ئه‌ڤرۆنيوز:
دچارچۆڤێ گه‌را 25 ژ خۆلا عيراقى يا ناياب بۆ ته‌پا پێ، ئه‌ڤرۆ چارشه‌مبى يانا زاخۆ ل گه‌ل مێهڤاندارا خوه يانا كاره‌با هاته دوراندن ب ئه‌نجامێ 0-1.
گۆلا يانا كاره‌با ل خۆله‌كا 10 ژ ياريێ ژلايێ ياريكه‌رێ وێ ڤه مسته‌فا عه‌لى هاته تۆماركرن.
ب ڤى ئه‌نجامى زاخۆ هه‌ر ل جهێ خوه ما ل رێزا 20 ودووماهيێ درێزبه‌ندا خۆلێ دا ب 18 خالان ويانا كاره‌با خالێن خوه گه‌هاندنه 54 خالان ول رێزا پێنجێ دهێت.
ئه‌ڤ دوراندنه دبيته يا 20كو يانا زاخۆ تووشى دبيت دخۆلا عيراقى يا ئه‌ڤ ساله‌دا كو تنێ سێ سه‌ركه‌فتن ب ده‌ستڤه‌ئيناينه و12 وه‌كهه‌ڤى.
ئه‌ڤرۆ نيوز، فاتما مزوورى:
ب مه‌ره‌ما به‌رسينگگرتنا بازاڕێ ره‌ش، بانكا ناڤه‌ندیا ئیرانێ ناڤێ وان كۆمپانیا به‌ڵاڤ كرن یێن كو ب بهایێن فه‌رمی كه‌لوپه‌لان هاورده دكه‌ن.
ب گۆره‌يی راگه‌هاندنه‌كا بانكا ناڤه‌ندیا ئیرانێ، هزار و 802 كۆمپانى ب وان بهایێن دراڤان كه‌لوپه‌لان هاورده دكه‌ن یێن كو ژ لايێ ده‌وله‌تێ ڤه هاتیه دیار كرن.
ئه‌ڤ لیسته پشتی نه‌رازیبوونا كاسبكارێن ته‌هرانێ و هه‌روه‌سا پرۆتستۆكرنا بهایێ دراڤان و كێشا ئابوورى ل وی وه‌لاتی دهێت كو هاتینه به‌ڵاڤ كرن.
هاورده‌كرنا كه‌لوپه‌لان ژ لايێ وان كۆمپانیایان ڤه، ب گۆره‌يی بهایێن دراڤێ جێگیر و ساخكرن د بازاران دا ل گۆره‌ی بهایێ دراڤێن بازارێ ره‌شه.
كارڤه‌دانێن وه‌لاتیێن وی وه‌لاتی ل په‌يی خوه ئيناینه. مه‌ره‌م ژ وێ لیستا كو ئه‌ڤرۆ هاتیه به‌ڵاڤ كرن ئه‌وه، رێگری ل وان مفايێن نه ئاسايی بهێته كرن كو ل رێیا بهایێن دراڤی دهێته ب ده‌ست خستن.
ئه‌ڤرۆ نيوز، فاتما مزوورى:
ئيماراتێ ده‌ست ب سه‌ر مولك و مال و وان كۆمپانيێن ئيرانى دا گرت يێن كو ناڤێن خودانێن وان د ليستا تيرۆرێ دا هه‌ين.
ده‌سته‌يا مولك و مالان ل ئيمارات راگه‌هاند كو ئه‌وان ده‌ست ب بلۆككرنا 9 وه‌لاتيان و كۆمپانيه‌كێ كريه.
ڤێ ده‌سته‌يێ بێى كو چو پێزانينان ل سه‌ر وان كه‌سان به‌لاڤ بكه‌ت راگه‌هانديه كو ژبلى وان كه‌سێن كو ناڤێن وان د ليستا تيرۆرێ دا، سامانێن چو وه‌لاتيه‌كى نه‌هاتينه بلۆككرن.
هه‌رديسا به‌حس ل وێ چه‌ندێ ژى كريه كو ئه‌و كه‌سێن سامانێن وان هاتينه بلوككرن، مليۆنێن دۆلاران ژبۆ هێزا قودس هنارتينه و هێزا قودس ژى سه‌ر ب پاسدارێن ئيرانێ ڤه يه و نوكه د ناڤ ليستا تيرۆرێ دايه.
ئه‌ڤرۆ نيوز، فاتما مزوورى:
وه‌زیرێ ده‌رڤه یێ روسیا سیرگی لاڤرۆڤ ل موسكو دانوستاندن ل گه‌ل هه‌ڤپيشه‌يێ خوه یێ ئۆردن ئه‌یمه‌ن سه‌فه‌دی ده‌رباری سوریا كرن.
ب سه‌ده‌ما به‌رده‌وامیا شه‌ر و ئالۆزیان ل باشوورێ سوریا و زێده‌بوونا هژمارا په‌نابه‌ران ل سه‌ر سنورێ ئۆردن و ئسرائیل ل گه‌ل سوریا، وه‌زیرێ ده‌رڤه یی ئۆردنێ سه‌ردانا روسیا كریه و دهێته پێشبینی كرن كو ره‌وشا پارێزگه‌ها د‌رعا و باشوورێ سوریا ل گه‌ل هه‌ڤپيشه‌يێ خوه یی روسی گه‌نگه‌شه كربن.
ب گۆری ئاژانسا روسیا توده‌يى، وه‌زاره‌تا ده‌رڤه یا روسیا گۆتیه هه‌ردو وه‌زیر دێ د كۆمبوونا خوه دا مژارێن نێڤده‌وله‌تی و هه‌رێمی و پرسا ده‌ڤه‌را كێمكرنا ئالۆزیان ل سوریا و باشوورێ رۆژئاڤایی سوریا گه‌نگه‌شه بكه‌ن.
ئه‌ڤرۆ نيوز، فاتما مزوورى:
سه‌رۆكێ فره‌نسا ئیمانوێل ماكرۆن راگه‌هاند كو هه‌گه‌ر سه‌ركردێن وه‌لاتێن ئه‌فریقیا ئاسایش و ئابووریه‌كێ باش ل ده‌ڤه‌رێ ئاماده بكه‌ن، ئالۆزیێن ئه‌فریقیا دێ چاره بن.
د سه‌ردانا خوه دا بۆ نا‌یژیریا، سه‌رۆكی فره‌نسا ل گه‌ل هه‌ڤشانێ خوه یێ نایژیری محه‌مه‌د بوخاری كۆمبوو و د پشت را د كونفرانسه‌كێ رۆژنامه‌ڤانیێ هه‌ڤپشك دا ماكرۆن راگه‌هاند كو فره‌نسا و نا‌یژیریا د رژدن د واری رووبرووبوونا تیرۆرێ دا و دێ هاریكاریا هه‌ڤدو كه‌ن.
ماكرۆن گۆتژی: “یا گرنگ ئه‌وه هه‌بوونا مه ل ئه‌فریقیا هه‌بيت ب تایبه‌ت ل كه‌ناران، ئه‌م دخوازين كارى ل وێرێ ئه‌نجام بده‌ين و به‌رسينگێ تیرۆرێ بگريت ب تایبه‌ت ل مالی.
ژ لایی خوه ڤه سه‌رۆكێ نا‌یژیریا راگه‌هاند كو وی ل گه‌ل سه‌رۆكێ فره‌نسا پرسێن ئاسایش و ئابووری و په‌یوه‌ندیێن هه‌ردۆ ئالیان گه‌نگه‌شه‌كرن.
ئه‌ڤرۆ نيوز، فاتما مزوورى:
دادگه‌هه‌كێ ل كوالالا‌مپۆر ئه‌ڤرۆ تومه‌تا گه‌نده‌لیێ ئاراسته‌يى سه‌رۆك وه‌زیرێن به‌رێ یێن مالیزیا كر كو د چارچوڤێ ڤه‌كۆلينا ده‌ربارێ دزینا ملیونێن دۆلاران ژ سه‌ندوقه‌كا حكومی دا دوهی هاتبوو گرتن.
ب گۆره‌ی فرانس پرێس دادگه‌هێ سێ تومه‌تێن گرێدايی ب نه پاراستنا ئه‌مانه‌تێ و تومه‌ته‌ك ژی گرێدايی ب وه‌رگرتنا به‌رتیلان ب رێژه‌یا زێده‌تری 10 ملیون دۆلاران ئاراستهي‌ی نه‌جیب عه‌بدولره‌زاق سه‌رۆك وه‌زیرێن به‌رێ یێن مالیزیا كر و سزایێن ڤان تومه‌تان دگه‌هنه 20 سال زيندانكرنێ.
نه‌جیب عه‌بدولره‌زاق ژ سالا 2009 هه‌تا 2018ێ سه‌رۆك وه‌زیرێن مالیزیا بوو، گۆمان هه‌یه كو وی 640 ملیۆن یۆرۆ دزی ين، به‌لێ ناڤبری وێ یه‌كێ ره‌ت دكه‌ت.
ئه‌ڤرۆ نیوز ، نه‌وزاد هلۆرى:
هونه‌رمه‌نده‌كێ كویه ب تێكه‌لكرنا ئاخا ره‌ش و ئاخا سوور كو ده‌ربرین ژ تازى و خوینێ دكر ، ل گه‌ل ره‌نگێ ئاڤێ كو ده‌ربرین ژ ئاشتیێ دكر كربوو ته‌قن و ب سه‌رێ خوه دا كر ، وه‌كو هه‌لویسته‌كێ هونه‌رى به‌رامبه‌ر گرتنا رێیا هه‌ولێر – كه‌ركوك ل خالا پردێ كو د روودانێن 16ێ ئوكتوبه‌را سالا بۆرى هه‌تا نها هاتیه گرتن.
هونه‌ر تاهر، بۆ ئه‌ڤرۆ نیوز گۆت : (نێزیكێ ساله‌كێ یه ژ ئه‌نجامێ روودانێن 16ێ ئوكتوبه‌رێ رێیا سه‌ره‌كى یا دناڤبه‌را هه‌ولێر و كه‌ركوكێ ل خالا پردێ هاتیه گرتن و وه‌لاتى نه‌شێن هاتنوچوونێ بكه‌ن، چ ب مه‌ره‌ما سه‌ره‌دان بیت، یان ژى بارزگانى و ئه‌ڤه ژى بوویه‌ئه‌گه‌ر كو هاتنوچوون ل رێیا كویه زێده بیت و رودانێن مه‌ترسيدار ل په‌ى درۆست ببن، ژبه‌رڤى چه‌ندێ وه‌كو هه‌لویسته‌كێ هونه‌رى من ئاخا سوور كو ره‌نگێ خوينێ یه و ئاخا ره‌ش كو ره‌نگێ تازیێ یه ل گه‌ل ئاڤا سپى كو ره‌نگێ ئاشتیێ یه تێكه‌ل كرن و كره ته‌قن و ب سه‌رێ خوه دا كر، به‌لكو ئه‌ڤ چه‌نده ببیته ئه‌گه‌ر كو دلێن به‌رپرسێن مه نه‌رم ببیت و دوباره رێیا هه‌ولێر و كه‌ركوك بهێته‌ڤه‌كرن).
زێده‌تر گۆت: (ئه‌ڤ جۆرێ هونه‌رى ناڤێ وى هونه‌رێ سه‌ر جادێ يه و ل گه‌له‌ك وه‌لاتێن جیهانێ يێ هه‌ى و من ژى ڤیا ب ڤى شێوه‌ى ده‌ربرینێ ژ قوربانیدانا خه‌لكى بكه‌م كو رۆژانه ژبه‌ر قه‌ره‌بالغێ ل سه‌ر رێیا كویه دبنه قوربانى و پێدڤیه هونه‌رمه‌ند و خه‌لكێ كوردستانێ ب گشتى هه‌مبه‌رى زولم و سته‌مێ بێ ده‌نگ نه‌بن و هه‌ر ئێك ژلایێ خوه‌ڤه ب ره‌نگه‌كێ ببیته هاریكار داكو جاره‌ك دن ژیانه‌ك نوو بۆ خه‌لكى بزڤریت ڤه).
هونه‌رمه‌ندێ ناڤبرى كو خه‌لكێ قه‌زا كویه یا سه‌ر ب هه‌ولێرێ یه و د چه‌ندین ڤیسته‌ڤالێن ناڤخوه‌يى و نێڤده‌وله‌تى پكشدارى د كارێن هونه‌رى و هونه‌رێ سه‌رجادێ كریه و په‌رتۆكه‌كا تایبه‌ت ژى دڤى بیاڤى دا نڤیسایه، زێده‌تر گۆت: (هونه‌رێ سه‌ر جادێ ده‌ربرینا خواست و داخوازیێن خه‌لكى یه ب ره‌نگه‌كێ جیاواز و ده‌هان كه‌سایه‌تى و هونه‌رمه‌ند و خه‌لكى ده‌ستخوه‌شى ل من كر ل سه‌ر هه‌لویستێ من و سوپاسیا رێڤه‌به‌ریا هاتنوچوونا كویه دكه‌م كو ئه‌ز پاراستيم ل ده‌ما ب رێڤه‌چوونا هونه‌رێ من ل سه‌ر رێیا گشتى یا كویه).
ئه‌ڤرۆنيوز:
لژنا بلند يا هه‌لبژارتنان ل توركيا، ئه‌ڤرۆ چارشه‌مبى ئه‌نجامێن دووماهيێ يێن هه‌لبژارتنێن سه‌رۆكاتيێ وپه‌رله‌مانى ل وى وه‌لاتى به‌لاڤكرن، كو ل رۆژا 24/6/2018 هاتبوونه ئه‌نجامدان.
دوان هه‌لبژارتنان دا، پارتيا ديموكراتيا گه‌لان (هه‌ده‌په) 11.7% ژ ده‌نگان ب ده‌ستڤه‌ئيناينه.
لژنا بلند يا هه‌لبژارتنان ل توركيا راگه‌هاند، ره‌جه‌ب ته‌يب ئه‌ردۆگان به‌ربژارێ سه‌رۆكاتيا كۆمارێ 52.59% ژ ده‌نگان ب ده‌ستڤه‌ئيناينه.
ل دووڤ ئه‌نجامێن دووماهيێ يێن هه‌لبژارتنێن توركيا، پارتيا داد وگه‌شه‌پێدان كو پارتا ئه‌ردۆگانى يه، ژ سه‌رجه‌مێ 600 كورسيێن په‌رله‌مانى 295 كورسى بده‌ستڤه‌ئيناينه ورێژا كورسيێن وێ پارتێ دبيته 42.56% ژ ده‌نگان.
هه‌روه‌سا پارتيا گه‌لێ كۆمارى ( جه‌هه‌په) 146 كورسى، پارتيا ديموكراتيا گه‌لان (هه‌ده‌په) 67 كورسى، پارتيا نه‌ته‌وى توركيا (مه‌هه‌په) 49 كورسى، ئى پارتى 43 كورسى ل په‌رله‌مانێ توركيا بده‌ستڤه‌ئيناينه.
دياركر ژى كو ئه‌ردۆگانى 26 مليۆن و330 هزار و823 ده‌نگ بده‌ستڤه‌ئيناينه كو دبيته 52.59% ژ ده‌نگان و موحه‌ره‌م ئينجه 30.64% ژ ده‌نگان ئيناينه و سه‌لاحه‌دين ده‌ميرتاش 8.40% ژده‌نگان بده‌ستڤه‌ئيناينه ومه‌رال ئاكشنه‌ر 7.29% ئيناينه.
ئه‌ڤرۆنيوز:
راپۆرتێن رۆژنامه‌ڤانى ژ مونديالا رووسيا ئاماژێ دده‌ن كو لويس سوارێزى خوه ژ راهێنانێن هه‌لبژارتيێ ئوروگواى ڤه‌كێشا پشتى هه‌ست ب ئێشانا پێ خوه كرى.
به‌لاڤكرن ژى كو دبيت هنگافتنا سوارێزى يا ب ساناهى بيت، به‌لێ راهێنه‌رێ ئه‌روگواى هه‌ست ب دلته‌نگيێ دكه‌ت ژبه‌ركو د ياريا ئه‌روگواى دا ل به‌رامبه‌ر پورتۆگال هێرشبه‌رێ ئوروگواى كافانى هه‌ست ب ئێشانێ پێ خوه كربوو وهاته گوهارتن كو شيابوو دوێ ياريێ دا هه‌ردو گولێن ئوروگواى تۆمار بكه‌ت.
دياركرن ژى كو دبيت كافانى د ياريا چارێك دووماهيێ دا ل به‌رامبه‌ر فره‌نسا نه‌كه‌ت وهه‌تا نوكه پشكداريا سوارێزى ژى يا ديار نينه.
ل رۆژا ئه‌ينيێ 6/7/2018 دئێكه‌م ياريا قۆناغا چارێك دووماهيێ يا مونديالا رووسيا، هه‌لبژارتيێ ئوروگواى دێ ل گه‌ل هه‌لبژارتيێ فره‌نسا كه‌ت.
نيشاندان