ئه‌ڤرۆنيوز:

به‌رپرسه‌كێ پێشمه‌رگه‌ى ئه‌ڤرۆ دوشه‌مبى 2/4/2018،  ئاشكراكر كو په‌كه‌كه‌ ل بن ناڤه‌كێ دى يا دشنگالێ دا ماى وخوياكر كو عيراقێ هێز نه‌ئيناينه‌ شنگالێ.

فه‌ريق(جه‌مال ئێمينكى) سوپاسالارێ پێشمه‌رگه‌ى، گۆت”ئه‌و چه‌ندا دهێته‌ به‌حسكرن كو په‌كه‌كێ يا خوه‌ ژشنگالێ ڤه‌كێشاى، چو راستى بۆ نينه‌، چونكى په‌كه‌كه‌ ل بن ناڤه‌كى دى ل وى سنورى يا ماى”.

فه‌ريق جه‌مالى گۆت ژى” عيراقێ چو هێز نه‌ئيناينه‌ شنگالێ”.

سوپاسالارێ پێشمه‌رگه‌ى زێده‌تر بۆ وشه‌ گۆت” هه‌ماهه‌نگى دناڤبه‌را عيراقێ وپه‌كه‌كێ دا يا هه‌ى ونێزيكى هزار چه‌كدارێن يه‌په‌شه‌، وه‌كو پشكه‌ك ژ ميليشيێن حه‌شدا شه‌عبى، مووچه‌ى ژ حوكمه‌تا عيراقێ وه‌ردگرن”.

هه‌روه‌سا گۆت” ئه‌و چه‌ندا ل دۆر شنگالێ دناڤبه‌را عيراقێ وتوركيا وپه‌كه‌كێ هه‌ى، ره‌نگه‌ ته‌كتيك بيت وپاشه‌رۆژا ده‌ڤه‌رێ ب تمامى يا ديار نينه‌، به‌لێ مه‌ترسى يا هه‌ى ل سه‌ر شنگالێ وخه‌لكێ وێ ژى هه‌ست ب ترسێ دكه‌ن”.

ئه‌ڤرۆنيوز:

سه‌رۆك وه‌زيرێن عيراقێ په‌يوه‌ندى ب نێچيرڤان بارزانى سه‌رۆك وه‌زيرێن هه‌رێما كوردستانێ كر وسه‌ره‌خوه‌شيێن خوه‌ ئاراسته‌ى وى كرن ب وه‌غه‌ركرنا برايێ وى دلوڤان ئيدريس بارزانى.

حوكمه‌تا هه‌رێما كوردستانێ به‌لاڤكر، ئه‌ڤرۆ سه‌رۆك وه‌زيرێن عيراقێ په‌يوه‌ندى ب سه‌رۆك وه‌زيرێن هه‌رێما كوردستانێ كر وهه‌ڤخه‌ميا خوه‌ ل گه‌ل نێچيرڤان بارزانى ومالباتا بارزانى دياركر.

دياركر ژى، عه‌بادى هيڤى خواست خودێى مه‌زن ره‌حمه‌تى ب به‌هه‌شتا خوه‌ شاد بكه‌ت وئه‌ڤه‌ دووماهى خه‌م بيت بۆ مالباتا بارزانى، ژئاليێ خوه‌ڤه‌ نێچيرڤان بارزانى سوپاسيا عه‌بادى كر بۆ وێ په‌يوه‌نديێ وپێشكێشكرنا سه‌ره‌خوه‌شيێ وهه‌ڤخه‌ميێ.

 ئه‌ڤرۆنيوز:

عه‌شيره‌تێن پارێزگه‌هێن نه‌ينه‌وا داخوازا ڤه‌گه‌راندنا هێزێن پێشمه‌رگه‌ى بۆ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ دكه‌ن، په‌يڤدارێ وان عه‌شيره‌تان ژى دبێژيت پێدڤيه‌ سه‌رۆك وه‌زيرێن عيراقێ ڤه‌گه‌راندنا پێشمه‌رگه‌ى قه‌بوول بكه‌ت وژۆره‌كا ئۆپه‌راسيۆنه‌كا هه‌ڤپشك بۆ وان ده‌ڤه‌ران بهێته‌ پێكئينان.

مزاحم حويت، په‌يڤدارێ عه‌شيره‌تێن عه‌ره‌ب ل پارێزگه‌ها نه‌ينه‌وا راگه‌هاند، بزاڤ بۆ ڤه‌گه‌راندنا هێزێن پێشمه‌رگه‌ى بۆ ده‌ڤه‌رێن كوردستانى يێن ده‌رڤه‌ى ئيدارا هه‌رێما كوردستانێ يا به‌رده‌وامه‌، داخوازێ ژ حه‌يده‌ر عه‌بادى دكه‌ين ڤه‌گه‌راندنا پێشمه‌رگه‌ى قه‌بوول بكه‌ت وژۆره‌كا هه‌ڤپشك دناڤبه‌را هه‌رێما كوردستانێ وحوكمه‌تا عيراقێ بۆ ب رێڤه‌برنا وان ده‌ڤه‌ران بهێته‌ پێكئينان ب مه‌ره‌ما به‌رهنگاريا مه‌ترسيێن داعشێ وشانێن نڤستى يێن وێ رێكخراوا تيرۆرستى.

حويت زێده‌تر بۆ وشه‌ گۆت” هێزێن ئێمناهيێ وله‌شكرێ عيراقێ شيانێن روو ب رووبوونا چه‌كدارێن داعشێ نينن، روودانێن باشوورێ مووسلێ وكه‌ركووكێ يێن ڤێ دووماهيێ دياركر كو هێزێن عيراقى نه‌شێن ئاراميا وان ده‌ڤه‌ران بپارێزن، له‌وما يا گرنگه‌ هێزێن پێشمه‌رگه‌ى ڤه‌گه‌رن بۆ وان ده‌ڤه‌ران”.

گۆت ژى” ده‌مێ ئه‌و ده‌ڤه‌ر دبن ده‌ستێ پێشمه‌رگه‌ى دا، پێزانينێن هوور هه‌بوون ل سه‌ر هه‌ر بزاڤه‌كا داعشێ ل وان ده‌ڤه‌ران، له‌وما به‌رى ئه‌نجامدانا هه‌ر كرياره‌كا تيرۆرستى، پێشمه‌رگه‌ ئه‌و بزاڤ ژناڤ دبر، ژبلى ڤێ چه‌ندێ، پێشمه‌رگه‌ى رۆله‌كێ كاريگه‌ر دئازادكرنا مووسلێ دا هه‌بوو”.

دياركر” پتريا ئه‌وێن پشته‌ڤانيا عه‌بادى دكر بۆ دژايه‌تيكرنا پێشمه‌رگه‌ى، سه‌ركردێن سونه‌يان بوون كو نوكه‌ وان پشتا عه‌بادى يا به‌رداى”.

پێشتر جه‌بار ياوه‌ر، ئه‌ميندارێ گشتيێ وه‌زاره‌تا پێشمه‌رگه‌ راگه‌هاندبوو” ل رۆژا چار شه‌مبيا بۆرى هه‌تا نوكه‌ دو گه‌رێن دانوستاندنێ دناڤبه‌را هه‌ولێرێ وبه‌غدا ب به‌رهه‌ڤبوونا سه‌ركردێن له‌شكرێ ئه‌مريكى وبريتانى ب رێڤه‌چووينه‌ ل سه‌ر چاوانيا ڤه‌گه‌راندنا هێزێن پێشمه‌رگه‌ى بۆ وان ده‌ڤه‌ران دچارچۆڤێ پرۆژێ ژۆرا ئۆپه‌راسيۆنا هه‌ڤپشك.

دهێته‌ زانين پێشتر ژۆرا ئۆپه‌راسيۆنا هه‌ڤپشك دناڤبه‌را هه‌ولێرێ وبه‌غدا ژ سالا 2011 هه‌تا سالا 2014 هه‌بوو بۆ پاراستنا ره‌وشا ته‌ناهيا وان ده‌ڤه‌ران، به‌لێ پشتى هاتنا داعشێ گورانكارى ب سه‌ر ره‌وشێ دا هات وژۆرا ئۆپه‌راسيۆنا هه‌ڤپشك بۆ به‌رهنگاريا داعشێ جهێ وێ گرت، پشتى روودانێن 16 ئوكتۆبه‌رێ، كارێ وێ ژۆرێ ب ئێكجارى ب دووماهى هات وچو په‌يوه‌ندى وهه‌ماهه‌نگيا هه‌والگيرى وله‌شكرى دناڤبه‌را هه‌ولێرێ وبه‌غدا نه‌ما.