ئەڤرۆ نیوز،بارزان مزووری:
لوئه‌ى فره‌نسیس ،راگەهاندنكار ژ نڤیسینگەها راگەهاندنا لقا 14 مووسل یا پارتی دیموكراتی كوردستان بۆ ئەڤرۆ نیوز دیار كر كو ل رۆژا 11/6 گەنجەكێ كوردێ شەبەك بناڤێ “حسێن حروش” ژ دایكبوویێ 1988 ژلایێ حەشدا شەعبی ڤە هاتبوو رەڤاندن، دوهى ئێڤارى 12/6 پەیوەندی ب مالا وان هاتكرن كو تەرمێ كورێ وان یێ هاڤێتیە سەر رێيا تلییارا و بایبوخت ،
ناڤبری دیار كر كو ئەو گەنج كارێ كرێكاریێ دكر وخەلكێ گوندێ تیس خرابە رۆژانە هاتنوچوون دكر بۆ مووسل ب مه‌ره‌ما پەیداكرنا كاری بۆ خوه.
ئه‌ڤرۆ نيوز، فاتما مزوورى:
دره‌نگيا شه‌ڤا بۆرى ل گوندێ عه‌لياوا يێ سه‌ر ب باژێرێ خانه‌قين ڤه، بۆمبه‌كا چه‌ندى ل سه‌ر رێيا سه‌ره‌كى ب ترۆمبێلا وه‌لاتيه‌كى ڤه په‌قى و د ئه‌نجام دا زه‌لامه‌كى و هه‌ڤژينا خوه گيانێ خوه ژ ده‌ست دان.
ئه‌ندامه‌كێ جڤاتا پارێزگه‌ها نه‌ينه‌وا ئاماژه ب وێ يه‌كێ كريه كو هێزێن ئه‌منى يێن خانه‌قين به‌رپرسيارن د پاراستنا وه‌لاتيان دا ل ناڤ باژێرێ خانه‌قين و ده‌وروبه‌ران و گۆت: “پێدڤيه ل سه‌ر فه‌رماندارێن ئه‌منى ڤه‌كۆلينه‌كا ب له‌ز د وێ بوويه‌رێ دا بكه‌ن.
گۆتژى: “هێزێن عيراقى ل پارێزگه‌ها ديالا و ده‌ڤه‌رێن ده‌وروبه‌ران گه‌له‌ك د خه‌مسارن و نه‌شێن گيانێ وه‌لاتيان ب پارێزن، هه‌ر ژ به‌ر وێ چه‌ندێ ژى تيرۆرستێن داعش ده‌ست ب چالاكيێن خوه ل ده‌ڤه‌رێن خوار و ناڤه‌راستا عيراقێ كرينه”.
به‌حس ل وێ چه‌ندێ ژى دهێته كرن كو رێكخستنا داعش ل نێزيك كارگه‌ها قێرى ل خانه‌قين هێرش كرينه سه‌ر هێزێن سه‌رايا سه‌لام.
ئه‌ڤرۆ نيوز، فاتما مزوورى:
نورەددین جانیکلی وەزیرێ بەرگریا تورکیا راگەھاند کو تورکیا تەڤی ئەمەریکا لدۆر منبج رێکەفتنە و لگۆری ژمارا رونشتڤانێن وی باژاری کو د سالا 2012 ھاتیە کرن برێڤەبرایەتیەک تێ پێک ئانین ژبۆ ڤێ مەبەستێ ژی ل ئەلمانیا دجڤن.
وەزیرێ بەرگریا تورکیا ئاماژە ب وێ یەکێ ژی کر کو ئەم کار ژبۆ وێ یەکێ دکەن داکو وەلاتیێن ئاوارە یێن منبج کو نەھا ل تورکیا دمینن ڤەگەرن باژارێ خوە و گۆت: ئەو رێککەفتنا د ناڤبەرا تورکیا و ئەمەریکا لدۆر منبج ھاتیە ئەنجام دان وەک خوە برێڤە دچە لێ ب سەدەما گوھەرتنا وەزیرێ بەرگریا ئەمەریکا کار ھاتنە راوەستاندن.
ھەڤدەم مەدیایێن تورکیا راگەھاندنە کو لگۆری نەخشە رێیەکی د ناڤبەرا واشنتن و ئەنقەرە لدۆر منبج دانوستاندن بەردەوامن و ڤێ ھەفتیێ شاندا ئەمەریکا و تورکیا ل ئەلمانیا دجڤن و لدۆر پلان و نەخشەرێیان ژبۆ پێشەرۆژا وی باژاری گفتگۆ دکەن.
ل گۆی وێ رێکەفتن و نەخشەرێیا کو د ناڤبەرا ئەمەریکا و تورکیا ل سەر منبج ھاتیە کرن ھێزێن یەپەگێ ل منیح ڤەدکشە و ھێزەک ھەڤبەش یا تورکیا و ئەمریکا ل وی باژاری تێ بجھـ کرن.
ئەڤرۆ نیوز ، زنار تۆڤی :
ب رەنگەکێ فەرمی هەرسێ وەلاتێن ئەمریکا و مەکسیک و کەنەدا مافێ مێهڤانداریکرنا جاما جیهانی یا سالا 2026 وەرگرت.
د کۆنفرانسێ فیدراسیۆنا تەپا پێ یا جیهانی ( فیفا) دا کو ل رووسیا برێڤەچوو ، دۆسیا هەرسێ وەلاتێن ئەمریکا و مەکسیک و کەنەدا زۆرترین دەنگێن ئەندامێن فیفایێ ب دەستڤەئینان ، پشتی سەرکەفتن ب سەر وەلاتێ مەغربێ دا ئینای بۆ مۆندیالا 2026.
د وێ دەنگدانێدا ئەمریکا و مەکسیک و کەنەدا 134 دەنگێن ئەندامێن فیفایێ ب دەستڤەئینان و مەغربێ ژی 65 دەنگ.
ئه‌ڤرۆ نيوز، فاتما مزوورى:
چار پارتيێن باكوورێ كوردستانێ پشته‌ڤانيا خوه بۆ به‌ربژارێ هه‌ده‌پێ يێ سه‌رۆكاتيا كۆمارا توركيا سه‌لاحه‌دين ده‌ميرتاش راگه‌هاند.
چار پارتيێن ئيتيفاقا كوردستانێ يێن وه‌كو پاك، پسك، پدك و بزاڤا ئازادى د ده‌رباره‌ى هه‌لبژارتنێن توركيا دا راگه‌هاند كو سه‌رۆك كۆمارێ توركيا ره‌جه‌ب ته‌يب ئه‌ردوگان ل سالێن دووماهيێ ل دژى كوردان سياسه‌ته‌كا دوژمانه ب كار ئينايه و دڤێت ئه‌ندام و لايه‌نگرێن وان ده‌نگێن خوه نه‌ده‌نێ.
ڤان چار پارتيان راگه‌هانديه ژى كو نابيت پشته‌ڤان و لايه‌نگرێن ڤان پارتيان ده‌نگێ خوه بده‌نه به‌ربژارێن تورك يێن سه‌رۆك كۆماريێ.
ل گۆر ڤان پارتيێن باكوورێ كوردستانێ دڤێت ئه‌ندام و لايه‌نگرێن وان ل گه‌ل شاشى و كيماسيێن وى ژى، ده‌نگێ خوه بده‌نه به‌ربژارێ هه‌ده‌پێ، سه‌لاحه‌دين ده‌ميرتاش، ژ به‌ر كو ئه‌و يێ گرتيه و غه‌در ل وى هاتيه كرن.
ئه‌ڤرۆ نيوز، فاتما مزوورى:
شيره‌تكارێ سه‌رۆك وه‌زيرێن هه‌رێما كوردستانێ راگه‌هاند كو د ده‌مه‌كى دا كێشا په‌رله‌مانى ل سه‌ر مووچێ په‌رله‌مانتاران بوويه، ئه‌و سه‌رسورمان ماينه كو وه‌سان دهێته نيشان دان كو حوكمه‌ت سه‌ده‌ما ئاريشان بيت.
دلشاد شه‌هباب، شيره‌تكارێ سه‌رۆك وه‌زيرێن هه‌رێما كوردستانێ گۆت: “هزرا پرۆژێ قانوونا چاكسازيێ هزرا هه‌ڤپشك يا په‌رله‌مان و حوكمه‌تا هه‌رێما كوردستانێ بوويه، ئه‌و هه‌ڤركيێن نها د ناڤبه‌را حوكمه‌ت و په‌رله‌مانى دا دهێنه نيشاندان، چو بنگه‌هه‌كێ وه‌سان نينه كو ببيته ئه‌گه‌رێ وان هه‌ڤركيان و سه‌ده‌مێ پاشكه‌فتنا سه‌رراستكرنا پرۆژێ قانوونا چاكسيازيێ، حوكمه‌ت نينه”.
دلشاد شه‌هاب گۆتژى: “حوكمه‌ت ب شێوه‌يه‌كى ل گه‌ل په‌رله‌مانتاران د پرۆژێ چاكسازيێ دا نينه، ئارمانجا حوكمه‌تا ژ پرۆژێ چاكسازيێ نه‌هێلانا گه‌نده‌ليێ يه”.
دا زانين ژى كو حوكمه‌ت پشكدارى روونشتنێن ده‌رباره‌ى پرۆژێ قانوونا چاكسازيێ دا بوويه و هه‌ماهه‌نگى پێنگاڤ هاتينه هاڤێتن، لێ نوكه گوهاڕتن د ماددێ پرۆژێ قانوونێ دا دروست بووينه.
دلشاد شه‌هاب ئاشكه‌را كر ژى كو پرسا ڤه‌گه‌ريانا قانوونێ د بن ده‌سته‌لاتا سه‌رۆكاتيا په‌رله‌مانى دا بوويه و هه‌ڤركى د ناڤبه‌را فراكسيۆنێن ناڤا په‌رله‌مانى دا هه‌يه و حوكمه‌ت نه‌چوويه ناڤ هه‌ڤركيێن ل سه‌ر وى پرۆژێ قانوونێ يێن د ناڤبه‌را فراكسيۆنان دا.
شيره‌تكارێ سه‌رۆك وه‌زيران نه‌ڤه‌شارت ژى كو نوكه نه ده‌ما هه‌ڤركيانه و خه‌لك يێ ل هيڤيا گوهۆڕينان و گۆت: “گازندا وه‌لاتيان ژى ژ پرۆژێ قانوونێ نه‌بوويه، ل سه‌ر مووچێ په‌رله‌مانتاران و خانه‌نشينيا وان بوويه”.
ئەڤرۆ، فاتما مزووری:
رێڤەبەرێ راگەھاند و پەیوەندیێن کۆمسیۆنێ راگەھاند کو کۆمسیۆن بۆ ھەلبژارتنێن پەرلەمانێ کوردستانێ دێ ژمارەکا کارمەندان دامەزرینیت.
شورەش حەسەن، رێڤەبەرێ راگەھاند و پەیوەندیێن کۆمسیۆنێ، د داخۆیانیەکێ دا بۆ رۆژناما ئەڤرۆ گۆت: ”میکانزم و بڕیارا دامەزراندنا کارمەندان بۆ ھەلبژارتنان د دەستەلاتا جڤاتا کۆمسیاران دایە و دو جۆرێن فەرمانبەران ژی دێ ھێنە دامەزراندن؛ جورەک بۆ ماوێ چار ھەیڤانە و ژمارا وان ژی یا کێمە”.
رێڤەبەرێ راگەھاند و پەیوەندیێن کۆمسیۆنێ گۆتژی: “جورێ دژی ئەو کارمەندن یێن ب تنێ بۆ رۆژا دەنگدانێ دێ ھێنە دامەزراندن، نوکە ل جڤاتا کۆمسیاران دانوستاندن ل سەر دھێتە کرن و پشتی پاقژکرنا تۆمارا دەنگدەران ئەو ژمارە ژی دێ ھێتە راگەھاندن و دێ ھێنە دامەزراندن”.
شورەش حەسەن دا زانین کو ئەڤ کەسێن دێ بۆ ماوێ رۆژەکێ ب تنێ ھێنە دامەزراندن، دێ ل دووڤ داخوازیا رێڤەبەریێن گشتی یێن پارێزگەھان بن کا دێ پێدڤی ب چەند کارمەندان بن.
ھەر چەندە نوکە بزاڤێن وێ چەندێ دھێنە کرن کو ھەلبژارتن ھەر چ بیت بۆ ھەیڤەکێ بھێنە پاشخستن، بەلێ بڕیار ھاتیە دان کو ل 30 ئیلۆنا 2018ێ ھەلبژارتنێن پەرلەمانێ کوردستانێ بھێنە ئەنجام دان.
ئه‌ڤرۆ نيوز، فاتما مزوورى:
له‌شكرێ نایجیریا راگه‌هاند كو 23 چه‌كدارێن بۆكۆ حه‌رام ل ده‌ڤه‌را ده‌ریاچه‌یا چاد كوشتينه.
د داخویانیه‌كێ دا ئاخفتنكه‌رێ ب ناڤێ له‌شكرێ نێجیریا، عه‌مید تیكاس چۆكۆا راگه‌هاندیه كو د دو رۆژێن ده‌رباس بووی دا هێزێن وانا ب هه‌ڤپشكيا له‌شكرێ كامیرۆن ئۆپه‌راسیۆنه‌ك ل دژی چه‌كدارێن بۆكۆ حه‌رام ل ده‌ڤه‌را ده‌ریاچه‌یا چاد ئه‌نجام دایه.
ل گۆری داخویانیا تیكاس چۆكۆ د ناڤا ئۆپه‌راسیۆنێ دا 23ێ چه‌كدارێن بۆكۆ حه‌رام كوشتينه، هه‌روه‌سا ده‌ست ب سه‌ر هنده‌ك چه‌ك و ته‌قه‌مه‌نیان دا گرتينه.
ئه‌ڤرۆ نيوز، فاتما مزوورى:
یه‌كیتیا ئه‌وروپا پشته‌ڤانیا خوه بۆ لۆتكه‌یا دیرۆكی دناڤبه‌را دۆنالد تره‌مپ و كیم جۆنگ ئۆن ده ده‌ربری.
فیدریكا مۆگرینی به‌رپرسا سیاسه‌تا ده‌رڤه یا یه‌كیتیا ئه‌وروپا د رونشتنه‌كه گشتی یا په‌رله‌مانا یه‌كیتیا ئه‌وروپا ل ستراسبۆرگێ ده پشته‌ڤانیا یه‌كیتیا ئه‌وروپا ژبۆ لۆتكه‌یا دیرۆكی دناڤبه‌را دۆنالد تره‌مپ سه‌رۆكێ ئه‌مریكا و كیم جۆنگ ئۆن سه‌رۆكێ كوریا باكور ده‌ربری و ب به‌لگه‌یه‌كی بناڤ كر كو ژبۆ ب ده‌ست خستنا ئاشتیێ دیپلۆماسیه‌ت ته‌نیا رێیه.
مۆگرینی روونی كر كو لۆتكه‌یا سه‌نگافۆره پشتراستكر كو چقاس رێره‌وا دیپلوماسی دژوار بوو، لێ هه‌رده‌م ب سووده و پێویسته به‌رده‌وام به.
ئه‌و تیبینیێن مۆكرینی ده‌ربارێ فشارێن یه‌كیتیا ئه‌وروپا بوو ژبۆ درێژكرنا رێكه‌فتنا ئه‌تۆمی دگه‌ل ئیران بوو پشتی ڤه‌كشاندنا ئه‌مریكا.
مۆگرینی ئاماژه ب وێ ژی كر كو پاراستنا وێ رێكه‌فتنێ د به‌رژه‌وه‌ندیا ئه‌مریكا و ئاسایشا هه‌ڤبه‌ش دناڤبه‌را ئه‌وروپا و ئه‌مریكا و هه‌مو ده‌ڤه‌را رۆژهه‌لاتا ناڤین ده‌یه
ئەڤرۆ نیوز، نەوزاد ھلۆری:
دیندار زێباری رێکخەرێ بەرسڤدانا راپورتێن نیڤدەولەتی ل حوکمەتا ھەرێما کوردستانێ د کونگرەیەکا رۆژنامەڤانی دا بەرسڤا چەند تومەتەکێن وەزارەتا دەرڤەیا ئەمریکا د راستیا ھەرێما کوردستانێ دا گوتبوون وچەند زانیاریەکێن نوو لسەر پێشمەرگەی و ئازادیا رادەربرینێ و کەمینەیێن نەتەوەیی و ئاینی و رزگارکرنا ئێزدی و مەسیحیان دئینیت زمان.
وەزارەتا دەرڤەیا ئەمریکا ل رێکەفتی 20 نیسانا 2018 د راپورتا خوە یا سالانەدا ل بارا رەوشا مافێ مرۆڤی ل جیھانێ بو سالا 2017 بەلاڤکربوو ، و د پشکەکا وێدا کو ھاتبویە تەرخانکرن ل بارا عیراقێ و د چەند پرسەکان دا ئاماژە ب ھژمارەکا تێبینی و دیتنان ل بارا ھەرێما کوردستانێ ژی کریە ژ وانان بنپێکرنا ئازادیا رادەربرینێ و کارێ رۆژنامەڤانی ، رەوشا چاکسازی ، ئەشکەنجەدان ، رووبروبوونا گەندەلیێ ،کێم ئاین و نەتەوەیان و چەند دوزەکێن دن یێن گرێدای مافێ مرۆڤی.
دیندار زێباری د کونگرەیا رۆژنامەڤانی دا دیارکر کو ب گورەی ئامارێن جڤاتا دادوەری یا ھەرێمێ د ماوەیێ سالێن 2014-2016 ب تومەتا داعشبوونێ، دوو ھزار و 704 کەس ھاتینە گرتن کو پشکەک ژ وان تومەتا داعشبوون لسەر ھاتیە ئاشکراکرن ئەو ژی ب بەلگە ھەموو ھاتینە سزادان، و دیسان 780 کەس ژی بێ تاوان دەرچوون و ھاتینە ئازادکرن.
ل بارا شانێن ھەرێما کوردستانێ د ئاکنجیکرنا ئاوارەیان دا ، زێباری ئاماژە ب وێ یەکێ کر کو دراپورتا وان دا بەحس ل ئاوارەیان و ئەوێ خزمەتا بو وان دھێتەکرن نەھاتیە کرن و گۆت ژی: (پێدڤی بوو کو وەزارەتا دەرڤەیا ئەمریکا ڤەحەواندن و ئاکنجی و خزمەتا ئاوارە و پەنابەران ل بەرچاڤ وەرگرتبایە ژبەرکو ب گورەی دوماھی ئامار ل سالا 2015- 2017 رێژا ھژمارا رونشتڤانێن ھەرێما کوردستانێ ب رێژا 30% بلندبویە و ھژمارا کەمپان ژی زێدەبویە و نھا 38 کەمپێن ئاوارە و 18 کەمپێن پەنابەران ھەنە).
ھەرێما کوردستانێ د رووبرووبونا گەندەلیێ بەردەوامە و پێنگاڤێن کریاری ھاڤێتێنە و بریارا گرتنا 118 کەسان دەرکریە ، کو ئەو ژی ب بریارا سەروکێ ھەرێمێ لروژا 10 شوبات 2016 بویە ،و مەرەم ئەو بویە کو بلەز چاکسازی د حوکمەتێ دا بھێتەکرن، لروژا 15 شوبات 2017 لژنەک ھاتیە پێکئێنان و راپوڕتا تایبەت ب پێنگاڤێن چاکسازیێ ھاتە بەلاڤکرن و دەستکاربوون ، زێباری ھوسا گوت.
دیندار زێباری د درێژاھیا ئاخفتنێن خودا دیارکر ژی کو ل ھەرێما کوردستانێ کومەکا قانونان دەرچوینە و کارپێ دھێتەکرن بو پاراستنا مافێن ئافرەتان و ب تایبەت قانونێن ھژمار 7 یا سالا 2001 و ھژمار 8 یا سالا 2001 و ھژمار 2 یا سالا 2009 ، ب گورەی ئەوان قانونان مافێن تایبەت داینە ئافرەتان بو پشکداریکرنا وان د حوکمەتێ دا و گۆت ژ: (نھا دەھان ئافرەت وەکو داخوازکارێن گشتی ھاتینە دامەزراندن ژ وانان 49 داخوازکارێن گشتی ، 30 دادوەرێن ئافرەت ل دادگەھێن تێھەلچۆنێ ، 94 ئافرەتێن ڤەکولەرێن دادوەری ، 389 ھارێکارێن دادوەری ل ھەرێما کوردستانێ ، و زێدەتر ژ 150 رێکخراوێن جڤاکێ سڤێل تایبەت ب ئافرەتان ھەنە ، ھەموو ب گورەی شیانێن خوە خزمەتێ بو ئافرەتان دکەن داکو ئەرک و مافێن وان بھێنە پاراستن).
ل بارا کامینەیێن ئاینی و نەتەوەی ل ھەرێمێ ژی ، دینداری گوت: (ھەرێما کوردستانێ تاکە جھە ل عیراقێ کو تێدا ھەموو کەمینە ھەست ب ئارامیێ بکەن و دلخوش بن ھەتا خوە ئێک کەس ژی نینە ل ھەرێمێ کو لسەر جوداھیا نەتەوەی و ئاینی رووبڕوویێ ئاریشەیان ببیت، ژبەرکو حوکمەتا ھەرێمێ پشتەڤانیا پێکڤە ژیانێ دکەت، بەلێ راپورتا وەزارەتا دەرڤە دڤی واریدا رەخنەیێن زۆر ئاراستەیێ ھەرێمێ کرینە ، بێی کو بەحس ل سیاسەت ، ستراتیجیەت و بزاڤێن ھەرێمێ بکەت ژ روویێ پراکتیکی ڤە ، ژبەرڤێ 21 قوتابخانە ب زمانێ تورکمانی و 56 قوتابخانە ب زمانێ سریانی ھاتینە چێکرن ل ھەرێما کوردستانێ).
رێکخەرێ بەرسڤدانا راپۆرتێن نیڤدەولەتی دیارکر ژی کو حوکمەتا ھەرێمێ ژ روویێ ماددی و مەعنەوی ڤە بزاڤێن پێدڤی بو رزگارکرنا وەلاتیێن ئێزدی کریە و گوت ژی: (ھەتا روژا 23/5/2018 ھژمارا رزگارکریێن ئێزدی سێ ھزار و 275 کەسبوون ، ژ وانان ھزار و 148 ئافرەت بوون ، دیسان ھژمارا دوزێن کریستیانێن کو ھاتێنە رەڤاندن ل روژا 3/4/2017 ھەتا روژا 18/7/2017 کو ھاتینە دیکێومێنتکرن 250 کەس بون ژ وانان 82 ئافرەت و 168 زەلام بوون ، ژ وێ ھژمارێ 174 ب شێوەیێن جودا ھاتینە رزگارکرن ، بەلێ ھەتا نھا 76 کەس نەھاتینە رزگارکرن کو ھژمارەک ژ وان ئافرەتن.
ل بارا گرتنا ھەرەمەکی وەکو د راپۆرتێ دا ھاتی کو جوداھی ناڤبەرا پێکھاتەیان دکەت و چەند دوزەکێن دن ، ژوانان دوزا نیاز عەزیز ، نڵڤبری گۆت: (ھەرکەسێ حوکمەت بگرت بێ فەرمانا دادوەری نینە ، و پشت وەرگرتنا رەزامەندیا دادگەھێ دھێنە گرتن ، و چو پەیوەند ب وێ یەکێ ڤە نینە کا کوردە یان عەرەب ، دیارە نیاز عەزیز ژی تاوانباربوویە کو ئەو ژی دوۆ تاوان بوون و پشتی تمامکرنا سزایێ وی لروژا 17/8/2017 ھاتیە ئازادکرن.
ل دۆماھیێ دیندار زێباری گوت: (دشەرێ رووبرووبونا ل گەل داعشێ دا ھزار و 814 پێشمەرگە ھاتینە شەھیدکرن و 10 ھزار و 725 پێسمەرگە ھاتینە برێندارکرن و 44 ژی ھاتینە ئێخسیرکرن ، و دییان پێسمەرگەی شیایە ل گەل ھێزێن عیراقی و رێکخراوێن نیڤدەولەتی 122 گۆرێن ب کوم ببینن کو بەری نھا ژلایێ داعش ڤە ئەو ھەموو خەڵک تێدا کوشتبون ، بەلێ ئەڤ یەک دراپورتا وان دا نەھاتیە بەحسکرن)
نيشاندان