌زراندن.
ئاشتی فتحی عبدالله، به‌رپرسێ راگه‌هاندنا كومه‌لا ئه‌كاديمیێن زانستێن سیاسی بۆ ئه‌ڤرۆنيؤز گۆت: ب هزرا كۆمه‌كا گه‌نجێن پارێزگه‌ها دهۆكێ و ب فه‌رمی كۆمه‌لا وان هاتیه دامه‌زراندن ب بریارا وه‌زاره‌تا ناڤخوه‌يى.
گۆت ژى، كۆمه‌لا ئه‌كاديمیێن زانستێن سیاسی كاردكه‌ت ژبۆ پشكداریكرن د پرۆژێ ئاڤاكرنا سیاسی ل كومه‌لگه‌هێ دا و رێكخستنا خۆلێن پێگه‌هاندنێ و وركشوپێن ره‌وشنبیریا سیاسی و ڤه‌گۆهاستن بۆ ناڤ ته‌خێن جڤاكی یێن جودا جودا ، كاركرن ژبۆ ڤه‌دیتنا ده‌لیڤێن كاری بۆ ده‌رچوویێن پشكا زانستێن سیاسی ب هه‌موو بياڤێن خوه‌ڤه (په‌یوه‌ندیێن نیڤده‌وله‌تی – سیاسه‌تا گشتی – هزرا سیاسی – سیسته‌مێن سیاسی ) ل ناڤ داموده‌زگایێن حكومی دا .
ديسا گۆت، پشتی دامه‌زراندنا كۆمه‌لی، ده‌سته‌یه‌كا ده‌مكى هاته پێكئینان ژبۆ رێڤه‌برنا كاروبارێن كۆمه‌لێ د ده‌مێ ئێك سال و نیڤ دا ، ده‌سته‌یا ده‌مكى سه‌ره‌راى هه‌موو ره‌وشێن سه‌ختێن روو ب روو هه‌رێما كوردستانێ بووین، شیاین كۆمه‌كا ده‌رچوویێن زانستێن سیاسیی ل خوه كۆمڤه‌بكه‌ین كو ببنه ئه‌ندام د كۆمه‌لێ دا ، چه‌ندين سه‌ره‌دانێن گرنگ هاتنه ئه‌نجامدان بۆ خورتكرنا په‌یوه‌ندیان و ب ده‌هان نڤیسان و چاڤپێكه‌فتن ل ته‌له‌ڤزیون و رادیویێن كوردی هاتنه ئه‌نجامدان ، هه‌روه‌سا ل23-05-2018 ب هه‌ڤكاریا سه‌نته‌رێ بێشكچی شیاین په‌نه‌له‌كێ مه‌زن ل سه‌ر ئاستێ هه‌موو پارتێن سیاسی ل پارێزگه‌ها دهۆكێ رێكبێخین ل دور بابه‌تێ (ریفراندوم ددیتنه‌كا سیاسی وقانوونى دا ) ، پشتی ب دووماهی هاتنا ده‌سته‌یا ده‌مكى، ل 2-7-2018 كۆنگرێ ئێكێ یێ كۆمه‌لا ئه‌كاديمیێن زانستێن سیاسی هاته گرێدان ب ئاوایه‌كێ دیموكراسیانه هه‌موو ئه‌ندامان مافێ خوه به‌ربژاركرنێ هه‌بوو و ب چاڤدێریا نوونه‌رێ پارێزگه‌ها دهۆكێ شیاین ده‌سته‌یه‌كا نوو بۆ كۆمه‌لێ ب هه‌لبژێرین.
ئه‌ڤرۆ نیوز ،بارزان مزوورى:
مونا قه‌هوه‌چى،جێگرا سه‌روكا پارتى چاكسازى توركمان بو ئه‌ڤرۆ نیوز ئاشكرا كر كو ئه‌ڤرۆ رێكه‌فتى 5/7/2018 ژلایێ كومسیونا بالا سه‌ربخویا هه‌لبژارتنان ڤه هات په‌سه‌ند كرن وه‌كو قه‌واره‌ى سیاسى به‌شدارى د هه‌لبژارتنێن 30/9/2018 بكه‌ین وه‌كو لیسته‌كا به‌شدار پارتى چاكسازى توركمان،
ناڤبرى ئاشكرا كر كو 9 قه‌وارێن سیاسى یێن توركمان ل كوردستانێ یێن هه‌ین قه‌وارا مه قه‌وارا پارتى چاكسازى توركمانه به‌شدارى د هه‌لبژارتنێن په‌رله‌مانێ كوردستانێ دا یاكرى ل خولا پێنجێ ،د نها دا 4 پارتێن سیاسى یێن توركمان یێن هاتینه دناڤ پارتا مه‌دا د هه‌لبژراتنێن بهێت دا هه‌ر ئێك ژوان پارتا دێ نوێنه‌رێ خو هه‌بیت كو نوێنه‌راتیا پارتا خو بكه‌ت ل په‌رله‌مانێ كوردستانێ ،
ناڤبرى گوت ژى مه بو هه‌لبژراتنێن بهێت 5 كاندید دێ هه‌بن دگه‌ل كوتایه‌كێ بو په‌رله‌مانێ كوردستانێ ، مه چ كاندید ل پارێزگه‌ها دهوك نینن ژبه‌ركو ژمارا توركمانا ل وێ پارێزگه‌هێ گه‌له‌ك كێمن .
ئه‌ڤرۆنيوز:
به‌رپرسێن كه‌نه‌دى راگه‌هاند ژئه‌گه‌رێ بلندبوونا پلێن گه‌رمێ ل وه‌لاتێ وان، 16 كه‌سان گيانێ خوه ژده‌ستدايه.
كه‌نالێ (سى بى سى) يێ كه‌نه‌دى ژ هژماره‌كا به‌رپرسێن كه‌نه‌دى ڤه‌گۆهاست” دده‌مێ سێ رۆژێن بۆرى 11 كه‌س ل باژێرێ مونتريال و 5 كه‌س ل ده‌ڤه‌را ئيسترن تاونشيبس ژئه‌گه‌رێ پێلا گه‌رمى گيانێ خوه ژده‌ستدايه”.
پلێن گه‌رمێ ل وه‌لاتێ كه‌نه‌دا ل رۆژا ئه‌ينيا بۆرى ب شێوه‌كێ به‌رچاڤ بلندبوون هه‌مبه‌ركرن ل گه‌ل سالێن بۆرى كو پلا گه‌رمێ گه‌هشته 34 ل باژێرێ مونتريال.
ئەڤرۆنیۆز، سالار دۆسكی:
به‌رپرسێ گشتیێ دەزگەهێ ئالایێ كوردستانێ ئاشكراكر كو یاداشتەكا 14 خالی پێشكێشی سەرۆكاتیا پەرلەمانێ كوردستانێ و هەر دو لژنێن رەوشەنبیری و قانوونی يێن په‌رله‌امانى كریە و تێدا چەندین داخوازی كرینە.
پەلەوان حەیدەر، بەرپرسێ گشتیێ دەزگەهێ ئالایێ كوردستانێ بۆ ئەڤرۆ نیۆز، گۆت: ل 4/7/2018 وەكو دەزگەهێ ئالایێ كوردستانێ مە سەره‌دانا پەرلەمانێ كوردستانێ كرو هاتینە پێشوازیكرن لایێ جەعفەر ئیبراهیم جێگرێ سەرۆكێ پەرلەمانی ڤە و چەندین ئەندامێن پەرلەمانێ كوردستانێ و مە وەكو دەزگەهێ ئالایێ كوردستانێ یاداشتەكا 14خالی رادەستی جێگرێ سەرۆكێ پەرلەمانی كر.
پەلەوانی گۆت ژی: ژ گرنكترین خالێن مە داخوازكرین، ئەوە كو ئالایێ كوردستانێ بچيته دپرۆگرامێن خواندنێ دا و ل قوتابخانان بهێته خواندن ، دیسا ئالایێ كوردستانێ ل كوردستانێ بهێتە دروستكرن نه‌كو ل دەرڤەی وەلاتی ، جێگرێ سەرۆكێ پەرلەمانی پەسنا رۆلێ دەزگەهێ ئالایێ كوردستانێ كر دیازدە سالێن بوری دا و ئەو خزمەتا پێشكێشی خەلكێ كوردستانێ كری و نەتەوا كورد هاتیەكرن.
ئەو ژی گۆت: ئەڤ خالێن بۆ سەرۆكاتیا پەرلەمانی هاتینە پێشكێشكرن، دێ هەموو ژلایێ لژنێن رەوشەنبیری و قانوونی ڤە ل پەرلەمانی هێنە گەنگەشەكرن و دێ بزاڤ هێنەكرن كا ب چ شێواز بكەڤنە دبیاڤێ بجئینانێ دا و خزمەتا كوردستانێ بهێتەكرن
ئه‌ڤرۆ نیوز، نه‌وزاد هلۆرى:
كومهلگهها وهلاتى ژێرى كو ژ حه‌فت گوند و نێزیكێ 500 مالان پێكدهێت ژبه‌ر نه‌بوونا چو پرۆژێن ئاڤێ ب هيڤیا تانكه‌ران ڤه‌یه ، وه‌لاتی ژبه‌ر كێمبوونا ئاڤێ دنالن ب تایبه‌تى نها كو وه‌رزێ هاڤینێ و گه‌رمێ یه ، ئه‌ڤه سه‌ره‌راى كو ئه‌و ئاڤا ب تانكه‌ران ژى دهێته دابینكرن یا ساخله‌م نينه.
دلفا خالد جه‌وهه‌ر، وه‌لاتیه‌كێ كومهلگهها وهلاتى ژێرى یه بۆ ئه‌ڤرۆ نیوز گۆت: (نێزیكێ هه‌شت سالانه كومهلگهها وهلاتى ژێرى هاتیه درۆستكرن ، سه‌ره‌راى كو پرۆژه‌كێ تایبه‌ت ل سه‌ر رووبارێ زێ مه‌زن هاتیه چێكرن، به‌لێ نێزیكێ ساله‌كێ یه ئاڤا وێ بو كومه‌لگه‌هێ نه‌هاتیه به‌ردان و نها نێزیكێ 500 مالێن كومه‌لگه‌هێ ب هويڤیا تانكه‌رێن ئاڤێ نه).
زێده‌تر گۆت: (زێده‌بارى كو ئه‌و ئاڤا ب تانكه‌ران دهێته كومه‌لگه‌هێ كێمه و حه‌فتیێ جاره‌كێ یه ، ل گه‌ل ڤێ یه‌كێ ژى ئه‌و ئاڤ نه‌یا ساخله‌مه ژبه‌ركو ئاڤا رووبارى یه و ل ده‌هان جهێن رووبارى ئاژه‌ل دهێنه ب خودانكرن و خه‌لك مه‌له‌ڤانیان تێدا دكه‌ت و پیس دبیت).
دیاركر ژى كو پێدڤى ناكه‌ت ب بهانه‌یا قه‌یرانا دارایى حوكمه‌ت و لایه‌نێن شوله‌ژێ كار ل سه‌ر پرۆژێن ئاڤا پاقژ بۆ مالان نه‌كه‌ت و زێده‌تر گۆت: (داخوازێ ژ حوكمه‌تێ و لایه‌نێن شوله‌ژێ دكه‌ین ب زووترین ده‌م چاره‌سه‌ریا ئاڤا كومهلگهها وهلاتى ژێرى بكه‌ن، ژبه‌ركو نها گه‌رمه و هاڤینه و خه‌لك زێده‌تر پێدڤى ب ئاڤێ هه‌یه).
زیاب ئه‌حمه‌د، رێڤه‌به‌رێ ئاڤا بارزان بۆ ئه‌ڤرۆ نیوز گۆت: (كێشه‌یا ئاڤێ نه‌ك تنێ ل كومهلگهها وهلاتى ژێرى هه‌یه، به‌لكو ل پتريا گوند و كومه‌لگه‌هێن ده‌ڤه‌را بارزان هه‌یه، و بۆ چاره‌سه‌ركرنا ئێكجارى یا ئاڤێ ل ده‌ڤه‌را بارزان پرۆژه‌یه‌كێ ستراتیژیێ ئاڤێ ل سه‌ر رووبارێ ئاڤا شین دهێته چێكرن و دێ 51 گوند و كومه‌لگه‌هێن وهلاتى ژێرى پێكڤه گرێده‌ت ئانكو هه‌ر ل گوندێ بالندا هه‌تا گوندێ شیڤه‌دزێ بیته ئێك پرۆژێ ئاڤێ).
زێده‌تر گۆت: (نها ب ره‌نگه‌كێ به‌رده‌وام كار ل سه‌ر پرۆژێ ستراتیژیێ بارزان دهێته‌كرن و ئه‌گه‌ر چو كێشه‌یێن دارایى و ته‌كنیكى نه‌هێنه پێش، ل ده‌مه‌كێ نێزیك دێ ب دووماهى هێت).
كومهلگهها وهلاتى ژێرى ژ خه‌لكێ 9 گوندان پێكدهێن و ل سالا 1994 ل وهلاتى ژێرى و پشتا چیایێ شیرینێ بۆ گوندێ هردان ل سه‌ر رووبارێ زى مه‌زن هاتبوونه ڤه‌گۆهاستن و پاشى ل سالا 2009 ل نێزیك گوندێ بالندا و دارا دازا هاتنه ئاكنجیكرن.
ئه‌ڤرۆ نیۆز،عه‌زیز هه‌ورامیی
ده‌رگه‌هێ سنورى يێ شۆشمێ كو دكه‌ڤيته سنورێ پارێزگه‌ها هه‌له‌بجه دێ بيته ده‌رگه‌هه‌كێ نێڤده‌وله‌تى دناڤبه‌را كۆمارا ئيسلامى يا ئيرانێ وهه‌رێما كوردستانێ، نوكه تنێ ئيمزايا حه‌يده‌ر عه‌بادى سه‌رۆك وه‌زيرێن عيراقێ يا ماى.
كاوه عه‌لى، جێگرێ پارێزگه‌رێ هه‌له‌بجه بۆ ئه‌ڤرۆنيوز گۆت” پشتى شاندێ چه‌ند وه‌زاره‌تێن حوكمه‌تا فيدرالى ل به‌غدا هاتنه سه‌ره‌دانا ده‌رگه‌هێ شۆشمێ – ته‌ويله، ب چاڤێ خوه ديت كو هه‌موو ئه‌و مه‌رجێن كو پێدڤيه ده‌رگه‌هه‌كێ سنورى يێ نێڤده‌وله‌تى هه‌بن، دوى ده‌رگه‌هێ سنورى يێن هه‌ين، له‌وما دراپۆرتا خوه دا بۆسه‌رۆك وه‌زيرێن عيراقێ رازيبوون دابوو بۆ ب نێڤده‌وله‌تيكرنا وى ده‌رگه‌هێ سنورى”.
دياركر” ب نێڤده‌وله‌تيكرنا ده‌رگه‌هێ سنورى يێ شۆشمێ – ته‌ويله بۆ پارێزگه‌ها هه‌له‌بجه گه‌له‌ك يا گرنگه ژبه‌ركو چو ده‌رگه‌هێن نێڤده‌وله‌تى ل هه‌له‌بجه نه‌بوون وب ڤێ پێنگاڤێ دێ هه‌له‌بجه چيته سه‌ر رێره‌وێ بازرگانيا نێڤده‌وله‌تى”.
جێگرێ پاريزگه‌رێ هه‌له‌بجه گۆت ژى” وه‌زاره‌تا ده‌رڤه‌يا عيراقێ ئاگه‌هداريا وه‌زاره‌تا ده‌رڤه‌يا ئيرانێ كريه كو هه‌موو به‌رهه‌ڤى ژلايێ عيراقێ ڤه بۆ ڤه‌كرنا وى ده‌رگه‌هێ نێڤده‌وله‌تى يێن ب دووماهى هاتين”.
ئەڤرۆ نیوز ، زنار تۆڤی:
جێگرێ سکرتێرێ جڤاتا ناڤەندی یێ ئێکەتیێ، ئاماژێ ب هندێ دکەت، کو چو بەهانە نەماینە بۆ هندێ کو لایەنێن نەرازی نەهێنە ژێر بارێ کۆمبوونان، ئەوێ ل گەل ئێکرێزیا نافمالا کوردی نەبیت، دێ روو ب روو بەرپرسیاریا مێژوویی بیت.
زوبێر ئۆسمان، جێگرێ ئێکێ یێ سکرتێری جڤاتا ناڤەندیی یێ ئێکەتیێ گوتیە: ئێکەتی ل گەل هندێ یە کو نافمالا کوردی بهێتە رێکخستن و ھەموو لایەنێن سیاسی یێن کوردستانێ، پێکڤە ل بەغدا دوور ژ بەرژەوەندیا تەسکی یا حزبی پشتگیریێ ل خواستێن بلند یێ میللەتێ مە بکەن، بێگومان ھەر لایەنەکێ سیاسی ببیتە ئەگەرێ هندێ کو ئێکرێزیا نافمالا کوردی دروست نەبیت، دێ بەرپرسیاریا مێژوویی کەڤیتە سەر ستوویێ وێ حزبێ“.
ئاشکرا کر ژی، نوکە هیچ بەهانەک نەمایە بۆ هندێ کو لایەنێن نەرازی نەهێنە کۆمبوونان و مامەلەکرنێ ل گەل ڤی دۆخێ کو نوکە ھەموو وەلاتیەک حەزا هندێ هەیە کو کێشە بهێنە چارەسەر کرن، بەلێ ”ھەر لایەنەکێ سیاسی بۆ پشکا خۆ رازی نەبیت، رێزێ ل ئیرادا خۆ و دەنگدەرێن خۆ ناگریت“.
ئەڤرۆ نیوز، فاتما مزووری:
جێگرێ پارێزگارێ سنە راگەھاند کو دەرگەھێ سنوری یێ پاشماغ ل دەڤەرا مەریوان یێ سەر ب پارێزگەھا سنەڤە دەرگەھێ سنوری یێ سیێ یە بۆ گرنگیا خوە بۆ ئیرانێ.
جێگرێ پارێزگارێ سنە بۆ ھەماھەنگیا ئابووری و گەشەپێدانا چاڤکانیان، حسێن فەیرۆزی دبێژیت: “مەریوان ئێک ژ باشترین دەڤەرێن ئیرانێ یە بۆ ھنارتنێ و نھا ل گەل خرابیا رێیا وێ و ژێرخانا وێ، دەرگەھێ سنورێ یێ پاشماغ بۆ گرنگیا خوە یێ سیێ یە ل ئیرانێ”.
زێدەتر گۆت: “زێدەتری 95% ب ھەڤگوھاڕتنا بازرگانی ل سنورێ پاشماغ بوویە و ب تنێ سالا بۆری ب بھایێ دو ملیار و 600 ملیۆن دۆلاران ل سنورێ پاشماغ کەلوپەل ھاتنە ھنارتن.
نيشاندان