ئه‌ڤرۆنيوز:

ئه‌ڤرۆ سپێدێ‌ 27/6/2018 ب ئاماده‌بونا جێگرێ‌ سه‌رۆكێ‌ په‌رله‌مانێ‌ كوردستانێ‌ و هژماره‌كا په‌رله‌مانتار و پارێزگه‌رێن هه‌ر چار پارێزگه‌هێن هه‌رێمێ‌ و نوونه‌رێ‌ سه‌رۆكاتیا جڤاتا وه‌زیران و هژماره‌كا مامۆستایێن زانكۆیێ‌ و رێڤه‌به‌رێن گشتی و قایمقام و ورێڤه‌به‌رێن ناحیێن سنورێ‌ پارێزگه‌ها دهۆكێ‌ و هژماره‌كا زۆر یا شاره‌زایێن قانوونى‌ و ده‌ستوری .. ئه‌نستیتویا رۆژهه‌لاتا ناڤه‌راست بۆ ڤه‌كۆلینان ( مێری ) و پارێزگه‌ها دهۆكێ‌ ل ئوتێلا ریكسوس ل باژێرێ‌ دهۆكێ‌ كۆنفراسنێ‌ ده‌وله‌تسازی و دارێژتنا په‌یكه‌رێ‌ حكومرانیێ‌ ل هه‌رێما كوردستانێ‌ ساز كر ,

دكتور دلاوه‌ر عه‌بدولعه‌زیز، رێڤه‌به‌رێ‌ ئه‌نستیتیوتا رۆژهه‌لاتا ناڤه‌راست بۆ ڤه‌كۆلینان ئاماژه‌ كره‌ ئارمانجا به‌ستنا ڤی كۆنفرانسی و سوپاسیا پارێزگه‌رێ‌ دهۆكێ‌ كر بۆ پشته‌ڤانی كرن و میهڤانكرنا كۆنفرانسی ,

ددوڤدا پارێزگه‌رێ‌ دهۆكێ‌ ( فه‌رهاد ئه‌مین ) دپه‌یڤه‌كێ‌ ب خێرهاتنا هه‌موو میهڤانا كر و هیڤی خواست كۆنفرانس ئارمانجێن خوه‌ بجهبینیت دیسان گوت : هه‌كه‌ هنده‌ك هه‌بن بێژن ل كوردستانێ‌ چو نه‌هاتیه‌ كرن …به‌لێ‌ تشتێ‌ مه‌زن و باش یێ‌ هاتیه‌ كرن و حازربوونا ئه‌ڤرۆ نیشانا هندێ‌ یه‌ كو كاره‌كێ‌ مه‌زن هاتیه‌ كرن ,

دیسان گۆت .هه‌موو لایه‌ن پێكڤه‌ هه‌ڤرانه‌ كو شاشی هه‌نه‌ و دڤێت چاكسازی بهێنه‌ كرن و پێدڤی ب چاره‌كرنێ‌ هه‌نه،‌ لێ‌ جهێ‌ داخێ‌ یه‌ كو چاكسازی ب ساناهی ناهێنه‌ كرن و ئاسته‌نگ هه‌نه‌ ,

دلایه‌كێ‌ دیدا دیار كر كو مه‌به‌ست ژ كۆنفرانسی بزاڤه‌كه‌ بۆ پێشڤه‌ برن و چاكسازیێ‌ كو هه‌یكه‌له‌ك و په‌یكه‌ره‌كێ رێكوپێك بۆ حكومرانیێ‌ ل كوردستانێ‌ بهێته‌ دارشتن ,

دیڤدا به‌نه‌لێن كۆنفرانسی ده‌ستپێكر بۆ قامقامێن‌ شه‌قلاوه‌ و كویه‌ و ئاكری و رێڤه‌به‌رێ‌ ناحیا شێلادزێ‌ و پاشی په‌نه‌لێ‌ پارێزگه‌رێن سلێمانیێ‌ و هه‌ولێرێ و دهۆكێ و هه‌له‌بجه‌ بشكداری كر و هه‌موو لایه‌نان بیرو بوچونێن خوه‌ دیاركرن پێخه‌مه‌ت باشتر خزمه‌تكرنا وه‌لاتیان و دانانا په‌یكه‌ره‌كێ‌ باشتر بۆ حكومرانیێ‌ دڤی ته‌وه‌ری دا پارێزگه‌رێ‌ دهۆكێ‌ دیار كر كو پێدڤیه‌ قانوونه‌كا روهن و ئاشكه‌را بۆ هه‌لبژارتنان هه‌بیت و ده‌مه‌ك دیاركری هه‌بیت بۆ هه‌لبژارتنان و گۆت .. ئه‌ڤرۆ چار سالێن من وه‌كو پارێزگه‌ر ب دووماهی دهێن پێدڤیه‌ نوكه‌ هه‌لبژارتن هاتبانه‌ كرن یان ئه‌ز دوباره‌ هاتبامه‌ هه‌لبژارتن یان ژی كه‌سه‌كێ‌ دی هاتبا دامه‌زراندن ب ده‌نگدانێ‌ .

پارێزگه‌رێ‌ دهوكێ‌ دیار كر كو نه‌بوونا د‌ستوری ل هه‌رێما كوردستانێ‌ ژێده‌رێ‌ هه‌موو وان ئاریشه‌ و ئاسته‌نگێن قانوونى یه‌ كو ئه‌ڤرۆ ل كوردستانێ‌ هه‌ین ژبه‌ر كو دستور سێ‌ خالان چاره‌ دكه‌ت ,,ئه‌وژى رێكخستنا ده‌ستهه‌لاتێ‌ و رێكخستنا ماف و ئازادیان و‌ په‌یوه‌ندی دنافڤبه‌را ده‌ستهه‌لاتێ‌ و وه‌لاتیان دا دیار دكه‌ت .

هه‌بوونا دهستوری دێ‌ دادپه‌روه‌ری ژی هه‌بیت و خه‌لك دێ‌ باشتر ب مافێن خوه‌ شاد بیت ژبه‌ر كو ده‌ستهه‌لات ئامرازه‌ بۆ بجهئینانا هنده‌ك ئارمانجان ئه‌وژی خزمه‌تكرنا وه‌لاتیانه‌ دمافێن وان یێن سیاسی و دارایی و جڤاكی و كاركێری و تا دووماهیێ‌ و ده‌ستهه‌لات مافێن دارایێ‌ ب قانوون به‌لاڤ بكه‌ت و هه‌ر وه‌لاتیه‌ك بگه‌هیته‌ مافێن خوه‌ ل دووڤ ئاماران هه‌ر جهه‌كی بگره‌ ژ پارێزگه‌هێ‌ تا دگه‌هیته‌ ناحیا و كومه‌لگه‌هان ,

ل دووماهیێ‌ پارێزگه‌رێ‌ دهۆكێ‌ گۆت گه‌له‌ك سته‌م ل پارێزگه‌ها دهۆكێ‌ هاتیه‌ كرن و ئه‌گه‌ر هه‌موو سیاسی بووینه‌ ,

ددیبه‌يته‌كا دی دا رێڤه‌به‌ریێن گشتی یێن باژێرڤانيێن پارێزگه‌هێن هه‌رێمێ‌ پشكدار بوون و بوچونێن خوه‌ دیار كرن ,

چه‌ندین دیبه‌يتێن دی ژی هاتنه‌ پێشكێشكرن ژلایێ‌ ده‌ستههه‌لاتا چاڤدێری و قایمقامێن چه‌ند قه‌زایێن هه‌رێما كوردستانێ‌ تێدا هژماره‌كا پێشنیار و بوچوونان هاتنه‌ دیار كرن ,

ل دووماهیا كۆنفرانسی، جه‌عفه‌ر ئێمینكی جێگرێ‌ سه‌رۆكێ‌ په‌له‌مانێ‌ كوردستانێ‌ و بێگه‌رد تاله‌بانێ‌ سكرتێرا په‌رله‌مانێ‌ كوردستانێ‌ و پارێزگه‌رێ‌ دهۆكێ‌ فه‌رهاد ئه‌مین هژماره‌كا پێشنیار و بوچوونان دیار كرن كو هه‌موو ده‌ستهه‌لات هه‌ڤكار بن بۆو هه‌ڤدو پێخه‌مه‌ت باشتركرنا سیسته‌مێ‌ حكومرانیێ‌ ل كوردستانێ‌ و خزمه‌تكرنا وه‌لاتیان و دارشتنا هنده‌ك قانوونێن گونجای بۆ خوه‌شكرنا ژیارا وه‌لاتیان و ده‌زگایی كرنا هه‌موو سیسته‌مێ‌ حكومرانیێ‌ ل كوردستانێ‌ .