ئه‌ڤرۆ نيوز:

رۆژنامەکا ئیسرائیلێ دیار دکەت کو تورکیا رۆژ ب رۆژێ پتر خوە نێزیکی روسیا دکەت و نھا تورکیا بەرھەڤە ل گەل رژێما بەشاری ژی دانوستاندنان بکەت و ھێزێن خوە ژ سووریێ ڤەکێشیت و ل ھەمبەر ڤێ یەکێ تورکیا دخوازیت بەشار شەرێ کوردان بکەت و نەھێلیت کورد ل سووریێ بگەھنە مافێن خوە و ئەو یەک ژی مەترسیەکا مەزنە بۆ کوردان ل سووریێ.

رۆژناما ھاریتس یا ئیسرائیلێ د راپۆرتەکێ دا بەحسێ مەترسیێن ل سەر کوردان ل سووریێ کریە و ئاماژە ب ھندێ کریە کو تورکیا گەلەک داخوازیێن روسیا قەبوول کرن و پوتین ژی ئەردۆگانی ل ھەمبەر ئەمریکا و ئورۆپا بۆ ب ھێزکرنا پێگەھێ خوە ل رۆژھەلاتا ناڤین بکار دئینیت و ژ بەر ھندێ ژی تورکیا ب پشتەڤانیا روسیا شیا عەفرینێ و گەلەک دەڤەرێن دی یێن سووریێ بکەتە بن کۆنترۆلا خوە، پشتی سەرکەفتنا ئەردۆگانی د ھەلبژارتنێن سەرۆک کۆماریێ دا ئەردۆگان دخوازیت ئۆپەراسیۆنێن ل دژی پەکەکێ ل قەندیلێ و دەڤەرێن دی بەرفرەھتر بکەت.

د بەردەوامیا راپۆرتێ دا ئەو یەک ژی ھاتیە دیارکرن کو ئەردۆگان و حوکمەتا وی دخوازن رێگریێ ل ب ھێزبوونا کوردان ل سووریێ بکەن، ژ بەر ھندێ ژی دەمەکە ب ناڤبژیڤانیا روسیا شاندێن تورکیا ب نھێنی ل گەل رژێما سووریێ ھەڤدیتنان دکەن و تورکیا رازیە ھێزێن خوە ژ سووریێ ڤەکێشیت و دەڤەرێن نھا ل ژێر کۆنترۆلا خوە رادەستی رژێما بەشاری بکەت، ل ھەمبەر ڤێ یەکێ ژی تورکیا دخوازیت رژێما بەشار شەرێ کوردان بکەت و نەھێلیت کورد ل سووریێ بگەھنە مافێن خوە، ئەردۆگانی چەندین جاران ژی بۆ بەرپرسێن روسیا و ئەمریکا دیارکریە کو ئەو وەکو تورکیا ب چو رەنگەکێ قەبوول ناکەن کو کورد ل سووریێ ھەرێمەکا ئۆتۆنۆمی بۆ خوە ئاڤا بکەن، چونکو ئەو یەک دێ مەترسیێن خوە بۆ تورکیا ھەبن و ژ بەر بەرژەوەندیێن ئەمریکا و روسیا یێن ل گەل کوردان رەنگە جارەکا دی کورد ببنە قوربانیا پیلانەکا دی یا نێڤدەولەتی، ژ بەر ھندێ ژی مەترسیەکا مەزن ل سەر پاشەرۆژا کوردان ل سووریێ یا ھەی.

رۆژناما ئیسرائیلێ د پشکەکا دی یا راپۆرتا خوە دا بەحسێ ھندێ ژی دکەت کو نھا ئیران ب ھەموو رەنگەکێ ل دژی ھندێ یە کو تورکیا ھێرشی قەندیلێ بکەت، بەرپرسێن ئیرانێ دبێژن نابیت تورکیا سەروەریا ئاخا عیراقێ بنپێ بکەت، لێ د بنەمایێ خوە دا ئیران ل گەل ھندێ نینە کو پەکەکە ژ قەندیلێ بھێتە دەرخستن، چونکو قەندیل جھەکێ ستراتیژی و گرنگە و ھەکە پەکەکە ل وێرێ نەمینیت رەنگە ھێزێن دژبەرێن ئیرانێ بچنە وی جھی و ئیران ژ ھندێ دترسیت، ژ بەر ڤێ یەکی ژی رەنگە ناکۆکیێن نوو د ناڤبەرا ئیرانێ و تورکیا دا ل دۆر سووریێ دەرکەڤن و ئەو یەک دێ کارتێکرنا خوە ل پەیوەندیێن ھەر دو وەلاتان کەت، ھەرچەندە ھەر دو وەلات ل دژی ھندێ نە کو کورد بگەھنە مافێن خوە، لێ د بابەتێ پەکەکێ و سووریێ دا ئیران ل دژی ھەلویست و دەستێوەردانێن تورکیا یە.

د دووماھیا راپۆرتا رۆژناما ئیسرائیلی دا ئەو یەک ژی ھاتیە دیارکرن کو رەنگە ئەمریکا، روسیا و تورکیا ل دۆر بەرژەوەندیێن خوە یێن ھەڤپشک ل سووریێ بگەھنە رێککەفتنەکێ و ئەو یەک دێ ل سەر بنەمایێ لاوازکرنا و نەھێلانا کوردان ل سووریێ بیت، ژ بەر ھندێ ژی ھەکە ئەمریکا کوردان ب تنێ بھێلیت رەنگە کورد ل سووریێ تووشی مەترسیەکا مەزن بن.

ئه‌ڤرۆ نيوز:

سەرۆکێ باسکێ پاشەرۆژا ئێزدیان دیارکر، بۆ جارا ئێکێ یە ل ھەرێما کوردستانێ باسکێ پاشەرۆژا ئێزدیان ھاتە دامەزاندن و ب فەرمی ھاتیە تۆمارکرن، نوکە مە دڤێت پەێوەندیێن خوە ل گەل ھەموو لایەنیێن سیاسی ل ھەرێما کوردستانێ ب ھێز بکەین، وتیگەھشتنەکێ د ناڤ ئێزدیاندا دروست بکەین، کو دیموکراسیی ل ھەرێما کوردستانآ یا ھەی بەلگە ژی ئەڤە جارا ئێکی یە ئێزدی دشێن گیانەکێ سیاسی دروست بکەن.

عادل شێخ فرمان سەرۆکێ باسکێ پاشەرۆژا ئێزدیان بۆ ئەڤرۆ راگەھاند، بەرنامە وکارێ پارتا وان تایبەتمەندەیا ئێزدیان ل کوردستانێ و عێراقی ل گەل مافێن ئێزدیان بھێتە پاراستن، مە دیت سال بۆ سالیێ چو ھاتە روودان ئاریشە مە مەزنتربوویە دەرباری گوڕێن بکۆم ورەڤاندییان وئێزدیان کوچبەر بووینە ئەم یێ ھەولدەن خزمەتا مللەتی خوە بکەن.

سەرۆکێ باسکێ پاشەرۆژا ئێزدیان ھەروەسا دیارکر، ل سالا 2013 بەغدا ئەم بناڤێ پەرلەمانێ ئێزدی ھاتینە دامەزراندن وتۆمارکرن، نوکە دێ جارەکا دێ خوە ل بەغدا تۆمارکەین و قانوونا حزبا ژی ھاتە گوھارتن دێ ل نێزیک ڤان پێنگاڤان ھاڤێژین، دێ کارکەین مافێن ئێزدیان بھێنە بەرفرەھکرن، دێ دناڤ حکومەتا عێراقی دا ل سەر ئاستی پارێزگەھا مووسل کارکەین کو پێنچ ھەتا شەش کورسیێن کۆتا بۆ ئێزدیان بن، ل ھەرێما کوردستانێ ژی کورسیا کۆتا ل سەر پارێزگەھا دھۆکێ بھێتە دانان بۆ ئێزدیان، ھەکە ل ھەرێما کوردستانێ چاڤەکێ مەزن ل مە ھاتە تەماشەکرن ئەڤ کورسیێن کۆتا ھاتە دان دێ ئەم شێن ل بەغدا ژی کورسیا زێدە کەین، دێ بیژینە بەغدا مە ل ھەرێما کوردستانێ ماف ھەیە وپێدڤیە ل بەغدا ژی ئەو ماف ب ئێزدیان ھەبیت.

شێخ عادل فەرمان ھەروەسا گۆت: کورسێن کۆتا بۆ ئێزدیان دگرنگن ئەم ب ئێک کورسیێ رازی نابین، چونکو ئەم ئێزدی وەکو مالەکێ نە وەکو ئێک جڤاتی نە بلا جۆداھیی جۆگرافیا ئێزدیاندا ھەبیت، لێ ئێزدی خوشیی و نەخۆشیان پێکڤە گرێداینە وبریاراندا ژی ئێزدی پێکڤە گرێداینە ژبەر ڤی چەندی دێ داخازا ھژمارەکا کورسین کۆتا کەین، داکو نوونەرێن شنگال و باشیک وبەحزانی ژی تێدا ھەبن.

زێدەتر گۆت: ھەلبژارتنیێن پەرلەمانێ کوردستانێ ھەکە ئێزدیان کۆتا نەبیت ئەم نەشین پێشکداریی بکەن ودەنگان دەستخوەڤە بینن چونکو دەنگیێن ئێزدیان ل دھۆک دکێمن ناگەھنە وێ رێژی ئێزدی بشین کورسیەکێ پێ وەرگرن.