ئەڤرۆ نیوز ، زنار تۆڤی :
موقەدەمێ مافپەروەر ئازاد تاها بەرپرسێ هوبا پەیوەندی و راگەهاندنێ ل رێڤەبەریا هاتنوچوونا پارێزگەها دهۆکێ بۆ ئەڤرۆ نیوز دا دیارکرن:د روودانەکا هاتنوچوونێ دا کەسەک برینداربوویه.<br>
ناڤهاتی ئەو چەند ژی دا خویاکرن:ل شەڤا بوری و ل دەمژمێر (۹:۰۰) شەڤ ل سەر جادا گەلیێ زاخو و ل نێزیک هولا پیشەنگ دو ترومبێلان لێکدایە و د ئەنجامێ ڤێ روودانێ دا کەسەك بریندار بوویە و هه‌روه‌سا زیانێن به‌رچاڤ ژی ب وان ترۆمبێلان كه‌فتینە.
ئەڤرۆ نیوز ، زنار تۆڤی:
وەزارەتا دارایی و ئابووری یا حوکمەتا هەرێما كوردستانێ راگەهاند،کو ئەڤرۆ چارشەمبی 25 نیسانێ دێ مووچێ چەند دامودەزگەهێن دیتر یێن حوکمەتا هەرێما كوردستانێ هێنە دابەش كرن.
لدووڤ خشتێ دابەشكرنا مووچەی کو ژلایێ وەزارەتا دارایی و ئابووری یا حومەتا هەرێما كوردستانێ ڤە هاتیە بەلاڤ كرن،ئەڤرۆ چارشەمبی دێ مووچێ خانەنشینێن سەربازی و مەدەنی هێتە دابەش كرن.
هەروەسا دێ مووچێ زێرەڤانی و بەرگریێ و هەوارهاتنێ هێتە دابەشكرن و هەتا رۆژا پێنجشەمبی هەموو دامودەزگەهێن حوکمەتێ دێ مووچێ هەیڤا ئێک وەرگرن.
دابەشكرنا مووچەی د دەمەکێ دایە،کو بەغدا گۆژمێ 317 ملیار دیناران بۆ مووچێ هەیڤا شوباتێ رەوانەی هەرێما كوردستانێ كریە،بەلێ هەتا نوکە هیچ زانیاریەكا فەرمی دەربارەی دابەشكرنا مووچێ هەیڤا شوباتێ یێ فەرمانبەران نینە.
ئه‌ڤرو نیوز ، ئێقبال عومه‌ر:
فروكێن توركیا ده‌ڤه‌را نێروه و رێكان و چیایێ كوره‌ژارى ل هنداڤى ناحیا شێلادزێ بومبه بارانكر.
ئەڤرۆ پشتى نیڤرۆ فروكێن توركیا چیایێ كوره‌ژارى و ده‌ڤه‌را نێروه و رێكان بومبه باران دكه‌ن و ئه‌ڤ بومبه بارانكرنا فروكێن شه‌ركه‌ر یێن له‌شكرێ توركیا بویه ئه‌گه‌رێ ترس و له‌رزێ ل ده‌ف وه‌لاتیێن ئاكنجیێن ناحیا شێلادزێ و گوندێن ده‌روروبه‌را, هه‌ژیه بێژین كو ئه‌ڤه ده‌مه‌كێ درێژه له‌شكرێ توركیا ب به‌رده‌وامى ده‌ڤه‌رێن سنورى یێن هه‌رێما كوردستانێ بومبه باران دكه‌ت .
ئه‌ڤرۆ نیوز: ره‌وان نهێلى
ئه‌ڤرۆ ل ده‌مژمێر چارێ ئێڤارى بشار مسته‌فا پیرۆمه‌رى، جێگرێ سه‌رۆكێ لژنا ئوله‌مپى یا عیراقێ ل رێیا كه‌ربه‌لا هاتیه ره‌ڤاندن.
كه‌سه‌كى نێزیكى بشار مسته‌فا بۆ ئه‌ڤرۆ نیوز دیاركر، ئه‌ڤرۆ بشار چوویه كه‌ربه‌لا بۆ پشكداریكرنێ د تازیه‌كێ دا، ل ده‌مێ زڤرینێ، ل رێیا حلله بۆ موسه‌یه‌ف، گرۆپه‌كێ نه‌نیاس بیسه‌یه‌ك بۆ دانایه و گرتینه و هه‌تا نوكه وى گروپى خوه ئاشكرانه‌كرینه، كانێ چ به‌رامبه‌ر ئازادكرنا وى دخوزان.
ئه‌ڤرۆ نیوز:
ژێده‌ره‌كێ ژ وه‌زاره‌تا دارایى و ئابوورى یا حوكمه‌تا هه‌رێمێ راگه‌هاند، ئه‌و 317 ملیار دینارێن حوكمه‌تا عیراقێ هه‌یڤانه بۆ مووچێ فه‌رمانبه‌رێن هه‌رێما كوردستانێ دهنێریت، گه‌هشته هه‌ولێرێ و حه‌فتیا بهێت، دێ ده‌ست ب به‌لاڤكرنا مووچێ هه‌یڤا دوو یێ وه‌زاره‌تێن په‌روه‌ردێ و ساخله‌میێ هێته كرن.
ئه‌ڤرۆ نیوز:
شانده‌كا سه‌ربازی و سیاسی یا ئه‌مریكی ل هه‌ولێرێ ل گه‌ل شیره‌تكارێ جڤاتا ئاسایشا هه‌رێمێ كۆمبوو و پشته‌ڤانییا وه‌لاتێ خوه بۆ كوردستانه‌كا ب هێز و ئێكگرتی دوپاتكر.
مه‌سرور بارزانی شیره‌تكارێ جڤاتا ئاسایشا هه‌رێمێ ئه‌ڤرۆ ل هه‌ولێرێ پێشوازی ل شانده‌كا سه‌ربازی و سیاسی یا ئه‌مریكی ب سه‌رۆكاتیا جه‌نه‌رال پاول فانكی كر و به‌حس ل ره‌وشا ده‌ڤه‌رێ و په‌یوه‌ندیێن ئه‌مریكا و هه‌رێما كوردستانێ كر و شاندا ئه‌مریكی راگه‌هاند؛ وه‌كو كیانه‌كێ دستووری، واشنتۆن پشته‌ڤانیێ ل كوردستانه‌كا ب هێز و ئێكگرتی دكه‌ت و دخوازیت د هه‌موو واران دا په‌یوه‌ندیێن خوه ل گه‌ل هه‌رێمێ پێشڤه‌ببه‌ت.
ل دۆر مه‌ترسیا دووباره سه‌رهلدانا تیرۆرێ ژی، شاندا ئه‌مریكی داخوازا هه‌ماهه‌نگی و هاریكارییا دناڤبه‌را هێزێن پێشمه‌رگه‌ی و هه‌ڤپه‌یمان و هێزێن ئیراقی دا كر و شیره‌تكارێ جڤاتا ئاساییشا هه‌رێمێ ژی، هاریكارییا هه‌موو ئالییان د به‌رهه‌نگاربوونا تیرۆرێ دا ب گرنگ ناڤكر و داخوازكر ئه‌گه‌رێن سه‌رهلدانا تیرۆرێ بهێنه ژناڤبرن.
ئه‌ڤرۆنيوز:
ژۆرا هه‌لبژارتنێن بزاڤا گۆران فێله‌كا قانوونى ل كۆمسيۆنا بلند يا هه‌لبژارتنان ل عيراقێ دكه‌ت وبۆ كۆتا ناڤێ دو ژنان دده‌ته كۆمسيۆنێ، به‌لێ ناڤێن وان نائێخيته دناڤ ليستا به‌ربژارێن خوه وبانگه‌شا هه‌لبژارتنان بۆ وان ناكه‌ت.
مالپه‌رێ سه‌ته‌لايتا كوردستان به‌لاڤكريه كو ل دووڤ دووڤچوونه‌كا رۆژناما (ژيان) كو ل سلێمانيێ ده‌ردكه‌ڤيت، بزاڤا گۆران ل پارێزگه‌ها هه‌ولێرێ ژسه‌رجه‌مێ 13 به‌ربژاران بۆ هه‌لبژارتنێن جڤاتا نوونه‌رێن عيراقێ، كێشا كێميا به‌ربژارێن ژن يا بۆ دروستبووى، له‌وما ناڤێ دو ژنان دايه كۆمسيۆنێ وگۆتيه وان هه‌ردو ژنان ژى چو بانگه‌شێ وريكلامێ نه‌كه‌ن.
ل دووڤ قانوونا كار پێ دهێته كرن بۆ رێژا كۆتا ژنان پێدڤيه دهه‌ر ليسته‌كێ دا ژسێ به‌ربژاران به‌ربژاره‌كا ژن هه‌بيت، مه‌كۆيێ هه‌وليرێ يێ بزاڤا گۆران ژى بۆ وێ چه‌ندێ كو ليسته‌كا 13 كه‌سى پێشكێشى كۆمسيۆنێ بكه‌ت، پێدڤى ب چار به‌ربژارێن ژن بوويه.
ئه‌ڤرۆنيوز:
پشتى نيڤرۆيا ئه‌ڤرۆ سێشه‌مبى 24/4/2018 به‌رپرسه‌كێ كۆمسيۆنا هه‌لبژارتن وراپرسيان ل هه‌رێما كوردستانێ ل هه‌ولێرێ هاته كوشتن.
فارس محه‌ممه‌د سادق، رێڤه‌به‌رێ گشتيێ فه‌رمانگه‌ها كارگێرى ل كۆمسيۆنا هه‌لبژارتن وراپرسيان ل هه‌رێما كوردستانێ كو كادره‌كێ ئێكه‌تى نيشتمانى كوردستانى يه ل جادا 100 مه‌ترى ل باژێرێ هه‌ولێرێ ب ده‌ست درێژيا گوله‌يان هاته كوشتن.
رێڤه‌به‌رێ پۆليسێن هه‌ولێرێ، ليوا عه‌بدولخالق ته‌لعه‌ت، دداخۆيانيه‌كا رۆژنامه‌ڤانى دا گۆت” روودانا كوشتنا فارس محه‌مه‌د سه‌ديق چو په‌يوه‌ندى ب سيساه‌تێ وكۆمسيۆنێ ڤه نينه، به‌لكو په‌يوه‌ندى ب كێشه‌كا جڤاكى دناڤبه‌را دو بنه‌مالان دا يا هه‌ى وپێشتر ژى ل سه‌ر هه‌مان كێشا جڤاكى، مه چه‌ندين كه‌س ژ هه‌ردو بنه‌مالان ده‌سته‌سه‌ركربوون”.
دياركر ژى كو پۆليسان سه‌ره‌داڤێن روودانێ يێن هه‌ين ونوكه ده‌زگه‌هێن ئه‌منى مژوولێ ڤه‌كۆلينانه.
ئه‌ڤرۆنيوز:
ده‌سته‌يا گشتى يا كه‌شناسيێ وبيڤه‌له‌رزان ل عيراقێ به‌لاڤكر كو بيڤه‌له‌رزه‌كێ ب هێزا 5.1 ل دووڤ پلا ريخته‌ر ل به‌نداڤا ئه‌تاتۆرك يا توركى دا.
ده‌سته‌يا كه‌شناسيا عيراقێ دياركر كو بيڤه‌له‌رزا ناڤبرى ب دووريا 288 كيلۆمه‌تران ل باكوورێ رۆژئاڤايێ سنوورێ دناڤبرا عيراقێ وسووريێ بوو ول عيراقێ هه‌ست ب بيڤه‌له‌رزێ نه‌هاته كرن وچو زيان ژى نه‌بوون.
هه‌ڤده‌م ئاژانسا ئه‌نادۆل يا ده‌نگوباسان يا توركى به‌لاڤكر، ل ده‌مژمێر 3:34 ئه‌ڤرۆ بيڤه‌له‌رزه‌كێ ب هێزا 5.1 پله ب كووراتيا 7 كيلۆمه‌تران ناڤه‌ندا باژێرێ سامساتى هه‌ژاند.
پشتى وێ بيڤه‌له‌رزێ دده‌مێ ئێك ده‌مژمێرێ دا، هه‌شت بيڤه‌له‌رزێن دى ب هێزا 1.4 بۆ 2.7 پله ئه‌ڤ ده‌ڤه‌ر هه‌ژاندن.
دياركر كو ژ ئه‌نجامێ وێ بيڤه‌له‌رزێ چه‌ند ئاڤاهيێن وى باژێرى وده‌وروبه‌رێن وى زيان گه‌هشتنێ وبارێ ساخله‌ميێ هنده‌ك كه‌سان تێكچوو وهاتنه گه‌هاندن بۆ نه‌خوه‌شخانه‌يان.
ئه‌ڤرۆنيوز:
ده‌زگه‌هێ عيراق بۆ ڤه‌كۆلينێن ستراتيژى ل دۆر سيسته‌مێ نوويێ هه‌لبژارتنێن عيراقێ كوربه‌نده‌ك ل ستانبولێ ل توركيا ئه‌نجامدا وتێدا گومانه‌كا مه‌زن خسته سه‌ر سيسته‌مێ نوويێ هه‌لبژارتنێن په‌رله‌مانێ عيراقێ وئاماژه ب وێ چه‌ندێ كر كو ئاليێن به‌رپرس دشێن ده‌ستكاريێ دئه‌نجامێن هه‌لبژارتنان دا بكه‌ن.
دڤى كوربه‌ندێ ستراتيژى دا، ل دووڤ باسنيوز، كو ب تايبه‌ت تێدا به‌حسێ كاريگه‌ريا ئاميرێن هژمارتن وجوداكرنا ئه‌لكترۆنى يا ده‌نگان ل سه‌ر پرۆسا هه‌لبژارتنێ هاته كرن وكۆمسيۆنا بلند يا هه‌لبژارتنان ل عيراقێ پشكدارى دوى كوربه‌ندى دا ره‌تكربوو، نيمچه كوده‌نگيه‌ك ل سه‌ر مه‌ترسيا مه‌زن ل دۆر ده‌ستكاريكرنێ دئه‌نجامێن هه‌لبژارتنان دا ب رێيا جوداكرن وهژمارتنا ئه‌لكترۆنى يا ده‌نگان ژئاليێ ده‌ستهه‌لاتدارێن عيراقێ هه‌بوو.
ئه‌يوب ياسين، شيره‌تكارێ وێ ناڤه‌ندا عيراقى راگه‌هاند كو هه‌موو ئاليێن سياسى يێن عيراقى ب فه‌رمى هاتبوو داخوازكرن بۆ پشكداريێ دوى كوربه‌ندى دا وپشكه‌كا به‌رچاڤ ژێ به‌رهه‌ڤبوون، ب تايبه‌تى سه‌رۆكاتيا په‌رله‌مانى وجڤاتا وه‌زيرێن عيراقێ.
كوربه‌ندێ ستراتيژى ئه‌و سيسته‌مه ره‌تكر كو كۆمسيۆنا بلند يا هه‌لبژارتنان بۆ هه‌لبژارتنا ئه‌لكترۆنى بكارئينايه وراگه‌هاند ئه‌ڤ سيسته‌مه بۆ بله‌ز ده‌ركرنا ئه‌نجامان وراگرتنا پاقژيا هه‌لبژارتنايه، به‌لكو سيسته‌مێ ناڤبرى ب تشته‌كێ جودا هژمارت كو ده‌نگدانا ئه‌لكترۆنى يه ودبيت سه‌خته‌كاريێ ل سه‌ر ئاستێ ده‌نگده‌ران كێم بكه‌ت، به‌لێ ئه‌گه‌رێ مه‌زن يێ هه‌ى كو ب رێيا وى ده‌ستكارى دئه‌نجامێ گشتيێ هه‌لبژارتنان بهێته كرن.
نيشاندان