ئەڤرۆ نیوز ،زنار تۆڤی :
وەزارەتا پەروەردێ یا حوکمەتا ھەرێما کوردستانێ 21 رێڤەبەرێن پەروەردێ گوھارتن.
ب بەرھەڤبوونا د. پشتیوان سادق وەزیرێ پەروەردێ یێ حوکمەتا هەرێما کوردستانێ 21 رێڤەبەرێن پەروەردێ کو پتری ھەشت سالان خزمەت ھەبوون، رێز لێ گرت و گوھارتن، ل شوونا وان ژی ھندەک کەسێن دی دانان.
وەزارەتا پەروەردێ یا حوکمەتا ھەرێما کوردستانێ ئێکەم جارە گوھرینەکا مەزن بڤی رەنگی دکەت، بریارە د دەمەکێ نێزیک دا ھندەک گوھۆرینێن دی ژی ل سەر ئاستێ رێڤەبەر و سازیێن پەروەردەیێ دا بھێنە ئەنجامدان.
ئەڤرۆ نیوز ، زنار تۆڤی :
ژێدەرەکێ ژ وەزارەتا دارایی و ئابووری یا حوکمەتا ھەرێما کوردستانێ راگەھاندیە،کو دابەشکرنا مووچەیێ فەرمانبەرێن ھەرێما کوردستانێ یێ هەیڤا شوواتێ دێ ل رۆژا چارشەمبێ دەستپێکەت.
هەمان ژێدەر ژ وەزارەتا دارایی و ئابوری یا حوکمەتا ھەرێما کوردستانێ دیارکریە:کو ل ناڤەراستنا ڤێ حەفتیێ و ل دەستپێکا هەیڤا گۆلانێ دێ مووچەیێ هەیڤا شوواتێ یێ فەرمانبەرێن ھەرێما کوردستانێ ھێتە دابەشکرن.
بەری نوکە وەزارەتا دارایی و ئابووری یا حوکمەتا ھەرێما کوردستانێ راگەھاند بوو،کو خشتەیێ دابەشکرنا مۆچەیێ فەرمانبەران دێ ھەڤشێوەیێ هەیڤا بۆری بیت، کو ل دەستپێکێ دێ مووچەیێ ھەردو وەزارەتێن ساخلەمیێ و پەروەردەیێ ھێتە دابەشکرن.
ئەڤرۆ نیوز ، زنار تۆڤی :
هرمیک ئێک ژ وان فێقیێن تامخۆش و ب مفایە بۆ ساخلەمیا لەشێ مرۆڤی، چونکی رێژەکا باش یا مادێن خوارنێ ڤیتامین دناڤ هرمیکێ دا هەنە،مرۆڤی ژ چەندین نەساخیێن مەترسیدار د پارێزیت.
لدووڤ نووچەکێ کو ل مالپه‌رێ organicfacts دا بەلاڤ بوویە و بەحسێ مفایێ خوارنا دوو هه‌رمیکان دکەت،هەکە مرۆڤ رۆژانە بخوت و دبێژیت، شاره‌زایێن وارێ خوارنێ شیرەتڵن ل مە دکەن،کو رۆژانه دوو هرمیکان بخوین، چونكی چه‌ندین مفا هه‌نه بۆ لەشی و مرۆڤی ژ مادێن ژه‌هراوی دپارێزیت،ل ڤێرێ دێ بەحسێ چه‌ند مفایێن خوارنا دوو هرمیکان كه‌ین ب شێوازەکێ رۆژانه:
.رۆژانه خوارنا دوو هرمیکان دێ سیسته‌مێ به‌رگریا لەشی ب هێز کەت:هەروەسا ئێك ژ مفایێن خوارنا هرمیکێ ئه‌وە کو سیسته‌مێ به‌رگریێ ب هێز دکەت، ئه‌ڤە ژی ژبەر هندێ کو هرمیک یا ده‌وله‌مه‌نده ب ڤیتامینێن C، B، E ، D، ژ بلی هندێ ژی رێژه‌یه‌كا زۆر یا مادێ كالسیۆم،ریشالان، پۆتاسیۆم، مه‌گنیسیۆم، مس و مه‌نگه‌نیز تێدا هەیه، كو ئه‌ڤ كانزا و ڤیتامینانه گەلەک د گرنگن بۆ ب هێزكرنا سیسته‌مێ به‌رگریا لەشی و پاراستنا وی ژ نه‌ساخیان.
.هرمیک رێژه‌یا كۆلسترۆلی نزم دکەت و دلی ژ نه‌خۆشیان دپارێزیت:ب ئەگەرێ هەبوونا پێكهاته‌یێ پێكتینی کو گەلەک یێ ب مفایە بۆ دابه‌زاندنا ئاستێ كۆلسترۆلی،هاریکارەکێ ب هێزە و رێژه‌یا كۆلسترۆلێ زیانبه‌خش کێم دکەت، هه‌روه‌سا ب ئەگەرێ هەبوونا ریشالێن خوارنێ،هاریکاریا ئاستێ كۆلسترۆلێ خراپ ددەت و ساخلەمیا دلی دپارێزیت.
ئەڤرۆ نیوز ، زنار تۆڤی :
رۆژا 16 یان ژی 17 گولانێ دێ ئێکەم رۆژا هەیڤا رەمەزانێ بیت و پەیڤدارێ وەزارەتا ئەوقافێ گوتیە ل رۆژا 15 هەیڤێ دا دێ لیژنا دیتنا هەیڤێ کۆم بیت.
نەبەز ئیسماعیل پەیڤدارێ وەزارەتا ئەوقافێ و کاروبارێن ئاینی ل حوکمەتا هەرێمێ دایە دیارکرن ،هەکە هەیڤا شەعبانێ 29 رۆژ بن دێ ئێکەم رۆژا هەیڤا رەمەزانێ 16 گولانێ بیت، بەلێ هەکە 30 رۆژ تەمام بن،دێ ئێکەم رۆژا رەمەزانێ 17 گولانێ بیت.
گوت ژی ،بۆ دیارکرنا ئێکەم رۆژا هەیڤا رەمەزانێ،دێ ل ئێڤاریا رۆژا 15 گولانێ لیژنا بلند یا دیتنێ هەیڤێ کۆم بیت و بریار دێ ل سەر ئێکەم رۆژا هەیڤا رەمەزانێ هێتە دان.
ئه‌ڤرۆنيوز:
رۆژنامه‌كێ له‌نده‌نێ پشت به‌ستن ب ژێده‌رێن ئيرانى ئاشكراكر كو عه‌لى خامه‌نه‌ئى رێبه‌رێ كۆمارا ئيسلامى يا ئيرانى هزر دلادانا قاسم سلێمانى وهه‌لوه‌شاندنا فه‌يله‌قا قودس يا سه‌ر ب له‌شكرێ پاسداران دكه‌ت.
رۆژناما (القدس العربي) دهژمارا خوه يا ئه‌ڤرۆ دا ئاماژه بۆ وێ چه‌ندێ كر كو عه‌لى خامه‌نه‌ئى رێبه‌رێ كۆمارا ئيسلامى يا ئيرانى هزر دهنده‌ك گۆهۆرينان دكه‌ت بۆ وێ چه‌ندێ دفه‌يله‌قا قودس دا ئه‌نجام بده‌ت.
رۆژناما ناڤبرى ئاماژه ب چه‌ند ژێده‌رێن ئيرانى دكه‌ت كو چاڤه‌رێ دهێته كرن خامه‌نه‌ئى گوهۆرينان دفه‌يله‌قا قودس دا بكه‌ت وبۆ وێ چه‌ندێ دو بژارده‌يه يێن هه‌ين، يا ئێكێ لادانا فه‌رماندێ وێ هێزێ قاسم سلێمانى ودانانا كه‌سه‌كى دى ل جهێ وى، بژارده‌يا دويێ ژى ئه‌وه هه‌موو فه‌يله‌قا قودس هه‌لوه‌شينيت وتێكهه‌لى له‌شكرێ پاسداران بكه‌ت.
ئه‌ڤرۆنيوز:
په‌يڤدارێ حوكمه‌تا هه‌رێما كوردستانێ راگه‌هاند، رۆژا سێشه‌مبى 1/5/2018 ل هه‌موو دام وده‌زگه‌هێن حوكمه‌تێ بێهنڤه‌دانا فه‌رمى يه ب هه‌لكه‌فتا رۆژا جيهانى يا كرێكاران.
سه‌فين دزه‌يى، په‌يڤدارێ حوكمه‌تا هه‌رێما كوردستانێ، گۆت ژى” هه‌ردو وه‌زاره‌تێن خواندنا بلند وپه‌روه‌ردێ دشێن وێ رۆژێ بكه‌ن بێهنڤه‌دان ودشێن ده‌واما ئاسايى يا خوه بكه‌ن وه‌كو رۆژێن دى”.
ئه‌ڤرۆنيوز:
ئاسايشا هه‌ولێرێ دكۆنگره‌كێ رۆژنامه‌ڤانى دا هوورده‌كاريێن كوشتنا به‌رپرسه‌كێ كۆمسيۆنا بلند يا هه‌لبژارتن وراپرسيان ل هه‌رێما كوردستان به‌لاڤ دكه‌ت ورادگه‌هينيت كو ئه‌و روودانه ژئه‌گه‌رێ كێشه‌كا جڤاكى بوو وچو په‌يوه‌ندى ب هه‌ڤركيا سياسى ڤه نينه.
ئێڤاريا ئه‌ڤرۆ ئێكشه‌مبى 29/4/2018 ، تارق نورى ريڤه‌به‌رێ ئاسايشا هه‌ولێرێ دكۆنگره‌كێ رۆژنامه‌ڤانى دا گۆت” ب رێيا كاميرێن چاڤدێريێ بكژێن فارس محه‌مه‌د رێڤه‌به‌رێ گشتى ل كۆمسيۆنا بلند يا هه‌لبژارتن وراپرسيان ل هه‌رێما كوردستانێ هاتن ئاشكراكرن ول دووڤ ڤه‌كۆلينان دياربوويه كو ڤێ روودانێ چو په‌يوه‌ندى ب هه‌ڤركيا سياسى ڤه نينه وهه‌ردو بنه‌مال ب سه‌ر ئێكه‌تى نيشتمانى كوردستان ڤه‌نه وكێشه‌كا جڤاكى هه‌بوو”.
رێڤه‌به‌رێ ئاسايشا هه‌ولێرێ زێده‌تر گۆت” ل رۆژا ئه‌نجامدانا وێ تاوانێ، پشتى چه‌ڤدێريا فارس محه‌مه‌د دكه‌ن ل ده‌مێ ده‌ركه‌فتنا وى ژ مال تا وى ده‌مێ دچيته ده‌واما خوه ل كۆمسيۆنێ، سێ تاوانبار دناڤ ترومبێله‌كا ژ جۆرێ ئۆپل ڤيكترا ل به‌رده‌م فاميلى مۆل ته‌قێ لێ دكه‌ن ودكوژن”.
رۆهنكر ژى” هێشتا تاوانبار نه‌هاتينه ده‌سته‌سه‌ركرن ويێن چووينه ده‌رڤه‌ى هه‌ولێرێ، به‌لێ تاوانبار فاروق غازى باشتەپەیی ته‌قه يا ل فارس محه‌مه‌دى كرى وئێكێ دى ب ناڤێ هونه‌ر عه‌بدولكه‌ريم ل گه‌ل كه‌سه‌كێ دى دناڤ ترومبێلێ دا بوون وئه‌م دپشت راستين يێن چووينه ده‌رڤه‌ى هه‌ولێرێ”.
گۆت ژى” بنه‌مالا غازى باشتەپەیی پێشمه‌رگه‌نه ول يه‌كه‌يا 70ده‌وامێ دكه‌ن”.
فارس محه‌مه‌د، كو ب فارس جوتياران يێ ناڤداربوو، رێڤه‌به‌رێ گشتيێ كارگيرى بوو ل كۆمسيۆنا بلند يا هه‌لبژارتن وراپرسيان ل هه‌رێما كوردستانێ وكادره‌كێ ئێكه‌تيێ بوو، ل رۆژا سێشه‌مبيا بۆرى ل سه‌ر جاده‌يا 100 مه‌ترى ل باژێرێ هه‌ولێرێ ژلايێ چه‌ند چه‌كدارێن نه‌نياس ڤه ته‌قه لێ هاته كرن وگيانێ خوه ژده‌ست دا.
ئه‌ڤرۆنيوز:
جێگرێ سه‌رۆكێ پارتى ديموكراتى كوردستان دچارچۆڤێ كه‌رنه‌فالا بانگه‌شا ليستا پارتى يا هژمار 184 ل هه‌ولێرێ راگه‌هاند، دڤێت ل رۆژا ده‌نگدانێ ب سه‌لمينين كو پارتى پێشه‌نگه وهێزا ئێكێ يا كوردستانێ يه.
نێچیرڤان بارزانی، جێگری سەرۆكێ پارتی دیموكراتی كوردستان، دگۆتاره‌كێ دا گۆت” پارتى دخوازت هه‌موو هيزێن سياسى يێن كوردستانى بريارێ بده‌ن ل سه‌ر پشكداريكرن يان نه‌كرن دليسته‌كێ دا دهه‌لبژارتنان دا، به‌لێ ئه‌و ئێكرێزى يه دروست نه‌بوو”.
نێچيرڤان بارزانى رۆهنكر ژى” هنده‌ك لايه‌نان خواست هه‌لبژارتنان بۆ لاوازكرنا پارتى بكاربينن، به‌لێ دڤێت ل رۆژا ده‌نگدانێ بسه‌لمينين كو پارتى پێشه‌نگه وهێزا ئێكێ يه ل كوردستانێ”.
گۆت ژى” ڤان هه‌لبژارتنان بۆ پارتى گرنگيا تايبه‌ت يا خوه يا هه‌ى وپێدڤيه هه‌موو ئه‌ندام ولايه‌نگرێن پارتى گرنگيا ڤان هه‌لبژارتنان بزانن ودچارچۆڤێ بانێ خوه بزاڤا بده‌ستڤه‌ئينانا ده‌نگێن پتر بۆ پارتى بكه‌ن”.
ئه‌ڤرۆنيوز:
ئه‌ندامه‌كێ مه‌كته‌با سياسى يا پارتى ديموكراتى كوردستان ئاشكراكر، كه‌ركووك يا داگيركريه وبه‌رپرسێ نوكه يێ پاسه‌وانێن پارێزگه‌هێ به‌رى نوكه داعش بوو وپۆليسێن وه‌لاته‌كى دى ب جلكێن پۆليسێن عيراقێ ل كه‌ركووكێ يێن هاتينه به‌لاڤكرن وئه‌سته‌مه كه‌ركووك ب وى شێوه‌ى بمينيت.
ئه‌ڤرۆ ئێكشه‌مبى ل ئاكرێ دچارچۆڤێ هه‌وا بانگه‌شا هه‌لبژارتنان دا بۆ ليستا پارتى، كه‌مال كه‌ركووكى ئه‌ندامێ مه‌كته‌با سياسى يا پارتى دكۆره‌كى دا دپشكه‌كا مه‌زن يا ئه‌خڤتنين خوه دا به‌حسێ ره‌وشا كه‌ركووكێ كر.
كه‌مال كه‌ركووكى دياركر” ئالايێ كوردستانێ ل دووڤ دستوورێ عيراقێ رێ پێ هاتيه دان، به‌لێ ل كه‌ركووكێ يێ هاتيه قه‌ده‌غه‌كرن پشتى ژئه‌گه‌رێ خيانه‌تا خيانه‌تكاران هاتيه داگيركرن”.
كه‌ركووكى ئاماژه دا” ل دووڤ مادێ 117 ژ دستوورێ عيراقێ، په‌رله‌مانێ كوردستانێ وه‌كو ژێده‌ره‌ك بۆ قانوون دانانێ بۆ هه‌رێما كوردستانێ هاتيه نياسين وهه‌ر برياره‌كا ژ وى په‌رله‌مانى هاتبيته ده‌ركرن دێ كار پێ هيته كرن، بريارا ئالايێ كوردستانێ ژى ل دووڤ په‌رله‌مانێ كوردستانێ بوو، كو ننوكه ل كه‌ركووكێ هاتيه قه‌ده‌غه‌كرن”.
دياركر” جودا ژ چار هێزێن عيراقى، 12 جۆرێن هێزا حه‌شدا شه‌عبى ل كه‌ركووكێ يێن هه‌ين وهه‌بوونا وان هێزان هوكارن بۆ نه‌ساقامگيريا ره‌وشا ته‌ناهيێ ل كه‌ركووكێ وده‌وروبه‌ر”.
گۆت ژى” به‌رپرسێ پاسه‌وانێن پارێزگه‌ها كه‌ركووكێ ب وه‌كاله‌ت، پێشتر داعش بوو، ژبلى وێ چه‌ندێ ژى ل كه‌ركووكێ پۆليس يا هه‌ى جلكێن پۆليسێن عيراقى يێن ل به‌ر، به‌لێ ئه‌و پۆليسێ وه‌لاته‌كێ دى يه، پارتى بزاڤان بۆ چاره‌سه‌ركرنا كێشا كه‌ركووكێ دكه‌ت وئه‌سته‌مه كه‌ركووك ب ڤى شێوه‌ى بمينيت، مه ب دانوستاندنێ بزاڤ يێن كرين كو ئه‌ز هێزه بچنه ده‌رڤه‌ى كه‌ركووكێ”.
ئه‌ڤرۆنيوز:
به‌ربژاره‌كێ هه‌لبژارتنێن جڤاتا نوونه‌رين عيراقێ دشه‌ره‌كێ عه‌شايرى دا ل رۆژئاڤايێ به‌غدا دهيته كوشتن.
ژيده‌ره‌كێ ئه‌منى ل باژێرێ به‌غدا، ئه‌ڤرۆ ئێكشه‌مبى 29/4/2018 بۆ ده‌زگه‌هێن راگه‌هاندنێ يێن عيراقى گۆت”ئه‌ڤرۆ سپێدێ ل ده‌ڤه‌را مه‌شته‌ل ب رۆژئاڤايێ به‌غدا شه‌ره‌كێ عه‌شايرى روودا وبوو ئه‌گه‌رێ كوشتنا (نه‌جم حه‌سناوى) به‌ربژارێ ليستا ده‌وله‌تا قانوونێ بۆ هه‌لبژارتنێن جڤاتا نوونه‌رێن عيراقێ”.
وى ژێده‌رێ ئه‌منى گۆت ژى” پشتى روودانێ هێزه‌كا ئه‌منى جهێ روودانێ دۆرپێچكر وته‌رمێ وى به‌ربژارى ژى هاته ڤه‌گوهاستن بۆ نوشداريا داد ودوسيا ڤه‌كۆلينێ ژى بۆ زانينائه‌گه‌رێ روودانێ هاته ڤه‌كرن”.
نيشاندان