ئه‌ڤرۆ نيوز:
سه‌مير هه‌ورامى، شيره‌تكارێ ميديايى يێ قوباد ته‌له‌بانى جێگرێ سه‌رۆك وه‌زيرێن هه‌رێما كوردستانێ بۆ رووداو راگه‌هاند كو بڕياره ل ڤان نێزيكان شانده‌كێ بلندێ حوكمه‌تا هه‌رێما كوردستانێ ب سه‌رۆكاتيا نێچيرڤان بارزانى و قوباد ته‌له‌بانى سه‌ره‌دانا به‌غدا بكه‌ت و گۆت: “مه‌ره‌ما سه‌ره‌دانێ بۆ دانوستاندنێ يه ده‌رباره‌ى بودجێ و چاره‌كرنا كێشێن هه‌لاويستى.
ئه‌ڤرۆ نيوز:
رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ راگه‌هاند كو سوبه‌هى رۆژا پێنجشه‌مبى رێكه‌فتى 12ى نيسانا 2018ێ دهێته پێشبينيكرن ئه‌سمان هنده‌ك ئه‌ورێن كێم بن و هنده‌ك جاران ژى باران دێ ل ده‌ڤه‌رێن چيايى باريت.
پشكا پێشبينيان ل رێڤه‌به‌ريا گشتى يا سه‌قاناسى و بيڤه‌له‌رزێ ل هه‌رێما كوردستانێ د نڤيساره‌كێ دا راگه‌هانديه كو ژ ئه گه‌رێ هاتنا فشارێن نزمێن ده‌ريا سۆر دهێته پێشبينيكرن ئه‌سمان هنده‌ك ئه‌ورێن كێم بن و هنده‌ك جاران ژى باران دێ ل ده‌ڤه‌رێن چيايى باريت.
پشكا پێشبينيان خۆيا ژى كريه كو نزمترين پلا گه‌رما پێشبينيكرى دێ 14 پله بيت و بلندترين پله ژى دێ 22 پله بيت.
هه‌ر ب گۆره‌ى ڤێ راپۆرتا رێڤه‌به‌ريا ناڤبرى له‌زاتيا باى ژى دێ د ناڤبه‌را 5 بۆ15كم بيت د ده‌مژمێره‌كێ دا و ماوێ ديتنێ ژى دێ 8 بۆ 10كم بيت د ده‌مژمێره‌كێ دا.
ئەڤرۆ نيوز:
ل رۆژا 14 / 4/ 2018 ل عیراقێ ھەوا ھەلبژارتنان دێ دەستپێکەتن، چەندێن ئالیێن کوردی ل کەرکووک دێ پشکدار بن یا کو نوکە ژ ئالیێ عیراقێ ڤە ھاتیە داگیرکرن، سەرۆک لیستا برایەتی د بێژیت، چو ھێزەکا کوردستانێ نەشێت ئالایێ کوردستانێ ددەمێ پرۆپاگندا ھەلبژارتنان دا ب کار بینیت.
رۆژا 16ی ئۆکتۆبەرا سالا بۆری ھێزێن عیراقێ ب ھەڤکاریا وەلاتێ ئیرانێ و چاڤشۆریەکا گرۆپەکێ ناڤا ئێکەتیێ دا کەرکووک پشتی حوکمڕانیا 15 سالا ھاتە داگیرکرن.
سەرۆکێ لیستا برایەتی یا جڤاتا پارێزگەھا کەرکووکێ مەحمەد کەمال بۆ رۆژناما ئەڤرۆ راگەھاند، ل کەرکووکێ چالاکیێن سیاسی بۆ حزبێن کوردی گەلەک یا بەرتەسک بوی، کو ھەتا نوکە ژی پشتی داگیرکرنا باژێرێ ناڤبری ژ ئالیێ حەشدا شەعبی و لەشکرێ عیراقێ، رێ بۆ بلندکرنا ئالایێ کوردستانێ نا ھێتە دان، بۆ وان حزبێن کوردی یێن بارەگایێن خوە ل کەرکووکێ ڤەکرین.
مەحمەد کەمال گۆت: ھێزێن داگیر کەرێن عیراقێ ل کەرکووکێ رێ نادەنە ئالیێن کوردی بۆ بلندکرنا ئالایێ کوردستانێ، چونکی لنک ھێزێن عیراقێ ئالایێ کوردستانێ ژ پرۆپاگندا ھەلبژاتنان گرنکترە و نابیت ئەو ئالایە بھێتە بلند کرن، وەکی گونەھباریەک دێ ل وان ئالان دنێرن یێن کو دڤێن ئالایێ کوردستانێ بلند بکەن.
سەبارەت ب دەستڤەئینانا کورسیێن کوردان ژی ناڤبری ھەروەسا خوەیاکر، ئەم وەکی پارتی مە بایکوتکرنا ھەلبژارتنێن باژێرێ کەرکووکێ کرینە، چونکی ئەو باژێر ژ ئالیێ ھێزێن عیراقێ ڤە ھاتیە داگیرکرن و باژێر بوویە بنگەھەکێ لەشکری، مللەتێ کورد نەشێت ب ئازادی بچیتە سەر سندۆقێن دەنگدانێ و دەنگێ خوە بدەت، لەورا ب باوەریا مە دڤێ ھەلبژارتنێ دا زیانەکا مەزن دێ بۆ کوردان ھەبیت، باشترین رێ ل دەڤەرێن دەرڤیا ھەرێما کوردستانێ یێن داگیر کرین ھەلبژارتن بھێنە پاشخستن، ھەکە حوکمەتا عیراقێ ئامادەنەبوو بھێتە پاشخستن، وی دەمی کورد ھەموو پێکڤە دڤێت باکوتکرنا ھەلبژارتنان بکەن.
مەحمەد کەمال گۆت: وەلاتیێن باژێرێ کەرکووکێ ھەتا نوکە ئاوارە و دەربەدەر بووینە، ژ بەر ھزر وبیرێن خوە یێن سیاسی نەشێن ڤەگەرن جھێن خوە ل کەرکووکێ، ئەڤجا دڤێ رەوشا ئالۆز دا ئەم دێ چەوا شێن پشکداریێ د پرۆسا ھەلبژارتنێن عیراقێ دا کەین، کو ئالیەکێ عیراقی یێ عەرەبی ب ھەموو رەنگەکی دڤێتن سەنگا کوردان کێم بکەت.
ئه‌ڤرۆ نيوز:
شرۆڤەکارەکێ سیاسی ئاشکرا کر، کو چو رێککەفتن دناڤبەرا ھەرێما کوردستانێ و بەغدا بۆچارەسەرکرنا ئاریشەیێن ناڤبەرا وان نە ھاتینە کرن،ھەروەسا دیارکر، دێ پەیوەندیێن ھەرێم و بەغدا وەکی نوکە بمینن ھەتا پشتی پڕۆسا ھەلبژارتنێن عێراقێ ژبەر کو ئاریشا مە ل گەل بەغدا ئێکدو قەبوول نەکرنە.
عەبدولسەلام بەرواری، شرۆڤەکارێ سیاسی بۆ رۆژناما ئەڤرۆ گۆت” رەوشا ناڤبەرا ھەرێما کوردستانێ و بەغدا ھەتا پشتی پڕۆسا ھەلبژارتنێن 12ی گۆلانێ دێ وەک خوە بمینن، چونکو ئاریشەیا مە وەک ھەرێما کوردستانێ دگەل بەغدا تنێ ب چەند پێنگاڤەکان ژلایێ بەغداڤە ناھێنە چارەسەرکرن و دوماھیژی ناھێن، ژبەرکو ئاریشەیا مە دگەل بەغدا ھزرکرن و تێگەھشتنە دگەل بەغدا، نیەتا ھندێ نابینم عێراق لسەر ئەڤێ رێکا راست بچیت یا کو پشتی سالا 2003ێ ھاتیە دانان، لەوڕا ب دیتنامە دەستھەلاتا ئێک لایەن یا سەرکەفتی نابیت و سەد سالی بۆری ژی ئەفچەندە سەلماندیە حوکمێ مەرکەزیێ عێراقێ پەیڕەو دکر دەولەتا عێراقێ گەھاندیە ڤێ رۆژێ یا ئەم ھەموو دبینین چو بسەرێ عێراقێ و عێراقیا ھاتیە، ئاریشەیا ھەرێمێ دگەل بەغدا تێگەھشتنا دەستھەلاتدارێن بەغدایە بۆ دیموکراتیەت و فیدڕالیەت و ئێکدی قەبوولکرنێ ڤە ھەیە.
عەبدولسەلام بەرواری گۆتژی” ھەتا نوکە چو رێکەفتنێن کۆنکرێتی پشتی روویدانێن 16ی ئۆکتۆبەرێ دناڤبەرا ھەردوو حوکمەتێن ھەرێم و عێراقێ نەھاتینە ئەنجامدان، دبیت بۆڤێ مەرەمێ شاندەکێ بلندێ ھەرێما کوردستانێ بسەرۆکایەتیا نێچیرڤان بارزانی سەرەدانا بەغدا بکەت و دگەل سەرۆک وەزیرێن نوکەیێ عێراقێ لدۆر چەند خالان بگەھنە رێکەفتنەکێ و رێیەک بھێتە دیارکرن بۆ ھەردولا، کو ھەتا نوکە مە ئەڤە نەدیتیە واتە چو رێکەفتن نەھاتینەکرن، ئەڤا نوکە دبۆریت لبن گڤاشتنێن جڤاکێ نێڤدەولەتی و ئەمریکایە بۆ ھنارتنا مووچە و ڤەکرنا فڕۆکخانا، دەستپێکێ پیلان یا دیاربو کو ژلایێ حەیدەر عەبادی سەرۆک وەزیرێن عێراقێ ھاتیە ئەشکرەکرن، ھندەک لایەنێن نافخۆیا ھەرێما کوردستانێ ب سەرۆک وەزیرێن عێراقێ راگەھاندبو مووچەی نەدەتە حوکمەتا ھەرێما کوردستانێ ھەتا ئەو حزب بێژنە خەلکێ کوردستانێ مە بۆ ھەوە مووچە ئینایە ل بەغدایە، بۆچوونا نێڤدەولەتی ژی یا خویایە پشتەڤانیا حوکمەتا ھەرێما کوردستانێ دکەن و دڤێت بەغدا دگەل حوکمەتا ھەرێمێ بگەھیتە رێکەفتنێ، ئەف چەند پێنگاڤێن ژلایێ عێراقێ ڤە ھاتینە ھاڤێتن ئەس ب ئەرێنی دبینم بەلێ ھێشتا ئاریشەژی نەھاتینە چارەسەرکرن.
ئەڤرۆ نیوز ، زنار تۆڤی :
شرۆڤەكارەکێ كورد دبێژیت، دادگەها فیدرالی یا عێراق یا سەركەفتی نەبوو د چارەسەركرنڵ كێشەیا نەفتێ دناڤبەرا بەغدا و هەرێما كوردستانێ دا، چونكی هەتا نوکە ل عێراقێ قانوونا نەفت و گازێ نینە و پەرلەمان و حوکمەتا عێراقێ كێمتەرخەم بوون ل دەركرنا ڤێ قانوونێ.
كێشەیا دابەشكرنا داهاتێ نەفت و گازێ و رێڤەبرنا كەرتێ وزێ و هنارتنا نەفتا هەرێما كوردستانێ و دابەشكرنا داهاتێ نەفت و گازێ ئێكە ژ مەزنترین كێشێن هەلاویستی دناڤبەرا هەولێر و بەغدا دا، هەڤدەم نەبوونا قانوونا نەفت و گازێ ئەڤ كێشە زۆر ئالۆزتر كریە،کو چەندین پرۆژە قانوونەک بۆ پەرلەمانی هاتینە بلند كرن، بەلێ هەتا ڤێ خولا پەرلەمانی ژی ب دوماهی نەهاتیە و هەتا نوکە رێگری ل دەرچوونا ڤێ قانوونێ دهێتە كرن.
كیفاح مەحموود د ڤی واریدا دبێژیت،بریارا دادگەها فیدرالی ل بەغدا پاشخستنا ڤێ پرسێ داخوازیەكە بۆ تانەدانێ ل هنارتنا نەفتا هاتیە بەرهەمئینان ل هەرێما كوردستانێ،ئەڤەژی پشتی هنگێ هات،کو داواكارێ گشتی داخوازا دەركرنا بریارەکێ بۆ راوەستاندنا هنارتنا نەفتا هەرێمێ راستەوخۆ بۆ دەرڤە کریە و رەنگە دادگەها وێ ژی ب رێیا پاشخستنا ئێکلاکرنا ڤێ پرسێ روو بدەت بۆ گەهشتن ب چارەسەریەکا سیاسی، چونكی ئە پرسە یا سیاسیە و هەروەسا ناكۆكیەكە کو د بنەرەتدا یا سیاسیە.
پەیڤدارێ ب ناڤێ دادگەها بلند یا فیدرالی ئاشکراکربوو،کو روونشتنا دوهی یا دادگەهێ ب سەرۆكاتیا دادوەر مەدحەت مەحموود و ئامادەبوونا هەموو ئەندامان بۆ گوتوبێژکرنا داخوایەكێ كو ژ لایێ وەزیرێ نەفتا عێراقێ ڤە ل دژی وەزیرێ سامانێن سروشتی یێ هەرێما كوردستانێ هاتبوو بلند كرن، كۆمبووینە.
د وێ روونشتنێ دا بەحسێ هندێ هاتبوو كرن،کو بیارەک ل دادگەهێ دەربچیت بۆ راوەستاندنا هنارتنا راستەوخۆ یا نەفتێ ل هەرێما كوردستانێ و ڤەگەراندنا داهاتێ فرۆشتنا بەرێ یا نەفتا هەرێمێ بۆ بەغدا، بەلێ دادگەها فیدرالی ئەڤ روونشتنە بۆ شەشی ئەیارا داهاتی پاخست ب مەبەستا دەلیڤەدانێ بۆ هەردوو لایان،ژ پێخەمەت هەردو لایەن بۆ وێ روونشتنێ د ئامادە بن.
ئەڤرۆ نیوز:
ب ده‌ست ڤەئینانا باوەریێ ل دەف ژنان تشتەکێ هند ب ساناهی نینه،کو زەلام هزر لێ دکەت،لەوما ژ بەر هندێ ژی هەتاکو ژنێ باوەری ب زەلامەکێ بهێت،دڤێت ئەو زەلام گەلەک بزاڤان بۆ بکەت.
ژن لدووڤ ئه‌زموونا ده‌وروبەرێن خوە بریارێ ل سه‌ر زەلامان دده‌ن،لەوما ژ بەر هندێ زۆربه‌یا وان باوەری ب زەلامان نینه، ئه‌ڤە ژی چه‌ند هۆكارەکن وە دکەن کو زەلام باوەریێ ل دەف ژنان ژ ده‌ست بدەت:
. ئه‌زموونا پێشتر:ب گشتی د دلێ هه‌موو ژنەکێدا زەلامەک هه‌یه كو نە پاقژی یان فێلەکا وەسا لێ كریه،کو وەلێ هاتیه کو وێ ژنێ چو جاران باوەری ب چو زەلامێن دیتر نه‌مینیت،لێ ئه‌ڤە دێ ب تنێ ب زەلامەکێ نموونه‌یی و زیره‌ك وێ باوەریێ دروست کەت و دێ بوریێ وێ ژ بیرا وێ بەت.
. زەلام هیچ هۆكارەکێ پێ نادەت بۆ هندێ کو باوەری پێ بهێت،ژن هه‌یه زەلامەک ب وی پەرێ دلی و مێشكێ خوە هه‌لبژارتیه و خۆش دڤێت،لێ باوەری پێ نینه، ئه‌ڤە ژی خەلەتیا وێ ژنێ نینە،لێ وی زەلامی ب خوە چو دەلیڤە بۆ نە رەخساندیە و هیچ هۆكارەک بۆ دروست نه‌كریه،وەلێ بکەت کو باوەری پێ هه‌بیت،ئەڤە ژی هندەك جاران ب تنێ ب گوتنەکێ یان رەفتارەکێ دهێته سەلماندن.
. هەڤالێن وی: په‌ندەک هه‌یه دبێژیت،بێژە من کی هەڤالێ تەیە،دێ بێژمە تە تۆ کی، به‌لێ زەلام هیچ گرنگیه‌كێ ب ڤێ گوتنێ ناده‌ن و هه‌موو گاڤا هەڤالینیا هه‌ر كه‌سەکێ دكه‌ن،یێن کو وان پێ خۆش،گوهنادەنە هندێ کو ئەڤ هەڤالینیە دێ چو ل کەسایەتیا وان کەت، هه‌ر ڤێ ژی وە كریه،کو هەڤالێن خراب یێن زەلامی وە بکەن،کو ژنێ باوەری پێ نەبیت و ب چاڤێن وان تەماشە بکەت.
. رووخۆشی به‌رامبه‌ر هه‌موو ژنان: ئه‌و زەلامێن گوتنێن شرین و رۆمانسی بۆ هه‌موو ژنان ب كار دئینن،چو سنوران بۆ حەز ژێکرنێ دناڤبەرا خوە و ژنا خوە ناهێلیت، هه‌ر ژ‌به‌ر هندێ ب چاڤەکێ سڤك ته‌ماشە دکەتێ و باوەری پێ نامینیت.
ئه‌ڤرۆينوز:
راپۆرتێن رۆژنامه‌ڤانى ئاشكرا دكه‌ن كو ياريكه‌رێ يانا لێڤه‌رپۆل وهه‌لبژارتيێ مسرێ، محه‌مه‌د سه‌لاح، ل دۆر پێشبينيێن چوونا خوه بۆ ناڤ رێزێن يانا ريال مه‌دريد يا ئيسپانى بريار دا.
محه‌مه‌د سه‌لاح كو نوكه ل رێزا ئێكێ دهێت درێزبه‌ندا كۆلكه‌رێن خۆلا ئينگليزى بۆ يانين پلا ياناب ب 29 گۆلان وياريكه‌رێ توتنهام وهه‌لبژارتيێ ئينگلته‌را، هارى كين، ب 25 گۆلان ل رێزا دويێ دهێت.
رۆژناما (ميرۆر) يا بريتانى به‌لاڤكر، محه‌مه‌د سه‌لاح برياردايه ل يانا لێڤه‌رپۆل بۆ ده‌مه‌كى بمينيت وئيدارا لێڤه‌رپۆل به‌رهه‌ڤيان دكه‌ت بۆ پێشكێشكرنا گرێبه‌سته‌كا نوو بۆ وى ياريكه‌رێ مسرى كو تێدا مووچێ وى يێ حه‌فتيانه بگه‌هيته 200 هزار جونه‌يهێن سترلينى.
رۆژناما ناڤبرى دياركر كو محه‌مه‌د سه‌لاح دخوازيت وه‌رزه‌كێ دى ژى بۆ لێڤه‌رپۆل ياريێ بكه‌ت وپتر ئاستێ خوه ل ئينگلته‌را بچه‌سپينيت، ب تايبه‌تى پشتى ئه‌زموونه‌كا نه‌سه‌ركه‌فتى ل گه‌ل يانا شيلسى بريه سه‌ر به‌رى چه‌ند سالان.
ئه‌ڤرۆنيوز:
روماتیزم نێزیکی 100 جورێن نەخوه‌شیا ب خۆڤە دگریت کو تووشی بەشەکێ ژ له‌شێ مرۆڤی دبیت ب جومگ و ماسولکان ڤە و بڕبڕا پشتێ و هه‌ستى و ئەندامان، گه‌له‌ك جاران تووشی ھەودانا دبن، ب ئەگەرێ تێکچوونا به‌ره‌ڤانيا له‌شی، جومگێن مرۆڤی دڤێ نەخوه‌شیێ دا مەزنترین زیان پێ دکەڤیت.
ئازاد مەنتك، نوشدارێ تایبەتمەندێ دل و ھناڤان، ل دووڤ نوش نيوز، دیارکر کو نەخوه‌شیا روماتیزمێ نەخوه‌شیەکا بەربەلاڤە د ناڤ خەلکی دا، دناڤ عەرەبان دا 1% ئاکنجیێن وان تووش دبنێ و ژن چار جاركى ھندی زەلامان تووش دبنێ و ھەموو ژیەکى ئەگەرێ تووشبوونێ ب روماتیزمێ يا هه‌ى، بەلێ د ژیێ (٤٠ هه‌تا ٦٠) سالیێ دا پتر تووش دبنێ.
زێدەتر گۆت “ئەڤ نەخوه‌شیە ھێدی ھێدی خرابترە، ژ بەر ھندێ دڤێت ھەموو چارەسەریەك ل گورەی رێنمایێن نێڤدەولەتی و کۆمەلا روماتیزما ئەمریکی بیت، ئەڤ نەخوه‌شیە ناھێتە بنبڕکرن و دەرمان ژی ژ بەر دو ئەگەران دھێنە دان”.
لابرنا نیشانێن وێ: نەخوه‌شان نیشانێن ئازار و رەق بوون و بێھن تەنگیێ ل ده‌ف پەیدا دبن، ژ بەر ھندێ چارەسەریێ بۆ دکەن دا ئەڤ نیشانە نەمینن.
ماک و ئالۆزی: ئەڤ نەخوه‌شیە هه‌كه چارەسەر نەبیت، ئەڤ کەسە دێ گوج بیت و دەست و تبلێن وی دێ خوار بن، کو ژ ئالیێ جوانکاریێ و کارێ رۆژانە دێ کارتێکرن ل سەر ژیانا رۆژانە ھێتەکرن.
ئازاد مەنتک، ئاماژە دا وێ چەندێ کو گیا و دەرمانێن سرۆشتی و روەکی ب چ ره‌نگه‌كى چارەسەریا نەخوه‌شیا روماتیزمێ ناکەن و ھەر کەسەکێ رێکلامێ بۆ بکەت ئەو فێلن و گۆت” دڤێت حوکمەت وان کەسان ده‌سته‌سه‌ر بكه‌ت کو فان فێلان ل خەلکی دکەن، چونکى هه‌كه رێکلامێ ب ڤێ رێ بۆ ڤێ نەخوه‌شیێ بکەن، ئەڤە دێ بیتە ئەگەرێ تێکچوونا بەرنامێ چارەسەریێ و دێ خرابتر بیت و ژیانا نەخوه‌شی کەڤیتە د مەترسیێ دا، ژ بەر کو ل ھەمو باژێرێن ھەرێما کوردستانێ لیژنەکا تایبەت ب ڤێ نەخوه‌شیێ ڤە ھەیە کو گه‌له‌ك دەرمانێن باش ژ لایێ حوکمەتێ ڤە بۆ ھاتینە دابینکرن”.
ئه‌ڤرۆنيوز:
ژێده‌ره‌كى ژ وه‌زاره‌تا ئه‌وقافێ وكاروبارێن ئايينى ل هه‌رێما كوردستانێ راگه‌هاند، ب هه‌لكه‌فتا سه‌رێ سالا ئێزدى ل هه‌موو داموده‌زگه‌هێن هه‌رێمێ بێهنڤه‌دانا فه‌رمى يه.
نه‌به‌ز ئيسماعيل، په‌يڤدارێ فه‌رمى يێ وه‌زاره‌تا ئه‌وقاقێ وكاروبارێن ئايينى ل هه‌رێمێ گۆت” ل دووڤ سالناما حوكمه‌تا هه‌رێما كوردستانێ، رۆژا چارشه‌مبيا بهێت 18/4/2018 بێهنڤه‌دانا فه‌رمى يه ل هه‌موو داموده‌زگه‌هێن حوكمه‌تێ”.
جه‌ژنا سه‌رێ سالا ئێزدى كو ب چارشه‌مبيا سور يا ناڤداره، دكه‌ڤيته چارشه‌مبيا ئێكێ ل هه‌يڤا نيسانێ ل دووڤ رۆژ ژمێريا رۆژهه‌لاتى.
نيشاندان