ئه‌ڤرۆ نيوز:

مامۆستایەکا زانستێن سیاسی ل زانکۆیا تەھرانێ راگەھاند کو قەیرانا نھا یا ئابووری ژیان ل ئیرانێ ‏راگرتیە و مخابن ھەتا نھا حوکمەتێ چو بەرنامە بۆ باشکرنا ژیانا وەلاتیان نینە و ھەکە ‏پێرابوونێن پێدڤی نەھێنە وەرگرتن رەنگە ئیران ژی وەکو سوڤیەتا بەرێ پارچە ببیت.‏

ئێلاھێ کولایی مامۆستایا زانستێن سیاسی ل زانکۆیا تەھرانێ و ئێک ژ کەسایەتیێن ناڤدار یێن ‏ئیرانێ ل دۆر قەیرانا ئابووری و خوەنیشادانێن ل ئیرانێ راگەھاند کو مخابن ئیران تووشی قەیرانەکا ‏مەزن یا ھاتی، قەیرانا ئابووری وەکو قەیرانێن دی نینن و دشێت ب ساناھی سیستەمێ سیاسی ل ‏ھەر وەلاتەکێ ب گوھۆریت، نھا رەوشا ژیانا وەلاتیان ل ئیرانێ گەلەکێ خراب بوویە، مخابن ‏حوکمەتێ ژی چو بەرنامە نینن و تنێ ب رێیا درووشمان دخوازن رەوشێ ئارام بکەن کو ئەو یەک ‏ژی ل گەل راستیا سیاسی و جڤاکی یا وەلاتێ مە ناگونجیت و ژ بەر ھندێ ژی نھا وەلاتێ مە تووشی ‏قەیرانەکا مەترسیدار بوویە و رەنگە ئەنجامێن گەلەک خراب ل دووڤ خوە بھێلیت و گۆت: ‏‏(بەرپرسێن ئیرانێ نەشیان مفایەکا باش ژ گوھۆرینێن ل دەڤەرێ وەربگرن و داھاتێ ئیرانێ ل جھێن ‏دی دھێتە مەزاختن و خەلک د رەوشەکا خراب دا دژیت، ژ بەر ھندێ ژی ئەز دبێژم ھەکە یا ‏پێدڤی نەھێتە کرن دێ ئیران ژی وەکو سوڤیەتێ پارچە بیت، چو کەسەک ژی نەشێت ئاستەنگیان ‏ل ھەمبەر ڤێ یەکێ دروست بکەت، رەوشا نھا نیشا ددەت کو حوکمەتێ ل ھەمبەر چارەکرنا ‏قەیرانێ چو نەکریە و رەوش رۆژ ب رۆژێ خرابتر دبیت).‏

مامۆستایا زانستێن سیاسی ل زانکۆیا تەھرانێ ئەو یەک ژی دیارکر کو دڤێت ئەم وانەیان ژ وەلاتێن ‏دی یێن رۆژھەلاتا ناڤین وەربگرین، ھەکە قەیرانا نھا وەسا بەردەوام بیت ئێدی دڤێت ئەم چاڤەرێ ‏ھەر پێشھاتەکا خراب بین، چونکو خەلکێ مە برسیە و نەشێت نانی بۆ خوە بکڕیت و مرۆڤێن ‏برسی دشێن ھەر تشتەکێ بکەن، ب درووشمان کەس تێر نابیت، دڤێت حوکمەت یا پێدڤی بکەت و ‏گۆت: (ھەکە ئەم بەرێ خوە بدەینە رەوشا سوڤیەتێ یا وی دەمی و رەوشا نھا یا وەلاتێ مە د گەلەک ‏بیاڤان دا وەکو ئێکن، ئەو یەک ژی نیشا ددەت کو سیاسەتا ئەمریکا تا رادەیەکا باش شیایە ‏سەرکەفتی بیت و مخابن حوکمەتێ ژی چو بەرنامێ نەبووینە و نینن، ژ بەر ھندێ ژی ھەکە رەوش ‏وەسا بەردەوام بیت دێ ئیران پارچە بیت و دیارە ئەمریکا ژی ڤێ یەکێ دخوازیت و مخابن ‏بەرپرسێن مە نەشیان چاڤێ خوە بدەنە خەلکێ خوە دا رێگریێ ل پیلانێن ئەمریکا بکەن).‏

ناڤھاتیێ ئەو یەک ژی دیارکر کو ئیران ئێکە ژ وەلاتێن ناڤدار یێن رۆژھەلاتا ناڤین کو جھێ شۆرەش ‏و گوھۆرینان بوویە و ئەڤرۆکە خەلکێ ئیرانێ ژ سیستەمێ نھا و رەوشا ژیانا خوە بێزار بوویە و ‏دخوازیت گوھۆرینان بکەت، ھەکە سیستەمێ سیاسی ڤێ یەکێ نەکەت دێ خەلک سیستەمی ب ‏گوھۆریت، ژ بەر ھندێ ژی ئەز دبێژم رەنگە ئەم ژی تووشی چارەنڤیسێ ئێکەتیا سوڤیەتا بەرێ ‏ببین.‏

ل ئالیێ دی خوەنیشادان ل پرانیا باژێرێن ئیرانێ ل دژی قەیرانا ئابووری و بێکاریێ بەردەوامن و ل ‏باشورێ ئیرانێ ھەتا نھا چەندین کەس ھاتینە کوشتن و رێژەکا مەزن یا خەلکی ژی ھاتنە ‏دەستەسەر کرن و بەرپرسێن ئیرانێ ژی گەفان ل خەلکی دکەن کو یێن ببنە ئەگەرێ ئالۆزیان دێ ‏ھێنە سێدارەدان و ھەتا نھا ژی خوەنیشادان بەردەوامن و ب تایبەتی ل تەھرانێ خوەنیشادان ل ‏چەندین تاخێن مەزن یێن وی باژاری بەردەوامن.‏

ئه‌ڤرۆ نيوز:

ئەندامەکێ جڤاتا سەرکرداتیا ئێکەتی نیشتیمانی کوردستان دخوازیت، کورد دڤێ ‏قۆناغێ دا ئێکگرتی و ھێزەکا کاریگەر بن ھەمبەری بەغدا، ھەروەسا دیارکر، ھەتا ‏نوکە چو ئاستەنگ ھەمبەری برێڤەچوونا ھەلبژارتنێن پەرلەمانێ کوردستانێ دا ‏نینن، کو 30ی ئیلوونێ بھێنە ئەنجامدان. ‏

فەرید ئەسەسەرد، ئەندامێ جڤاتا سەرکرداتیا ئێکەتی نیشتیمانی کوردستان بۆ ‏رۆژناما ئەڤرۆ گۆت: رەوشا نوکە یا ھەرێما کوردستانێ دخوازیت ھەموو ھێز لایەنێن ‏سیاسی پێکڤە کۆمببن، مخابن تنێ ددەمێ قەیران و چێبوونا ئاریشەیان لایەنێن ‏سیاسی کۆمدبن، بەلێ ھەگەر بەری نوکە ئەم شیاباینە جڤاتەکێ یان ھەر ناڤەکێ ‏ھەبیت چێکەین ئەڤە جڤاتە بێگومان دا رۆلێ خوە بۆھەر پرسەکێ ھەبیت، ھەبوونا ‏جڤاتەکا سیاسی مفایەکێ زۆر ھەیە، پێدڤیە ھەماھەنگی د ناڤبەرا لایەنێن سیاسی ‏دا ھەبیت، ژ بەر کو گەلێ کوردستانێ ھەموویان ئێک بەرژەوەندی ھەیە، ھەردەمێ ‏ھەماھەنگی نەبیت پارتی لایەکی و ئێکەتی لایەکی و ھەر لایەنەکێ دیکە دێ بەھرا ‏خوە تووشی زیانبیت، بەرۆڤا ژی ئێک رێزی د بەرژەوەندیا لایەنێن سیاسی و مللەتی ‏دایە، لەوڕا ددەمێ ئێکگرتنا لایەنێن سیاسی دکارن ھێزەکا کاریگەر ھەمبەر بەغدا ‏چێکەن و گورەی شیانێن خوە مافێن مللەتێ کوردستانێ ب دەستڤە بینن.

‎‎ل دۆر ئەنجامدانا ھەلبژارتنێن ھەرێما کوردستانێ ژی ئەندامێ جڤاتا سەرکرداتیا ‏ئێکەتیێ دیارکر، ھەتا نوکە ئەم وەکی ئێکەتی پێگیرین ب ژڤانێ ھەلبژاردتنێن ‏پەرلەمانێ کوردستانێ لڕۆژا 30ی ھەیڤا ئیلوونا داھاتی، بەلێ مە بۆچوونەکا دی ‏ھەبوو ئەوژی برێڤەچوونا ھەڵبژارتنێن پەرلەمانێ کوردستانێ و جڤاتێن ‏پارێزگەھا پێکڤە بھێتە ئەنجامدان و ئەف بۆچوونا خوە مە گەھاندیە لایەنێن ‏دیژی یێن سیاسی، واتە ھەر لڕۆژا 30ی ئیلوونێ ھەلبژارتنێن جڤاتێن پارێزگەھان ‏ژی بھێنە برێڤەبرن، دیارکرنا ژڤانێ ھەلبژارتنانێن پەرلەمانێ کوردستانێ ژلایێ ‏پەرلەمانتارێن ئێکەتیێ ژی ھاتیە پەسەندکرن، ئەم نوکە کار دکەین بۆ ‏برێڤەچوونا ئەڤان ھەلبژارتنان ددەمێ خوەدا.‏

ل دۆر پاشخستنا پڕۆسا ھەلبژارتنێن پەرلەمانێ کوردستانێ فەرید ئەسەسەرد گۆت: ‏چو ئاستەنگ ل ھەمبەر برێڤەچوونا ھەلبژارتنێن ھەرێما کوردستانێ دا نینە، بەلێ ‏ھەکە لایەنێن سیاسی ھەموو کۆکبن ل سەر ڤێ چەندێ ھەلبژارتن بھێنە گیرووکرن ‏تشتەکێ ئاسایی یە، بەلێ حزبەک تنێ بڕیارێ لسەرنەدەت، ھەتا ببیتە بڕیارا ‏ھەموو لایەنێن سیاسی و نوکە ئەم یێ خۆ بەرھەڤدکەین بۆ ئەڤان ھەلبژارتنان و ‏ھەر پێشنیارەکا ھەبیت بۆ پاشخستنا پڕۆسا ھەلبژارتنان ئەم وەکی ئێکەتی ‏نیشتیمانی کوردستان دێ بەرچاڤ وەرگریت و دیراسەتێ بۆ کەین.‏