ئه‌ڤرۆنيوز:

‌په‌رله‌مانێ كوردستانێ ئه‌ڤرۆ ئێكشه‌مبى 1/7/2018 ل روونشتنه‌كا ئاسايى يا خوه‌ دا دنوستاندن ل دۆر درێژكرنا كاركرنێ ب قانوونا به‌رهنگاريا تيرۆرێ يا هژمار 3 خسته‌ دبه‌رنامێ كارى دا و ب پتريا ده‌نگان هاته‌ په‌سه‌ندكرن.

ل دووڤ ژێده‌ره‌كى ژ په‌رله‌مانێ كوردستانێ بۆ ئه‌ڤرۆنيوز دايه‌ دياركرن كو ئه‌ڤ قانوونه‌ بۆ ده‌مێ دو سالێن دى دێ كار پێ هيته‌ كرن.

دهێته‌ زانين، ئه‌ز پرۆژه‌ قانوونه‌ چه‌ندين ساله‌ هاتبوو راوه‌ستاندن وپێدڤى بوو ل سالا 2016 بهێته‌ تمامكرن وهه‌ر دو سالان جاره‌كێ ده‌نگ ل سه‌ر بهێته‌ دان.

ئه‌ڤرۆنيوز:

وه‌زاره‌تا ساخله‌ميێ ل هه‌رێما كوردستانێ تۆماركرنا ئێكه‌م حاله‌تا تووشبوونێ ب نه‌خوه‌شيا تايا خوين به‌ربوونێ راگه‌هاند وبۆ ڤێ مه‌ره‌مێ ژى سێ بريار ده‌ركرن.

خالس قادر، په‌يڤدارێ وه‌زاره‌تا ساخله‌ميێ ل هه‌رێما كوردستانێ  بۆ (ئه‌ڤرۆنيوز)  گۆت” ل ده‌ڤه‌را سۆران ئێكه‌م حاله‌تا توشبوونێ ب نه‌خوه‌شيا تايا خوين به‌ربوونێ هاته‌ تۆماركرن”.

خالس قادر گۆت ژى” هه‌رچه‌نده‌ ئه‌و حاله‌ت يا هاتيه‌ تۆماركرن، به‌لێ ساخله‌ميا وى كه‌سێ توشبوويێ يا جهگيره‌ ونوكه‌ يێ د بن چاڤدێريا نوشداران دا”.

گۆت ژى” مه‌ترسيا به‌لاڤبوونا وێنه‌خوه‌شيێ تنێ دناڤ ئاژه‌لداران وقه‌سابان دا يا هه‌ى”.

په‌يڤدارێ وه‌زاره‌تا ساخله‌ميێ ئاماژه‌ دا كو ئه‌ڤرۆ ئێكشه‌مبى 1/7/2018 لژنا بلند يا كونترۆلكرنا نه‌خوه‌شيا تايا خوين به‌ربوونێ ل سه‌ر ئاستێ هه‌رێما كوردستانێ ب سه‌رۆكاتيا وه‌زيرێ ساخله‌ميێ وب به‌رهه‌ڤبوونا پارێزگه‌رێ هه‌ولێرێ ونوونه‌رێن وه‌زاره‌تێن چاندنێ كۆمبوون وهه‌موو پێرابوونان دێ وه‌رگرن بۆ به‌رهنگاريا وێ نه‌خوه‌شيێ.

ل دووڤ پێزانينان دوێ كۆمبوونێ دا، وه‌زاره‌تا ساخله‌ميێ ل هه‌رێما كوردستانێ وه‌كو خوه‌پاراستن ورێگرتن ل به‌لاڤبوونا وێنه‌خوه‌شيێ سێ بريار ده‌ركرن ئه‌وژى پێكئينانا لژنه‌كێ بۆ هشياركرنا خه‌لكى ژ وێ نه‌خوه‌شيێ ودابينكرنا بودجه‌كێ ژلايێ حوكمه‌تا هه‌رێمێ بۆ برژاندنا ده‌رمانى بۆ رێگرتنێ ل وێ نه‌خوه‌شيێ وئه‌و كاره‌ ژى دێ ل گوندان هێته‌ ده‌ستپێكرن، بريارا سيێ ژى دروستكرنا ژۆرا كارى ل هه‌موو پارێزگه‌هان تايبه‌ت ب وێ نه‌خوه‌شيێ.

ئه‌ڤرۆنيوز:

ده‌زگه‌هێ خێرخوازى يێ بازرانى ورێكخراوا وينكس ئوف هێلپى يا ئه‌لمانى ب مه‌ره‌ما گه‌هاندنا هاريكاريێن زێده‌تر بۆ ئاواران وپه‌نابه‌ران ل هه‌رێما كوردستانا عيراقێ وكۆمكرنا هاريكاريێن وه‌لاتێن ئورۆپى وبه‌لاڤكرنا هاريكاريان ب رێيا ده‌زگه‌هێ خێرخوازى يێ بارزانى ل سه‌ر لێقه‌وميان دا، رێككه‌فتنه‌كا لێكتێگه‌هشتنێ دناڤبه‌را ده‌زگه‌هێ خێرخوازى يێ بارزانى ورێكخراوا وينگس ئوف هێلپى يا ئه‌لمانى هاته‌ ئيمزاكرن.

ل رۆژا شه‌مبيێ 30/6/2018 رێكخراوا وينگس ئۆف هێلپى يا ئه‌لمانى ب به‌رهه‌ڤبوونا فران فرانكێ سه‌رۆكێ رێكخراوێ وكارزان نورى به‌رپرسێ ئۆفيسا هه‌ولێرێ يا ده‌زگه‌هێ خێرخوازى يێ بارزانى رێككه‌فتنه‌كا لێكتێگه‌هشتنێ ل دۆر ميكانيزما كۆمكرنا هاريكاريان ل وه‌لاتێن ئه‌ورۆپى وگه‌هاندنا وان بۆ هه‌رێما كوردستانێ ئيمزاكر.

ل ده‌قێ وێ رێككه‌فتنێ هاتيه‌ كو لايه‌نێ ئێكێ ئانكو رێكخراوا ئه‌لمانى دێ رابيت ب كۆمكرنا هاريكاريێن زێده‌تر ل ئه‌لمانيا ووه‌لاتێن ئه‌ورۆپى وگه‌هاندنا هاريكاريان بۆ عيراقێ ب رێيا فرۆكان يان ب رێيا ئه‌ردى وپاشى ژلايێ ده‌زگه‌هێ خێرخوازى يێ بارزانى دێ ئه‌و هاريكارى هێنه‌ به‌لاڤكرن.

ل دووڤ وێ رێككه‌فتنا هه‌ڤپشك، هه‌تا دووماهيا سالا 2019 دێ كار پێ هێته‌ كرن ل گه‌ل ئه‌گه‌رێ نووكرنا ب رازيبوونا هه‌ردو لايه‌نان.

دهێته‌ زانين، رێكخراوا وينگس ئۆف هێلپى يا ئه‌لمانى ل ده‌مێن بۆرى چه‌ندين كاروانێن هاريكاريێن مرۆڤايه‌تى گه‌هاندينه‌ هه‌رێما كوردستانێ وب هه‌ڤكارى ل گه‌ل ده‌زگه‌هێ خێرخوازيێ بارزانى ل سه‌ر لێقه‌وميان وئاواران وپه‌نابه‌ران به‌لاڤكرينه‌.

شایه‌نی باسه‌ رێكخراوی وینگس ئۆف هێڵپی ئه‌ڵمانیا له‌ رابردوودا چه‌ندین كاروانی هاوكاری مرۆیی گه‌یاندۆته‌ كوردستان و به‌هاوبه‌شی له‌گه‌ڵ ده‌زگای خێرخوازیی بارزانی به‌سه‌ر لێقه‌وماوان و ئاواره‌و په‌نابه‌راندا دابه‌شكراون.

ئه‌ڤرۆ نيوز:‏

ژ ئەگەرێ مەترسیێن داعش ل رۆژێن بۆری ھژمارەکا وەلاتیێن کوردێن کاکەیی ئاوارەبوون ‏و سەرۆکێ لیژنا دەڤەرێن کوردستانی یێن دەرڤەی حوکمەتا ھەرێمێ ژی دبێژیت کاکەیی ‏یێ دھێنە جینۆسایدکرن.‏

شوان شێخ ئەحمەد، سەرۆکێ لیژنا دەڤەرێن کوردستانی یێن دەرڤەی ئیدارەیا حوکمەتا ‏ھەرێمێ ل پەرلەمانێ کوردستانێ بۆ رۆژناما ئەڤرۆ دیار کر کو چەند رۆژەکە تیرۆرستێن ‏داعش ل کەرکووکێ و خانەقین دەست ب چالاکیێن خوە کریە ڤە و ئاکنجیێن دەڤەرێن ‏کوردستانی یێن سنوورێ مادێ 140 ل بن گەفێن تیرۆرستان دا ژیانا خوە دەرباز دکەن، ‏ھەتا نوکە چەندین وەلاتی ھاتینە کوشتن و رەڤاندن، ھەروەسا ھژمارەکادی ژی ‏ئاوارەبووینە، ب تایبەتی کوردێن کاکەیی نوکە یێ دھێنە جینۆسایدکرن و ژناڤبرن ل ‏دەڤەرێن دەوروبەرێ کەرکووکێ و قەزا داقووق.‏

ناڤھاتی ئاماژە دا وێ چەندێ کو پێدڤیە ھێزا پێشمەرگەی بھێتە ڤەگەڕاندن بۆ ئەڤان ‏دەڤەران، چونکی ھێزێن عیراقی نەشێن رەوشا ئەمنی بپارێزن و تیرۆرستان ژناڤ ببەن، ‏پشتی روودانێن 16ی ئۆکتۆبەرێ گەفێن مەزن لسەر دەڤەرێن کوردستانی یێن ھاتینە ‏داگیرکرن پەیدابووینە و ب ڤەگەڕیانا ھێزا پێشمەرگەی دێ رەوش ھێتە تەناکرن، ب تنێ ل ‏چەند رۆژێن بۆری چەندین کارەسات پەیدابووینە و ھژمارەکا وەلاتیان بووینە قوربانی، ‏ئەڤە ژی بۆ کەمتەرخەمیا حوکمەتا بەغدا ڤەدگەڕیت کو ئەرکێ وانایە وەلاتیان ژ ھەر ‏گەفەکێ بپارێزن.‏