ئه‌ڤرۆ نيوز:
عزه‌ت دورى جێگرێ سه‌رۆكێ رژێما به‌عسا ژ ناڤ چوويى د گرته ڤيديويه‌كێ دا گه‌ف ل سه‌ركردێن پروسا سياسى يا عيراقێ كرن و داخوازا ئازادكرنا هه‌موو زيندانيێن عيراقێ كرن.
ئاماژه ب وێ يه‌كێ دايه، ئه‌گه‌ر زيندانيێن عيراقى نه‌هێنه ئازادكرن و دان ب مافێن وان نه‌هێته كرن، دێ شه‌رى دژى حوكمه‌تا سه‌فه‌وى و ئيرانيان راگه‌هينن.
ئەڤرۆ نیوز ، زنار تۆڤی :
وەسا بریارە سوبەهی ئێكشەمبیێ ل بەغدا و ب رێیا ئەنجامدانا تیروپشكێ ناڤێن كارمەندێن سەر سندووقێن دەنگدانێ بهێنە ئاشكرا کرن.
سەلیم شەریف ئەندامێ ژوورا پەیوەندیێن كۆمسیۆنا بلند یا سەربەخۆ یا هەلبژارتنێن عێراقێ گوتیە،ئاگەهداریا سەرجەم وان كەسان دكەین یێن کو ناڤێن خۆ بۆ چاڤدێریا سندووقێن دەنگدانێ تۆمار كرین و فۆرما دامەزراندنێ بۆ رۆژا هەلبژارتنان پێشكێش كرین بۆ هندێ کو وەك كارمەند پشکداریێ د وێ پروسێدا بكەن، سوبەهی دێ ناڤێن وان دەرچن.
هەروەسا گوتیە، ل دەمژمێر 10 سپێدێ ل باژێرێ بەغداد ناڤێن وان ب شێوێ تیروپشك ل بەردەم نوونەرێن لایەنێن سیاسی دێ هێنه راكێشان ب سیستەمێ كۆمپیوتەری.
شەریفی ئاشكرا كر ژی،هەتا نوکە ب فەرمی هژمارا دوماهیێ ژ لایێ ئەندامێن جڤاتا كۆمسیاران ڤە نەهاتیە دیار کرن کا چەندن،لێ زێدەتر ژ ملیۆنەك و 500 هزار فۆرم هاتینە پر كرن، بەلێ ل دووڤ پێشبینیان دێ 400 هزار ناڤ سوودمەند بن.
بریارە ل 12 گولانا ئەڤ سالە هەلبژارتنێن عێراقێ بهێنە ئەنجامدان و كوردان بۆ ڤێ مەرەمێ پتر ژ 700 كاندیدان هەنە ژ هەموو حزبان، بۆ ب دەستڤەئینانا كورسیێن پەرلەمانێ عێراق.
ئەڤرۆ نیوز ، زنار تۆڤی :
یانا مانچستەر یونایتد پاشکەفتنا خوە کرە سەرکەفتن و نەهێلا یانا مانچستەر ستی یا رکابەر ببیته قارەمانا پرێمەر لیگێ.
د گەرا 33 یا پرێمەرلیگێ دا د یاریا دێربی یا مانچستەر ستی و مانچستەر یونایتد دا و ل سەر یاریگەها ئیتیحاد هەردو یانە روو ب روو ئێک بوون،ل خولەکا 25 ڤینسێنت کۆمپانی ب لێدانا سەری گۆلا ئێکێ بۆ مانچستەر ستی تۆمارکر،پاشی ل خولەکا 31 ئیلکای گوندۆگان گۆلا دوویێ ژی بۆ ستی تۆمارکر.
ل دەستپێکا گێمێ دوویێ دا پۆل پۆگبای دوو گۆل ل 97 چرکەیان دا بۆ مانچستەر یۆنایتد تۆمارکرن و ئەنجامێ یاریێ یەکسان کر، پاشی ل خولەکا 69 کریس سمالینگ گۆلا سییێ بۆ مان یۆنایتد تۆمارکر و یاری ب سێ گۆلان بەرامبەر دوو گۆلان د بەرژەوەندیا تیپا مۆرینیۆی دا ب دوماهی هات و قارەمانیا مانچستەر ستی ژی بۆ گەرێن داهاتی پاشخست.
ئەڤرۆ نیوز ، زنار تۆڤی :
یانا بایرن میونشن ل دەرڤەی یاریگەها خۆ دا سەرکەفتن ل سەر یانڵ ئۆگسبورگ تۆمار کر ناسناڤێ خولا ئەلمانیا ب دەستڤە ئینا.
ل ئیمپولس ئارینا هەردوو یانە روو ب روو ئێک بوون و بایرن میونشن ب ئەنجامێ چار گۆلا بەرامبەر گۆلەکێ سەرکەفتن ب دەستڤە ئینا.
ب ڤێ برنێ یانا بایرن میونشن خالێن خوە گەهاندنە 72 خالان و جۆداهیا خالان ل گەل شالکێ کو ل رێزا دویێ دهێت کرنە 20 خال و بەری ب دوماهی هاتنا وێ خولێ ب پێنج گەرن،ب ڤێ چەندێ یانا بایرن میونشن بۆ جارا شەشێ ل سەر ئێک بوو قارەمانا خولا ئەلمانیا،کو ئەڤە ژی هژمارەکا پیڤانەیی یە،ژ بلی هندێ ڤێ یانێ بۆ جارا 28 د مێژوویا خوە دا بوویە قارەمانا بۆندسلیگایێ،کو هەتاکو نوکە هیچ یانەکا دیتر ل ڤی وەلاتی ب تنێ 10 جاران ژی نەبوویە قارەمانا خولا ئەلمانیا.
ئه‌ڤرۆ نیوز ، گوهدار زێبارى :
موقه‌ده‌مێ مافپه‌روه‌ر ئازاد تاها به‌رپرسێ هوبا په‌یوه‌ندى و راگه‌هاندنێ ل رێڤه‌به‌ریا هاتنوچوونا پارێزگه‌ها دهوكێ بۆ ئه‌ڤرۆ نیوز گوت : ئه‌ڤرۆ شه‌مبیێ 7/4/2018 و ل ده‌مژمێر 3:30 ئێڤارى ل سه‌ر رێیا سه‌ره‌كى یا د ناڤبه‌را قه‌زا به‌رده‌ره‌ش و پرا حسێنیێ دا و ل نێزیك گوندێ دولیجانا مه‌زن روودانه‌كا هاتنوچوونێ روودایە د ناڤبه‌را ترومبێله‌كا تۆیۆتا كورولا یا تایبه‌ت و ماتورسكله‌كێ دا د ڤێ روودانێ دا ژ به‌ر سه‌ختیا برینێ كه‌سه‌كێ گیانێ خوە ژ ده‌ست دایە و 4 كه‌سێن بریندار بووینە.
ئەڤرۆ نیوز ، زنار تۆڤی :
وەسا بریارە ل 14 ڤێ هەیڤێ بانگەشەیا هەلبژارتنێن پەرلەمانێ عێراقێ دەست پێ بکەن، کوردان ل مووسل 150 کاندید هەنە، بەلێ لدووڤ گوتنا لایەنێن سیاسی ڤێ جارێ مەزنترین ئاستەنگ بانگەشەیا هەلبژارتنایه ل مووسله،هەروەسا ل وان دەڤەرێن ل ژێر کونترۆلا هێزێن عێراقی دایە.
هەروەسا ب گشتی ل پارێزگەها مووسل 907 کاندید دێ ل هەڤرکیێ ل سەر 31 کورسیان بۆ پەرلەمانێ عێراقێ کەن، بەلێ ئاسایی نەبوونا دۆخێ ئێمناهیێ ل ڤی باژێری دێ ئاستەنگان بۆ لایەنان دروست کەن ل دەمێ بانگەشەیا هەلبژارتنان دا.
ئه‌ڤرۆنيوز:
رۆژناما ئيندپێندتى يا بريتانى ئاشكرا دكه‌ت، توركيا مه‌شقێ ب چه‌كدارێن داعشێ دكه‌ت ودئێخيته دناڤ رێزێن له‌شكرى سوورى يێ ئازاد دا تاكو ل عه‌فرينێ دژى كوردان بكاربينيت.
رۆژناما ناڤبرى، وه‌كو سايتێ شه‌فه‌ق نيوز، ئه‌و ده‌نگوباس ژێ ڤه‌گوهاستى، به‌لاڤكريه” پتريا ئه‌و چه‌كدارێن دژى يه‌په‌گێ شه‌رى دكه‌ن، سه‌ر ب رێكخراوا داعش يا تيرۆرستى ڤه‌نه”.
رۆژناما بريتانى دياركر ژى” توركيا بزاڤكر هه‌موو ئاليه‌كى دسه‌ردا ببه‌ت ل ده‌مێ ده‌ستپێكا ئۆپه‌راسيۆنا خوه يا له‌شكرى راگه‌هاندى كو دژايه‌تيا داعشێ دكه‌ت، به‌لێ يا راست ئه‌وه توركيا مه‌شقێ ب چه‌كدارێن داعشێ دكه‌ت ووان دهنێريته عه‌فرينێ”.
هه‌روه‌سا ئاماژێ بۆ وێ چه‌ندێ دكه‌ت كو ئه‌و سه‌ركردێن مه‌شقێ ب چه‌كدارێن به‌رێ يێن داعشێ دكه‌ن، رێ ناده‌ن ئه‌و زه‌لامێن داعشى شێوازێ ترومبێلێن بۆمبه‌رێژكرى وهێرشێن خوه‌كوژى ئه‌نجام بده‌ن، چونكى ئه‌ڤ چه‌نده دێ هه‌ماهه‌نگيێ دناڤبه‌را داعشێ وتوركيا دا ئاشكرا كه‌ت”.
ل دووڤ وێ رۆژنامێ” هه‌موو ئه‌و چه‌كدارێن داعشێ ئه‌وێن برينه دناڤ له‌شكرێ سووريێ ئازاد دا كو هژمارا وان 10 هزار چه‌كدارن، ل گه‌ل توركيا دئۆپه‌راسيۆنێ دا دپشكدارن”.
ل 18/3/2018 پشتى 58 رۆژان ژ ده‌ستپێكرنا ئۆپه‌راسيۆنا له‌شكرێ توركى دژى عه‌فرينێ، له‌شكرێ توركى وهێزێن توندره‌و يێ نهه‌ڤپه‌يمانێن وێ شيان عه‌فينێ داگير بكه‌ن ونێزيكى 160 هزار خه‌لكى وى باژێرێ ئاواره بوون.
ئه‌ڤرۆنيوز:
ئه‌ڤرۆ شه‌مبيێ 7/4/2018 ل پيرمام، سه‌رۆك بارزانى ل گه‌ل شانده‌كێ بلند يێ پارتيا ديموكراتيا گه‌لان (هه‌ده‌په) كۆمبوو، كو پێكهاتبوو ژ په‌روين بۆلدان هه‌ڤسه‌رۆكا گشتيێ هه‌ده‌پێ وئوسمان ايده‌مير وفه‌له‌كناز ئۆجا وئيمام تاشجيه‌ر وزه‌ينه‌ب بۆغا، په‌رله‌مانتارێن هه‌ده‌پێ وموزه‌يه‌ن گونه‌ش وعابيد ئيك نوونه‌رێن وێ حزبێ ل هه‌رێما كوردستانێ.
دديداره‌كێ دا شاندێ بلند يێ هه‌ده‌پێ سه‌ره‌خوه‌شى ل سه‌رۆك بارزانى كر ب وه‌غه‌ركرنا دلۆڤان ئيدريس بارزانى وهه‌ڤخه‌ميا خوه بۆ سه‌رۆك بارزانى دياركر، زێده‌بارى ئاماژه‌دان ب كێشه وته‌حه‌ديێن به‌رده‌م گه‌لێ كوردستانێ ل توركيا وعيراقێ، هه‌روه‌سا گورانكارى وپێشهاتێن رۆژئاڤا وشه‌رێ عه‌فرينێ به‌رچاڤكرن، شاندێ هه‌ده‌پێ رۆناهى خسته سه‌ر روودانێن پشتى ريفراندۆمێ ودووپاتى ل وێ چه‌ندێ كر كو كێشێن به‌رده‌م گه‌لێ كوردستانێ ل ده‌ڤه‌رێ پێدڤى هه‌ماهه‌نگيێ وراوێژكرنێ يه دناڤبه‌را ئاليێن سياسى يێن كوردى.
دپشكه‌كا دى وێ كۆمبوونێ دا، شاندێ هه‌ده‌پێ به‌حسێ ده‌رئه‌نجامێن كۆنگرێ خوه كر وكورتيه‌ك ل دۆر ره‌وشا سياسى ل توركيا وبارودۆخێ وه‌لاتيێن كورد وكار وچالاكيێن هه‌ده‌پێ بۆ سه‌رۆك بارزانى شرۆڤه‌كر.
ل به‌رانبه‌ر دا، سه‌رۆك بارزانى، ب گه‌رمى ب خێر هاتنا شاندێ بلند يێ هه‌ده‌پێ كر وسوپاسيا هه‌لويستێ وێ حزبێ وكوردێن باكوور كر، هه‌روه‌سا رۆناهى خسته سه‌ر هوورده‌كاريێن روودانێن پشتى ريفراندۆمێ ودووپاتى ل وێ چه‌ندێ كر كو بژارده‌يا سه‌ره‌كى يا گه‌لێ كوردستانێ دهه‌موو قۆناغه‌كێ دا ئاشتى بوو وبه‌رده‌وام شه‌ر يێ ل سه‌ر هاتيه سه‌پاندن.
سه‌رۆك بارزانى داخوازكر” پێدڤيه ئه‌م هه‌موو ل سه‌ر رێيا چاره‌سه‌ريا واقعيانه وئاشتيانه بگه‌هينه ئه‌نجام ول گه‌ل وێ چه‌ندێ ژى دا زمانێ زۆردايێ وچه‌كى وخوه‌سه‌پاندنێ ئه‌نجام نابيت”.
ئه‌ڤرۆنيوز:
لژنا ئێمناهيێ وبه‌رگريێ ل جڤاتا نوونه‌رين عيراقێ ئاشكر دكه‌ت، چه‌ند ئاليه‌كێن سياسى ل عيراقێ پلانێن حوكمه‌تێ دژى تيرۆرێ تێك دده‌ن ورێ ناده‌ن ره‌وشا ته‌ناهيێ ل سێ باژێرێن عيراقى جهگير بيت، پێزانين ژى هێمايێ بۆ وێ چه‌ندێ دكه‌ن، نورى مالكى وهادى عامرى دخوازن ب رێيا تێكدانا ره‌وشا هنده‌ك ده‌ڤه‌ران، وێنێ عه‌بادى دهه‌لبژارتناندا ب شێوينن ودووپات ل وێ چه‌ندێ بكه‌ن، كو سه‌ركه‌فتن ل سه‌ر داعشێ يا ماى وهێشتا ب دووماهى نه‌هاتيه.
حامد موتله‌گ، ئه‌ندامێ لژنا ئێمناهيێ وبه‌رگريێ ل جڤاتا نوونه‌رێن عيراقێ دداخۆيانيه‌كێ دا بۆ سايتێ (بغداد اليوم) دبێژيت” چه‌ند ئاليه‌كێن سياسى ل عيراقێ كاردكه‌ن بۆ وێ چه‌ندێ پلانا حوكمه‌تێ يا ته‌ناهيێ ل ديالا وتكريت وكه‌ركووكێ سه‌رنه‌گريت”.
موتله‌گى، بێ ناڤێ وان ئاليان بينيت، گۆت ژى” ئه‌و ئاليێن سياسى كار دكه‌ن بۆ وێ چه‌ندێ رۆل هه‌بيت دره‌وشا ته‌ناهيێ دا، ئه‌ڤه ژى دێ بيته ئه‌گه‌ر كو رۆلێ ده‌زگه‌هێن فه‌رمى يێن ئێمناهيێ يێن حوكمه‌تێ لاواز بيت”.
نيشاندان